قصه ولادتي بالشيخ تميم

بسم الله الرحمن الرحيم

حبيت احط لكم قصه ولادتي بطفلي الثاني تميم

والاكشن اللي صار فيها

اول شي انا ماعطيني موعد ولاده تاريخ 17 -2

من اول مادخلت الشهر التاسع قمت اقرى سوره مريم والزلزله والواقعه والملك و يس + المعوذات واول 5 ايات من سوره البقره واخر 5 ايات من سوره البقره وايه الكرسي مع ادعيه تسهيل الولاده

وبعد قريتهم في غرشه ماي صحه وماي زمزم وكنت اشرب منهم يوميا

كان يجيني الم في الليل بس خفيف اقول طلق واقوم الصبح جني حصان مافيني شي

وقلت اكيد بعدي موعدي نفس حملي الاولي

تاريخ 15 - 2 بالليل كنت احس بالم يروح ويرجع في بطني وظهري بس مو منتظم قلت هاي شكله امنان ماقدرت ارقد لان كل مايجيني اقوم حاولت احسب كل كم دقيقه بس كان وايد متباعد

رقدت شوي الظهر بس بعد قمت من الالم صليت وقريت الادعيه والقرءان كان نفس اليوم عندي موعد

رحت الموعد الساعه 2 وقتها مافي اي الم ولا شي بس دخلوني على دكتور قلت له معاي الم قال بيفحصني مارضيت قالي اوكي اذا زاد تعالي

رحت البيت مافي اي الم بس دخلت الحمام الله يعزكم شفت شوي دم ينزل قلت لا شكلي بولد قريب شربت منقوع الزعفران

المغرب رحت بيت ابوي ماكان في الم الا خفيف قمت امشي بالصاله احس يجيني الم بس خفيف وانا مجربه الطلق من قبل واعرف المه ف ماتوقعت ان هاي طلق

كنت برجع البيت بس امي مارضت قالت نامي عندي عشان يمكن يزيد عليج الالم

دخلت الساعه 10 انام لاني مانمت

بس بعد ماقدرت كل ما حاولت انام يزيد علي الالم لي ما انتظم وصار كل ربع ساعه

يعني كل ربع ساعه يصيدني الم ثواني ويروح

الساعه 1 قعدت امي من النوم قلت لها زاد علي الطلق قالت لي امي طلقج بارد انطري شوي مابنروح المستشفى الحين لان بيرجعونا

نطرت لي الساعه 2 وكان للحين الطلق كل ربع ساعه يجي ثواني ويروح مادري شاللي خلاني اروح المستشفى مع اني كنت حاسه انهم بيرجعوني البيت

اتصلت لزوجي ورحت المستشفى طول الطريج اسولف عادي ماحس ان فيني شي حتى زوجي يقولي ما بتولدين مافيج شي

لما دخلت على الدكتوره فحصتني قالت 3 سانتي ماتوقعت على بالي 1 لان كان الطلق خفيف الحمدلله قلت يالله باقي واحد سانتي وباخذ ابره الظهر

سوت لي تخطيط وعقب ودوني فوق لان غرفه الولاده ما يدخلون الا 4 سانتي

رحت فوق وكان للحين الطلق كل ربع ساعه يجيني ثواني ويروح قلت شكلي مطوله لان الطلق مب راضي يحمي

على 4 ونص جات الدكتور تفحصني الا قالت لي 4 سانتي ونص يالله الحين تنزلين ولاده

استغربت ان 4 ونص وللحين كل ربع ساعه وساعات اكثر بعد

قلت للدكتوره ابي ابره الظهر قالت لي بيعطونج تحت

نزلوني تحت غرفه الولاده اول مادخلت قلت لهم ابي ابره الظهر قالو لي ليش ماقلتي من قبل

قلت لها قلت لهم فوق واول مادخلت الطواري بعد قلت لهم

قالت مايصير تاخذينها الا اول لازم نسوي تحليل دم وخاصه ان عندج ثلاسيميا ف مانقدر الا بعد نتيجه التحليل وراح تاخذ تقريبا من ساعه الى نص ساعه لي تطلع النتيجه قلت لها حرام عليكم ماقدر استحمل الالم قالت لي بعطيج شي يهديج حطت على الكمام وقالت لي اشفطي وانا اشفط احس بدوخه تقولي هو جي يخليج تتخدرين وبعدها جات اسحبت مني دم عشان توديه المختبر قالت لي بحاول اطلعه لج مستعجل

خذت الدم مني توها بتوديه المختبر الا حسيت اني برجع قالت لي اوكي رجعي عشان ترتاحين وانا ارجع حسيت ماي البيبي انفجر

قلت لها ينزل مني ماي قالت لي يمكن ولاده جات تقيس الا انا واصله 10 قالت لي انتي حبيبتي ولاده قلت لها احس اني ابي ادفع

الا بسرعه بسرعه يبطلون السرير ويرفعون ريلي تقولي ما شاء الله انا اشوف البيبي تقولي لو ساعدتيني بتولدين بدون خياط قلت لها ماعرف شسوي ولا اعرف شلون ادفع انا بولادتي بالاول شفطوه لاني ماكنت اعرف ادفع الا قالت لي سوي نفسي ف كانت تعلمني شلون اتنفس نفسها مره مرتين الا ولدي بيدها حطوه على صدري ولما شالوه قلت لها رجعوه ابي ابوسه ومسكينه جابته لي وبسته عقب خذوه عشان ينظفونه

اللي عذبني في الولاده المشيمه لي طلعت والضغط على البطن

في وقت مانزلت امي نزلت معاي وراحت الاستراحه كان وقت اذان الفجر

صلت وجات تنطر برع غرفه الولاده ماتدرين اني ولدت

وانا اقولهم قولو حق امي اني ولدت

كانت امي برع تسمع صوت بيبي بس ماتوقعت اني ولدت

الا عقب قالو لها اني ولدت ماصدقت لان بس خذت نص ساعه في غرفه الولاده

الحمدلله سهالات من رب العالمين

القابله اللي ولدتني كانت تقولي عسى ان تكرهو شيا وهو خير لكم

تقولي ولدتي لا احتجتي ابره ولا شي

اقولها الحمدلله ماتوقعت ان بولد جي كنت شاله هم الولاده

الحمدلله

جانا احلى تميم الله يخليه ويحفظه هو وابوه واخوه :thumbs_up: