صورت لكم عشانا اليوم
وهو طبق بحريني او خليجي شعبي
يتوفر ع الموائد ف شهر رمضان بكثرة
وبعض البيوت ياكلونه يوميا
أول مرة سويت هالطبق بعد الزواج
استغرب زوجي من طعمه
ومن كثر ماعجبه
طلبه 3 ايام متواصلة:)
قال لي اول مرة ياكل شي بهالحلاة
نجي المهم بسنا هذرة صارت قصة حياتي كلها
طبقنا هو الكباب
المقادير
طحين نخي-حمص
طحين عادي
بمقدار ملعقة طحين عادي لكوب من طحين الحمص
بهارات مخلوطة
ثوم بودرة
زنجبيل بودرة
فلفل اسود
فلفل احمر حاار
كركم
ملح
وطبعا ماء للعجن
>>> نضيف الماي للمقادير ونعجن
تكون العجينة ثقيلة اثقل من القيمات
لأن بنضيف عليها الخضرة وبتسيح
*نقدر نستبدل الطحين العادي بطحين اسمر
** سبب اضافة الطحين العادي هو انه بعض انواع طحين الحمص فيه نكهة قوية
لأن الحمص يكون محمص وبعدها ينطحن
الخضروات
بقل....... اعواد طويلة خضراء من الخضروات الورقية
بصل مفروم
ثوم وزنجبيل
جزر مبشور
بطاطس مبشورة
نعناع
كزبرة
بقدونس
ريحان
فلفل اخضر رومي
فلفل حار
طماطم
>>> نقطع كل الخضروات بحجم صغير جدا
*ممكن نستغني عن بعض الخضروات
الوصفة الرئيسية فيها بقل وفلفل حار بس
والباقي تطور للطبق عبر الازمان:)
نخلط العجينة مع الخضروات
ولازم تكون العجينة اقل من الخضروات
عشان يتميز الطعم بالخضروات مو بطعم العجين
نسخن الزيت ف المقلاة
المفروض يكون الزيت غزير مثل الفلافل
بس انا اسويه بدهن اقل
عشان ماتنتفخ
وافضله لما يكون مسطح مافيه عجين ف الوسط
نجي للمهمة
بملعقة الطعام
نصب ف الزيت ملعقة ملعقة
ونحمره حتى يستوي من داخل
ونقدمه بألف هنا وعافية
حياكم شوفو صور طبقنا - عشانا
وهذي زوووووووم ع الصورة
اتمنى يكون طبخي عجبكم
اللي تجربه تقول رايها
