مساء الخير صبايا وبنات عروس
كتير استفدت من طرحكم المميز والرائع دوما
وأكلاتكم المنوعة والشهية
حبيت أشارككم بطريقة احبها كتير للفراخ المشوية
وكتير من صديقاتي مدحوني فيها
نبدأ بسم الله ونقول
المقادير
خردل - كاتشب-مايونيز- خل
ملح -فلفل -هيل -روزماري -توابل -ثوم ناعم
الطريقة
حنخلط كل المكونات دي مع بعض بس حنسيب الهيل على جنب
وحيكون شكلها كده
حنجيب الفرخة ونغسلها كويس جدا بالميون ونشطفها ونحضرها للتقطيع
حنقلبها على ظهرها وبالسكينة ومن فوق من عند الرقبة نبدأ الشق
وبعد كده حنفردها ونضغط عليها ببطن ايدنا
حنقوم بالدق بالمدق الخشبي لو مش موجود عندك بظهر السكينة وخلي بالك
وكمان حنعمل فيها فتحات صغيرة جداااا
هنا كمان من وشها
حنبدأ بتتبيلها بالتتتبيلة الجاهزة عندنا ومن كل حتة ونتوصى شوية
وحنسيبها لمدة ساعتين او ثلاثة او من بالليل يبقى افضل بكتييير
نيجي بقى لتجهيزها للشوي
حنجهز صنية فيها ماية ونحط فيها ورق غار وهيل ولو باقي شيء من التتبيلة نحطها معاهم
حتدي طعم وريحة جميلة جدااا
حنحط الصنية دي في آخر الفرن ونوسط الشبكة السلك في الوسط
نخلي بالنا متكونش قريبة من الشواية من فوق علشان النار متحرقش الفرخة
نحط بقى الفرخة في وسط الشبكة السلك
خلال نصف ساعة من تركها تحت الشواية حنقلبها ونسقيها من الصوص الى حيتكون
في الصينية مرتين ثلاثة
ودي النتيجة النهائية طبعا المنتظرينها والطعم بجد راااااااااااائع
طبعا بنفرش تحتها طبقة بطاطس شيبسي ونحضر سلطة زبادي ومكرونة
يارب تكون الأكلة نالت اعجابكم وتجربوها وتدعولي
منتظرة ارآئكم وتوجيهاتكم
ملحوظة : تاريخ الصور مكنش مظبوط على الكاميرة ومنتبهتش الا بعد ماصورت