اللهم لا اسالك رد القضاء ولكن اسالك اللطف فيه

ما اعرف من وين ابتدي .....بس الحمدلله على كل حال

كل ما اطلع من مشكلة ادخل في مشكلة جديدة ... وسبحان الله كل ما اقول خلاص الله بيفرجها ... سبحان الله ادخل في دوامة جديدة ... وكل مرة تعلقي بربي يزيد وكل مرة معاناتي تزيد ...وانا صاااااااابرة


كل يوم ادخل المنتدى واحاول اشارك في قضايا البنات لاني من كثر المعاناة صرت احس بكل وحدة لما تكون تعاني

بس اليوم ....لفت فيني الدنيا وماني عارفة شنو اسوي



كلكم اكيد قريتو قصصي مع زوجي ومشاكلي وضربه واهاناته ومعاملته السيئة .....الحمدلله بعد ماصبرت عليه سنة كاملة الحين من شهر بس بعد مشكلة كبيرة وبعد ما قررت انفصل عنه ....الله هداه

بس انا بعدني مجروحة ...وبعدني ما استرجعت ثقتي فيه ...وكل مرة احس ان هو ممكن بسهولة يرجع لطبعه السيئ ...وخايفة وحاطه فكرة الانفصال في راسي وماشلتها ابدا


بس اليوم .......خلاص لفت الدنيا فيني .......حاسة اني بموت من القهر ...لاني اكتشفت اني حـــــــــــامل



سبحان الله ...... شنو اسوي وين اروح ..... مالي وجه حتى اقول لامي ... ولا حتى لزوجي ....... استغفر الله افكر انزل البيبي


دموعي حابستها لاني في الدوام



الحمل مو وقته ابدا ابدا
استغفر الله العظيم اللهم لا اسالك رد القضاء ولكن اسالك اللظف فيه

توه ولدي بكرة بيكمل السنة توه صغير ويرضع

توني اشتغلت وماكملت شهرين وانا انتظر الوظيفة من سنتين من 2008


توني طالعة من مشكلة عودة وفلت لابوي كم مرة بنفصل خلاص مافيني

توه زوجي تعدل من معاملته السيئة لي

بنات المشكلة اني قايمة بكل شي لولدي مو قادرة عليه
زوجي حتى ما يرضى انه يخليه جنبه ادخل دورة المياه ( الله يعزكم ) وارجع
انا اللي اهتم بكل شي وزوجي ما يسوي ولا شي لاداخل البيت ولا برى البيت ولا حتى يرضى اني اودي الملابس تنكوي برى عشان اشتغلت مع انه قبل الشغل كان يوديهم ...ولا يرضى اني اجيب وحدة بالساعة تساعدني مع انه قبل الشغل كان موافق .... انا اسوي كل شي حتى لما ولدي يمرض ما يرضى يوديه الطبيب وانا لما وديته المرة اللي طافت ضربني .....انا الاام والابو ....انا الرجل والحرمة ويا دوووب الحق على كل شي الحمد لله بس


حتى ماكان يرضى يجيب له حفاظات ولا رضاعات انا كنت اجمع الفلوس من وراه واروح اشتريهم

الحين انا يادوب راتبي يكفي لي ولولدي ....الحمدلله كل واحد يجي والله يرسل رزقه معاه .... بس مشكلتي اني ما اريد البيبي

ما اكره الاطفال بس مو وقته... كل حياتي من زوجي مشاكل ... امس كنت قاعدة افكر فيه واقول بيني وبين نفسي انه ما يصلح اب

كان رايح السوق يشتري بلاي ستيشن جديد وطبعا كل وقته تلفزيون وربعه وما الى ذلك

انا لو نمت وهو صاحي يسويها سالفة ...ولو صحى ولقاني نايمة تستوي سالفة

وايد افكار وايد اشياء في راسي وكلامي مخربط بس راسي خلاص بينفجر


ما عندي حل غير الصبر .....يا رب صبرني