قصة ولادتي بنور عيوني (حيدر)

عاد لما جات الساعه 4 تذكرت ان باقي شوية اشياء فقمت سويتهم وجهزت تمر العجوة وماي زمزم وادعية الولادة

ورحت سبحت ولبست وصحيت زوجي الساعه 5 وسبح وصلينا وطلعنا منطلقين للجامعة هههه

وصلت 6 وربع ورحت عند اختي نمت لحد 11 وبعدها رحت اشتريت لي اكل خميت الفير كله ورحت المستشفى

لما دخلت قسم امراض النساء والولادة الممرضات طبعا حافظيني ، قالوا ننتظرج من الصبح هههه ، خلصت الوزن والضغط والحرارة وهالحركات ورحت سريري وجلست اضرب بو شارتنه ومعاي كتاب عبقرية مبكرة لاطفالنا اقرأ فيه، هالكتاب عجيييييييييييييييييييب

العصر جاني زوجي وجوا عندي صديقاتي والمغرب بدأ راوند الدكاترة

جات عندي دكتورة ثور اكرهها من قلبي دائما تقول لي كلام خطأ وقالت لي احنا بس حاطينج ملاحظة ، انتي تتدلعي وما بنولدج بطلق بنخليج ليما تولدي بروحج


طبعا سفهتها وسكتت عنها لان متعودة فكل مرة تخرف لي كلام من عندها


اليوم الثاني جاتني دكتورتي وقالت اول مايفضى سرير في الولادة بننقلج ولكن لازم بالاول تاخذي جرعة منشطة من البيتاميثازون - ابرة الرئة- لان اللي ماخذتنها من زمان كانت في الشهر السادس

خذيت الابرة الاثنين الساعه 3 الظهر

وهاليوم طبعا زوجي ماقدر يجيني لانه رايح صحرا وبيرجع الثلاثاء المسا

الموهيييم ، عدت ليلة الثلاثاء وانا ماعارفة وش الوضع وتليفوني ما سكت من الاتصالات وانا بروحي فعالم يا اما اقرأ كتابي او افرفر فالنت، وكل الليل جلست على عروس بعدها وانا خااايفة مرررة ما اعرف وش وضعي

يوم الثلاثاء الصباح جات عندي اللي في السرير اللي جنبي وجلست تحكيلي قصتها ، تخيلي متزوجة من 15 سنة وهذا اول حمل لها

يا الله صحت من قلب وحمدت ربي عالنعمة ، وجلست تحكيلي معاناتها هي وزوجها في العلاج بين الجامعة والسلطاني والرستاق لحد ما حملت ، المشكلة كانت منها هي وزوجها! والمشكلة انه عندها ضغط وسكر وكانت فنفس اسبوع حملي ويراقبوا البيبي لان دقات قلبه مو منتظمة وقرروا يولدوها بطلق وجلست تبكي تقول لهم انتوا ما حاسين باللي انا مريت فيه ليما حملت ، ما اريد طلق اخاف انها تروح مني ، ابولد بعملية


بعدين بدا راوند الدكاترة وجات الدكتورة تقول اليوم اول ما يفضى سرير خلاص انتي ولادة وانفجعت اتصلت بأختي تو تو تجيني وتجيبي حدال وصبار وبزار وفلفل وملح هههههههههههههههه

وجات طبعا وجلسنا سوالف وضحوك ونسيت شوي السالفة وجلست اكل حدال وام سليمان وام ميسوم يراسلني فديتهن وقفن معي وااااايد

وبعدين راحت اختي عالساعه 1 وجلست بروحي صليت وجلست اقرا سورة مريم وكنت ابنام واسمع عند الريسبشن النيرس تقول يلا بناخذ سرير 7.3 للولادة وانا طااااااااااااارت روحي لان استوعبت انه رقم سريري ههههههههههههههههههههه


وقمت بسرعه اتصلت بحميتي وعمتي وقلتلهم تو تجووووووني بيودوني الولاااااااااااااادة هع


واعتفست وحالتي حالة الملم اغراضي واسكر لابتوبي ههههههههههههههههههه


وجا المضمد جاب الكرسي قلتله لااا بروح امشي وشل اغراضي والممرضة شالة ملفي وشنطة لابتوبي وانا خااااطفة اركض وراهم رايحين غرفة الولادة

نكمل احم احم


لما وصلنا قسم الولادة الممرضات يضحكن علي يقولوا وش عندها هالبيشنت جاية تركض هع استحيت

المهم ركبولي على طول التخطيط وجات الدكتورة فحصتني وذبببببحتني من الالم ايدها عرييييييييضة وفي الحلقة الاخيرة قالت اساسا انتي عندج بوادر ولادة فيه افرازات مخاطية بدم ومفتوح الرحم 1-2 سم وحطتلي اول تحميلة طلق وكانت الساعه 4 وقالتلي انه فيه ناس ما يستجيبوا إلا للحقنة الثالثة وقالت المخطط انه بعد 6 ساعات يشيكوا علي ويحطوا التحميلة الثانية وبعدها ب6 ساعات الثالثة ولو ما استجبت بيعطوني بريك 24 ساعه وبعدها بيرجعوا يعطوني 3 بعد

وفهاللحظة دخلت عمتي وحميتي وانا فرحانة احسب بس نفس الالام اللي فيني ماوايد بتزيد وشوي شوي احس الالام تزيد وانا كلما يجيني الم اضحك اقول الله بولد وعمتي تقول لي ترى ذا بعده ماااااشي وانا ادوووور فالغرفة لان الالم عاد بدا يزيد ومسكينة حميتي تسدحت مكاني عالكرفاية كان تجيها الممرضة تقول لها نزلي ولا ترى بفحصج بدالها هههههههههههههه واساسا حميتي ما متزوجة


كل هذا وزوجي العزيز بعده ما وصل :(

الساعه 7 انا واايد عندي الام جوا وركبولي التخطيط وقالوا مااااشي طلق اساسا هئ هئ جد جد انصدمت لان الالام اقوى من الدورة بملايين المرات

واتصل زوجي بهالوقت انه وصل بس بيروح البيت يسبح وبيجيب عشا ويجي وانا فرحت قلت شكلي بولد الفجر وزوجي عندي ههههههههههههه ما احسب الدرب طويل بعده

المووهيم ان بعلي العزيز وصل الساعه 9 ونص اظن وجايب معاه فطاير وحركات وجايبلي عصير اناناس بناءا على نصيحة ام تميم اظن

وانا من الالم ماااقادرة اصلا اكل ولكن غصبوني عشان ما افقد طاقتي

الساعه 10 روحوا عمتي وحميتي وبقى عندي زوجي واللي كان مسكين مانايم يومين ورا بعض وحدددده تعبان،،،

والساعه 10 ونص جات نفس الدكتورة تفحصني وطبعا قالت ماافيه طلق للحين في السي تي جي ولكن التوسع زاد 3-4 سم وانا فرححححت قلت يالله الحمدلله مابنطول شكلنا

وكانت الالام مستمرة وكلها على بعضها يعني ماتفكني اساسا مافيه بريك بين الليات على قولة زوجي

الساعه 11 حطولي التحميلة الثانية واااااخ يااربي كيف الالم زاد وهمه طايحيبي ماااشي طلق


رحمت زوجي وقلتلهم يجيبوله بطانية ومخدة ونام عالكرسي وطبعا كل شوي يتنزق يشوفني لا يكون فيني شي

وانا يا ادور في الغرفة او اطلع في الممر امشي وكلمن يشوف شكلي يقول لي تو انتي حااامل اساسا؟ وانا خااااااااطري اكفخهن اقوم ارص الثوب على بطني واقولهم شوووفوا ذا وش ههههههههههههههههه

كل شوي ارجع الغرفة احاول انام ماااقدر من الالم ويقولولي استخدمي الغاز بس ماا اطيع اخاف ههههههههههههه

وطبعا عندي ماي زمزم وتمر وانا رايحة ورادة ابلع منه واطلع اروح الحمام وارد ابلع وهكذا هههههههه

اخييرا طلع الصباح وجلست انتظر الدكاترة يمروا لان خلااااص تعبانة وابغى اعرف وش وضعي تو وهل زاد التوسع ولا لأ


مروا تقريبا على الساعه 8 وانا مسوية نفسي متحملة واساسا كنت اصييح ومسكين زوجي كل شوي يتنزق لما يدخلوا عندي وقرر انه خلاص مايبا ينام ههه


المهم قلتلهم ارجوكم خلاص مابا فحص وايد يعور


ومسكينة الدكتورة تقول لي هااانت مابقى شي وتصيري ام خلينا نخلص

المهم جات وتحملت وفحصتني وكان تقول اساسا عنق الرحم مفتوح من برا بس من داخل متسكر نهااائيا واللي برا مفتوح بس 1 ونص وكااااااااااان افتحها مناحة واقول لها كيييييييييييييف وذيك البارحة تقول لي 3-4 سم ، وكانت هذيك اللي فاحصتني موجودة قالت اساسا انتي عنق الرحم وايد بعيد وانا ايدي قصيرة ماقدرت افحصج زين تخييييييييييييييييييييييييلوا وش كنت بسويبها هالمخلوقة

بس بجد اللي كان وايد يصبر تعامل الممرضات والميدوايفز واااااااااااااايد حلو


المهم حطولي التحميلة الثالثة وانا خلاااااااااص منتهيه ماقادرة

وحطوا التخطيط وطلع طلق جددددا خفيف ومسكين زوجي يمسح على راسي وظهري ويحاول يهديني


جات الساعه 1 وزوجي مسكين تعبان ويبا يطلع يروح يتغدى ويريح ظهره، فاتصل بأمه واخته يجوني وهو راح بعد ماوصلوا وكانت عاد 2 ونص تقريبا

ولما جوني جايبيلي صحن كبسة دجاج وانا من اللوعة والتعب والالم ماقادرة اكل لكن مسكينة عمتي جلست تقول لي وايد بتتعبي ومابتقدري تولدي احسن تاكلي ومااااتشوفوا غير فتافت بلعت الصحن كاااامل هههههههههههههه وبعدها رجعته وطبعا جاني اسهال

وعمتي لما شافت كيف شكلي وايد رحمتني وكلمت الممرضات تقول لهم شوفوا كيف هي تعبانة ليش من الاساس ماسويتولها عمليه خصوصا ان حركة الطفل ضعيفة وتخاف انه مايقدر يتحمل الطلق والممرضات انقسموا فريقين اللي يأيد العملية واللي يقول احسن الطلق وانا اقول دام بدينا بالطلق احسن نكمل

جات الساعه 4 وانا خلاااص قمت اغيييب عن الوعي من الالم وتعباااااااااااااااانة

جات الميدوايف تفحصني الساعه4 ونص وانا مسكرة رجولي بقوة ماطايعه اقول لها يكفي الالم اللي فيني ، الحين بتقولي مامتوسعه

وبالغصب خليتها تفحصني وكانت يدها خفيفة ربي يجزيها الجنة وقالت شكله 2-3سم

شوي وجات الدكتورة تبا تفحص ومااااااااااطعت كان تقول لاااازم قلتلها والله توها ذيك فاحصتني ههههههههههههههههه وتجمعوا 3 دكتورات وكم ممرضة بس عشان يقنعوني اخليها تفحصني مرة

وقررت الدكتورة تعطيني جرعة طلع 4 وانا اصيح واقول لها ماااقدر اتحمل اكثر بموووت وهنا هي حطت لي الغااااز وبديت اهلوس شوي ههههههههههه


اقول لخالتي تو تو اتصلي بزوجي خليه يجي ومسكينة اتصلت له

المهم الدكتورة فحصتني وقالت 3 سم وقالت بفتح الماي عشان يسرع الوضع وعشان يحمي الطلق ، وانا مامتخيلة كيف ممكن يحمي اكثر من كذا


فتحت الماي وكااان تسبحت كلي وهي مخليه يدها دااخل الرحم مثبته البيبي تقول عشان لا يرتفع او يلف او يلتف عليه الحبل السري


وهنا صار شي مااااكان في الحسبان ابدا

الدكتورة هنا واااايد رحمتني اساسا وخيرتني انه يا اخذ ابر في العضل وهذي بتمص 30% من الالم او اخذ ابرة الظهر اللي انا اساسا معارضتنها نهائيا وطبعا خالتي مسكينة ماكانت تعرف وش ابرة الظهر وكانت وايد خايفة علي لان 6 ممرضات ودكتورات واقفات على راسي اللي مثبته الجنين لين يطلع الماي واللي تركب التخطيط واللي ماسكة الغاز

المهم بدوووون شعور قلت لها ارريييييد ابرة الظهر وعلى طول اتصلت بأخصائي التخدير

الساعه 5 جا اخصائي التخدير وشرح لي كيف الابرة ووش اثارها وقال لي بتمص كل الالم ولكن وقت الولادة بحس اني اريد ادفع بس!

وسألته عن اثارها الجانبية وقال لي انه بيجيني الم ظهر وصداع 3 ايام بس وخلاص ووافقت على طول ووقعت

وهنا بالمرة الممرضات بدلولي ملابسي عشان يسويلي اياه


فهاللحظة دخل زوجي وكان متروع مافاهم وش جالس يصير بس قلتله يجي ويمسك لي الغاز ويثبتني وهو مافاهم وش ذا كله اللي جالس يصير

المهم سأل الدكتور وقال له انه ذا تخدير وكذا فقال له زوجي انه انا اساسا عندي مشكلة في التخدير ومايشتغل عندي إلا التخدير الكلي، فطمنه الدكتور وقال له ان شاء الله بيشتغل ذا معها


وجلسوني على طرف السرير وزوجي قدامي ماسكني مثبتني وماسك لي الغاز والدكتور ينظف ظهري عشان يحط لي الابرة


اول شي عطاني ابرة بنج فأسفل الظهر وبعدها دخل لي الابرة الاساسية واللي هي طريقتها نفس السقاية بالضبط

دخل ابرة فيها انبوب في الحبل الشوكي اظن وسحب الابرة وبقى الانبوب وثبته وبعدين نيمني على ظهري والانبوب موصل بجهاز يضخ فيه مخدر

كلها دقايق وبديت احس بثقل في رجولي والدكتور قال يعني خلاااص بيشتغل ان شاء الله وقال اذا اي شي صار او رجع الالم اتصلولي

هنا انا هديت شوي الحمدلله والالام خفت وكنت احس بس بنبضات قوية فبطني


وهذا الكلام كان يوم الاربعاء الساعه 6 المسا

انا هديت شوي وارتحت وغمضت شوي وكان اسمع صوت مسج فتحته ولا امي مسكينة تحاتيني وتقول لي انه اختي تبا تجيني بس زوجي كل شوي يقول لها لا بعدين

وهو اساسا انا اللي كنت اقول له يأخرها عشان اباها تكون معي حزة الولادة ما تجي وتجلس عالفاضي وانا ماعرف متى بولد


المهم قلتلها خلاص ماماتي خليها تجي واتصلت بأختي وقلتلها تجي وعاد يبالها ساعتين طريق ليما توصل

جلس زوجي يقرا علي وانا نمت شوي وعمتي جنبه تقرا قرءان فديتها

قمت الساعه 8 جاية السكيوريتي تقول لازم واحد من اللي عندي يطلعوا ماينفع الاثنين وبالغصب وافقت يجلسوا اثنينهم

وحاولت انام ماشي فايدة اساسا ماتتخيلوا وش صار

بدأ يروح مفعول التخدير من الجزء الايمن من جسمي وبقى في الايسر بس!

وقلت لزوجي ونادى الممرضة وقالت لي رفعي الجزء الايسر عشان يتركز التخدير في الجزء الايمن ولكن ماااشي فايدة ورجعت الالام بقووووووووووووووووووووة ولكن بس في الجزء الايمن وفي الجزء الايسر كنت احس بنبض بس


وارتفع الطلق في التخطيط فجأة

وكانت الليات كل 5 دقايق وعمتي تقول لاااا بعدنا مطوولين اساسا لان المغرب كان 3 سم

واتصلت حميتي وخبرها زوجي الوضع وقالتله صدقني ان شاء الله عالفجر بتولد

المهم اتصلوا باخصائي التخدير وزودلي جرعة التخدير بس ماشي فايدة الالم كلماله ويزيد

جات الدكتورة وفحصتني وقالت 4 وكان هالكلام الساعه 9

وهنا جات اختي حبيبتي فديتها وروحت عمتي البيت وزوجي وزوج اختي جلسوا برا ينتظروا

وكل شوي زوجي يجي يطل ويهديني وانا ماغير اصيح من التعب واختي تقرا علي

وجات الدكتورة قالت الساعه 1 ونص بنركب سقاية طلق

وفاجأتني اختي بخبر انه زوجة اخوي ولدت يوم الاربعاء 8-12 وجابت بنوتة قبلي بيوم بس ههههه حماس لاه؟!


المهم جات الساعه 12 وجات الدكتورة تبا تفحص وماخليتها قلتلها مستحيييييييييييييل انا بمووووت من الالم وانتي ماغير تجي تفحصي

ماااعرف كيف عدا الوقت وجات الساعه 1 وانا خلاص منتهية اقول للمرضات انا ماااقادرة اكثر


جات الميدوايف وشيكت التخطيط تقول ان شاء الله على الصبح او الظهر بتولدي لان الطلق جالس يزيد

جات 1 و20 وجات السيكيوريتي وقالت لازم الحين واحد يطلع ومسكين زوجي طلع على اساس شوي ويرجع يدخل

هنا انا اقول لهم احس بشي ثقيييييييييييييل ماقاااااادرة


وكل هالالم بس في الجانب الايمن والايسر بااااااارد ههههههههههههههههههههههههههههههههه


جات الممرضة تقيس قالت 7-8 سم واحتشروا بسرعه يجهزو للولادة وانا ماقادرة جالسة ادفع


لكن من غبائي اساسا انا تعبانة وماقادرة ادفع ولا عارفة ادفع

اوصل البوش بس لين اسفل بطني وما اكمل ههههه واختي عيت تفهمني و3 ميدوايفز وممرضة عندي


المهم الساعه 1و35 قلتلها خلاص ما اقدر اكثر وبس جلست اشوف عليهم ماقادرة لا اتكلم ولا اتحرك ولا اسوي شي

وهي تصرخ علي تقول لي راس البيبي في المهبل بيختنق وانا ماقادرة


قامت وسوت لي شق كبيييييييييييير وانزلق حيدري حبيبي الساعه 1 و42 وكان الحبل السري ملتف عليه ولكن الحمدلله فكته بسرعه


وخلته على بطني وانا مبققة عيوني فيه ومرة اشوفه ومرة اشوفهم ومرة اشوف اختي مامستوعبة


اقول حال اختي لحقيني هذا ولد اخوووييي هههههههههههههههههههههههههههههههههههههههههههههههههه هههههه لانه يشبه اخوي

المهم بسرعه شالوه يلفوه وياخذوا قياساته وهالسوالف واختي بسرعه اتصلت لزوجي تبشره وزوجي جاي منصعق مامصدق لان توه قبل ثلث ساعه طالع قايليله بتولد عالظهر ههههههههههههه


مسكين دخل وجا وباسني على راسي وجا يبا يلف يروح يشوف ولده وشاف الميدوايف تغرز وتخيط هع وفتح عيونه عالاخر بس طنش وراح يشوف ولده



يااااااااااااااااااااي احلى لحظة لما شاله وجا جنبي وأذن فاذنه

جلست اصيح ونسيت ذيك اللي جالسة تغرز

وعاد جا اخصائي الاطفال وكشف عليه وقال الحمدلله ما يحتاج حضانة وانه بخير

وبالمرة جابوه على صدري وقالوا لاااازم تحاولي ترضعيه عشان لو شارب وسخ يرجع


حاولت بعد عناااء مص شوي


وشلوه مرة ثانية ودخلت اختي تلملم اشياءاتي وخذتني الممرضة سبحتني وودوني انا وولدي الجناح


وفالجناح اول شي شلوه هوه وخذوا ملابسه وقالولي بنرجع لج اياه الصباح عشان ترتاحي


ونمت الساعه 5 احلى نومة من بعد تعب وسهر 3 ايام


-------------------------------------


دعواتكم لحيدر ربي يشفيه ويعطيه الصحة والعافية ويجعله بار بوالديه

في الحلقة الجاية بحكيلكم تفاصيل الاسبوع المرهق اللي قضيناه في المستشفى بعد الولادة

الحمدالله على سلامتك ياأم حيدر

والله يخليلك الحلو أن شاءالله

أم حيدر

ربي كان في عونك 3 أيام فالولاده

إن شاء الله يكبر وتشوفيه معرس وتربي عياله وعيال عياله

:)ألف مبروك حبيبتي
عانيتي كثير بس اهم شي انك انتي وحيدر الحين بخير الحمدلله

الحمدالله على سلامتش بجد قصتك غررريبه ومبروك عليك حيدر ويتربى بعزك ياقمر

1000000000 مبروك ام حيدر

ويتربى ف عزك

والحمدلله انك قمت بالسلامه

الحمدالله على سلامتك ياأم حيدر

والله يخليلك أن شاءالله

يممممممممه فلم رعب...

اني ولدتين مرتين من قبل وعندي افلام الرعب حقتي.. بس فلمك يا اختي اكشن اكثر

المهم الحمد لله على السلامه وانشاء الله كله اجر وعافيه

جتني الصيحه

الف الحمدلله على سلامتك ام حييييييييييدر ويتربى البطل بعزكم يااااااارب

الف مبروك حبيبتي
والحمد لله على السلامه
ويشفي حيدر يارب وتشوفيه احلى معرس

ياربي
حمدالله على السلامة
ويتربى في عزكم ان شاء الله
من جد قلبي عورني وذكرتيني بالوجع
الصراحه بكيت تخيلت نفسي مكانج
الله يخليه لج وتشوفينه معرس ان شاء الله