بنات حبيت اعرض لكم صور رحلتي لماليزيا مع الاكشنات اللي صارت
اتمنى انها تعجبكم
اول شي
كانت رحلتنا يوم الخميس تاريخ 2010 - 10 -15
عدد الاشخاص
انا وزوجي العزيز وولدي الغالي وجنيني اللي في بطني :biggrin:
توجهنا للمطار في الساعه 8 مساء
وهاي صوره ولدي في المطار يودع قطر
كانت الرحله 7 ساعات جنني فيها ولدي ما نام الا ساعه وحده وبعدها قام
جنن المسافرين يروح للي مسكرين عينهم ونايمين يتحرش فيهم :hysterical:
وماكان راضي يقعد واذا مسكناه يصيح ماغير ابوه مسكين مراكض وراه
وصلنا ماليزيا وكان عندهم صبح الساعه 9 تقريبا
هاي صور من الطريق للفندق
كنا مقررين ان نروح سلانقور لفندق سن واي لاقون
لكن اللي يبي يحجز لنا قال لزوجي عندي لك شقه احلى في كوالالمبور ومتى ماتبي تروح سلانقور تقدر لان بينهم 10 دقايق
وقالنا ان الشقه لعرسان بس مايدري ليش كنسلو الحجز
واحنا حزتها كنا تعبانين ونبي ننام قالو لنا ان سن واي لاقون مافيه غرف والبريمايد ماراح تفضى الغرف الا بعد ال 12 عشان جي قلنا خلاص نروح الشقه اللي قال عنها وكانت في التايم سكوير
وصلنا الشقه والله لا يوريكم
صغيره كلش ومب حلوة وحاره
قالنا حاره لان المكيف من فتره ماشتغل شغلوه وبيبرد
قلنا خلاص بنام اليوم وباجر بنغير الفندق و امرنا لله
احلى ما في الشقه المنظر اللي نطل عليه
هاي صور من بلكونه الشقه ماصورت الشقه مابي تلوع كبدكم
بيما ان كانت الشقه حاره قلنا بنروح نتغدى وبنرجع ننام على ما تبرد الشقه
لكن مع الاسف تغدينا ورجعنا نبي ندخل الحمام الله يعزكم نتوضى الا قفل بروحه شلون مانعرف وزين محد داخل
اتصل ريلي في اللي حجز لنا قاله تعال شوف لنا صرفه
جى وفتح الحمام
قاله زوجي شوف المكيف مابرد
الا طلع خربان قاله زوجي مابي الشقه بروح ادور لي فندق تخيلو هاي كله واحنا للحين مانمنا صج هذاك اليوم وايد تعبنا كان اخس يوم في السفره
طلعنا والحمدلله على طول لقينا شقه في الماليليوم كان فندق راقي وحلو ونمنا احلى نومه
هاي كان اول يوم لنا في ماليزيا
