انا بجد زعلانة منكم جداً لأن محدش سأل عليا خالص
وزعلانة من لاف يو لأني حطيتلها صور المفارش ولا علقت بأي تعليق
يا وحشييييييييييين :'(
amonmon66;14966415:
هاي ياجماعة انا عضوة جديدة هنا كلاسيك ممكن صور اوضح للعفش بتاعك بجد ماشاء الله المفارش حلوة اوي وانا ان شاء الله عاوزه افرش مودرن ومحتاجة افكار
ربنا يخليكي يا حبيبتي تسلمي
ان شاء الله هانزل الصور في اقرب وقت وقولي انتى عايزة افكار في ايه
بالظبط وانا اقولك يا حبيبتي
بيريتان;14966439:
بنات بلييييز ممكن تردوا على دى صور لستائر الفيرتى بل انا عندى فى حجرة الاطفال قمت بتقفيل البلكونة وعملتها الومنتال وفتحتها على الاوضة لتعطى وسع ينفع احط الستائر دى فيها
وعندى برضه حجرة الانتريه ليس بها شباك ممكن اضعها كمنظر فيها ولا ايه ينفع ولا ايه؟؟؟؟
وهى بتشترى جاهزة ولا بتتعمل وبتتعلق عادى ولا ايه وسعرها كااااام ؟؟؟؟؟
الى تعرف حااااجة تقولى وربنا يسعدها وشكرررررا :confused:
هي كفكرة هتبقى حلوة اوى لغرفة الاطفال خاصة بس معرفش بتتباع فين
بس ممكن تسألي في العتبة
hoba bodyyy;14967941:
كلاسيك عفشك عسول ماشاء الله ورينا يلا بقيه الشقه
ربنا يكرمك يا حبيبتي عقبالك يااااااارب
ان شاء الله في اقرب وقت ان شاء الله هنزل الصور
Nouna2002;14971613:
كلاسيك حاجتك ماشاء الله حلوة قوى وشيك ممكن اعرف اسعار النجف؟
ومنين ياحبيبتى
معلش محتاجة العنوان ضرورى
يابنات هو المفروض الشقة بتاخد اخر وش بياض امتى
وبيتركب النجف قبل البياض الوش الاخرانى ولا العكس
ربنا يخليكي يا حبيبتي يارب
النجف من درب البرابرة وكان كله تقريباً ب 1400
بس النجف دلوقتي اسعاره نزلت عن وقت ما كنت بشتري
والنجف بيكون في الآخر خالص
hooba;14973640:
بنات الله يخليكم عندي استفسار
انا ان شاء الله لون دهان اوضة النوم هيكون روز فاتح
عايزاكم تقترحوا عليا لون تاني ادخله معاه غير النبيتي لان كل ما اسأل حد يقولي نبيتي
الله يخليكم جاوبوني
انا شايفه ان اوضة النوم بتكون محتاجة الوان هادية وناعمة
علشان تكون مريحة للعين
aseel 22;14997524:
ازيكوا يا بنات بصوا بقي انا عاوزه حد بيفصل ستاير ويكون شغله نظيف
كمان عهاوزه اعرف متوسط سعر التفصيل كام
وياريت بقي لو تدلوني علي حد يكون بيبيع قماش ستاير وبيفصل في نفس الوقت عشان الوقت بالنسبالي
ولو حد كمان عنده فكره رنجات اسعار قماش الستاير في الازهر في حدود كام
اه كمان مين نزلت قريب درب البرابره تقولي اخبار سعر النجف هناك ايه
معلش اسالتي كتير بس انتوا اخواتي
انا اشترت قماش ستارة الصالة والسفرة بتاعتي من احمد انور ( راتكس )
في الأزهر عند الكوبري اللي هناك وهو مشهور اوي
والباقي من برنت شوب اللى في شارع محيي الدين
banana z3lana;15008144:
ركزوا معايا بقي يا بنات
انا السفره بتاعتي 220 * 110 ماشي ماشي
طيب لما احط السجاده تبقي علي اد السفره بس ؟؟؟
و لا ازيد حته لحد ما يبقي عليها الكراسي ؟؟؟
و لا تغطي كل المساحه اللي محطوط فيها السفره بمعني
توصل لحد النيش و البوفيه؟ش
طيب لو تبقي اد الترابيزه انا عندي لسه مساحه كبيره
احط مشايه و لا اسيبها قرعه و لا ايه؟
طيب لو اغطي المساحه مش كده هتبقي كبيره قوي و مش هعرف اشيلها و لا انفضها و لا حاجه ؟؟؟
ردوا عليا ضروري ضروري
سؤال كمان
هيا الالياف الصناعيه (بروبروبليين) اللي بيتعمل منها السجاد دي كوبسه و بتتحمل و لا لازم سجاده صوف ؟
اصل بابا بيقول البوليبروبلين دي بيعمل شحنات كهربيه و نعد نكهرب بعض كده
و مصر نجيب صوف
طيب يا عم الحاج الصوف غالي و انا بقول حرام اجيب سجاده صوف تحت السفره
سؤال كمان
سفرتي جنب الانتريه في نفس الصاله يعني
اجيب السجاتين اخوات بعض بالمللي لا شبه بعض
و لا براحتي
يلا عاوزة اجابات واضحه و صريحه و محدده
بصى انا معرفش حكاية الصوف دي بصراحة
بالنسبة للسجادة نفسها انا قست عندي المساحة وسبت جزء من هنا
وجزء من هنا بحيث انها تكون في النص يعني لا تكون قرعه ولا تكون
كلها متغطية
ولو السفرة والانتريه لونهم قريب او واحد هاتي سجادتين شبه بعض
لو مختلفين ممكن تختاريهم قريب من بعض في الشكل
لكن كل واحد حسب اللون اللى عندك
عسولة عمرو;15016676:
بنات دلوقتى انا ان شاء الله هعمل الانتريه ده ايه رايكوا فيه الاول حلو ولا ادور تانى؟؟؟
تانى حاجه مش هعمله اسود كده لا عايزه اعمل اللون ده اللى هو الموف
هعمل الكرسين بس هما المشجرين
يعنى زى الصوره بالظبط بس مع اختلاف االوان
الكنبتين بقى اخليهم كلهم موف ساده كده والمخدات هتبقى مشجره
ولا دخل لونين فى بعض؟؟؟؟؟؟؟
هو ضخم شوية بس كويس مش وحش
اعملى الكنبتين ساده والخداديات مشجرة وكرسين مشجرين
بس كلهم مشجرين مش تدخلى فيهم لون واعملى خدادياتهم بقى ساده
Love You 7abibi;15017300:
ازيكوا يا بنااااااااااااااات
عسولة الانترية جميل اوووووي ماشاءالله
بناااااااااات انا الحمدللة نزلت امبارح درب البرابرة جبت النجف
بس معلش مش لحقت أصورة
هصورة ان شاءالله في الشقة و تقولولي رأيكوا
جبت كلة مودرن
للريسبشن اتنين كريستال سيلفر زي بعض
الاتنين ب 1200
وجبت للنوم نجفة عسولة خشب بسيط في سيلفر
ب 150
وجبت لليفنج واحدة مودرن تحفففففة ب 260 اللي هي تلاتة مع بعض
وجبت للمطبخ واحدة بردو اللي هيا تلاتة مع بعض ب 170
الوان كل واحدة لون من الوان المطبخ
وجبت الحمام طبق كبير كدة ب 50 جنية
وانا عندي طرقتين جبت اتنين عسولين بردو
واحدة ب 50 جنية وواحدة ب 70 جنية
انا والله نسيت اصورهم خالص كان نفسي أخد رأيكوا فيهم اوووووووووووي
بس قولولي اية رأيكوا في الاسعار؟؟؟
ماشاء الله يا حبيبتي مبارك عليكي يارب عقبال باقى الشقة ان شاء الله
انا شايفه ان الاسعار حلوة جداً ماشاء الله ومنتظرين الصور بقى :)
te amo;15020448:
ينات صحيح لو انا هعمل فكرة عسولة الكراسى مختلفة عن الكنب ينفع اعمل القماش المنقوش اللى هجيبه للكراسى نفس قماش الستاير لان انا مش هعمل الوان فى الشقة هتبقى سادة فعاوزة انطق الشقة بستاير منقوشة زى البرنت شوب بدل ماتبقى شيفونات وكله سادة ولا لاعمل الانتريه سادة كله واعمل الخدديات من نفس قماش الستاير؟
انا شايفه انها فكرة حلوة جداً ماشاء الله وهتنطق الشقة بدل الشيفونات
اللى انا شايفه انها تقليدية جداااااا وانا عاملة عندي كده في الشقه
miobello;15021890:
سلامو عليكم
انا عروسه قديمه بس بجهز شقتى تانى فكنت عايزه بقى خبراتكم يا حلوين فى كل حاجه واحسن اتعاقد مع شركه تشطب الشقه ولا اجيب كل حد لوحده ولو حد عارف اسعار شركات مهندسين ديكور حرفين اى حاجه وماركات ولحوظات كله كله ياريت يقول ويفيدنى ويفيد الجميع
اهلاً يا قمر منورانا :)
هو المتداول اكتر الصنايعيه العاديين ودول اللى انا اتعاملت معاهم في شقتي
فمقدرش افيدك في موضوع مهندسين الديكور للأسف
aseel 22;15023120:
بنات هو مين سجاده ارخص النساجون ولا كاربت سيتي انا عارفه النساجون وعارفه سجاده لا يعلي عليه بس خطيبي طاقه في دماغه يروح كاربت سيتي شوروا عليا بتجاربكوا يابنات
انا مرحتش كاربت سيتي بس النساجون تشكيلاته كبيرة اوي ماشاء الله
انا رأيي تروحوا تتفرجوا الاول وبعدين تقرري على حسب المناسب ليكي
كشكل والوان وكسعر
dr/doaa;15032673:
ازيكم يا احلى عرايس
مبرووووك على الجزء الجديد
عاوزة اخد رأيكم في بيتي اللي لسه هبنيه
ههههههههههه
معلش انا حاباكم تساعدوني بأفكاركم
ديه بلان البيت حسب شغل المهندس
وكنت عاوزة منكم افضل تصور لفرشه
لان لو مش هيعطيني شغل حلو اخليه يغيره
او يعدله
ارجو منكم الاهتمام والرد السريعF:F:
http://forums.3roos.com/attachment.php?attachmentid=126231&d=1304167507
عاوزة احط في الرسيبشن 3 غرف
سفرة (لو محتاجين مقاساتها قولولي)
انتريه
ركنة
ويبقى استايل الشقة مودرن هادي
لان ده الدور التاني بتاع البيت
اللي مش هيكون فيه استقبال ضيوف غرب قوي
انما الدور الاول
هبعتلكم التصور بتاعه في مشاركة تانية
وده هيكون فيه صالون ودفاية بكرسيين وانتريه تاني لزوم استقبال الضيوف الاغراب
اسفة على الاطالة
وشكرا
اهلاً يا حبيبتي منورانا
انا شايفه التخطيط حلو ومعقول انتى عاملة المطبخ والحمام والغرف
كلها في مكان مستقل عن الريسبشن صح ؟
ومنتظرين صورة الدور الأول ان شاء الله
Love You 7abibi;15036281:
بنااات بليييييز محتاجة مساعدتكوا النجار زنقنا في الوقت
وهنضطر نجيب الركنة و الصالون جاهزين
قولولي امااااااااكن للركنات بالاسماء بليييييييز
و اسعار مش غاليه
وكمان اماكن صالونات شيك و مش غالية
وياريت لو حد شاف صالونات فضي يقوللي فين
عشان نازلة بكرة بلييييييييز
في مول دمياط بس غالي شوية
وفي هاى فرنيتشر في اول مكرم قدام سيتي سنتر
وفي الديار برضه في نفس الشارع قدام شوية
وعامة الشارع ده كله محلات اثاث ادخلى وشوفي