مخنووقة على ولدي

الله يجزاكم خير خواتي وربي ارتحت لردودكم
ولدي وديته المغربي وقالوا ان عضلات العين مشدودة وهي الي مخلية الحول على جوا
للأمانه الدكتور قال نلبسه نظارة ونشوف التحسن
وكان في تحسن من غير مايواظب عالنظارة
بس مدري كيف تغير حاله ورجع عليه الحول وبين اكثر
قال الدكتور مافي الا عمليه قبل مايضعف نظره
ولكن المشكلة بالمبلغ كان كبير علينا
هذا غير انهم يادوب ساعتين ويطلعونه للبيت عقب العملية وانا ماارتحت له الشي ابد
هو جسمه صغير ونحيف وخايفة عليه مايتحمل المخدر
عارفين لاني خايفة فقدت ولدي وخايفة افقد ذا بدال ماعالجه
وقتها ماراح اسامح نفسي
ادري اني متشائمة بس والله موبيدي انا المصايب الي قاعدة اعيشها
خلتني كذا والحمدلله رغم هذا صابرة على ابتلاء ربي
وديته المركزي وحطمتني الدكتورة لما قالت عن الاهتزاز الي في عيونه
وان ماله علاج الا الدعاء قلت ونعم بالله
وطبعا من شان الحول قالت لازم مواعيدج من اول وجديد
لكني طنشت وقلت بوديه الكحال يمدحون اطباء عيون فيه
واشوف شنو يقولون والعملية يقولون صاحب المستشفى ممكن يعملها لنا لوجه الله
والله اعلم
لكن انا خوفي من العملية وحطمني هالاهتزاز الي بعيونه
رغم انه ماشاء الله تبارك الرحمن جميل وعيونه كلمن طالعها قال ماشاء الله حلوة ومو مثل عيونا
ادري هذرت كثير
اتحملوني
ودعواتكم يالغوالي له بالشفاء والسلامة
ولكل مريض
والله لايحرق قلب ام على ولدها يارب
ربي يسعدكم

الله يشفيه ويحفظه ومايشوف شر ان شاء الله

ما عليه شر ان شاء الله
ربي يحفظه ويخليه وتفرحين فيه يارب

الله يشفيه و يخليه الك

الله يشافية ياارب

الله يشفيه ويخلى الج يارب

والله وجعتي قلبي على الله يكون بعونج ويخلى الكم ياااااااااارب..

ما يشووف شر

الله يعينش ..الله بشفيه ويعافيه يارب

ربي يشافيه ويعافيه ويفرحك بيه

على عمررررررري عور قلبي الله يخليييية ليييكم إنشاء الله
أنشاء الله ماعلية شر ولين يكبر يتعدل نظرة
مابيدي شيء علية غير الدعاء لية بالشفاء

والله عورتي قلبي
فضفضي حبيبتي احنا ما عندنا غير نغضفض ولعل وعسى نحصل على جزء من الراحه
يارب اشفي ولد اختي الغاليه وقر عينها بولدها ياااااارب
طيب مو ممكن النظاره تعدل بنظره؟؟
اعرف وحده عندها حول والدكتور قال لها الحل نظاره افضل من العمليه؟؟

ان انصحج تودين ولدج تسوين له نظارة تحفظ نظرة

لان عيال خوالي فيهم حول بالعيون وكان كلام الدكاترة لازم بداية العمر يلبسون نظارة ع الاقل لمدة 2 الى 3 سنوات تحفظ لهم النظر

وماشاااء الله بنت خالتي تعدلت عينهاااا بس اخت يبيبن حولها ع الخفيف اذا كان الشخص يركز فيها عدل يتنبة


واولا واخير ربي يمن علية بالشفا يارب


وذا كان ولدج يلعب العاب البلاي استيشن وقفيها عنة

واستعيني بمن رد الى يعقوب بصرة وارجع الية يوسف سليما معافي الى الى ربج

وماراح يقصر علينا سبحانة ذو الجود والكرم

ما يشوف شر
إن شاء الله

من قال ما ليه حل!!!!

ليه اكبر حل وأحسن حل


وين راح رب العالمين؟؟ الدكاترة ما يقدرون يسوون شي بدون ارادة رب العالمين

احمدي ربش عندش على الأقل ولد ناااااااااااااااااااااااس يمووووتووووون من مكان لمكان ومن بلد لبلد بس عشان يجيبون ليهم ولد او بنت وانتين الحمد لله على الأقل عندش ولد تفرحين فيه

حبيبتي عليش بالدعاء ولا تيأسين من رحمة رب العالمين

الله اللي خلق الرحمة في قلبس على ولدش وهو ارحم منش عليه واعطف منش عليه

عليش بالدعاء والإستغفار وصلاااااااااااااااااااة الليل صدقيني وبتجوفين اموركم كلها متيسرة والله بشافي ولدش

في ناس اكثر واكثر من مشكلة الحول بس بسبب توكلهم على الله ودعائهم واستغفارهم المستمر تجوفينهم يحصلون العلاج المتاسب ويعيشون حياة سعيدة ومرتاحين

ثانيا تقدرون تجمعون ليه مبلغ والجمعيات الخيرية ما تقول لاااا

روحوا عالجوه في لندن عمد احسن بروفسور والله كريم

ما يشوف شر الله يشافيه وتشوفيه رجال

ما عليه شر ان شاءلله
ربي يشافيه و يعافيه
و اتشوفيينه معرس يارب
طمنيينا عنه

ربي يشافيه ويعافيه
وان شاء الله تطمنيني عليه وتطمنينا

حبيبتي شوفي راي طبيب اخر .... اختي كانت عندها حول من ومن اقل من عمر سنتين تلبس نظارة وشافت اكثر من عشرين طبيب وكل واحد رايه غير وفي عمر 18 او 17 عيونها صارت مثل بنظرب عليه في الجمال ...راح الحول وراح الضعف وراحت كل مشاكلها والحمدلله