حبايب قلبى صديقاتى
انا سيده عندى 35 سنه متزوجه وعندى ثلاث أطفال ربنا يخليهم يارب
تزوجت فور تخرجى من الجامعه من (أخو صديقتى) كان فيه كل المواصفات
التى تتمناها كل بنت من تعليم ومركز وسن مناسب ولا أكذب عليكم كان فيه
كل المواصفات التى فى بالى وكنت أتمناها ولكن كان فيه حاجه واحده فقط
الى مخوفانى انه كان شديد على صديقتى جدا وكانت بتخاف منه جدا يمكن يكون أكثر من والدها
وده كان قالقنى بس لما كنت أفكر كنت اقول ده كدا كويس بيخاف عليها ماهى دى الأصول
ولكن خوف صديقتى اتنقلى غصبن عنى لدرجه انى لاأستطيع ان اجادله فى شيئ أحسن
يحرجنى أو يتطاول عليا وده للأسف يظهر قلل منى فى نظره وكان الزواج تقليدى جدا جدا
زوج وزوجه وأهى عيشه وخلاص لكن يااخواتى فوجئت فى أول الزواج انه انسان قاسى الطبع
كان الخصام من طبعه عنده استعداد يخاصم اى انسان مهما طالت المده ممكن توصل لسنين
عرفه هتقلولى ده ممكن مع اى حد بره مش مع مراته بس اناهقولكم كان معايا أنا كمان كدا.
فى أول شهر زواج
حدث موقف بسيط لايستدعى ان عريس يخاصم عروسته فى أول شهر أو ما يسمونه شهر العسل وظل مخاصمنى
حتى قمت انا بالتودد له وعرفت منه ان الطبع ده عودوه عليه اهله من هو صغير عندما كان يخاصم احد اخوته كان والداه لايتم الصلح بينهم ولكن يتركوهم علشان يكبروا دمغهم لغايه ما يتصلحوا لوحدهم وده هو السبب فى قسوه القلب والخصام
واستمرت الأيام ولاأنكر انه مع العشره والأولاد بدأ يهدئ من طبعه ولا اريد ان اكون من الذين ينسون افضال أزواجهم عليهم فسوف اقول أيضا هو يعتبر زوج صالح يحضر لى كل مااريد لايبخل عليا ولا على اولاده بشئ اهتمامه الأول والأخير بالبيت والأولاد وغير ذالك كثير من الصفات الحسنه التى ممكن ان توجد فى زوج
ولكن يا أخواتى مازال طبع الخصام لسه فيه ممكن على أتفه الأسباب يبقى موضوع كبير وغير قابل للنقاش وخصام حتى اقوم أنا بمبادره الصلح
ولكن من فتره أصبح على اتفه الأسباب يكون فيه اهانه لى بالكلام الجارح وخاصه ان أولادى كبروا ومينفعش يشوفوا مامتهم وهى وقفه امام باباهم كالتلميذ الخايب. يمكن عشان انا مبردش عليه ودا مش أدب منى لا انا مبردش علشان بحترم نفسى ومدهوش فرصه يتطاول عليا أكثر من كده وانهى الموقف
ولكن هو افتكر ان دا ضعف منى ودلوقتى هو مخاصمنى ومبيكلمنيش علشان خلاف ميستهلش .بس هذه المره سمعنى كلام يوجع قوى مش قادره أنساه زى (انت ملكيش لزمه عندى انتى ولا حاجه انا بكره اليوم الى شفتك فيه.... وكتير من هذا القبيل ).مخلينى مش قابله على نفسى ان حتى اشوفه، مش اصالحه لأن موقف لايستدعى ان يقول ما قاله لى امام اولادى وغير كده انا هفضل لأمتى انا الى اصالح والغلط فيا المرادى كان اكبر علشان المره السابقه هو غلط فيا برضه وانا قلت عدى معلش اصله كويس علشان الأولاد والزعل فى البيت بس لأمتى هتنازل
كل الحكايه ان عندى سلفتى اصغر منى كنت بحبها قوى وكنت بتكلم معاها كتير فى كل شيئ ووبعتبرها زى اختى واكتر لكن فوجأت انها تقول كل شيئ لزوجها وهو بدوره يروح يقول لخواته حجات والله مبتحصلش منى ولا بقولها وده علشان كل اهله مش بيحبوها وبيفضلونى عنها وبيقولوا انها عايزه اخوهم فيهم انا للأسف عرفت ده متاخر بعد مكانت هتوقعنى فى اخوات جوزى كلهم و علشان هما عرفينى جدا جدا مصدقوش الكلام
وللأسف ان زوجى الوحيد هو الذى يكلمها ويتعامل معها بكل ود ولما اقوله انها غلطت فيا يقولى انا بعملها علشان اخويا
والخناقه الأخيره دى علشان هى اساءت ليا من قريب وهو عرف وبرضهكانت تتكلم معاه فى التلفون وهو كلمها بكل ذوق وموده وحب وكان مفيش اى حاجه خالص ولما قلتله انت بتكافأها على الى عملته معايا طلع فيا كده وقلى الى قالهولى
ردو عليا بالله عليكم لو مش هو الى هياخد حقى من الى اساءتلى من هيخده .الى مذعلنى ان اخواته وقفين معايه ومذعلوش منى علشان عرفين انها كاذبه
ادعولى ان ربنا يهديه
وللعلم هو ليس له شخص يمكن ان احكى له او اتحدث اليه من اهله لأنهم بيخافوا منه وبيعملوا لزعله الف حساب وذالك يرجع لشخصيته القويه وممكن اقول لوالده ولكن انا اعلم ممكن ان يكون رد فعله اعنف مما اتخيل لن يقبل بان يوضع فى هذا الموقف وذلك لأحساسه انه هو على حق (بمعنا أصح ودارج عندنا فى مصر ملوش كبير )
ماذا أفعل ارجو الرد على رسالتى للاهميه
