كاتب بحريني في احدى المواقع يكتب سلسه من المواضيع الواقعيه بطريقة ساخره ... يعني يقط نغزات ;)
دكاترتنا ربي يحفظهم ماتم شي ماقالوا يسبب السرطان بعيد الشر عنكم .... الطماط، البيبسي، الخس، البقل. البصل، التكه، الباجه ... ماخلوا لنا شي ناكله ... حتى البيض والطماط الي اهي الأكله الشعبية رقم واحد في البحرين بعد قالوا اتسبب امراض ... يعني بالله عليكم شناكل ... ماي مفيوح؟؟؟ والغريب ان الدخاتر ياكلون كل شي من صوب وينصحون الأوادم من صوب ثاني ... حتى الجقاير نصهم يدخنون ولا عاد ذاك المصري الطويل مال طوارئ السلمانية يجوف له مريض قد 5 دقايق ويطلع يدخن ربع ساعه .... لا ومايعطي اجازات نفسه خايسه ربي يهديه!!!!!!!!!!!
يقولون والعهدة على الراوي ان المخالفات المرورية على شبابنا الجلحان فديت قلبهم قلت وايد مب مثل قبل ... والسبب مب لأنهم ملتزمين بالقوانين ... لااااا لأن وايد من افراد المرور الحين مايوقفونهم .... يدورون بس السواد في وين ) يعني الدفه ) لو وحده بس عطت اشارة غلط وقفوها عشان يعطونها مخالفة ... ويمكن عاد تتدلع عليه واتقوله سامحني هالمرة بلييييز الله يخليك ... عاد حزتها الدفتر مال المخالفات بشققه وبيعضه بضروسه .. يلعن ابو المخالفة .... بناتنا طال عمركم لاتهينون نفسكم عشان جم دينار بارك الله فيكم ترى ماتسوى ... وديروا بالكم ترى اذا الوحده اعطست في الشارع بيعطونها مخالفة .. يعني عطسي في البيت وطلعي ( يرحمج الله) !!!!!!!!!!
بعض الرياييل الله يهديهم ويهديني معاهم في الشارع في المجمعات بكل مكان عام يقعدون يتحككون جدام الناس ولا همهم شي .... يا اخي روح الحمام ( عزكم الله ) وتحكك لين اتقول بس ... عاد جذيه جدام الأوادم والحريم عيب .. وياريت بعد على الطاير لااااا ياخذ له 5 دقايق ورايح ولا يدري بالدنيا .. والمصيبة الأكبر ان بعض الحريم ياتهم العدوى .. الظاهر عبالهم شي حضاري هالسالفة عاد مايعوقون يقلدون وياحبهم للتقليد .. من اليوم وساير كل واحد يتسبح قبل مايطلع من بيتهم مب ناقصين فضايح !!!!!!!!!!
وحده من الخوات ربي ان شاء الله يسهل امورها ... حبت لها واحد طرطنقي مع مرتبة الشرف وآخر هالحب تقدم لها وطبعا اهلها عارضوا ولكن بالأخير خذها لأنها اصرت انها تاخذه ... وتمو مخطوبين تقريبا 6 اشهر .... يوم العرس قال لها بروح الصالون بتعدل ... قالت له روح والقلب داعيلك حبيبي .... راح وتأخر .... تموا يتصلون له مايرد ... الناس ينطرون دشته مع العروس.... طلع الريال رايح حق صديقته الفلبينية اتعدله وتحتفل فيه بمناسبة عرسه .. وسكر ربي يعافينا ورقد ولا يدري بالدنيا .... ويه العرس متأخر وللحين آثار السكر فيه .... وياب الفلبينية معاه .... قعدها على كرسي وراح حق العروسة وقعد يمها ... سالته من هذي .... قال لها فقيرة مسكينه امفنشينها الصالون ويبتها عشان ناخذ اجر فيها .... لا ورقصت بعد عشان تاخذ اجر عدل .... والحين هالأخت عندها ثلاثة اعيال منه .... صج لي قالوا الحب عمي .. ومكثر العميان في هالديرة ... الي يبي أجر في الفلبينية يخبرني !!!!!!!!!!!
البنات والعيايز الي يروحون المحل الي في السيتي سنتر .... اسمه اعتقد واهوووو .... روحوا استانسوا عاد مب تلبسون مايوهات وخربطة ... الحين انتي يالعيوز بالله عليج متلتله وحالتج لله لو يمقطونج صرتي شراع ... ستري على روحج ..وانتي يالبنية اتلبسين مايوه ودبتج شكبرها طالعه وتختض قاصر بس انحط فيها حليب ويطلع لنا زبد .... خشي بلاويج ... بتقولون عادي الا بنات ... لا ياخواتي .... هذي عورتكم مايجوز تطلع ... لايغركم لبس الأجانب ..ترى اهم كل شي عندهم عادي .... ولا عاد الألوان الحلوة مالت البنات الجلحان كل نتفه غير .. كأنك اتجوف مسلسل ابيض واسود + املح !!!!!!!!!!!!!
مادري شسالفة الأحكام هالأيام .... واحد بايق تليفون حاكمين عليه 6 اشهر سجن .. او واحد بايق مليون محكوم عليه اسبوعين سجن مع وقف التنفيذ .... واحد عزكم الله تافل بويه شرطي اثناء اداء الواجب يحكمون عليه بـ 20 دينار غرامة .... او واحد سب موظف عام يحكمون عليه بسجن شهرين مع غرامة 500 دينار .... والي عاد مصخها الي حكم بتعويض حق واحد قصوا ريله الصاحية وخلوا له الخرابة ... بـ 2000 دينار .... من صجهم والا يتغشمرون مادري .... كل واحد وعلى هواه ومزاجه الله يعين الي بيدخل على واحد رافسته مرته من الصبح .. سيده اعدام.... آخر القضايا ...واحد ذبح قطوه طلع براءه لأن القطوة عضته .. او واحد داس على زهيوي .. غرموه 300 دينار وحبس شهر لأن لزهيوي مادش البيت وكان في طريج عام .... التسعيرات :
1. ضرب شرطي مع عاهات مستديمة: 30 دينار .. ياعيني
2. البصق على الشرطي: 20 دينار .. بلاش والله
3. رفس الشرطي: تنبيه وأخذ تعهد .. يا حلاوه
4. قتل شرطي: براءة ... وبيت اسكان هدية ... شي شي (تبون امن وامان بعد (
5. رفع الصوت على القاضي: الأعدام شنقا ثلاث مرات ونص !!!!!!!!!!!!!!!!!!!
اجوف هالايام لمغازل رد على ايام اول .... كنت اظن انهم تطوروا يوم استخدموا البيبي الله يحفظه ويبلغنا فيه معرس ... ولبلو توث (الضرس الأزرق على قولة واحد من الأخوان) ... تموا يسوون حركات يديده .. مثلا وحده من الخوات اتقول انها كانت تمشي وتسولف مع صديقتها في الجامعه ... واتقول لها صح كلامج ..والا واحد من الميهل مال الجامعة يقول أي صح .. يبي يدش في الموضوع ويتخيفف يحليله .... جان اتقوله جب .. انصدم وعليه بس تقبل الأمر الواقع ومشى .... انا لو منها اصفقه باي شي وعقب ابتسم له واقوله غلط والا صح الي سويته فيك؟؟؟ .... عيب يا اخوان متى يعني بتكبرون وبتصيرون رياييل .... وياحسره على الرياييل .. كل واحد صبغ شعره وشنبه وارتز في الكوفي شوب من اتدش وحده عدل النسفة ... حتى الشياب تموا يلبسون كبوس وثوب مخصر ويروحون المجمعات ويقعدون يخزون ويتغشمرون مع الفلبينيات الي يبيعون .... لا خربت الديرة ... باقي بس دار ياكو يسوونها خلط عشان يتماشى مع التحضر والتسامح الديني الي احنا فيه
مساكين اليهال ودهم يلعبون ويستانسون بس كل شي غالي .. الحين هالياهل بياخذ فره على حصان بدينار .... مسكين بروحه خايف ومتبرعص وبعد تاخذون عليه دينار .... والا بيركب سيارة على بتري فرتين ثلاث بدينارين .... يعني ابهاتهم مساكين اذا يبون يودون عيالهم يبيلهم ثروه عشان يشبعون من اللعب .... بعد للحين مايبنا طاري باقي المحلات مثل عذاري وجنة دلمون وغيرها الي مساكين عيالنا يجوفون دعاياتهم بس ومن يسال ابوه شنو ذي يبه؟؟؟ يقوله هذي حديقة تماسيح عشان يخرعه ومايحن عليه .. خافوا ربكم يا اصحاب هالمشاريع ترى الناس على قد حالهم لاتستغلون ضعفهم جدام عيالهم .... كل واحد يسوي له دورفه داخل البيت وزحلاقة حق اليهال وعقب مايرقدون يروح اهو ومرته ويرشون الحوش ماي ويلعبون يازعم انهم في منتجع ارخص لهم !!!!!!!!
ياجماعة الخير احنا بروحنا مب بالعين معظم المعلقين الرياضيين الي عندنا بعد اتزيدون الطين بله واتيبون ناس يازعم محللين مايعرفون يتحجون كلمتين ورى بعض .... جمله مفيده ماعندهم .... والبدليات على كيف كيفك ... معقولة يعني اجوف مباراة بين فريقين بحرينيين والمحلل خباااااز مب بحريني .... احترموا الناس الي اتجوف ...احترموا ديرتكم .... شوي ويقول لنا في التلفزيون بيزن بيزن آموووو !!!!!!!!
واحد من الأخوان يقولي سالفة يدته ربي يطوللنا بعمرها .... يقول دشت علي ذاك اليوم والا اتقولي يمه ابي اتسويلي اشتراك حق الترترنت .... قال لها شنو ؟؟؟ قالت له الترترنت .... قال لها مافهمت يمه ... قالت له ذي الي يدشونه في الكمبيوتر .. قال لها أي انترنت .. قالت له أي .. فال لها ان شاء الله ... سوى لها عقب ماطحنت عليه .... والا يايه تتمخطر اتقوله تعال علمني شلون يدشون الشورت ... يعني الشات ... قال لها يمه من صجج الا اتقوله أي شفيها بدال ما انا قاعده طول يومي مجابله لطوف خلني اجوف الأوادم يسولفون ... علمها وتمت اتدش ... تكتب السلام وبس تقعد تتقهوى واتجوف السوالف ... ساعات يسمعها اتقول وييييييييييييه وعليه .. وساعات تضحك ... وساعات اتقول سود الله ويهك .. الظاهر احد مطرش لها رسالة خاصة ..... قام اخونا تسحلب من وراها يبي يعرف نكها عشان يغربلها ... طلع نكها ذبانه مجروحه .... وسوت لها ربع وعلى قولتها شله تسهر معاهم من عقب ماكانت مجابله السيادة والصلاة ليل نهار .. وصارت ترقد لي الظهر ... سبحان الله هالأنترنت والشات سوى بلاوي في اليهال ..والحين دور العيايز ... يمكن بعد عقب سنه اتصيرهاليده هكر من يدري!!!!!!!!
