محتاجة رايكم الامومة افضل لو العمل؟؟؟؟

الصراحة موضوع محير بعض الشيء
بالخصوص اذا كنتي دارسة سنين وسنين في الجامعة
واحباط كبير لما تكوني دارسة وجالسة فقط في البيت يعني ربة منزل
وجهة نظري انه من الاجمل ان نكون ربات منزل وموظفات في آن واحد
إذا سنحت لنا الظروف
وماشاء الله انتي وظيفتج يمكن الاغلبية تحلم فيها لأنج تبع وزارة والدوام قصير بالنسبة الى الغير...

لكن اصعب شيء وهذا اللي شاغل بالي من الحين
الاطفال هل بيحصلون الرعاية التامة اذا كان اغلب وقتهم مو وياي؟؟
المختصر المفيد
اذا حصلتين مكان ضمان سواء كانت حضانة او روضة او الاهل يتكفلون بالاطفال في فترة دوامج فلا تتردين في العمل وواصلي حياتج العملية. اما اذا كان العكس وظروفكم المادية ممتازة ويكفي عمل زوجك الاولى لكِ ان تتفرغي لتربية الابناء وهذا ماينص عليه بعض العلماء..

ياختي اعيالج مردهم بكبرون وبيعتمدون على نفسهم من وجهه نظري استمري في العمل افضل وفكري في المستقبل لازم تكونين موفرة لهم كل شي

مرحبا
مسجلة عندكم من فترة بدون مشاركات اقرأ بس من بعيد يعني
بس حبيت ارد عليش اختي نصيحة مني لا تخلين الشغل تعرفين الوضع اختى وان الكل اكيد يحسدش على الوظيفة الله يبارك لش فيها وتعرفين ان بصعوبه تقدرين تحصلين شغل اهني ومثل ما قالت معكرونه حارة بناتش مردهم بكبرون ويعتمدون على نفسهم وحطي في بالي ان حتى شغلش الا تشتغلينه على حسابهم مثل ما قالت لازم توفرين لهم في المستقبل وانتين ما تدرين بالدنيا شنو خاشة لش وهالوظيفة اعتبريها بمثابة الدعم لش وذخيره حتى لو انكم مثل ما تقولين الحين وضعكم تحسن وبناتش ما بضيعون واذا خططتين عدل ودبرتين بتقدرين توافقين بين الشغل والبيت
والله يوفقش ويسهل عليش ويسهل علينا بحصول الوظيفه

رأي من رأي البنااات


وظيفتج لا تتخلين عنهاا خصوصاا انهاا في وزارة ودوامج الى 2

حاولي انج تتأقلمين مع الووضع وصدقيني رااح تقدرين

وعيالج مردهم بيكوون وبيعتمدون على روحهم وانتي بتتملين من قعدة البيت وفكري في مستقبلهم الحين المادة صاارت مهمة خصوصا بمصااريف الاطفال كل ما يكبرون طلباااتهم تززيد



انا يمكن ما اشتغل بس ادرس يعني اطلع بره البيت ارجع البيت تعباانة وعندي جاهل عمره 6 شهور تعبت بالبدااية بس الحين خلاص تأقلمت

وصدقيني الام اللي تقعد في البيت وتقابل اولادها 24 ساعه تصير عصبية ويااهم وتفكر تطلع بدوونهم عشاان ترتااح نفسيتهاااا انا جذي

موووفقه خيتوو

السلام عليكم ورحمة الله..
انا كنت في وضعك بالضبط ومتحيرة بين العمل والامومة بس اكتشف شئ مهم جدا..
عانيت من العصبية الزايدة مع اطفالي لكني قررت اتغير فانا اعمل حتى اوفر افضل حياة لهم.. الحل كان اني اكرر 100 كلمة (يا حليم) وكانت كالسحر على قلبي صرت هادئة.. تعلمت سياسة التطنيش يعني طنشي سلوكياتهم.. وترى الطفل يتصرف بالحاح وعصبية بس يبي منك لمة حضن لعب وضحك وهذه ما تستغرق اكثر من 10 دقائق وكل شئ راح يكون بسهولة.

فكري 100 مرة قبل ما تستقلي من عملك اولادك بعد سنة او سنتين بيرحون المدرسة من الصبح الى الظهر بعدها انتي بتتمللين وتحسين بالفراغ وتبدء رحلة البحث عن العمل لزيادة المصاريف وكبر الاولاد والفراغ وانتي عارفة وضعنا بالبحرين الشغل على يطق الباب .. خخخخ

السر الاهم الي اكتشفته..

ليس المهم كم تقضي من الوقت مع ابنائك بمقدار كم تعطيهم من حنان واحتواء وتفاهم..

الكثير من ربات البيت مجابلين بيوتهم واولادهم ومع ذلك مب قادرين يحتوهم.. اهم شئ الاحتواء والاهتمام .. وبكره لما يكبرون راح يطالبون بتوفير الاشياء وليس توفير الوقت.. ووقت دوامك ممتاز مع تواجدهم في الروضة .. شنو راح تقولين عني الا اشتغل الى 9 بالليل.. او حتى الدكاترة.. الزامات

كانك تتكلمين عني ، مختفية تماما عن المجتمع وعصبية مع عيالي وزوجي وشغل البيت دماااااار وكل مرة افكر في الاستقالة بس أخاف اندم ،،،،،،،

بس قاعدة أفكر في إجازة بدون راتب لمدة سنة ارتاح فيه وأريح اعصابي

هلا اختي

اني بصراحة راي يمكن يختلف عن باقي البنات ...

في راي ... اذا كنتين مو بحاجة هامة للشغل .. وزوجش شغله زين وراتبه قوي ومو مقصر عليكم في شي ..
وشغلتش مجرد ملئ وقت ... اذا انتين قادرة تستقيلين استقيلي واتفرغي ليهم ...
تعرفين انه اهم مرحلة في حياة الطفل تكون سنينه الاولى لانه هي المرحلة اللي بتتخزن في مخه وبتربيه وبتتكون فيها شخصيته وكل شي ... وهذا السن اهم مرحلة في حياتهم لانه هي اللي بتحدد مصيرهم وحياتهم واسلوبهم المستقبلي..


فمثل ماقالت اذا انتين مو بحاجة ماسة للشغل استقيلي .. واذا العكس .. حاولي تضبطين حياتش واتعودي على الوضع واضبطي اعصابش كثر ماتقدرين

والله يكون في العون
ويساعد الجميع يارب
والله يوفقش

مشكورين خواتي على تفاعلكم ....والله اني راسي منفجر واني افكر في السالفة ...زوجي يقول براحتش بس يقول ما بنقدر ناخذ بيت ولا ارض بهذا الوضع بس بيني وبين نفسي احب اكون مع اولادي بنتي تصيح الصبح تباني اوديها الروضة واخذها من الروضة وولدي مثل الشيء وفي كل شيء اعطيهم الاشياء الاساسية اسوي الواجب معاهم واكلهم واشربهم بس بدون نفس من زود التعب الايام تنقضي والاسابيع والشهور واولادي يكبرون بس ما استمتع بطفولتهم حتى يوم هم صغار نفس الوضع زوجي كان يدرس في جامعة خاصة والحين خلص وظروفنا ان شاء الله للافضل بس ان سالفة السكن لان احنا في شقة اجار ...لكن ما تخيل نفسي اقعد عشر سنين زيادة في الشغل وبعدها بتجي احتياجات ثانية والانسان ما تخلص احتياجاته ...احس بالظلم لاولادي ساعات المفروض اكون جنبهم بس اقسي قلبي واطلع من عند امي ودموعي على خدي ساعات يكونون مسخنين او في اجازة اشيلهم من الصبح من اعز نومتهم واوديهم عند امي من جدي افكر جديا في السالفة وهالشهر بحسم امري دعواتكم بنات

انا بصراحه عني يتصلووو علي ناس كثير للوظيفه بس زوجي رافض ويقولي ربي ولدك احسن واحنا مو محتاجين للوظيفه

وإذا فكرت فيها بصراحه اشوف اني مو بحاجة الوظيفه وولدي اولى ...


فأنتي إذا مو محتاجه للوظيفه خليك مع اولادك احسن

ربنا يوفقك للى فية الخير

البنات ماقصرو في النصايح بس اني اجوف انش محتاجة للوظيفة والسبب مثل ماقال زوجش تاخذون لكم ارض والا بيت يعني شالفايدة تكونين مع ولدش طول اليوم ويكبرون قدام عيونش وهم كانهم في قفص محبوسين؟؟ ترى المسكن الكبير يسوى انش تواصلين في العمل

وعندي فكرة ليش حاولي تاخذين اجازة شهرين او ثلاثة بدون راتب وجوفي شصير اتوقع بتحسين بتعب اكثر من يوم انش تشتغلين لان شغل البيت والتربية اصعب من شغل المكاتب هذا غير عدم الاستقلالية في المصروف حتى لو زوجش يعطيش المصروف شهريا بتحسين عقب ان مو اي شي تبينه بتقدرين تاخذينه لعدة اسباب

الله يساعدك اختى ويعطيك العافية انا عن نفس ربة بيت وتعبانه ويا الاولاد الله يعين اللى بشتغلون , ومن راي نفس ما قالوا البنات اخذى اجازة وشوفي شنو تقررين بعدين , هم الشغل زين وفى حكومة بعد الله يساعد اللى يشتغلون فى المستشفيات وغيرة شفتات حياتهم فوق تحت , الله يعينك بس فكري عدل انتين تشتغلين علشانهم جيبي لك شغالة تهتم بامور البيت عشان يخف التعب عليك , نصيحة لاتهدين شغلك فى كلا الحالتين بتتعبين ,
موووووووفقة

اختي ليش مااجيبين ليش خادمة تساعدك على ترتيب المنزل

وتساعدك في بعض امورك لانك مستحيل تقدرين توفين كل المسؤليات عمل +شغل بيت +اطفال

ومن رأي العمل مهم عشان توفرين حياة كريمة ليش ولعيالش حرام تستقيلي وبعدين راح تتعودين على نظام حياتك ...

ردي لعنوان الموضوع اكيد الأمومه افضل يعني لو ماكنتي تشغلين وبتحصلين شغل اي مكان وانتي مب محتاجه للعمل فالامومه افضل

بس بالنسبه لوضعج بالعس احس عادي خيو في ناس خاص وبعد يمشو مع حياتهم

يعني حاولي بتنظيم شويه من الوقت وبتلاقين وله اسهل

وخصوصا انش حكومه يعني بعدين التقاعد والأمور اسهل من خاص

وهالزمن ايد وحده ما تصفق وخاص عندنا

بالنسبه لي توني مشتغله شهرين صار ليه وداومي شويه طويل لي 3 ونص بس الحمد لله

ما انام اله واكل بنتي للروضه جاهز وغدايه بعد اني خب لانه غده زوجي بنتي مع عمتي الله يطول في عمرها ويحفظها

مشكورين خواتي على تفاعلكم :thumbs_up: مع مشكلتي لكن اني خلاص حسمت امري وواولادي ورعايتهم افضل من اي شيء بالدنيا لاني الحمدلله بالشغل مرتاحة ماديا بس نفسيتي :thumbs_down: تعبانة حدها ومو حاسة بطعم اي شيء وكلت امري لرب العالمين اللي مابيضيعني لا اني ولا اولادي انشاء الله والسكن مو بعيدة على رب العالمين يكون اقرب مما توقعت ;) بس اهم شيء التربية وما كط عيالي على احد حتى لو كانوا اهلي ..واشكركم مرة ثانية خواتي F:

اختي ما انصحش تتركين شغلش ..
صدقيني خيوه شغلتش تتمناها الف وحدة ووحدة .. ناس تشتغل للساعة 5 او 6 بالليل يعني قطاع خاص وعندها اولاد ولا فكروا يستقيلون ،
نصيحتي ليش اختي تاخذسن اجازة اول تشوفين وضعش وبعدين قرري ترى بتندمين بعدين ،

أختي أنصحش تاخذين إجازة لمدة سنة وتشوفين الوضع وبعدها قرري .. لأنه فعلا شغلة الحكومة الكل يتمناها ..

um 3looy;13642943:
هلا اختي

اني بصراحة راي يمكن يختلف عن باقي البنات ...

في راي ... اذا كنتين مو بحاجة هامة للشغل .. وزوجش شغله زين وراتبه قوي ومو مقصر عليكم في شي ..
وشغلتش مجرد ملئ وقت ... اذا انتين قادرة تستقيلين استقيلي واتفرغي ليهم ...
تعرفين انه اهم مرحلة في حياة الطفل تكون سنينه الاولى لانه هي المرحلة اللي بتتخزن في مخه وبتربيه وبتتكون فيها شخصيته وكل شي ... وهذا السن اهم مرحلة في حياتهم لانه هي اللي بتحدد مصيرهم وحياتهم واسلوبهم المستقبلي..


فمثل ماقالت اذا انتين مو بحاجة ماسة للشغل استقيلي .. واذا العكس .. حاولي تضبطين حياتش واتعودي على الوضع واضبطي اعصابش كثر ماتقدرين

والله يكون في العون
ويساعد الجميع يارب
والله يوفقش

رأيي من رأي أم علوي

إذا الوظيفه مي ضرورية وظروفكم مي محتاجه ليها اتركيها

لان مافي أحلى من شوفة الأولاد يكبروا قدام عيونش تشوفي ضحكتهم وتشوفي تطوراتهم قدامش

وإذا الوظيفة ضرورية لاتطلعي خليكي عليها لكن أهم نقطه تنظيم الوقت

عندش أني مثال لاأشتغل ولاشيء لكن مثل ماقلتي حياتي كلها فوضى في فوضى :confused:
وطلعه مافي!! حدي بيت الوالد وأرجع مكاني :!!:

لكن أكتشفت أن تنظيم الوقت هو أهم نقطة عشان أقدر أعيش واستمتع وي أولادي بطفولتهم

وأهم نقطه تنظيم وقت الأطفال من ناحية نومهم وأكلهم وكل شيء

وإذا جدول نومتهم أنتظم الأم تنتظم حياتها

واللحين الحمد لله بعد مانظمت نومة أولادي جدولي أنتظم وتحسنت ظروف حياتي الحمد لله

لكن لازلت مااقدر اطلع بهم ثنينهم مره بالبنت ومره بالولد هههه

فهذي للحين مااعتمدت على نفسي :o


وعلى التنظيف وشغل البيت خليه لوقت نومتهم نيميهم وخذي ساعتين رتبي عالسريع


وأتمنى لك التوفيق أن شاء الله مهما كان قرارك