لو مخطوبه خشي وادعيلي هههههههههه

سلام عليكم
يارب كل اللى يفتح موضوعى (وهو أول موضوع لى ) يتجوز بسرعه
واللى مش مخطوبه تتخطب
وربنا يبعد عننا وعن خطابنا العين والحسد والمشاكل ويجمع بينا على خير
ويملا قلوبنا وبيوتنا ألفه ومحبه وذرية صالحة

قولوا اميييييييييييييييين

مش هطول عليكوا يا بنات ندخل فى موضوعنا
أكيد كل واحده فينا بيبقى نفسها انها تتجوز وربنا يتتم الخطوبه على خير وساعات بتبقى خايفه ليحصل حاجه لاقدر الله والجوازه متمش
فعاوزه أقولكوا حاجه مهمه جدا ايه هى ؟؟ حاسبى على كلامك مع خطيبك يعنى ايه ؟؟
يعنى مهما كنتى بتحبى خطيبك ومهما كنتى مشتقاله ومهما ومهما .. اياكى تصارحيه بده.. (( ليه فيها ايه يعنى ؟ ده خطيبى أمال احنا مخطوبين ليه؟ ))
مانا عارفه يا ستى انه خطيبك بس مينفعش يسمع منك الكلام الحلو ده لأنه قبل العقد مازال أجنبى عنك (مش شعره أصفر[ لا يعنى مازال غريب وميحلش ليكى ولا ليه أى شئ من هذا القبيل ..

(( طيب ماهوه كمان بيقولى وحشتينى وبحبك أسكت يعنى ده كان سابنى وشاف غيرى وقال على مش رومانسيه ولا بحبه))

تبقى عبيطه لو قولتى كده انتى كده بتحافظى على نفسك وعلى صورتك قدامه وصدقينى الكلام ده فى الحلال هيبقى أحلى لأنه حلال ومتخافيش منه

وياما بنات فضلت تحب فى خطيبها وفى الاخر كان نصيبها مع حد تانى يعنى سمعت كلامها الحلو ده لحد غير زوجها والواحد ميعرفش نصيبه مع مين

ولازم ناخد بالنا يا جماعه ومنتبعش هوانا (ما يلفظ من قول الا لديه رقيب عتيد)

((طيب خلصينا يا حاجه وهاتى من الاخر))

بصى ياستى لو انتى كنتى متعوده تكلمى خطيبك بالطريقه دى ومعوداه يمسك ايدك ويسلم عليكى

من الان انوى نيه جديده مع ربنا انك هتطيعيه ومش هتعصيه تانى وتبدأى صفحه جديده بنية ان ربنا يتمم لك على خير

وعلى فكره بكره وبعده هيزهق من الكلام وهيبقى عاوز اللى بعده يعنى متستغربيش لما تدخلى المحتاره وتلاقى البلاوى اللى بنقراها
ان واحده خطيبها بيطلب منها طلبات غريبه أو ان واحده غلطت مع خطيبها
لأنها هى اللى جرأته على كده والكلام ده بيبقىمدخل من مداخل الشيطان
ومتستعجليش يا ستى على الكلام الحلو يعنى انتى صبرتى كام وعشرين سنه مش قادره تصبرى شهور بس لما يبقى زوجك حلالك

((انتى ليه بس مكبره الموضوع ما ياما بنات قعدو يحبوا فى خطيبهم بالسنين ونتهت قصة حبهم السعيده بالزواج يعنى هوه الكلام ده هيمنع الجواز))

لا يا حبيبتى مش هيمنعه ولا حاجه بس تلاقى اللى اتقوا ربنا فى فترة الخطوبه ربنا بارك لهم

أما الناس التانيه ممكن الحب ده بعد الزواج ميدمش أو يحصل مشاكل من أقل سبب وتبقى الناس مستغربه ويقولوا دول كانوا بيموتوا فى بعض ايه بس اللى جرالهم

بس مش معنى كده ياقمر ان بقولك متحبيش خطيبك خالص أو ان الحب حرام
لا الحب ده ميل قلبى وفطره ربنا خلقها فينا وهى ميل الرجل للمرأه وميل المرأه للرجل بس التصريح بالحب والكلام الغرامى هوه ده اللى مينفعش فى فترة الخطوبه لأنها فترة تعارف فقط

((طب افرض انا معوداه كده من أول الخطوبه لو بطلت الكلام ده مره واحده ممكن يفتكر ان فى حاجه أو انى زعلانه منه أو انى مبقتش أحبه زى الاول))

لا عادى يا حبيبتى قوليله انك عرفتى ان الكلام ده حرام وانك نفسك تبنى بيتك على أسس سليمه من البدايه وانك مش عاوزه تغضبى ربنا فى أى شئ علشان يباركلك فى زواجك

((هيقولك ايه الهبل ده احنا مبنعملش حاجه غلط وانا خطيبك وانتى أى حاجه تسمعيها كده تصدقيها على طول ))
برضه خليكى على موقفك وادعى ربنا كتير انه يهديكوا على بعض وتكونوا عون لبعض على طاعة ربنا

وعلى فكره لو خطيبك ملتزمده جدا فيكى وهيحس ان خطيبته هتاحفظ على بيته واسمه

وخديها منى نصيحه لما تراعى ربنا وترضيه وتمنعى نفسك من حاجه بتحبيها ربنا كمان هيرضيكى ويفرح قلبك

وكمان فى حجات تحسس خطيبك بحبك ليه غير الكلام الرومانسى
سؤالك عليه واهتمامك بيه وبشغله ولما يكون تعبان (بعد الشر) يحس انك زعلانه عليه

وأحسن حاجه ان المكالمه متطولش بينكوا وانه ميحصلش خلوه تامه بينكوا

بس كده انا كده خلصت كلامى

بس لى طلب عندكوا كل واحده تدخل موضوعى حتى لو مش عاجبها الكلام تسيبلى رد أو تتناقش معاى لو مش مقتنعه
ولو واحده بتعمل كده مع خطيبها يعنى الكلام معاه بحدود تقول برضه علشان نعين بعض يا بنات

ومفيش حد يطلع من الموضوع الا لما يسيب بصمته بدعوه أو رد

اللهم بلغت اللهم فاشهد

على فكره يا بنات انا مخطوبه من سنه وبحب خطيبى ربنا يخليهولى ويجمع بينا على خير منقووووووووووووووول