حملة ضد الرجال (عرايس المنتدى شوفو شغلكم)

اولا اشكرك اختي ايوت على هذا الرد
اخوي الفرزدق اشفيك علينا طاير شوية وتصفخنا ، هذي وجهات نظر مختلفة واحنا حبينا نفهمك انه وجهة نظرك غلط ، يعني مافيها شي لو الواحد ساعد زوجته في وقت ضروري مثل لوكانت تعبانة يعني لازم تجيب لها خدامه!
مساعدتك لها راح تكبر في نظرها ويزيد حبها واحترامها لك .
احنا ماهو قصدنا المساعدة يوميا يادوب تهتم باغراضك الشخصيه والله يعينك على تفكيرك
السموحة:smile:

انا زوجتى حاطلها خدامتين مو وحده

وحده للطبخ والثانيه للغسيل

وعلى شان يونسونها بعد لان احنا بروحنا بالبيت

يعنى اهى اصلا ما تخم ولا تغسل مواعين وشلون انا

تدرون بنات؟؟؟

انا ما ابغا اشارك عشان الفرزدق موجود

بالنسبه لي خربت القعده

و الظاهر انتوا عارفين ليه.. يتعمد اقواله اللي فيهت هجوم و تعدي على المراه

عشان يردون عليه البنات.....

و الصراحه ما عاد لي نفس اقرا ردوده اللي على هاذي الشاكله

ام نواف

هيه والله صدقتي يبغي يهاوش لكن ما يشوف ردونا متعصب لرايه




:cool:

صراحه موضوع مسكة ولا تعطون الريايل فرصه في انهم يهاجموكم انا هذا اخوي الفرزدق واااااايد يغايظني بأسلوبه كأنه دخل يشارك في الموضوع بس عشان يغايظنا

بس واااااايد محلي السالفه اخوي الفرزدق السموحه منك

ya jma3ah,, methle mafi reyayeel salbeyeyn fi 7reem slbyat,, ana 3momn
aqader al reyayeel o hatha 3n tjrobah,, ryli ansan netheef o metfahem o yesa3dni fi kel shi,, n7n methel al asdeqa'a,,

9b3n n7n tezwjna 3n 7ob o al7mduleleh al 7een lena 3 snwat be7b o salam,,
arfeth ay hjoom 3ala al reyaeel,,
o daymn a7es alansan masoal 3n a5tyaratah
sorry girls:o

هي والله ما نباكم تغسلون وتخمون..

بس حسو فينا ...مثل ريلي الله يهديه والله كل يوم ارتب ثيابه في الكبت وكل شي مرتب بس خليه ياخذ شي من الكبت اللا عفس الكبت يعني لازم ارد وارتب ثيابه واكويهم من اول ويديد والله اني تعبت...

وغير عن الحجرة بس خلوني اطلع دقيقة من الحجرة يوم ارد اشوف زباله مب حجرة


واللللللللللللللللللللله تعبت


حسوووووو فينا يا الريااااااااااااييل

انا بشارك برااايي
انا وااايد أأيد مساعدة الرجل لزوجته لأبعد حد شو فيها يعنى تراها هي بعد ما اتقصر

على الأقل بيقدر يعتمد على نفسه في حالة مرضها ولادتها ودخولها المستشفى يعنى بيكون متهيأ لأي ضرررررف :s2 وإلا شواراايكم

المهم
عندي صديقة متزوجه من رجل أحس انه مافيه أثنين في العالم مثله طبعا مابذكر أخلاقه اللى مالها نهايه ولا حنانه وإستقامته وحبه لها لا لانى لوذكرت هالشي مابخلص اللهم لاحسد :up:

اتعرفون من تزوجوا وهم متفقين قبل لا يطلعون للعمل ايكونو منظفين البيت واللى يوصل البيت قبل الثانى بيتدي ايحضر للغدا وإذا الثانى كان مريض لا ايضن انه البيت بيخرب لانه كل واحد منهم ايكون عارف لكل شي في البيت من وغسل وكنس وتنظيف حتى الأطفال بعد هو ايساعدها في كل شي ايخصهم
يعنى كأنه هو الأم والأبو وهي كذلك وكل واااحد ايكمل الثانى ( اللهم لا حسد )
اتصدقون انه حتى تنويم الأطفال اللى منهم ايقوم فليل يصيح بعد يتناوبون عليه عشان اينومونه وحتى عمل الحليب لهم وتغسيلهم
والله كلامى صحصح 100%100 :up:

يارب ترزقنى برجل لو بربع أخلاقه وطيبته وحبه وعقليته الحلوه

أرتب وهو يعفس لا بخليه كبته معفووووس لين ما يقول ليش ما رتبتي وبعدين أقول له ليش ما رتبت من حضرت جنابه :cool:

لا تنسون بنااات في ريااايييل يساعدون شوي لكن مع هذا الا هم شوي واايدييييييييييييييين الي ما يحسون بتعب الحرمه يقولون لها شو يعني شغل البيت احن نتعب أكثر يمههههههههههههه تذبحني هالكلمه لأنهم ما ينظفون ويمسحوون بس خلي لو محتاجين شي وهم يدرسون في الخارج
ينظفون ويعملون عماايل بس فاضيين يستخقون علينا ناااااس :cool: :eek:

انا عني عشت بدون خدامه مده 7 اسنين اول سنين كانت عندي وناسه

انظف وارتب واكوي اوبعدين صرت اطبخ لين صار عندي 3 اطفال الله

ايخليهم بس عقب رفعت الرايه وستسلمت لاني حسيت اني متزوجه

علشان اكرف اوبس لاطلعه ولا سفر والا وناسه غير السجن والحبسه في

البيت مافي اوتميت كلمايكلمني اقعد اصيح عليه من التعب و الزور الي

ضايقته ماقول اهوه مايساعدني لا حرام ايساعدني بس اشقد بيساعدني

شغل البيت اكثر مني اومنه او خبركم الياهال والحمد الله زادو اكثر

يعني في النهايه مافي الا ايكون عندي خدامه اساعدني في البيت

معني ماشتغل اوقاعده في البيت واداد حق الموضفات لانه اكيد اهمه

ايتعبون اكثر مني لاكن بعد تعب اومافيه شي اذا الواحد مد يده على ثوبه

اوعلقه على الشماعه والله شال الكلينس من على الارض او كنس الارض


او حتى رتب السرير اوشاف الياهال صدقوني اليد الوحده ماتصفق


يعني الواحد اشكثر بيعيش اشفيه اذا خله شي زين المره اتذكره فيه بعد

عمره وانشاالله عقب عمر طويل والله ان المره في بعظ الامور الريال

ايشوفه سخيفه اوتافه اوتكون عند المره كل حياته بس المشكله ان

معضم الريايل مايعرف سياسه المره والاقليه منهم اهوه الي فاهمه

وانشالله ماكون طولت عليكم بس جني قصيت قصه حياتي<<<<<:)

السلام عليكم و رحمة الله وبركاته

طبعا لم يكن لي رغبة في الرد على هذا الموضوع لو لا رد الاخ فرزدق

يا اخ الفرزدق اذا انعم الله عليك و نشأت في بيت يوجد فيه الخدم و الحشم فلا تحقر هذه الاعمال رجاء.ً

لان بعض هذه الاعمال قام بها خير البرية محمد صلى الله عليه و سلم وكذلك صحابته رضوان الله عليهم.

كما اني لا ارى اي نقص للرجولة في القيام بها وان كنت لا احبذ الحديث عن نفسي ولكم اخبرك اني من عمر 6 سنوات وانا اعاون والدتي حفظها الله في امور المنزل وهذا من البر بها بل واقوم بمعاونتها في شؤون اخواني الاطفال من لباس و التغيير لهم. وكذلك كنت اقوم بمساعدتها في المطبخ وكانت تعاير اخواتي بي حيث اني اجيد ما لا يجدن.وكذلك لا اجد ولله الحمد اي خجل بهذا الموضوع مع اقراني فالكل يعلم باني اقوم ببعض اعمال المنزل.

على العموم خدمة اهلك في اعمال المنزل من البر بهم و تنال الاجر بأذن الله

ولكم تحيات جدكم شوّيب

بنااااااااااااااااااااااات

روقو وهدو اعصابكم رجال المنتدى ماراح يسمعون منكم ولاراح يفهمون وجهة نظرنا ومتأكده ان اللي قروا الموضوع ماعاد رجعو له

وبالنسبه للفرزدق خلوه مو لازم تقنعونه لا تعبون روحكم ماراح يقتنع
اهم شي رجالكم وهو الله يعينه علا تفكيره

ما فيها شي ادا الرجل ساعد زوجته في اعمال البيت اصلا له ثواب كبير والرسول كان يساعد زوجاته والامام علي بعد كان يساعد الزهراء في اعمال البيت الائمه الاطهار ايضا.

ياشويب الله يطول عمرك بس

نبيك عون صرت فرعون

اشعندهم الحريم من مسئوليات غير البيت وتربية الاولاد

لو اتقولها دفعى فواتير الكهربا والماى من راتبك قالتلك انا شكو انت ريال

البيت ؟؟انزين اشترى ثلاجه او غساله حق البيت راح اتقولك يبه انا مالى

شغل انت ريال البيت؟؟ طيب ماجلة البيت اتقولك انا الريال او انت؟

يعنى اهى ماتساعدك وانت راضى على انك انت ريال البيت ؟؟

فقامو يحوسون ويدورون ويدورون شى على الريال مالقو الا سالفة

المطبخ اللى ابائنا واجدادنا ما سووها وبيحطونها بروسنا على ابو تطور

لا يبه مانبى هالتطور اللى فيه غسل مواعين؟

يازينك ياشويب وربعك زايرينك بالبيت واتقولهم والله مشغول عندى غسيل

مواعين وطباخ ؟

اشفيك تبي تعفس الرجال على اهله ؟؟

وبعدين اذا انت عندك امكانيه تحط لمرتك خدم وحشم

في غيرك حاط لمرته الهم والتعب

يعني بدل ليرحمها ويساعدها يصير لها اخس من الياهل في الوساخه والاهمال

ومنت حاس بالمشكله لانك مو عايشها

ومرتك لو ما عندها خدم جان شفتها اشلون قلبت عليك وزعلت منك بسبب

انك مو حاس بالتعب الي تحصله من شغل البيت خصوصا لو كان البيت ماشاء الله كبييييييير

بس الي يده في الماي غير عن الي يده في النار

واذا في رأيك المره ما تساعد براتبها فكلامك خطأ * خطأ

احنا المجتمع البحريني المره معروف انها تساهم براتبها في الحياة الزوجيه هذا اذا مو كله قروض وديون وكلها حق بيتها
فماأدري عن المجتمع الكويتي اشلون بس اكيد المره ما بتبخل بمالها من اجل بيتها واولادها وزوجها

بس تدرون بنات الريايل ما بينوا ما في الا الفرزدق نهجم عليه ابروحه

الظاهر خايفين مننا:D2

أختي الحبيبة شعشبونة
لن نقول هجوماً على الرجل ولكن نقول دعوة للحوار الصريح والصادق ليخرج كلٌ منا ما في نفسه بطريقة مهذبة وراقية
فالأعمال المنزلية هي الوظيفة الأساسية للمرأة كما هو الحال مع الرجل فوظيفته الأساسية هي الجري وراء لقمة العيش وتوفيرها لعائلته
فلماذا يا غاليتي نطالب الرجل بالقيام بأعمالنا بينما نحن نبقى في البيت ولا نمارس عمله في الخارج
ونقف عند هذه النقطة فلو قلتِ بأنا هناك نساء عاملات أقول لكِ بأن عملهن ليس مفروض عليهن وأنهن أخترن العمل خارج المنزل بإرادتهن فلا داعي للتذمر من تأدية واجباتها المنزلية
وهناك الكثير من الرجال يساعدن أزواجهن بما تفضلت بالحديث عنه مثل تعليق الملابس ووضع النفايت في مكانها المخصص وهناك أيضاً من يعد من زوجته السفرة ثم يساعدها بعد الإنتهاء
فأنا أقول أن المرأة والرجل لكلٌ منهما دور في هذه الحياة والمسألة مسألة تعود فعودي زوجكِ على الإهتمام والترتيب وسوف ترين نتائج ذلك في المستقبل
شاكرة لكِ هذا الطرح الرائع
تقبلي تحياتي وفائق إحترامي وتقديري

شوفوا حبايبي

انا زوجي غير ((صلوا على النبي)) بصراحة ماعمري طلبت منه مساعدة وبخل علي بها ، وخصوصا اذا مريضة ايشيل البيت فوق راسه هو صدق مايعرف الطبخ او التنظيف مثل الزوجة لكن الحمدلله اللي يقدر عليه ايسويه.....

بسم الله الرحمن الرحيم

على اني مشغوله و اصلا ما كنت ناويه ارد على الموضوع مره

ثانيه(انتو عارفين ليش)

لكن لفتت نظري كلمه ان المراه ما تساعد زوجها في مصروف

البيت !!!

الصراحه مدري اضحك على هاذي النكته و لا اصيح..

اكثر الحريم يساعدون رجالهم لو معاهن فلوس حتى يا قلبي لو

ما معها الوحده و زوجها محتاج تبيع ذهبها و تعطيه...

انا صحيح ما اشتغل و لا شي لكن طول فتره دراستي بالكليه

كنت اخذ المكافات من هنا و احطها بيد زوجي من هنا....

اصلا المراه بطبعها عاطفيه ما تقدر تشوف زوجها محتاج و

تبخل..

و لو عندها و الله مغنيها ما عندها مانع تفتح له محل و تخليه يريح

بالبيت..

لكن مثل ما قلت...

الكل عارف هاذا الشي بس الاخ الفرزدق يتلكك .. و اذا بنفسرها نفسيا..

يا انه عنده صدمه من النساء سببت له هذا التعصب الرجولي المتكلف

يا انه لقى صدود من النساء ادى الى انه يحاول ان يجعلهن يتحدثن معه باي طريقه

حتى لو عن طريق الاستفزاز...

و لا ايش رايكم بنات؟

ام نواف

بالنسبه لام نواف

الاخت اللى كتبت الموضوع طلبت مشاركت الرجال وارائهم وانا

هذا رأيى عجبك ما عجبك مو شغلى انتى ماتفرضين علينا كلامنا .


وبالنسبه الى كلامك السوقى اللى قلتيه. ارد ببيت الشعر هذا


اذا خاطبك السفيه فلا تجبه ،،،،، فخير من اجابته السكووووت

الفرزدق:

ما في شئ اسمه واجب خدمة الزوجة لزوجها.. اللي تسويه المره حق ريلها طيب نفس منها مو واااااااااااااااجب .. والرسول يتكلم عن الزوج المثالي(مثل اللي تكلمت عنه العنقاء) و تأكد إذا كان الزوج مثالي زوجتة راح تعبده من ما يامرها أحد .. و اليال إذا كان يعشق زوجته راح يساعدها بكل حب , بس انتوا ما تحبون غير نفسكم .. و تدري شنهي مشكلتك .. إنك اتحسب إن الرجوله=استبداد و فرعنه و انك تحط ريل على ريل و تامر و تنهي(عشان تثبت لنفسك قبل لا تثبت لزوجتك رجولتك) و تحسب المرأة جارية انخلقت عشان تخدمك أو مكينة تفريخ تترس لك البيت عيال و ما تنظر لها على انها شريكة حياتك و نصفك الثاني اللي يكملك.
و إذا مستخف بشغل البيت و مجابل العيال , اشوفك امسك واحد من عيالك و جابله و شوف إذا ما شاب راسك و نزل وزنك لي النص .
و بعدين تربية الأولاد مسؤولية الزوج و الزوجة لأن أهم عياله مثل ما اهم عيالها و يحتاجونه مثل ما يحتاجونها..
و إذا تبي مرتك تصرف على البيت و تييب لك الماجله وين راحت الرجولة اللي ذابحنا فيها ؟!!!! الريال ما تسمحله رجولته انه ياخذ فلس من مره.. و مساعدتك لمرتك ما لها دخل في التطور .. لها دخل في مستوى تفكيرك و ثقتك في رجولتك اللي ما راح يخدشها مساعدة بسيطة لزوجتك.

Bronzeyay:

مو كل الرياييل مثل زوجج .. و إذا انتي جربتي غيرج جرب و ذاق المر .. و احنا مو قاعدين انتكلم عن الرياييل اللي مثل زوجج.. و الله يهنيج فيه و يتمم عليه.


العنقاء:

صح لسانج و الله يرزقج ابريال مثله.


كلهم قمرهم:

صاجه ياوخيتي الله يعينه على تفكيره.


ايوت:

في رياييل عندنا إذا بغوا يتزوجون يشرطون انها تكون موظفة عشان تساعدهم في صرفية البيت(خوش رياييل .. هذي الرجولة ولا بلاش) بس شاطرين يقولون حقوقنا , ما كأن عليهم واجبات , يعرفون شلون يستخدمون الدين لأغراضهم الدنيئه و نسوا ان الرسول وصاهم فينا و قال:رفقا بالقوارير.


المرتحله:

عمل النساء خارج المنزل مو مفروض عليهم مثل ما قلتي و حتى الاعمال المنزلية لأنها تقوم فيها لحسن العشرة مو لأنها واجبة عليها.

ms7o0o0or و الفرزدق :

والله انكم اتفشلون يا رياييل الكويت , صج ان في رياييل (كويتيين) نفتخر فيهم .. بس الظاهر ما في واحد منهم في هالمنتدى.

الدموع الحايره و شويب:
والنعم فيكم و الثلاثة أنعام.