مين الغلطان انا ولا بنت خالتي ؟؟

السلام عليكم ورحمة الله وبركااته ..

أول موضوع لي .. وفي البداية حابة اقلكم اني انسانة تبى تطور من نفسها بأي طريقة ..لكن

المشكلة اني عاجزة عن التطوير من غير احد مايدعمها.. يعني انا من غير نصائح ماامشي

ولا خطوة .. واني كابتة في نفسي اشياء مايعلمها الا الله وعشان كدا سميت نفسي الصمت الحزين ..

ودحين بقلكم على اول مشكلة .. نفسي احلهاااا ..

بنت خالتي .. ومعروفين بنات الخالات كيف يغارو من بعض .. ومشكلتنا نغاااار من بعض وهادي المشكلة نفسي احلها .. لكن على قد مااغار منها هي تغار مني اكتر ..

1- هي دحين شقرة على خفيييف بس لمن صبغت شعري اشقر ..قامت طلعت تبى تشووف وعلطوول تبى تقلدني بنفس صبغتي وتلمحلي ..وكل الناس قالت انه يلائمني والمهم وحاسة عليها .. وبس بالنهاية سارت تناديني وجع جاوية والله العظيم .. بس هي من زمان تناديني كدا مع انه مافيا جاوة بس خشمي افطس..لكن تحب تناديني قدام الناس يا جاوية معرف كيف اسكتها ..وعلى فكرة هي بالنسبالها حشة بس انا ابينلها انو حلو العرق الجاوي وياناس عليهم نعومين ..

2-
والقصة ومافيها انها شايلة عليا انو كيف سمعتها اتشوهت وانا لأ وسارت تتهمني بأني انا اتكلم عنها من وراها ولكن العكس هي الي اتكلمت عني عند قرباتي التانين وقرباتي حكوني بنفسهم.. وهي انتساب سارت تقولي بس اجي الجامعة اخليكي تهبقيي .. وتحاول تعرفني على اصحابها .. وانا اقلها عذر انهم مو حلوين .. مو حابة ابينلها اني مااحب دا الطريق بالعكس ابينلها اني فلا ..

3- لمن ابينلها اني مااسمع اغاني تحقد وتقعد تقول بطلووها وايش الهبالا دي ياهبلة استمتعي واسمعي اغاني ..

4-ولمن اطالع في نفسي في المراية تجريييي تبى توقف قدامي في المرايا عشان تتطمن وتشوف مين احلى .. واحياناا اقهرها ومااديها مجال اول ماتبى توقف جمبي في المراية اهرب ..

5-ودحين عشان سرت ابينلها انو عندي صحبات سارت تكزب عليا وتقولي صحباتي صحباتي ..وفي نفس الوقت تقول نفسي اتصاحب

6- كانت تقولي لا تحولي انتظام ترا الانتساب افل عشان تهبق كل شوية ولمن حولت انتظام بان عليها وجه الزعل وماباركتلي بس سارت تقول انو الانتساب اروق واريح .. بس

7- وتحب تستعرض نفسها عند الاولاد .. ولمن تستعرض نفسها تجرني معاها اقلها لاا في ولد تقول ياشيخة لا تسوي نفسك مؤدبة وجع .. وحتى في غطة الوجه لمن تكشف الا تباني اكشف معاها عشان امها لاتقولها شوفي تغطي وجها وكدا واصلن ابوها متشدد اصلن لمن تشوفو تهرب تتخبى تحت الكنب .. بس من وراهـ غير..عشان كدا هي تسوي دي الحركات من كبت على مااظن .. بس احيانا تجرني .. زي مرة في فرح كان في اخوان العروسة واحنا بالفساتين الا جرتني جر قالت تعالي نجذبهم .. ومدري الله يسامحني رضيت ولمن مشينا قدامهم طالعو فينا .. وانا حسيت وقتها بغضب ربنا .. استغفر الله العظيم ..




..

ورغم دا كلو نكلم بعض زي كأننا حابيب بس الي في القلب غير

وعلى فكرة الاحداث مو متسلسلة كل واحد كان في سن معين وزمن معين ..يعني مرة قلتلكم مااسمع اغاني ومرة قلتلكم اني ظهرت قدام اخوان العروسة لا دا كان زماان مرت عليها سسنتين تقريبا ..

المهم وحاليا سرت اسمع اغاني ونفسي ارجع لأول بس المجتمع الي انا فيه يجرر .. لكن بحاول التزم تاني


برأيكم كلكم مين الغلطان فينا ..بس بأعرف .. انا قولت كل الحقيقة عشان بس اعرف مين الغلطان فينا .. ولو انا ..بحاول اغير من نفسي .. ولو هي ..كيف اتعامل معاها

؟؟


اعرف انو كلنا غلطانيين :o