أبي أسوي حفلة وأسافر

سويلج جدول اختي .. من الميزانيه الي عندج و منها تقدرين توفقين بين الاثنين سفر و حفله زواج ..

يعني انتي اكيد تعرفين الصالونات الي ممكن يطلعونج اوكي و اسعارهم لا يعلى عليها ..
يعني اووكي للعادي و يناسب عروس ان ما حبيتي تقولين انج عروس ..
و شوفي ان بتسوين حفله الزواج بس ..
او معاها حفله الحنه و الجلوه ..
هني لازم تشوفين الميزانيه صح .. و على اساسها تحاولين تمشين فيها ..
و ان كنتي تشتغلين تقدرين تستفيدين من راتبج حق تزيدين الميزانيه الي حاطتها ..

حبيبتـي .,

إنتي أوردي عندج المهر + الطايح (الضيفة)

يعني حاولي إنج تقسمينهم .. تقسيم صحيح

وفي نفس الوقت ,

لازم يكون في مساعدات من قبل الأهل + خطيبج .. إلخ

يعني مو معقولة .. بتتزوجين جذي ,

وما شاء الله

الحين 3 سنين خطوبة

حلاتج مسويه لج جمعيـة

حتى لو بسيطة ومبلغ عادي مثل 500 أو آلف

بس أقلها ينفعج بـ التجهيزات

|||

ما علينا!..

فاتحي خطيبج بموضوع إن خاطركم تسافرون

وأكو مكاتب تنظم رحلات إلى (إيران) >> بما إن خاطرج فيها

تكون شاملة كل شي : تذاكر , فندق , أكل , رحلات .. إلخ

على سبيل المثال : النصر

وخلي السفرة تكون من صوبه وأكيد بيتلقى المساعدات ,

وأسعارهم رخيصة وحلوة

يمكن السفرة كل أبوها تكلفكم 800 إلى آلف بس ..

|||

حفل الزواج !..

فعلاً مب حلوة بعد 3 سنين طويلة خطوبة

تدشين عش الزوجية بدون حفلة

أقلها حفلة عائلية بسيطة جداً .. من باب الإشهار فقط

وأكو صالات إيجارها رخيص وزيـن

يعني على 200 إلى 300 دينار بس

وتكفي عدد عائلي

وما أنصحج بعدد كبير , أكتفي بحفل صغير عائلي

يعني الأهل , الأقارب , الأصدقاء .. إلح

300 شخص ,

لا أكثر

حتى توفرين في البارسلات ..

والبارسلات أكو وايد مخابز أسعارها حلوة ما بتطلع عليكم غاليـة وايد

|||

الدبلة .,

بتاخذين دبلة ذهب صوح ؟!..

وأتوقع سادة !!..

صح الذهب غالي

بس بكم تطلع لج هـ الدبلة

حدها .. حدها

50 إلى 60 دينار

مستحيل تطلع عليج أغلى

وخصوصاً إذا كانت السادة العاديـة

وحتى لو قلنا ذهب محفورة

أو ذهب بفصوص .. إلخ

الدبل بشكل عام خفيفة وناعمة

لو كلش بتمصخها 70 دينار مثلاً

وهذي مبلغ بسيط كلش

المفترض أصلاً ما تشيلين همه حتى !!!!..

|||

كشختج كـ عروس ,

تبين شي بسيط وفخم وناعم وعلى مستوى

دفعـي ,

هاي نظام ماكيراتنا وصالونتنـا الحين

لازم الوحدة تدفع علشان تطلع بالشي العدل

لا تقولين لي العفراء ولا سلوى ولا نجلاء .. ولا ولا

تراهم كلهم يتضربون على العروس

فـ نصيحة مني لج

أبتعدي عن الصالونات إلي شغلها مش ولا بد

وأختاري لج شي عدل

تدفعين 70 على المكياج

وتطلعين مرتاحة البال ومستانسة ومتطمنة على مكياجج كونه ماركة وثقة

ولا تدفعين 50 وفي نص الحفلة إلا وجهج أعتفس ودهن

ويمكن تطلعين بشي عدل ويمكن ما تطلعين ؟!..

ترى ماكو فرق بين صالوناتنا والماكيرات

فرقية 20 أو 30 دينار .. بسيطة ترى

والشعر ,

لج حرية الإختيار

وأكو وايد كوافيرات فنانات ومبدعات

يشتغلون في بيوتهم

وأعجز والله عن التعداد والذكر لأن مب وحدة ولا 2

|||

الفستان .,

خذي إيجار

الإيجارات مب غالية

120 إلى 180 تقريباً

وإنتي تبين شي بسيط وهادىء وناعم

أفتري على المحلات

وشوفي الأسعار والفساتين ..

|||

باقة .. بحدود 30 إلى 40

حنة بحدود 35 إلى 45

السيرفس :worn_out: بحدود 30 إلى 50

وهاي كلها مبالغ عادية وبسيطة ومقدور عليها !..

|||

الزبدة!..

نظمي وقسمي فلوسج عدل وزين ما زين

بتقدرين تطلعين بشي حلو وناعم مثل ما تحبين

الحفلة ممكن تطلع لج بتكلفة تتراوح بين 700 إلى آلف

والسفرة نفس الشي

|||

وربي ييسر كل أمورج

F:

أم هـادي;13728955:
سويلج جدول اختي .. من الميزانيه الي عندج و منها تقدرين توفقين بين الاثنين سفر و حفله زواج ..

يعني انتي اكيد تعرفين الصالونات الي ممكن يطلعونج اوكي و اسعارهم لا يعلى عليها ..
يعني اووكي للعادي و يناسب عروس ان ما حبيتي تقولين انج عروس ..
و شوفي ان بتسوين حفله الزواج بس ..
او معاها حفله الحنه و الجلوه ..
هني لازم تشوفين الميزانيه صح .. و على اساسها تحاولين تمشين فيها ..
و ان كنتي تشتغلين تقدرين تستفيدين من راتبج حق تزيدين الميزانيه الي حاطتها ..

مقررة أسوي العرس والجلوة في يوم واحد وبتحنى في البيت من باب التوفير ;)
اني اللي عندي 800 دينار لأان صار عليه خمس والضيفة ما عطاني وياها للحين
يقول عليه ضغط الشقة وبصراحة معور قلبي بس شاسوي:thumbs_down:

أحاول أنظم روحي على الميزانية وما أشقح فوقها بس أني وسواسية
أبي أختار شي ونفسي مطمنة ،، وأخاف ما أقول لهم عروس ويسوون ليي كلش تحت
يعني إنتي مثلاً ما شفتي بنات راحوا صالونات وعرايس وسووا ليهم مكياج
وشعر وما قالوا لهم عرايس وطلعوا احليوين؟ :o
يعني لو حطيت ليي مكياج 35 وسويت شعري تسريحة مرفوع بحيث يطلع عليي
كل الشغل جدي 70 -80 ما أطلع احليوة؟ ^o)
أعرف كم صالون بس المشكلة أحس وجهي يناسب له الناعم والليبناني
ومو الكل يضبط الناعم :(

في وحدة اعتقد اسمها رقية من الهملة تعدل

روحي ليها بس لا تقولين ليها ان انتين عروس روحي ليها كعادي وقولي ليها تبين شي فخم

مرت اخوي راحت ليها المكياج ب 10 و التسريحة ب 14 طلع كامل ب 24 دينار وشغلها حليييو ومرتب

حبيبتي ليش ماتسوين جلوه بس بدون عرس؟

يعني بدال مايروح اجار الفستان تقدرين بنص قيمته تاخذين لج جلابيه حلوه أو ساري - انه مادري جم اسعار اجار الفساتين بس اتوقع 150 وفوق صح؟ - وتقدرين النص الثاني تستغلينه بشي ثاني ..

انه رفيجتي سوت جذي وعند الرونق ماقالت لهم انها العروس قالت انه اخت العروس وعند جنى سوولها بـ 25 تخيلي! وانه بعرسها سوت لي حسناء تسريحة اتينن ورفعت شعري كامل بـ 25 !! يعني لتقولين مافي ، في وخاصه اذا بس جلوه يعني يبيلها شعر بسيط جدن قولي ماكسمم بتحطين 30 حق الشعر ..


شنو تحبين من ستايلات حق ميك اب؟ ثقيل ولا خفيف؟ عندج شريفة فولاذ حتى بو 25 دينار مالها حلو بس انتي طلبي اكثر وبجذي ماعتقد بيطلع عليج السعر فوق واقل من 100 دينار بعد !


والناس مو لازم تعزمين ناس وايد وايد اذا مابتقدرين واذا احد من هلج نط وقال نبي نعزم وايد قولي لهم انتو ساعدوني فالبارسلات !! او كلش كلش المنار وخذي لج صحن فيه 3 اشياء وبـ 100 فلس يعني الصحن الواحد يطلع عليج بـ 300 فلس وطقي هالرقم في عدد معازيمج ..

ماله داعي توزيعات وخرابيط،، انه شخصيا" جدن ماؤوومن في هالاشيه واحس انه شي مال امه داعي،، في نهاية الجلوه أو الحفله وزعي شوكليت وخلص،، انصحج بـ مخبز دلمون وايد وايد واااااااااااااااااااايد لذيذ ومجربينه شخصيا" الكيلو 7 دينار أو 5 .. جربت الساده واالمحشو فستق وولوز كان لذيذ


والحنه انه اقولج روحي اي صالون ومو لازم تقولين لهم عروس بس انج تبين طويل ونقشي في ريلج شي بسيط وخلص ..


والباجي خليهم حق السفر ومو لازم اسبوعين،، حتى اسبوع حلوو..


انتي اهم شي لتكدرين خاطرج وعرفي صح شلون توزعين فلوسج وان شاء الله ربي بيبارك لج في الفلووس وبتسوين كل اللي بخاطرج ..

البنات ماقصرو \\
بس اني بقول لش اني ضليت بعد سنتين مخطوبة ولا سافرت مكان لاحقه على السفر

لا تحرمين روحش من الحفله والفستان الابيض
وان شاء الله بعد الزواج دشو جمعيه او خصوو اليكم مبلغ كل شهر جمعو فيه عشان تسافرين

والله يوفقش ان شاء الله

حلمـ .,;13729650:

ما علينا!..

فاتحي خطيبج بموضوع إن خاطركم تسافرون

وأكو مكاتب تنظم رحلات إلى (إيران) >> بما إن خاطرج فيها

تكون شاملة كل شي : تذاكر , فندق , أكل , رحلات .. إلخ

على سبيل المثال : النصر

وخلي السفرة تكون من صوبه وأكيد بيتلقى المساعدات ,

وأسعارهم رخيصة وحلوة

يمكن السفرة كل أبوها تكلفكم 800 إلى آلف بس ..

قلت له بس مديون ومفلس فبحاول من فلوس الضيفة أسافر لأنه احتمال يرجع
عليي نصها ،،
800 وآلاف!! مشهد اسبوعين جبر خاطر مو سفرة ملوك تكفي عفر :woo:

حلمـ .,;13729650:

حفل الزواج !..

فعلاً مب حلوة بعد 3 سنين طويلة خطوبة

تدشين عش الزوجية بدون حفلة

أقلها حفلة عائلية بسيطة جداً .. من باب الإشهار فقط

وأكو صالات إيجارها رخيص وزيـن

يعني على 200 إلى 300 دينار بس

وتكفي عدد عائلي

وما أنصحج بعدد كبير , أكتفي بحفل صغير عائلي

يعني الأهل , الأقارب , الأصدقاء .. إلح

ياريت بس عايلتنا عودة ومحساب بسوي محدودة بس القريبين كلش وانتي
تعرفين سوالف النسوان والزعل لأن فلانة بالغلط نسوها وما عزموها بعد شلون
شايلينها من اللستة :lol:

ولو قللت العدد ما أظن إنهم بيقلعون عن عادتهم في كل وحدة عطوها جيس:p

حلمـ .,;13729650:

صح الذهب غالي

بس بكم تطلع لج هـ الدبلة

حدها .. حدها

50 إلى 60 دينار

مستحيل تطلع عليج أغلى

وخصوصاً إذا كانت السادة العاديـة

وحتى لو قلنا ذهب محفورة

أو ذهب بفصوص .. إلخ

الدبل بشكل عام خفيفة وناعمة

لو كلش بتمصخها 70 دينار مثلاً

وهذي مبلغ بسيط كلش

المفترض أصلاً ما تشيلين همه حتى !!!!..

إذا الدبلة تطلع 50 60 70 عجل ما بشتري ليي معاضض:lol:
شلون ما أشيل همها هذه تفرق في الميزانية هههه بااااال صايرة حدي
امصفعة (بخيلة) :$:

حلمـ .,;13729650:

كشختج كـ عروس ,

تبين شي بسيط وفخم وناعم وعلى مستوى

دفعـي ,

هاي نظام ماكيراتنا وصالونتنـا الحين

لازم الوحدة تدفع علشان تطلع بالشي العدل

لا تقولين لي العفراء ولا سلوى ولا نجلاء .. ولا ولا

تراهم كلهم يتضربون على العروس

فـ نصيحة مني لج

أبتعدي عن الصالونات إلي شغلها مش ولا بد

وأختاري لج شي عدل

تدفعين 70 على المكياج

وتطلعين مرتاحة البال ومستانسة ومتطمنة على مكياجج كونه ماركة وثقة

ولا تدفعين 50 وفي نص الحفلة إلا وجهج أعتفس ودهن

ويمكن تطلعين بشي عدل ويمكن ما تطلعين ؟!..

ترى ماكو فرق بين صالوناتنا والماكيرات

فرقية 20 أو 30 دينار .. بسيطة ترى

والشعر ,

لج حرية الإختيار

وأكو وايد كوافيرات فنانات ومبدعات

يشتغلون في بيوتهم

وأعجز والله عن التعداد والذكر لأن مب وحدة ولا 2

:'( يا صاحب العصر والزمان

حلمـ .,;13729650:


الفستان .,

خذي إيجار

الإيجارات مب غالية

120 إلى 180 تقريباً

وإنتي تبين شي بسيط وهادىء وناعم

أفتري على المحلات

وشوفي الأسعار والفساتين ..

إن شااااء الله وهذا اللي بسويه بروح أفتر وبختار
الفستان مو واجد شايلة همه مثل الميكاب والشعر :)

¦¦ Strawberry ¦¦;13729964:
مقررة أسوي العرس والجلوة في يوم واحد وبتحنى في البيت من باب التوفير ;)
اني اللي عندي 800 دينار لأان صار عليه خمس والضيفة ما عطاني وياها للحين
يقول عليه ضغط الشقة وبصراحة معور قلبي بس شاسوي:thumbs_down:

أحاول أنظم روحي على الميزانية وما أشقح فوقها بس أني وسواسية
أبي أختار شي ونفسي مطمنة ،، وأخاف ما أقول لهم عروس ويسوون ليي كلش تحت
يعني إنتي مثلاً ما شفتي بنات راحوا صالونات وعرايس وسووا ليهم مكياج
وشعر وما قالوا لهم عرايس وطلعوا احليوين؟ :o
يعني لو حطيت ليي مكياج 35 وسويت شعري تسريحة مرفوع بحيث يطلع عليي
كل الشغل جدي 70 -80 ما أطلع احليوة؟ ^o)
أعرف كم صالون بس المشكلة أحس وجهي يناسب له الناعم والليبناني
ومو الكل يضبط الناعم :(

بس عيل سوي الحفله على الميزانية الي عندج

800 دينار قسميها و ان شاء الله يصيرلج كلشي تبينه و طبعا مع مبلغ الضيفة فاكيد بيكون عندج الف وشي
خلي ميزانيه للمكان الي تبين تسوين فيه الحفله ، خل نقول ان في ماتم 80-100 دينار
ان في صالة سعرها معقول بين 300-400 دينار
و شيلي 100 دينار خليها للشعر و الماكياج و روحي صالون انتي متعلمه عليه و يطلعونج
و الفستان اجار بين 80-100 دينار او من السعودية
و التصوير
و الذهب غالي احين ، الجرام 16 دينار تقريبا احين موصل فشوفي الانسب لج واشتريه
و طبعا باقي الاساسيات من تجهيزات اكيد اردي جهزتيها

مدمنة النت;13730221:
في وحدة اعتقد اسمها رقية من الهملة تعدل

روحي ليها بس لا تقولين ليها ان انتين عروس روحي ليها كعادي وقولي ليها تبين شي فخم

مرت اخوي راحت ليها المكياج ب 10 و التسريحة ب 14 طلع كامل ب 24 دينار وشغلها حليييو ومرتب

اممم ما ادري ما سمعت بها متأكدة ما تقصدين رقية في المالجية؟؟
لأن رقية اللي خبروني بها عندها صالون في المالجية يقولون :p

اني شفت شغل رقية العادي وعجبني فبحطها في بالي بس انتي تأكدي
اللي تقصدينها مو تبع المالجية عشان أحس بثقة أكثر بلكت أروح وأغامر :thumbs_up:

¦¦ Strawberry ¦¦;13728780:
خاطري أسافر ولو اسبوعين عن خاطري من انخطبت للحين ما سافرت إلا
مرتين يمكن ويا البيت المدينة بس مع إنهم كانوا يسافرون ويقولون ليي بس
خطيبي ما يرضى لازم هو يدفع من جدي بس المدينة رحت لأن المصاريف
ما تخليه يقدر يعطيني حق أروح ويا البيت إيران فأخفق من الصوبين :'(
عاد أبي أسافر بعد ما أتزوج أفكر أروح مشهد أسبوعين بس أشوف تكاليف
الزواج من شعر ومكياج والفستان وتصوير وبارسل وصالة وحنة وملابس وغيرها
من أمور تحوش على الميزانية بحيث يا دوب تكفي وما تكفي حق سفر أصلاً
خاصة إني أبي أشتري دبلة
لأن ضيعت مالت خطوبتي :thumbs_down: والدهب غالي هالأيام ،،

أبي صالون للمكياج والشعر مرة وحدة احليو وناعم ويناسب عروس
مو بـ 120 :sick: أني أشوف البنات يسوون زواج ومكياج وشعر ناعم بس احليو
حتى الفستان اللي يلبسونه ناعم ويسافرون بس أني خايفة وين أحصل
هالصالونات وإذا رحت يطلعوني حلوة إذا ما قلت لهم إني عروس؟
لو هم يقولون عروس بس نبي بحدود هالقد وبسيط ؟

أبي أسافر :'( بس أبي أسوي زواج وأستانس خاصة إن 3 سنوات تقريبًا
مخطوبين فمو حلوة ما أسوي عرس له أخاف أتحسف على الفستان
الأبيض مع إن خطيبي يقول سوينا خطوبة في صالة وما له داعي :(
بس البيت وبيت عمي خاطرهم في عرس وحتى أني صراحة بس أبي أسافر :sick:

رفيقتي راحت العفراء حطت مكياج مال عروس بـ 30 والشعر خدوا عليها 18
تقول ما قلت لهم عروس عند سهام ونرجس بس أني بصراحة ما شفتها شلون
طلعت لأن سوت بس جلوة ولبست أبيض وراحت بيت زوجها

أروح وين يا بنات ساعدوني
أبي أطلع كشخة وعرسي كشخة وأسافر بعد :thumbs_down:

WARD89;13730351:
حبيبتي ليش ماتسوين جلوه بس بدون عرس؟

يعني بدال مايروح اجار الفستان تقدرين بنص قيمته تاخذين لج جلابيه حلوه أو ساري - انه مادري جم اسعار اجار الفساتين بس اتوقع 150 وفوق صح؟ - وتقدرين النص الثاني تستغلينه بشي ثاني ..

فكرت فيها بس راجعت روحي أكتشفت أني مو راضية متنازلة عن الأبيض:D

WARD89;13730351:

انه رفيجتي سوت جذي وعند الرونق ماقالت لهم انها العروس قالت انه اخت العروس وعند جنى سوولها بـ 25 تخيلي! وانه بعرسها سوت لي حسناء تسريحة اتينن ورفعت شعري كامل بـ 25 !! يعني لتقولين مافي ، في وخاصه اذا بس جلوه يعني يبيلها شعر بسيط جدن قولي ماكسمم بتحطين 30 حق الشعر ..

والله زين يعني رفيقش وانتي ما قلتوا عرايس وطلعتوا احليوين وراضين
من جدي أفكر بهالحيلة صراحة واجد يضربون خاصة إذا طلع رجلش ما يحب
المكياج الثقيل وكلما خففتي قال ثقيل ،، ولا بس تجي 2 الليل مسحتي كل
شي وفليتي الشعر:D

WARD89;13730351:

والناس مو لازم تعزمين ناس وايد وايد اذا مابتقدرين واذا احد من هلج نط وقال نبي نعزم وايد قولي لهم انتو ساعدوني فالبارسلات !! او كلش كلش المنار وخذي لج صحن فيه 3 اشياء وبـ 100 فلس يعني الصحن الواحد يطلع عليج بـ 300 فلس وطقي هالرقم في عدد معازيمج ..

:thumbs_up:

WARD89;13730351:

والحنه انه اقولج روحي اي صالون ومو لازم تقولين لهم عروس بس انج تبين طويل ونقشي في ريلج شي بسيط وخلص ..

الحنة اشوى اكو في 35 واحليو يعني مقدور عليه على الأقل

WARD89;13730351:


والباجي خليهم حق السفر ومو لازم اسبوعين،، حتى اسبوع حلوو..


انتي اهم شي لتكدرين خاطرج وعرفي صح شلون توزعين فلوسج وان شاء الله ربي بيبارك لج في الفلووس وبتسوين كل اللي بخاطرج ..

الله يفرج همش ويحقق لش أمانيش يارب ويسعدش:thumbs_up:

الفرقد 23;13732233:
البنات ماقصرو \\
بس اني بقول لش اني ضليت بعد سنتين مخطوبة ولا سافرت مكان لاحقه على السفر

لا تحرمين روحش من الحفله والفستان الابيض
وان شاء الله بعد الزواج دشو جمعيه او خصوو اليكم مبلغ كل شهر جمعو فيه عشان تسافرين

والله يوفقش ان شاء الله

لكن حلو إنش تسافرين وتشوفين الدنيا وتفرفشين خاصة إذا ما سافرتي
من زمان يصير خاطرش بقوة وما تدرين بعد الزواج اشكثر على ما تدبر ويصير
تسافرون :o

وياش يا رب

مريمتي;13740022:

هلا حبوبه شلونج
انا عندي صور الى العفراء وتوني متعدله اذا تبين براويج الياهم

بس خلينا نتواصل

مشكووورة خيووو ما تقصرين بس شلون نتواصل إنتي من وين
إن شاااااء الله إنتي قريبة مني.. :)

أبتهال الروح;13741032:

بصراحه الحين العفراء تروحين ليهم عادي يسون ليش تسريحه عروس والمكيااااج العادي وااااااااجد احلى من العرايس اصلاً من يسمعون عرووس ما يخلوون لون ولا زري الا دبغووو في الوجه ..

صدق يسوون احليو؟
لأني شفت أخت رفيقتي في خطوبتي ما عجبتني
ومثل ما قلتي حاطين لها في عيونها كومة زري
مع إن وجها بيبي فيس بس ما توقعتها يطلعونها جدي
لأني كنت متشوقة أشوفها عروس وآخرتها تطلع مو مثل
توقعاتي،، يمكن صدق تجيهم الحالة ويدبغون يا زعم يطلعونها أحلى بالألوان:D