Dior Me;14602806:تصدقي .. قريت مشكلتك وكنت بعلق من اول مانزلتيها
بعدين قلت خليني استنى شوية يمكن كتبت اللي كتبته وهي متضايقة
خليها لين ترد ثاني يوم على البنات بتكون نفسيتها احسن وبتتأثر بردود البنات ويبين شي من ردودها اقدر اطلع منه بشي ..
وهذا اللي صار ..
ردك على أسيل82 وأم علي بين لي انتي قد ايه عاقلة و فاهمة وتقدري تتحملي مسؤولية الزواج ..
ياقلبي مافي رجال كامل وعمرك ماتلاقي انسان تفصيل
لا انتي مفصلة على هواه ولا هو مفصل على هواكي ..
اذا هو رجال طيب و يخاف الله ثقي تمام الثقة انك بإذن الله بين يدين أمينه ..
والعيوب الثانية مقدور عليها .. الوقت يعالجها والعشرة كمان
وانتي بتكبري وهو بيكبر
ونظرتكم للحياة مابتستمر على شكل واحد ..
في هذي الفترة طبيعي تحسي بالفرق بينك وبينه بحكم اختلاف البيئة
وحتى لو انخطبتي لغيره مرة واثنين وعشرة ..
نفس الإحساس بتحسيه .. وهو الاختلاف ..
وهذا أمره أسهل مما تتخيلي ..
بكرة يصير لكم بيئتكم الخاصة .. تعيشوا مع بعض تحت سقف واحد ..
يصير بينكم في البداية شوية صدام بسبب الاختلافات ..
بس كمان بتكتشفوا في بعضكم ايجابيات ماكنتوا تعرفوها ..
وتصيروا زي قطع البازل تكملوا بعض ..
يفهمك وتفهميه .. والوقت بيغيرك وبيغيره لصالحكم انتو الاثنين ..
جموده اللي تشوفيه هذا .. بكرة مع العشرة بيتغير تماااااما ..
لاتنسي انه طول عمره عايش بين اهله وماتعود على وجود المرأة في حياته غير محارمه ..
وتعامل الرجال مع محارمه يختلف كليا عن تعامله مع زوجته ..
وهذا اللي لسه ما لحق يتأقلم معاه ..
لسه مو مستوعب ان هذي البنت اللي دخلت حياته اسمها زوجة ولها معاملة خاصة
خصوصا انكم لسه جداد على بعض 3 شهور و زيدي عليها انك ماشفتيه الا اسبوعين ..
اسبوعين مستحيل تكون كافية لانك تعرفيه وتحكمي عليه
حتى هو نفسه مو عارف كيف يتعامل معاكي بصفته زوج ..
لسه مالحقتوا تولفوا على بعض و تتكون بينكم مشاعر جديدة ..
يميل لك وتميلي له .. الحمدلله خير وبركة .. هذا مؤشر لشي حلو جاي في الطريق ..
فيه بذرة حب لسه ماصارت مواقف ترويها .. ولا ايام عشرة تخليها تزهر و تبين ألوانها ..
اعطيه فرصة كافية واعطي نفسك انتي كمان فرصة .. 3 شهور مو كفاية
تفكيرك خلال الفترة اللي راحت كان متمركز حول اشياء معينة مسببة لك ازعاج
ومنتي قادرة تغيري تفكيرك فيها لأنه مافي فرصة بينكم تشوفوا بعض
لو كنتوا تشوفوا بعض ماكنتي فكرتي كذا ابدا ..
كل اللي بينكم مكالمات كم دقيقة..
وانتي من قبلها مشحونة نفسياً ومتأهبة لاقتناص أي فرصة تثبت لك اللي قاعدة تفكري فيه ..
تدوري على جموده .. تحاولي تكلميه في الموضوع .. تصدمك ردات فعله ..
تقفلي معاه وانتي منكدة لانك ماقدرتي تلاقي شي عكس اللي فكرتي فيه ..
لا ياقلبي مو كذا ... المكالمات مجرد صوت .. مافيها اتصال بصري ..
الاتصال البصري يخليكي تشوفي لمعة عيونه لمن تصدر منك كلمة حلوة ..
تشوفي ملامح وجهه المليانة ارتياح بوجودك لمن تدخلي عليه ..
انتي زعلانة منه دحين عشانك قاعدة تعطي من الكلام الحلو والاشتياق من غير ماتشوفي مقابل ...
المقابل ياقمر مو دحين .. المقابل حتشوفيه بعدين .. يوم ماتكوني في بيته
لو تنجرح يدك وانتي تسوي سلطة غير ينقز زي المجنون يمسك يدك ويلم جرحك ويسمي عليكي ويخاصمك يقولك انتي ماتنتبهي ؟؟؟؟
لو يشوفك تبكي ينهز كيانه كله عشان دمعتك ..
اصبري يابنتي اصبري ... بإذن الله مستنيتك أيام حلوة ماكنتي تحلمي فيها معاه ..
هذا الرجال اللي مجننك غموضه و جموده ..
مجرد ماتعيشي معاه بتعرفي ان داخله طفل يفرح من أقل كلمة ..
ولو يسمع منك كلمة حلوة الدنيا ماتشيله من الفرح حتى لو مابين لك ولا عبر بالكلام ..
حتشوفي التعبير بالفعل .. وصدقيني .. الزوج اللي يحب بالأفعال هو اللي تأمني على نفسك معاه ..
اما راعي الكلام ... سيبيكي منه ..
يطلع عيونك وياكل بعقلك حلاوة بالكلام الحلو ولاتعرفي تاخذي منه لاحق ولا باطل ..
بكرة تطلع عندك حاسة مو سادسة الا عاشرة .. تخليكي تشوفي اللي جوة قلبه وتفهميه من نظرة عينه ..
دحين عشان ماتحرقي في دمك كثير بلاش تتصلي فيه انتي ..
بس عشان تكوني دايما حاضرة .. راسليه ايميلات و اكتبيها مخصوص له
ايش سويتي في يومك وفين رحتي وقابلتي مين ..
ودخلي شوية كلام حلوغير مباشر بين السطور
زي مثلا اليوم رحت مطعم يجنن اتمنيتك معايا .. لازم نروحه مع بعض ان شاء الله .. احس المكان بوجودك أحلى ..
راسليه كل يوم وفجأة اقطعي يومين ثلاثة ..
بتلاقيه يكلمك والا يرسلك يقولك عسى ماشر ؟؟ فين الاكسجين ؟؟ قطعتيه عني ليه ؟؟
بعد الزواج اسأليه .. حيقولك انه كان يعيد قراية رسايلك القديمة كلها وقت اللي تقطعي فيه ..:038:
لاتعاتبيه على قلة الاتصالات ..خليه متى مافضي هو اللي يتصل ..
خليه يفقدك شوية ..
عودتيه على الاتصال والسؤال .. جربي تغيري شوية وتشوفي ردة فعله ..
حتى لو كانت اتصالاته قليلة .. هذا النوع أنا أعرفه تمام ..
مايتصل عشان يأدي واجب .. يتصل اذا وحشتيه .. اذا حس انه محتاج يسمع صوتك ..
اوحشيه شوية ياشيخة .. لاتخلي المسألة واجب ولازم يتأدى ..
اعذريني على الاطالة
بس حبيت اقولك كلام من قلبي عشان شفت كثييير زي حالتك
وشفت كيف تغير حالهم مع الوقت وصاروا زي العسل ..
وفي النهاية أكيد الامر يرجع لك والنصيب مقدر ومكتوب ..استخيري ربك وبإذن الله ماتشوفي الا الخير ..
ربي يوفقك ويسعدك وتجي تبشرينا بالبشاير الحلوة :032:
:thumbs_up::thumbs_up::thumbs_up:تلاث شهورر لتعرف موكفاااايه