مدري كيف اتصرف،، ساعدوني

السلام عليكم ورحمة الله وبركاته

ترددت كثير قبل ما أكتب هالموضوع لأني وبكل صراحه أحس ان مافي حد راح يعطيني حل بس لما شفت اني ماقدر اتحمل قررت اني اكتب لو على الأقل عشان أفضفض باللي داخلي لأني ابتديت اخاف على نفسي ومن اللي ممكن اسويه فيها

الله يسلمكم أنا متزوجه وراح أكمل السنه قريباً
تزوجت عن طريق خطبه تقليديه، زوجي ماعرفه من قبل ولا يعرفني وظلينا مخطوبين لمدة 9 شهور تقريباً
حالياً أنا حامل وفي الشهر السادس

مشكلتي أو بالأحرى مشكلتنا ان مافي حوار بيننا
أنا طبيعتي هادئه واستحي وماعرف اعبر عن اللي في داخلي وهو بعد مايعرف يعبر وهالشي اكتشفته من خلال عدة مواقف تصير له

الحين انا غيرت من نفسي وابتديت اتكلم له وأقول له وش يصير معاي يومياً في الشغل، و وش اللي افكر فيه وتجهيزات البيبي وغيره
بس هو مثل ماهو


من أول يوم بعد الملكه قال لي انه يحبني (وكنا نكلم بعض بالتلفون لمدة شهرين تقريباً قبل الملكه) أنا ماصدقت في البدايه لأن حسيت هالشي انه صاير بسرعه وبعدين قلت يمكن صج يحبني

مرت فترة الخطوبه وبحكم شغله واني انا بعد موظفه فماكنا نتلاقى كثير ولا كنا نطلع ونروح ونجي مثل باقي المخطوبين
للحين أفكر اني ما انبسطت في فترة الخطوبه مثل باقي البنات بس بعد الحمدلله على كل شي
الطلعات هي مو كل شي في الحياه

بعدها تزوجنا وسكنت عند أهله ولحد الآن انا ساكنه معاهم ومانفكر ان نطلع في سكن مستقل حالياً

المهم، من بعد ماطلعت موضة البلاك بيري زوجي أخذ له واحد
وطبعاً أنا ماكان عندي خبر الا لما اخذه وجابه وأنا ماكنت مقتنعه بهالاختراع ولا صار خاطري اني ابيه او اي شي

من فتره جوالي اخترب، فزوجي عطاني جواله عشان استخدمه مؤقتاً لحد ما اشتري لي واحد ثاني
مو هذا موضوعنا، بس ابي اوضح لكم الصوره شوي
ومن شهرين يمكن قلت له اني ابي بلاك بيري (وأنا تراني أقدر في أي لحظه اروح للشركه واطلع الجهاز بدون اي مشكله) بس كنت متردده لأني ابي جهاز ثاني في نفس الوقت

طيب، من فترة شهر تقريباً حسيت ان زوجي متغير
صار متعلق بالجهاز أكثر من قبل، وصار يفتح اللاب توب أكثر من قبل
بالعاده مايدري عن لاب توبه الا يمكن مره في الشهر او كل شهرين
الحين صار كل ليله يدخل على النت لما انا بنام ويلعب بليارد!! من اسبوعين تقريبا صحيت مرتين من النوم مالقيته جنبي!!! قلت يمكن في الحمام بس ماكان هناك وجوالاته معاه!! اتصلت على واحد منهم وقطع الخط ودقايق الا هو عندي في الغرفه
ولما سألته وين كان قال لي انه كان يلعب بليارد!!
المره الثانيه صحيت وماشفته جنبي وبس ماخبرته اني صحيت ومالقيته

أول شي ابتدت تجيني أفكار،، وين راح؟؟ معقوله قاعد تحت يشوف التلفزيون؟؟ ولا صج يلعب بليارد؟؟ بس هو في العاده وانا نايمه عادي يشغل التلفزيون واللابتوب، ماعنده أي مشكله أبداً

لحد ماجتني فكره انه يمكن يكلم أحد في التلفون، وخصوصا اني مره صحيت من النوم وهو قاعد يتكلم على المسنجر الساعه 4 الفجر تقريباً، حاولت القط الكلام بس سبحان الله النوم كان أقوى مني وماقدرت افتح عيوني عدل

بس بعدين تعوذت من ابليس وخليت هالافكار عني

من يومين بس كلمته وقلت له ان هو مايتكلم معاي ومايقعد يسولف وهو حس اني متضايقه من موضوع البلاك بيري وقال لي وشفيك تغيرين من الجهاز؟؟؟ قلت له ايه أغير منه وأغير من أصدقائك اللي تطلع معاهم وقعد معاي يسولف وانا انبسطت لهالكم دقيقه اللي قعدناها مع بعض

البارحه كنا على السرير وقت النوم، أنا بنام وهو بيطالع التلفزيون
نمت جنبه وحطيت راسي على صدره وغمضت، مافتحت عيوني الا وهو ماسك البلاك بيري ويتكلم مع وحده !!!!

أنا ماعرفت وش اسوي، رجعت غمضت وبعدين قمت ولفيت للجهه الثانيه، وبدون قصد لفيت بقوه وكأني زعلانه
هو حس ان فيني شي قال لي وش فيك؟؟ ماتكلمت
وبعدين ضمني وقال لي وشلون عن موعدك بكره؟؟ (لأن عندي موعد في المستشفى) قلت له وشلون بعد؟؟ بكل برود
هو عصب وقال لي كلميني عدل، قلت له يعني وش فيه الموعد؟؟ مثل كل مره بروح
رجع وقال انا كلمتك وردي علي كلميني عدل وقام وهو معصب، وانا تركته ونمت ودموعي تنزل من عيني

صحيت الصبح من النوم وطلعت رحت الدوام وأنا كارهه نفسي وكارهه حياتي واللي فيها
أنا في السياره وكان ودي ان السياره تنقلب فيني او ان اي احد يطلع علي بالشارع ويصير لي شي
رحت الشغل وانا مابي اكلم اي احد والكل لاحظ علي هالشي
ماقدرت آكل اي شي، وفكرت اني مابي آكل وماراح آكل أي شي لين اتعب وكلي أمل ان راح يصير لي اي شي

وصدفه سبحان الله ان الموبايل اخترب اليوم، صار مايشتغل لأنه تبلل من المطر!! وانا اكلم اختي قالت لي راح اشتري لك جهاز ثاني واني راح ادفع لها مع الراتب الاسبوع الجاي، قلت لها أوكي

وبعدين كلمتني وقالت لي ان هي اشترت الجهاز وهو عندها الحين بس انا مارحت آخذه

رجعت البيت بعد المغرب وهو كان موجود
قعدت على السرير وهو يشوفني وانا اطالع التلفزيون، قال لي وش فيك زعلانه؟؟ قلت له مافيني شي
قال طيب ليش ماتصلتي اليوم؟؟ قلت له ماعندي جوال، الجوال اخترب وقلت له اني اشتريت موبايل جديد
قال وش هو؟؟ قلت له بلاك بيري
هنا هو عصب، ليه اختك هي اللي تشتري لك وانا اللي قلت لك راح اشتري لك؟؟؟
وانتي دايماً تتصريفن بدون اذن وتماديتي في تصرفك، والجوال ماراح تاخذينه من اختك
طيب وهي الحين اشترته؟؟ قال لي هاذي مشكلتها
انا سكت عنه

رجع قال لي اصلاً انتي من البارحه مدري وشفيك متسببه!!!
هنا انا استغربت وماقدرت اتكلم
معقوله يعني هو ما حس اني شفته وهو يكتب المسج؟؟؟ ولا هو يستهبل ويبي يشوفني وش أقول؟؟ وعامل روحه بريء؟؟

أنا سكت واستغليت هالنقطه ومابينت له اني عارفه وش السالفه

بس بداخلي احس اني احترق
وطبعا لبس ثيابه وراح بيسهر عند اصدقائه

المشكله الحين ماني عارفه وش اسوي وكيف اتصرف؟؟؟
أنا اعترف اني غلطت في اشيا وايد وقصرت في حقه في بعض الاوقات بس الحمل متعبني نفسياً وجسدياً وانا قلت له بس للأسف ماعتقد انه من النوع المتفهم

والله احس اني في دوامه
ماعندي أي احد أكلمه أو اقول له اللي في قلبي

أنا ماعرف اواجه أي احد
ودايماً أميل لأسهل الطرق وهي الانسحاب، بس في هالحاله الانسحاب هو الطلاق
بس انه يرسل مسجات لبنت ماهي سبب للطلاق، وبعدين انا حامل، لو ماكنت حامل كان يمكن اتصرف تصرف ثاني

يمكن تكون مجرد رسايل بريئه، بس بعد وش يضمنني انها بس رسايل؟؟ وش يضمنني انه مايكلمها؟؟ أو انه راح يشوفها الحين ؟؟؟

ماني عارفه كيف أفكر احس الدنيا تدور فيني
كيف بستقبله لما يرجع وامثل ان كأن مافيني شي
ماقدر ماقدر أمثل، ماقدر أبلع الغصه اللي فيني، أطالع روحي في المرايه واحس اني ولا شي
كيف فكر انه يكلم غيري؟؟
كيف طاوعته نفسه؟؟؟

يمكن البعض مايشوف ان المشكله كبيره بس بالنسبه لي والله والله انها كبيره
كيف راح اتقبل اني اكلمه وارجع مثل قبل
كيف ازيل الشك من بالي

آخر شي توقعته منه، ولااا وأنا بحضنه وهو يكلمها!!! مر علي اليوم وكأنه سنه
في لحظات تمنيت ان اللي في بطني مايعيش، بتقولون أبالغ، بس ماحس اني أبي تكون لي اي صله فيه

آلاف الأفكار مرت علي البارحه واليوم
من متى يعرفها؟؟ وهل هي الوحيده؟؟ وايش هي حدود العلاقه؟؟ وهل يكلمها عني؟؟ وش يقول لها عني؟؟

لما تعرفين ان في شخص يخونك من وراك اهون مية مره من انه يخونك قدامك ويستغفلك


ساعدوني تراني مالي أحد غيركم من بعد الله

ساعدوني ولو بدعوه تراني اختكم و محتاجه لكم