البخلاء ودورهم السلبي تجاه نمط حياتهم وحياة من حولهم .. الله يعينهم ..

البخلاء ودورهم السلبي تجاه نمط حياتهم وحياة من حولهم .. الله يعينهم ..
تكرر الى اسماعنا دوما هذا ( بخيل ) وهو يملك ملايين والغريبه فعلا تشوف حالتهم تقول لاهلك لو سمحتوا اذا زاد عندكم من فضلت الغداء او العشاء او الفطور لاتنسون جارنا ( فلان ) .. حتى الملابس بدل ماتودونها للجمعية الخيرية ودي ماتنسون جارنا ( الاقربون اولى بالمعروف ) لان الواقع فارض نفسه تشوف بيته وهو كاسي بلكونته ببلكاش .. تشوف سيارته اعمتنا بدخاخينها .. تشوف دثرته وملابسه وغتيرته تقول ودي افصخ ثيابي واعطيه اياه .. المهم حالة وزاء الله لايوريكم امثال ( عيناته) لا والمصيبه الكبرى له زوجتين احدهما بالاونه الاخيرة ( كثره ترددها الى بيتنا ) وهي خجولة بطبعها بس صريحة وكانت تحكي بلاوي على المدام وهي تطلق صرخات الم وحسرة وتقول بفمها المليان من يوم خطبني ( طبعا اهلي بانين على فليساته بعد مايفنقس ) ملايين وربما يطولهم من الحب جانب .. المهم البنية تحلم بقفص ذهبي من الاقفاص النادرة عندما تتزوج ذا البخيل وكانت طموحها وامالها لاتنتهي بل تبني قصور من الاحلام ( بالخدم والحشم والدلال ) ولكن بعد ليلة الدخله ( تعال وشوف ) يفرك الريال فرك ويقول بقراره نفسه يمكن فرخ وانا مادري .. وتصبح احلامها وامالها مدفونه تحت وطأة ذا البخيل .. وانا اقول البعض من بناتنا والتي وقعت تحت براثن هذا البخيل او بمعنى اخر ( ذا النصاب ) اضطررنا الى البقاء والاستمرار معه لاحول لهن ولاقوه ..وبقائهن مع هذا البخيل ربما راجع الى وجود اولاد لاذنب لهم وفضلن البقاء ايضا سترا وسلامه من السن الناس التي لاترحم ( المطلقة ) .. والبعض الآخر من الزوجات لم يستطعن تحمل هذا المرض الخطير وقررن الفرار والهروب من حياته الزوجية وقرفه وفضلن لقب ( مطلقة ) ابرك من تعيش تحت الذل والهوان والذي يسببه هذا البخيل ..وصدقوني مهما جمع هذا البخيل من اموال ومهما عزف عن صرفها والعيش بكرامة فلن يطيل عمره بقدرة قادر وربنا فوق الجميع .. صدقوني اسمع انا وانتم ايضا تسمعون الهوايل من ( امثال هؤلاء البخلاء ) واللي العن منهم صدقوني ( الاباء ) واللي يرمي بنته في احضان هؤلاء لسبب انه غني وبخيل وتسمع الطناجه اليوميه ( بكرى يتعدل ) والمثل يقول ( عدل جبل ولا تعدل طبع ) و( من عاش على طبعه مايخليه ) هؤلاء هذه طبائعهم وصدقوني الفقر اهون كثير .. من انك تعيش مع بخيل تحت سقف واحد .. وانا اضرب لكم مثل حي وواقعي بااحد اصحابي السابقين واللي مليت منهم ومن ثم ابتعدت عنه بعد المشرق عن المغرب ( ورغم انه موذيني باتصالاته بس مطنش وزينته انه يدق دقه يبيني ارد عليه .. مادرى اني مطنش وسافهه ( مليت ) منه ارسلت له رساله بذلك .. المهم تشوف هندامه وسيارته تقول هذا يملك ملايين فعلا وصريف على قولتهم .. بس تدخل بيته وتشوف دثرة عياله وملابسهم .. ودثرة مريته تقول ( لا) صاحبي عايش على البلاط .. بس تسمع جيرانه ومن حوله من اقربائه واصدقائه يقولون عنه هذا مريض بمرض اسمه ( فسافلوس ) مرض خطير جدا ماله علاج ( تصدقون ) وزوجته المسيكينه ماعندها الا دميعاتها بس .. وتخاف من الطلاق .. والغريبه اكتشفنا حكايته من خلال الاستراحة كل ليلة على واحد عشاء ضمن جدول ( والليلة اللي يصير عليه العشاء ) يغاب ويغلق جواله بعد .. ولما تسأله من بكرى وينك البارح يقول والله مريض ماطلعت البيت وهو كذاب عند الاستراحه الثانيه لان عندهم عشاء .. كسف بنا شهرين وهو مرمط بنا مرمطه مايعلم بها الا الله .. لا والدفع بعد ( الشهري ) يغاب اسبوع ماتشوفه ولما تسأله عن الدفع يقول ماصرف الراتب لانه محجوز للبنك .. ولما تأكد احد اصدقائي الحقيقه لقي الرجال ( البخيل ) ينافسنا على اعطاء تقسيط سيارات وطايحن طيحه ( بالمدرسات هالمساكين ) ورافع سعر اقساطه الى الاعلى لا والمصيبه بدون كفيل ( بس يجير صك البيت بأسمه ) .. امثال هؤلاء البخلاء هل يعتقدون بان اعمارهم ستطول .. او يعتقدون ان فلوسهم سوف تدفن معهم .. ولكن مايحز بالنفس هو مايتصرف به حيال بخله على اولاده وزوجته .. وهم محرومين من السعادة والتي ينعم بها الكثير منا ولله الحمد .. بخلاء ولكن اين يجد المحبة في قلوب اولاده وزوجته وزملائه واقربائه تجاهه اعتقد ان هذا هو اهم شيء بالوجود لانهم يتمنون اولاده ان ( يلقسها .. يعني يموت ) اليوم قبل باكر ليذوقو طعم الحياة ونعيمها والتي حرموا منها في ظل وجود هذا البخيل ..الكثير الكثير من القصص والتي تسمع عنها يوميا حتى ان هؤلاء البخلاء اصبحوا من النوادر التي يتسلى بها الناس وقد تثير الضحك عندما يقصها البعض منا .. وسلامتكم