مرحبا للكل,,
عزيزاتي حبيت اليوم افيدكم بخبراتي واللي اعرفه من خلال التجهيزات اللي سويتها بعرسي وحتى من قبل او بعده.. خاصة انه لاحظت من خلال تصفحي لمعظم المنتديات انه ما في ملف للتجهيزات المميزة يعني دايما نشووف المميز مخلوط مع العادي او حتى الاقل انا اليوم حبيت اعرض بس المميز , لانه في ناس وايد اتبعوا المكتوب في المنتديات وانصموا وحرام لانه البنت اهم يوم في حياتها هو يوم زواجها
عزيزاتي حبيت اليوم افيدكم بخبراتي واللي اعرفه من خلال التجهيزات اللي سويتها بعرسي وحتى من قبل او بعده.. خاصة انه لاحظت من خلال تصفحي لمعظم المنتديات انه ما في ملف للتجهيزات المميزة يعني دايما نشووف المميز مخلوط مع العادي او حتى الاقل انا اليوم حبيت اعرض بس المميز , لانه في ناس وايد اتبعوا المكتوب في المنتديات وانصموا وحرام لانه البنت اهم يوم في حياتها هو يوم زواجها
اولا : قاعات الزواج او الحنة او الجلوة
راح ابتدى من الغالي للرخيص
الرتز عندهم قاعتين النا اكثرهم يعرفون عن الغزال بس عندهم قاعة ثانية اسمها "قاعة النور" خيالية جدا بحجم قاعة المؤتمرات بفندق الخليج بس على افخم بوااايد طبعا سعرها خيالي لعرس خيالي تتسع لـ 600 شخص
الخليج عندهم قاعاتين المؤتمرات تتسع لـ 800 شخص والثانية اوال وانا ما اشجع عليها بصراحة بس الناس اذواق وتتسع لـ 250 شخص
الشيراتون والدبلومات من نفس المستوى لكن الشيراتون اغلى والقاعة اصغر والدبلومات اكبر والسعر اقل بشويه
الموفنبيك القاعة جميلة وحديثة ولكن صغيرة تتسع لـ 230 شخص
إليت عندهم قاعة صغنونة حق عرس عائلي او حنة او جلوة تتسع لـ 150 شخص
قاعة برستيج القاعة حلوة وحديثة ونظامها حلو ومبتكر انه البوفيه من اماكن مضمونة كبيرة وكلها بيضة يعني ما تحتاج تغليف وعشان جذي لازم الوحدة تكسرها بلون ثاني وطبعا تقع في منتزه عذاري
قاعات مرمريز في غنى عن التعريف والكل يعرف نظامهم وآخر قاعاتهم اللي ضموها لهم الجميرا
قاعات الدانه بعد الناس يعرفونها عدل وهي نفس نظام مرمريز بس المالك مختلف
وننتقل الحين للقاعات الخيرية
قاعة عايشة المؤيد [SIZE=4]تقع في مدينة عيسى وتتسع لـ 160 شخص[/SIZE]
قاعة أحمد علي كانو تقع في الدوار الثاني من مدينة حمد قرب الجامع وهي جديدة وحلوة
قاعة الشكر الكائنة بالدوار الاول من مدينة حمد وهي للرجال فقط وصغيرة
قاعة فاطمة كانو تقع في منطقة الخارطة وهي للرجال فقط
قاعة بن دينة وتقع في البسيتين وهي شبه جديدة وحلوة
قاعة شيخاني تقع في الرفاع بالقرب من بوكوارة وهي للرجال فقط حلوة ولها باركات خاصة
والحين ننتقل الى
ثانيا: التصوير وراح ابتدى من افضل شي الى المفضل:)
عزيزة سلمان اللي لها محل باباراتزي [SIZE=4]طبعا كانت في كانتري مول بس ماادري وين انتقلت الحين طبعا اسعارها فووووق بس فظيعة[/SIZE]
ام يقين مالها محل خاص فيها ومنزلها يقع في شارع البديع في منطقة المقشع مؤخرا وايد رفعت اسعارها وصار مب الكل يقدر ياخذها
ام عباس [SIZE=4]وبعد تعمل لحسابها الخاص ويقع منزلها في منطقة البلاد ولها ابتكارات بنوعية الخامات اللي تتطبع عليها الصور [/SIZE]
سكووب طبعا في طليعة نظام الاستويوهات في البحرين له فروع في البديع والسلمانية والمحرق جاري الافتتاح
صحاري وله افرع في البديع ومدينة حمد والمحرق ويحاول انه يواكب التطورات في مجال التصوير
عواكس ميديا يقع في شارع جد علي جديد وعنده نظام مجلة للأطفال يهبل خاصة لحديثي الولادة في المستشفى
والحين ننتقل الى
ثالثا: الدي جى طبعا انا اقدم الافضل والمتميز فقط
دي جي ليلى سهراب طبعا ما اعرف اشلون اوصف لكم اشلون تشيل المكان شيل وبطريقة حلوة مااظن في احد يقدر يقعد وسعرها انا اشوفه معقول مقابل تميزها
دي جى فيض واايد حلو وبعد مميز وتوفر لج اذا تبين مع الدي جى فرقة يعني كل شي متوفر عندها بس ترى غالية شوي اممم اكثر من شوي :D
دي جى الرياش طبعا غني عن التعريف وبعد عنده نظام انج تضيفين فرقة مع الدي جى والحين على حسب معلوماتي اخوه انفصل عنه وصار عنده دي جى باسم " سيتي دي جى"
دي جى دريم طبعا بعد معروفة ومتجددة دايما ومتعاونة وايد ويمكن سعرها معقول
والحين ننتقل الى
رابعا: الشعر والميكب
نبتدي بالشعر
فوزية عبدالله هالانسانة ما تتخيلون اشكثر ذووق وطيووبة ويمكن الله مبارك لها عشان هالشي دايما مميزة ومتجددة بتسريحاتها وتنافس اسامي كبيرة موقعها ورا لولو هايبر ماركت في الرفاع شوي مدعووس وهي تشتغل في التلفزيون بعد وطبعا تييج وين ما تبين بس الاسعار تتغير
عايدة النعيمي تسريحاتها متجددة وحلوة وعصرية وكانت المصففة الخاصة لهند واكثر شي تتعاون مع ابتسام كمال وطبعا تتطلع لج اذا تبين مع اختلاف الاسعار
وحيدة وفتحية وبدرية طبعا غنيين عن التعريف وهم كلهم خوات واول وحدة اشتهرت فيهم وحيدة ولها صالونها الخاص المجدد اللي هو الحين في فلة في سند ومعاها خواتها وستافها الباقي
وردة التركية في صالون ايلاف ماشاء الله عليها تساريحها وااايد مميزة وهي حبوبة وطيبة واللي عنده حجز هناك يطلبها
ننتقل للميكب
طبعا انا ما احب المكياج الثقيل اطلاقا وعشان جذي انا راح اذكر اكثر ناس مميزين بالمكيب الراقي المتوسط اللي يطلعج عروس وفي نفس الوقت مو صورة
ابتسام كمال موقعها في المحرق قريب المقبرة واايد حبابة وقادرة تسوي لج ستايلات مختلفة وهي وايد حبابة وخلوقة وسمعت انها غلت اسعارها
شيماء بو جيري كانت في المحرق بس الحين انتقلت مع وحيدة الرونق ماشاء الله عليها مكياجيها مميز تتقن الثقيل شوي او المتوسط او الخفيف وكل الحالات تتطلعين جميلة
شريفة فولاذ ماشاء الله بالها طويل مع الزباين وخلووقة وذوق بشكل كبير مكياجها ما يتيغير حتى ولا يسيح ومتمكنة في ابداعها موقع صالونها في منطقة لولو هايبر ماركت الرفاع
شيما في صالون الرونق مكياجها ناعم وحلو ومميز متعلمة على يد الماكيير اللبناني احمد قبيسي ودمجها حلو
ايمان ماك ماشاء الله مكياجها وايد راقي وحلو على قولتهم تتطلعين مثل المودل اللبنانية
زهرة ماك نفس ستايل ايمان واايد راقي وهادئ وتتطلعين بعد مودل :)
فاطمة اللبنانية اللي عرفته مؤخرا انه صار لها صالونها الخاص في الرفاع بس ما اعرف وين بالضبط لانها من قبل كانت في مع وحيدة طبعا غنية عن التعريف بالنختصر ستايل لبناني بحت
معصومة ماك طبعا الكل يعرفها ولكن رأيي الشخصي انها كانت تهتم في العرايس قبل اكثر والحين سمعت ما تلتزم وتكنسل مواعيد وطبعا معروف ستايلها ناعم وراقي
وننتقل الان الى
خامسا: الفساتين
الانامل الحريرية في العدلية هو الافضل في التفصيل بس السعر لا شوي غالي :$:
اتيليه جون في الرفاع وانتي رايحة طريق المنتزه على يدج اليسار واايد حلو وعنده موديلات مبتكرة وشوي غالي والمصمم فلبيني صار له 20 سنة في ابو ظبي بعدين جا البحرين وفتح في الرفاع من تقريبا 7 سنوات
تارا في العدلية التفصيل رووعة والاسعاار جدا معقوولة ومناسبة وماراح تحتاجين بروفات واايد لانهم يتقنون القصة خاصة اذا عندج الموديل او مرسوم بطريقة واضحة
رومان ديزاين وفيصل الاحمد المكانين يم بعض في الرفاع ولنفس المصمم واعتقد انه شوي الاسعار مبالغ فيها بس سمعت انه يتفاوض في السعر اذا بينتي له ميزانيتج
سيما فاشن في المحرق عندها موديلات فظيعة خاصة للي يبي اشية راقية وكلاس بس اسعارها فووق
احلى الوصايف التفصيل حلو وخاصة اذا تشرحين بالتفصيل عن الموديل وتراكضين وراهم واسعارهم معقوولة جدا بالنسبة للباقي وشكهم حلو
التزامن في الرفاع طبعا الكل يعرفه ويعرف مستوى الشغل وبعد مستوى الاسعار واترك التعليق لكم مع مراعاة اختلاف الاذواق والاراء
ميللي في نهاية شارع بوكوارة صراحة وااايد تفصيله حلوووالاسعار معقوله واتوقع له مستقبل لانه قاعد ينشهر
وننتقل الى
سادسا: الكوشات
جندل لصلاح بوشهري تصاميمه مميزة جدا وفنان في ابداعاته ودائما متجدد بس ياريت يسوي اشية لزباينه اللي يحبونه من ذوي الدخل المحدود
قرية الافراح لياسر في المحرق ماشاءالله عليه عنه ديزاينات وايد حلوة ويقدر يسوي لجميع المستويات والاذواق ويماشى مع ميزانية العروس
المزيونة في مدينة عيسى عنده تصاميم حلوة خاصة حق الكوشات الكبيرة واللي ستايلها كلاسيكي
دان في المحرق بالقرب من مركز باربي للتجميل صراحة صاحبة المحل جدا ذووووق وعندها تصاميم وايد حلوة ومميزة ومتعاونة مع الزبونة وعندها طبعا قسم زهور للباقات والتغليف
ليفز في البديع وايد الكوشات راقية ومتعوب عليها حتى ترتيب القاعة ككل ولكن الاسعار قاعة ترتفع كل فترة مع إرتفاع الجوكلت :D وطبعا متوفر عندها قسم الزهور والتغليف والباقات
دريم هوم في شارع الخدمات بالقرب من مخبز المرزوق عندهم تصاميم حلوة وهادئة خاصة حق الناس اللي تحب الاشية السنبل مب الدفشة وبعد متوفر عنده قسم الباقات والتغليف
وفي النهاية اتمنى من الكل انه يستفيد من الموضوع وانا حاضرة لأي استفسار.. ولا تنسوني بالتقييم, والتشجيع منكم F: