بين أهلي وزوجي

الحمدلله يا بنات رجعت لبيتي و مشكلتي مع زوجي انحلت بس الحين لأنه احنا لجئنا لأهلي في أغلبية مشاكلنا أهلي صارو مستضغيرين زوجي و مش مقدرينه ...

انا ربيت اول مولود لي و رحت بيت اهلي بس للاسف ماكان في حد يقعد لي ... الحمدلله الشغالة على الاقل ساعدت .. اخواني اللي في جامعته واللي في مدرسته ..والوالدة الله يهديها اشتغلت فراشة في مدرسة عشان ما تقعد في البيت مع اني اعطيها راتب

الصراحة مالقيت راحتي في بيت اهلي ، قبل ما اتم الاربعين رجعت لبيت زوجي ، قبل فترة قصيرة لقيت لي بيت قريب من اهلي وفرحت وايد اني بكون قريبة منهم على الاقل وقت ما هم موجودين ممكن اجي اتونس معاهم وفي نفس الوقت بكون مطمنة على ولدي الصبح لما اكون في الدوام .. بس المفاجأة كانت اني ما لقيت اي حد من اخواني يساعدني ، اللي مشغول واللي عندها موقف مع زوجي ما تبي تجي و امي مشغولة مع عيالها وشايفة انه كان المفروض اعبرها اكتر و اكلمها اني معزلة قريب منهم عشان يساعدوني مع اني قبل الاربعين طلعت من بيتي و جيت لها لحد البيت عشان اوريها بيتي الجديد والله يعلم اشلون انا اتبهدلت وولدي معاي في السيارة عمره اقله من اربعين يوم يصيح و انا اسوق السيارة وزوجي اتصليها وكلمها انه احنا وقعنا العقد و بنصير جيرانهم

والله الموضوع حز في نفسي وايد ، حسيت نفسي مققطوعة من شجرة واهلي قريبين مني واهل زوجي اللي يتصل واللي واقف معاه ويساعده ، اليوم الوالدة جابت معاها غدى وجاتني البيت ولما اتكلمت معاها و اعاتبها زعلت لأني قلت لها انه هاذي اول ولادة لي وما ورتني ايش اسي وايش اعمل كاول تجربة ..زعلت و سكرت على الموضوع وقالت انها انصدمت فيني و اذا كان على الفلوس اللي اعطيها اياها الله الغني وهي موب محتاجة واذا على الولادة انا مش اول ولا اخر وحدة تولد وتنزل في بيت امها و معصبة اشلون اقول اني جايبة خدامتي معاي كانت شايلة البيت الفترة اللي كنت عندهم .. يعني انا قصدي بكلامي اني كنت ابيها هي اللي تخدمني؟ ولا انا مستكترة ان شغالتي تجي وتخدمها ؟ صراحة ما عرفت اتكلم و ما عرفت اقول اي شي غير اني كنت متوقعة من امي انها تكون امي بس هي الله يهديها

بمواقف اهلي حسيت انه ما حد قدرني مع اني من عمري 19 سنة وانا اساعد في البيت ، حتى هم صايرين يتعاملون معاي انا وزوجي كأننا راعيين مشاكل و نعظم الامور مع اني اشوف انه هذي ابسط حقوقي اني احس بالتقدير و احس ان اهلي حوالي .. مادري كيف اتصرف غير اني انفل بحياتي و اركز على زوجي و بيتي و مالي دخل بأخواني ولا امي و بس اعمل الواجب معاهم عشان ما اتوقع وايد و لا انصدم في حد واقعد اشتكي