موقف اثر فيني وما قدرت اناام

مرحبا عرايس
شخباركم

الصبح صار لي موووووقف والله لحين مأثر فيني

اليوم الصبح وديت ولدي متاخر المدرسة لانة البارحة ما نام عدل كل اشوي يقعد وديته بداية الحصة الاولى والمدرسة قريب اوصله مشي
وفي بيت صوبنا يبنونه وقريب يجهز والهندي يحط قاشي وصوبه جاهل صغير لابس ثياب روضة وبس شافني الهندي قعد يناديني اذا اعرف الجاهل او شي واني ما عطيته وج ومشيت وفي الطريقة قلت ويش سالفة هالجاهل؟؟؟
وحسيت بتأنيب ضمير وشفت باص روضة ومشرفة الباص توها نازلة وقلت اليها في جاهل هالجهة وية هندي يمكن من روضتكم وقالت هي تستلم الجهال من ايدهم يعني اكيد مو من روضتهم والزي نفس زي روضتهم وقالت في روضة ثاني يجي باص هني وثيابهم تشابه روضتنا واكيد هالجاهل مو ويايي لانة اني استلم كل الجهال من ايدهم واركبهم البااص

ومشيت عنهاا وبالي مشغول بالجاهل
وصلت ولدي المدرسة وراح صفه ورجعتي قعدت اطالع في الهندي مو وياه الجااهل وهو يشتغل قعدت اطالعه وحسسته انه اطالعه ابيه يناديني يقول لي شي عن الجااهل بس ما تكلم ورجعت البيت ما عرفت انام
وزوجي كان جاي من اخر ليل وقلت له السالفة وقلت له روح اسال الهندي ويش سالفة هالجاهل ويمكن انت تعرفه وتوديه بيتهم

وزوجي نزل للهندي وساله والهندي يقول ما شاف هالجاهل الا جاي اليه من صباح الله وغربله يفلت عليه حجارة ويدوس على القاشي الي هو قاعد يركبه مغربلنه غربال يقول لين تملل ومشى واشر على الطريق الي راح الجااهل وزوجي راح يدووره وما حصله
ورجع واني للحين بالي مشغول فيه والصبح ما قدررت انام كلششش رغم اني من يروح ولدي المدرسة ارجع انام لحزة نهاية الدوام اروح اخذ ولدي مرة ثانية
اقول ما ادري هل امه خلته على الباب اشوي وجت طلت عليه وشافته مو صوب الباب وفكرت ان جى باص الروضة واخذه!!!!!
والله لحين قلبي معورني عليه وتندمت اني مشيت وما رحت للهندي واخذت الجاهل منه لانة كنت وااجد مستعجلة

ما ادري بس حاسة بذنب كبير اني مشيت ولا يندرى الجاهل متى رجع بيتهم