تقرير خطوبتي

سلام للجمييع
طبعا هالمره التقرير من غير صور راح اتكلم عن ملجتي وخطوبتي كااامل يمكن البنات يستفيدون منها لتجهيزاتهم
ومره الثانيه راح احط لكم صور

اول شي طبعا تجهيزاتي كانت من كل مكان ثياب واغراااض مافي مكان مارحت ولمن عطوني فلوس
كتبت الي احتاجهم في دفتر وقسمت كل شي عليه ويبت ظروف وحطيت كل المبلغ بروحه وكتبت على الظرف الاقسام
وهذا الشي سهل علي واااااااايد وماتخربطت وحاولت اني لمن احط المبلغ اخذ اقل او بنفس المبلغ مايزيد وماكان عندي فتره طويله للتجهيزات شهر ونص تقريبا وماكان يكفي
كان كل ناس يسوون شي على ان بسيط الي اعطيهم بس اتحجج عليه ولازم يكون لي دور
امي تفتر من مكان لي مكان على الاغراض اطرشها الله يحفظها ويخليها حقي
اختي تفتر وياي كل يوم من الظهر رجعتها للشغل لساعه 12 وايام الاجازه سهر على اغراض السفره
وبنت خالتي خليتها تمتلك الدي جي تسوي سيديات الدي جي
وابوي الله يخليه كان حق مشاوير حقي مني ومناك
كلهم ماقصروا والله يخليهم لي
ويوم الخميس رحت حفاف وشيره ومنكير بديكير وحمام مغربي ب15 عند نهله كامل طلع علي ب50 دينار

احين بتكلم عن الملجه...
طبعا اول شي كان العقد بتاريخ 10-10-2010 يوم الاحد الصبح في بيت يدي
عقدنا وطلعت معاه وخلصنا امورنا كااااااااااااامل في هالاسبوع مع اني كنت مضغوووطه في هالاسبوع بس مسكين ماقصر يراكض وياي من مكان لي مكان
وكانت حفله الملجه بتاريخ 15-10-2010 يوم الجمعه ليله السبت في ماتم البدع كانت
اول شي السفره كانت من عند ام فاطمه من ستره كانت حلوه وستايل ومميزه ب 200 دينار السفره بالخلفيه مع باقتين ورد صغار ومتر ورد للخلفيه وطبعا التوزيعات اخذت 360 توزيعه منوعه من الرونق كان من كل الانواع اخذ واشياء حلوه بشهاده الجميع وانه الي سويت الديزاينات وكل وشي فيهم ويبتهم لأم فاطمه
طبعا الساعه 10 كنت انتظرها بالماتم وماقدرت تيي من وقت عشان زحمه الجسر وصلت عندي 11 ونص وانه موعدي للصالون الساعه 12 ونص اروح
كنت انتظرها وحاولت ابين لها كل شي على ان في اشياء ناقصه بس اتداركت الموقف وياي وخليتها تعدل شوي
طلعت عنها واهي ليحين ماخلصت وكنت خايفه من الافكار الي انه مدخلتها من عندي في السفره ماتضبطها لان كنت مدخله اشياء من عندي
طلعت ورحت برزت كل شي ورحت الصالون الساعه 2 ههههه تأخرت بس ماعليه صالون وحده من اهلي ماتقول شي اسمه بنت الفريج الشعر واااااااايد فن تسويه ماشاء الله عليها واسعارها حلوه ودوم عندها مافرط فيها واهي معاملتها وااااااايد حلوه ويه الناس خلصت شعر ومر علي خطيبي الساعه 4 قلت له يمر فيني الماتم قبل لا اروح الميك اب بجوف السفره
رحت ومسكين ابوي كان هناك يشرف عليها واوردي كانت مخلصه السفره
الحمدلله كانت حلوه السفره واستانست لمن جفتها وعجبتني وطلعت للسياره وانطلقت لعراد حق وحده اسمها بتول تحط لي ميك اب
طبعا انه من النوع الي مايحب ميك اب وايد وحتى لو عندي اعراس لو شنو يصير ماخلي وايد ههه
وهالمره انه مضطره اخلي ميك اب عرووس
وصلت عنها على الساعه 5 اختي قبلي خلت لها ومشت عقب الصلاه انه بدت فيني وكنت احاتي شلون بطلع والحمدلله لمن جفت روحي حسيت نفسي ملكه ههههههه كان فستاني ذهبي واخضر غامق مخمل وفيه فصوص ذهبيه وصاير جنه ستايله مغربي اخذته من جمعه سنتر بالسعوديه ب 100 وعلي تاج ملكي عريض ذهبي من سوق الحريم في الدمام ب 10 دينار ولبست تراكي اخذتهم من الرفاع محل مسوي تخفيض ب دينارين وصندلي اخذت شي استفيد منه ومن السعوديه اخذته مجمع جمعه سنتر ب 11 دينار وشعري كان كله وييفي مع باف خفيييف
حسيت روحي غييييير نهائيا ههههههه
وعجبني وتسلم يدها وكان ب 25 حطيت لي مابغيت عرووس لان اخاف ماتغير للخطوبه حطيت شي بسيط واهي العروس تحط لها ب 40 وميكبها كله ماركه مو اي شي
خلصت ومر علي خطيبي ورحنا صورنا في جير وخلصنا وبعدها الناس كانت 8 وشي اتصلت في امي قلت لها اني خلصت الا تسوي خلج بره تو الناس قلت لها اوكي
الساعه 9 اتصلت فيها ها كل شي اوكي قالت لحين ام فاضل مايت انه بدى قلبي يرقع وشوي واصيح من الخوف واهي تعرف امي عدل مستحيل تخذلها وماتيي تالي اشوه يت
طلعنا قلت له ابي عصير <<<فاضيه ههه
رحنا اخذنا عصير توه بيرجع ريوس الا ويضربه واحد من وره :confused: شهالحاله احين تم وياهم بره لي ماتفاهم وياهم وبروحون المرور يوم ثاني
اتصلت امي الساعه 9 ونص الا تقول يلا تعالي توكلنا على الله ورحت
وكان قلبي يدق الف دقه من الخوووف وصلت يم الباب جفت اخوي وابوي واقفين يم الماتم استقبلوني ونزلني اخوي بفستاني فديته لين الباب ودخلت ادور حد وينهم جان اجوف شغالتنا اقولها نادي ماما يت امي ودخلوني كان شعور خوف على فرحه لان الكل حولي ويفرحون لي ويرقصون :o
بنت اختي حاظنتني وتصيح فديتها:'(
وتموا يصوروني ويترقصون وكان خاطري اروح ارقص وياهم هههههه كان الماتم مرتبش وماتم حد قاعد مكانه الكل يرقص صج صج عجيييب كان
ودخل خطيبي وصوروا وعقب ابوي واخوي واجوف فرحتهم وانه دموعي جذي:'(
وخلص هاليوم على خيييييييير

يوم الحنه:o

كان تاريخ 16-10-2010 يوم السبت في بيتنا
الساعه 3 وشي يت الحنايه تحني اهلي وربعي قرايبي كللللهم
حنتهم حميده ام محمد ومعاها وحده من اهلهم حناها حلووو وغاااااااامق تسلم ايدها
خلصت على الساعه 6 وشي منهم
انه الساعه 5 يت الحنايه حقي زينب من مدينه حمد 17 تسلم ايدها ويعطيها العافيه ماقصرت
بدت فيني الساعه 6 حنتني وبدوا اهلي وربعي يوم خلصوا حناهم حطوا سماعه في البيت ويرقصون ويصفقون:lol:
خلصت مني زينب الساعه 11 ونص ووصلوها اهلي والساعه 12 يه خطيبي قعد وياي لي الساعه 2 راح بيتهم

تاريخ 17-10-2010 كان هاليوم بريك وراحه حقي ومنها اخلص مشاويري الي ماخلصتها اودي السي دي للصاله
واروح استلم عباتي

ليله الخطوبه
كانت بتاريخ 18-10-2010 يوم الاثنين في صاله مرمريز 3
قعدت الساعه 7 الصبح جهزت اغراضي واكلت لي شي خفيف وانتظر خطيبي ايي اروح ريفيرا استلم تاج الورد والستاند للتوزيعات واودي فساتين اليهال وجواتيهم وطرحاتهم للصاله
وطبعا عباتي ماستوت عدل واضطريت اروح يوم الخطوبه المحل استلمها بشكل نهائي

صارت الساعه3 الظهر واني لحييييين في عفستي ماوصلت البيت ولا تسبحت هههه والشارع زحمه والساعه 5 لازم اروح ميك اب هههه وفي السياره شوي واصيح خلاص وصلت حدي:'(
وصلت البيت ولبست ورحت الصالون نفس الشي الشعر بنت الفريج وكانت التسريحه فخمه ومميزه ويه التاج الورد والطرحه مثل اول سويتها القصيره ام 3 طبقات
خلصت شعر الساعه 5 وشي اختي خليتها تروح قبل عشان تتمكيج على ما انه ايي مر علي خطيبي 5 وشي ويوم وصلت بسيتين تذكرت اني نسيت الباقه ونرد نرجع ريفيرا استلم الباقه وصلت بسيتين الساعه 6
طبعا ميك اب مالي عند ابتسام كمال ب 70 للعروس تحط وباقتي كل الالوان فيها مسكه يد وفيها لون اصفر ووردي وماروني واخضر وبيج يعني كانت مميزه وعلى قولتهم الالوان جريئه ان عروس تسوي خلط جذي لان تخاف من الميك اب يعتفس
بس انه تجرأت لان اعرف ابتسام بتطلعني شي مميز وانه نتفه على قولت ابتسام باربي :o
خلصت اختي ولبست وقلت لها تنتظرني عشان تلبسني
حطت لي ميك اب ابتسام ولمن جفت روحي تميت فتره اظحك حسيت روحي مو انه كنت وااااااااااايد روعه اول مره اقتنع بميك اب جذي الحمدلله هههه لبست فستاني كان من السعوديه تفصيل سوق الحريم بالدمام ب 460 كان ناعم وقصه السمجه هههه لونه اوف وايت
خلصت الساعه 7 وشي وموعد الاستيديو صحاري الساعه 8 مر علي خطيبي ورحت هناك الساعه 8 تقريبا خلصت تصوير الساعه 9 ونص بوووو من وقت 8o| شسوي احين وكنت ميته يووووووووع مو ماكله اكلتي من الريوق الصبح
قلت له مر حلويات طارق ابي بيتزا ههههههه<< اقولكم فاضيه ههه
خلصت اكلت لي شوي وشربت بيبسي وتمينا نفتر لساعه 10 وربع اتصلت في اختي برزي اليهال لبسيهم اكو يايه
ماييت الا قاعدين يلبسونهم الكل اهم 3 بنات طبعا بنت اختي وبنت خالي وحماتي الصغيره
الكل لمن جافني انبهر على قولتهم ههههه<< كل تمدح روحها بس اقول الي قالوه عني ههه
الساعه 10 ونص لمن لبسوا اليهال وخلصوا
اووو نسيت اقولكم
اليهال انه مسويه فساتينهم نفس الشي خياط طبعا والموديل من النت مع شوي تغييرات القطعه والدانتيل والخياط والجوتي طلع كل وحده 30 دينار رخيص وقوي ههه
دخلت الساعه 10 ونص بروحي من غير خطيبي على موسيقى فيها يباب هادئه والكل يطالع جذي:-o وين ريلها هههههه نسته هههههه والا تقول بانطلونه فيه شي ولا تقول مادري شنو خبركم هرار النسوان ههههه:lol: لان محد كان يدري بالحركه غير اختي وبنت خالتي وامي واهو وخواته
دخلت بروحي امشي لين المسرح ولمن ركبت على الستيج الكل صفق وصفر ويبب وصوروني وقعدت وخلصت موسيقى مالت دخلت عليها موسيقى نفس الرعد والعاصفه قمت وقفت نزلت الطرحه وابتدت اغنيه خطيبي يدخل معاه اهله واهلي من وراه يصفقون قبل لا يدخل اخته كانت تمشي في يدها مخده مخمل مارونيه حطيت فيها الطقم ومع خطيبي بنت اختي وبنت خالي في يدهم باقات ورد بكل وحده وفي كل باقه عمود مرتفع فيه الدبله:adore:
اخته يت تمشي لين عندي عطتني الطقم وخليته على الطاوله لان فيه ستاند مسويه ابوي حقي فديته وطبعا مزين بالورد الطبيعي في ريفيرا
وعقب ركب الستيج حقي واليهال الثنين وقفوا يم بدايه الستيج على الدرج مقابلين النسوان
يه يمي ورفع الطرحه وباسني على راسي وصورنا وقعدنا شوي الا ابتدت موسيقى هادئه عقب شوي طلع صوت الشيخ يقول فيه بصوته اسمعيني يا (اسمي) (اسمه كامل) يتقدم لخطبتك على هذا المهر وهذه الشروط فان كنتي وافقه فقولي نعم اوافق ويطلع صوتي اقول نعم اوافق
طبعا ساحبه الشروط والمهر مايطلع بالخطوبه
عقبها يوم قلت نعم اوافق خطيبي باس يدي وقومني وداني بدايه الستيييج نلبس الدبل :thumbs_up:
رجعنا عقب مالبسنا الدبل وصار الرقص
ودخلوا اهلي سلموا علي وامي لبستني قلاده ورد وفلوس فيها انه وخطيبي هديه منها
وابوي لبسني طقم هديه منه ولبس خطيبي ساعه
والمفاجأه ان اختي شرت حقي طيور لوف بيرد الي ميته علييييهم ابيهم يابتهم لي في قفص مزين وياشبه باقتي هههه
وبنت خالتي كانت يايبه حقي ساعه

والاحلى ان دخلوا علي بباقه ورد كبيييره من عند انسانه عزيزه علي ماقدرت تيي عندها حاله وفاه وطرشت لي الباقه فديتها الله يخليها لي ان شاء الله وفرحتني هالمفاجأه واااايد
كان هاليوم كله مفاجآت وحلووو واستانست ماتم حد مارقص الكل كان يرقص
وعلى قوله الي يو ماكان خطوبه كان عرس من الف ليله وليله وكان روعه ومدح واااايد

هذا تقريبا التقرير ان شاء الله حد يستفيد منه لو شوي
واي سؤال انه حاظره

هااا شراكم في خطوبتي؟؟
استاهل تقييم او لا؟؟:thumbs_up: