تنظيف المكياج ... الجزء الثاني (تنظيف الظلال - الشدو)

[همس جنوبي]

السلام عليكم و رحمة اللّه و بركاته




هلا بنات
أخباركم بنات إن شاء اللّه الكل بخير



اليوم راح أنزل لكم الجزء الثاني من موضوع تنظيف المكياج و هالجزء راح يكون مخصص لتنظيف الظلال (الشدو)


و هذا رابط الجزء الأول للبنات اللي ما شافوه
http://forums.3roos.com/showthread.php?t=585610


و إن شاء اللّه راح يكون في جزء ثالث مثل ما قلت من قبل في الجزء الأول و بيكون مخصص لتنظيف الفرش و احتمال جزء رابع مخصص لتنظيف الأرواج و أحمر الخدود (البلاشر) و أدوات المكياج بوجه عام


و ترا أنا قبلها نزلت موضوع بعنوان كتاب الظلال
(هذا رابط الموضوع http://forums.3roos.com/showthread.php?t=558849)
و خلال فترة انجازه أجلت تنظيف مكياجي لما بعد الإنتهاء من الملف و هذا التأجيل - و حجم كمية المكياج و الأدوات اللي كانت تحتاج تنظيف- هو اللي خلاني أقرر أنزل مواضيع التنظيف لما بدأت أنظف المكياج


أتمنى تكون الطريقة واضحة لكم خصوصاً في هذا الجزء لأني نسيت أسجل الخطوات لما عملتها فاعتمدت على الصور و الذاكرة اللي عليكم عليها شوي :worn_out:



نقطة مهمة هالطريقة في التنظيف طريقتي أنا، شيء من عندي و شيء أخذت أفكاره من الآنترنت قد أكون صائبة و قد أكون مخطئة يعني ليست الطريقة الوحيدة و الإلزامية في التنظيف و كل وحدة و طريقتها اللي ترتاح لها و كمان نقطة أخرى الظلال اللي في الصور ترا هذا اللي موجود معي و هذا اللي استخدمه علشان كذا حطيت طرق تنظيفهم و لم أضع طرق تنظيف الظلال الأخرى.


و أي سؤال أو استفسار (ما عدا الأسئلة الشخصية طبعاً) يا حبذا يكون على العام


و قبل لا أبدأ (أعرف لعيت كثير :p و لا ما أكون هموسة ) دعواتكم لي إن اللّه ييسر لي زيارة بيته الحرام عاجلاً غير آجل اللي كل ما قلت خلاص راح أشوفه يتأجل الموضوع


و أخليكم مع الموضوع و الصور


يتبع

[همس جنوبي]

السلام عليكم و رحمة اللّه و بركاته



الأدوات المستخدمة

مثل المعتاد

كلينكس (فاين- محارم ورقية) و أعواد قطن (عادي- تجميلي) و أعواد القطن المبللة من ماك و مناديل جونسون

صور أخرى للأدوات و علب الشدو في غرفة الانتظار






وقت الاستحمام


أهم نقطة قبل لا تبدين في أي شيء إنك تفرشين كلينكس أو أي شيء آخر على السطح اللي بتنظفين فوقه حتى يكون عازل و كمان الأوساخ تتجمع فيه و بسهولة تلمينها و ترمينها لما تخلصين من التنظيف




تنظيف شدوات ماك المفردة

الشدو قبل التنظيف


و هو مفتوح



الخطوات




جبت ورقة كلينكس و مسحت فيها سطح الشدو علشان أشيل الطبقة اللي فوق

في بنات ممكن يقولون إن طريقة المسح هذي ممكن تخلي الشدو يخلص بسرعة في رأيي خليه يخلص أهم شيء عندي لا استخدم شيء وسخ فوق عيني ثانياً الشدو الوسخ يخرب بسرعة لأنه يصير مدينة ملاهي للجراثيم :celebrate:


بعد المسح أقلب علبة الشدو حتى تطيح أي بقايا



بعدها جبت الغلاف مال عود قطن ماك أو أي شيء حاد و نظفت بين الجزء المعدني و البلاستيكي للشدو



نظفت بعدها بمنديل جونسون



طبعاً لا ننسى الأماكن الضيقة





الشدو بعد التنظيف



و أكيد لا ننسى تنظيف العلبة من الخارج بمناديل جونسون و تجفيفها بالكلينكس أو قطعة قماش نظيفة


و هذا الشدو بعد ما خلص

نعيماً


شدو آخر أثناء التنظيف



ورقة الكلينكس بعد تنظيف كمن شدو :badly:



شدو آخر بعد التنظيف بس هذا تأثر بالحماس الزايد

انتبهتوا كيف خرج الجزء الشفاف يا حماسي
بس لحقت عليه بسرعة و صلحته



يتبع

[همس جنوبي]

السلام عليكم و رحمة اللّه و بركاته

هالمرة راح ننظف شدوات مفردة من ماركات مختلفة عندي

أول شيء من نوبا

الشدو قبل التنظيف

نفس الطريقة اللي من قبل مسحت السطح بالكلينكس و قلبت العلبة للتخلص من البقايا

و مسحت حوالين الشدو بعود القطن التجميلي و مسحت العلبة من برا و ما نسيت الغطاء

شدو آخر من نوبا بس هذا حالة خاصة :sick: طالع من العلبة

نظفت العلبة بمنديل جونسون و نشفتها بالكلينكس

أخذت الشدو و مسحته في الكلينكس

بعدها رجعته لبيته بس ما لصقته

بعدها نظفت شدوات من ديور و شدو من HR و شدو أسود من ماركة ما أتذكر اسمها :worn_out:

الشدو الأسود

نفس الخطوات اللي قبل

أمسح بالكلينكس و أقلب الشدو للتخلص من البقايا بعدها نظفت بعود قطن ماك المبلل الجزء البلاستيكي

بعدها بعود القطن العادي

شدو ديور

هنا لأن الشدو فيه تشكيلة خفت إذا استخدمت الكلينكس تروح لأني أعرف نفسي إذا تحمست بزيادة فجبت فرشاة نظيفة مسحت فيها سطح الشدو

و باقي العلبة بمناديل جونسون و أعواد القطن

و ما نسيت أنظف الغطاء الشفاف، عندي مناديل جونسون جافة مسحته فيها

شدو HR

نفس الخطوات اللي قبل

يتبع

[همس جنوبي]

السلام عليكم و رحمة اللّه و بركاته



أولاً تنظيف علبة ماك الـQuad اللي أنا عبأتها


مقدمة بسيطة :cool:

في ألوان من شدوات ماك ما تنباع إلا على شكل ريفيل (للتعبأة في باليتات فاضية) و هذول آخذهم مضطرة لأني ما أحب الباليتات بس أحطهم في الباليتة اللي بها أماكن لأربع شدوات ما آخذ مال 15 لون


هنا راح ننظفهم


العلبة قبل الإستحمام



أول شيء طلعت الشدو من العلب



مسحت العلبة بمنديل جونسون



بعدها جبت عود قطن ماك المبلل و مسحت مكان الشدو



طبعاً ما نسيت الأماكن الضيقة مثل مكان القفل



جبت منديل جونسون و بغلاف عود قطن ماك المبلل دخلته في مكان القفل و نظفت ;)

و بعدها مسحت بورقة كلينكس


و بالنسبة للشدوات مثل اللي قبلهم مسحتهم بكلينكس



و ما نسيت أنظف الجزء المعدني بمنديل جونسون



العلبة بعد الاستحمام



علبة ثانية






تنظيف علبة ماك المعبأة مسبقاً

هنا راح ننظف العلب اللي تجي جاهزة من ماك و فيها 4 ألوان. و مشكلة هالعلب إن الشدو ملصوق فما يطلع (إلا بمفك براغي أو أي أداة حادة) فتنظيفها يكون متعب شوي 8o|


العلبة قبل الاستحمام



نظفت الغطاء الشفاف بمنديل جونسون جاف



نجي للعلبة نفسها



أنا بدأت بالجزء الأيسر قبل و من فوق لتحت و كنت مخلية العلبة على جنبها
مثل المعتاد أمسح وجه الشدو بكلينكس ثم أقلب العلبة بعدين أمسح المنطقة اللي حوالين الشدو



هالصورة توضح كيف إني خليت العلبة على جنبها و نظفت الجزء الأيسر منها أول



بعد ما خلصت الجزء الأيسر رحت للجزء الأيمن و كررت نفس الخطوات و طبعاً ما ننسى مكان القفل و الغطاء و العلبة من برا :worn_out:


العلبة بعد حمام الهناء

نعيماً



يتبع

[همس جنوبي]

السلام عليكم و رحمة اللّه و بركاته



مقدمة بسيطة :cool:

لي موضوع قديم اسمه "مجموعتي الماكية ... حياكم" و في هذا الموضوع أخت من المنتدى طلبت مني طريقة تنظيفة باليتة الشدو من ماك و نزلتها لها في الموضوع نفسه بس ما أعتقد كثير شافوه و لأني عارفة إن الصور بعدها موجودة ما صورت تنظيفي الأخير لباليتات شدو ماك و راح أحط نفس الخطوات و نفس الصور

و ترا أيامها كان اسمي Ever Lovely لا تجيني وحدة و تقول لي لاطشة الصور :mad: أضعف الإيمان تشوف توقيعي فيه إن اسمي سابقاً Ever Lovely

الوصلة للصور في موضوعي القديم
http://forums.3roos.com/showthread.php?t=327920&page=46



هذي طريقتي بتنظيف الباليتات


الأدوات اللي نحتاجها


1- باليتة مش نظيفة (تراه لزوم التصوير لعبت فيها شوي)



2- أعواد قطنية لزوم التجميل و أعواد ماك و نحتاج ورق كلينكس



أول خطوة نفرش ورقة الكلينكس و نقلب علبة الشدو على وجهها حتى يطيح
الشدو المتطاير (هذا لأني عارفة إن الشدو نظيف بس إذا مستخدمته راح أمسح كل لون بورقة كلينكس)



نرفع العلبة و بتلاحظين إن الشدو المتناثر طاح



نجيب الطرف المدبب من عود القطن و نبدأ ننظف الباليتة و نخلي الطريقة منظمة
يعني منطقة منطقة و التنظيف يكون كله في نفس الاتجاه







بعدين بالطرف المتين من عود القطن نبدأ ننظف مكان الفرشاة





بعدين بعود قطن ماك المبلل نعيد التنظيف على الأماكن اللي مش نظيفة



بعدين بإصبعي الملفوف عليه ورقة كلينكس أنشف العلبة



و هذي العلبة بعد التنظيف الداخلي و من الخارج أنظفها بمنديل جونسون للأطفال و بعدين كلينكس و مرات أكتفي بالكلينكس، صح و ما أنسى تنظيف المرايا بأي قطعة قماش



و هذي صورة قبل و بعد






باليتة ثانية من ماك و هذي فيها أرواج و شدوات و بيس للوجه



الباليتة قبل التنظيف و تلاحظون آثار الشدو على الأرواج و البيس



أول شيء بدأت بالشدوات نفس خطوات قبل، أحط العلبة على جنب و أبدأ بالجانب الأيسر بعدين الأيمن، أمسح وجه الشدو بكلينكس بعدها أنظف حوالين الشدو و في الأخير نظفت البيس و الأرواج بكلينكس من آثار الشدو المتناثر عليهم



العلبة بعد ما تنظفت





يتبع

[همس جنوبي]

السلام عليكم و رحمة اللّه و بركاته



كررت نفس خطوات تنظيف باليتات الشدو مال ماك مع باليتات الشدو من ديور و باليتة من إيف سان لوران


علب ديور قبل التنظيف





بعد المسح بالكلينكس قلبت العلبة على وجهها و آسفة لأن الصورة مش واضحة (العلبة كحلية و الأرضية سوداء :|)



العلبة بعد التنظيف





و هذه علبة YSL بعد التنظيف




و هذي صور لبعض الشدوات و العلب بعد الاستحمام



نعيماً لهم كلهم


و بكذا الحمد للّه أكون خلصت الجزء الثاني من ملف تنظيف المكياج

و إن شاء اللّه كان الموضوع واضح لكم و أكون قد أفدتكم و لو بشيء قليل و عاد أريد أشوف مواضيع تطبيقاتكم إذا طبقتوا



الجزء الثالث مثل ماقلت راح يكون عن تنظيفي لفرش المكياج إن شاء اللّه
و مثل العادة إذا تأخرت ذكروني على الخاص :call:



صح نسيت :-o الموضوع تراه حصري لحبيبي موقع عروس و اللبيب بالإشارة يفهم (هم عارفين نفسهم :mad



وتحياتي لكم
همس جنوبي :K:

[مسزز غموضة]

همووووسة

حبيبتي

عجزت شو اقوووول!!
نصايحك هذه فاتدني في الموضوع الاخير
والحمدلله اني اتعلم واستفيد من اخت عزيزة علي مثلج

بجد من اول الموضوع لاخرة كلمة رائع قليلة

بل هو سوبر دبل وتربل رائع :celebrate:

الله ما يحرمنا منك ولا من مواضيعج ولا حركاتك الفنتك

موفقة ياعسل

[reemiia]

فدييييتج تسلميييين ع هالطرح المميز .. مب غريب منج ,, واعجبتني نصاايحج وانشالله اطبقها ..
يعطيييج الف عاااافيه ع هالمجهووود ..

F:

[رنادو]

الله يعطيج العاافيه
وتم التقييم ..

[▫▪◦ سَآسٍيِ آڵْڍڵعْ ▫▪◦]

بصراحــه همووســه ما عليج زوود غلايــه ~

يعطيج الف عافيه على المجهوود المبذوول و الرائع ..

تسلم ايدج على النصائح الحلووة و المفيده و ان شاء الله راح اجرب هالطريقه فالتنظيف ,, لاني دووم انظف الشدو من الخارج و امسح البقايا المتناثره و عمري ما جربت امسح الشدوو من فوق بكلينكس !!

و تستاهليــن آحلى تقييم حبيبتي ..

[vanilla cake]

ما شاء الله موضوع وااايد حلووو ويشجع الواحد انه يقوم وينظف مكياجه يعطيج العافيه حبيبتي
وتعجبني افكارج بارك الله فيج

[$$um ali$$]

السلام عليكم

ما شا الله عليج عيني عليج بارده

ربي يحفظج

ما شا الله ما قصرتي

اللّه ييسر لج و ايسري لي زيارة بيته الحرام عاجلاً و ليس اجلا يا رب

[Omniyat Shop]

تم التقييم ياحلوه

[مشكلتي دلوعة]

ماشاء الله ياعسل تنظيف ولااروع رجعت جديدة من اول وتفتح النفس للاستخدام تتهني فيها ياحلوة

[عذبة العيون]

ماشاء الله مجهود رائع تشكرين عليه


يعطيك الف عافيه