افتوني في حل مشكلتي مع زوجي واخوانه

موضوعي في غاية التعقيد وحياتي الزوجيه متعلقه بحل مشكلتي وهده هي بداية قصتي تزوجت بقريب لي وتعلق قبول زواجي بشرط اني اريد ان اسكن بمفردي مع زوجي واهل زوجي رفضوا وطلبوا مني ان اسكن مع زوجي واخوانه اثنين في نفس المنزل بسبب انهم مايقدرون على الأيجار وراح يتساعدو في دفع الأيجار

ملاحظه ان زوجي يعمل هو واخوانه في بلد واهله يسكنون في بلد آخر ومن ثم وصلنا لتسوية قبل الزواج ا ن اهله طلبوا مني ان اطبخ لهم وانا وافقت على اساس مايتحكمو فيا واطبخ الي انا ابغاه واقدر عليه على حسب الظروف

بعد كدا اشطرت شقه يكون لها بابين ويكون لي جهه منعزله عنهم وان لا يتدخلوا فيها ابدا لاكن بعد الزواج تفاجئت بتغير كل هدا وحصلت تدخلات في حياتي من اخوانه عند شراء اغراض لمنزلي ضروريه مثلا فناجين شاهي اكواب مويه ملاعق سكاكين وهكدا وزوجي يقول : ما ابغى (ما له داعي ما له داعي ) لازم تشاوري اخوي الكبير بالرغم في مجتمعنا من عاداتنا ما نختلط مع اخوان الزوج وانا تفاجأت بموقفه هدا وهدا في اول ايام زواجي وحتى لما جيت وجدت منزلي في حاله يرثا لها وبدأت بالتنظيف كالخادمه وبمساعده من زوجي مع الطبخ لهم من اول يوم وصلت به في المنزل وبعد ماكانوا اثنين اصبحوا اربعه وصاروا يتدخلوا في كل حياتي في كل صغيره وكبيره اشياء تخصني وتخص بيتي مثلا يتدخلوا في دهابي للكوافير وهو يستأدن من أخوه الكبير في كل شيء ويقول اخوي ما يبغى يشتري هدا ومايبغاكي تروحي للكوفيرا واشيا من هدا القبيل يعني انه ليس له رأي ولا مشوره في اتفه الاشياء مع العلم انهم في وضع مادي جيد ولكن يتحكموا في زوجي لأنه الصغير في اخوانه وتحملت ورضيت .....

أدا خرجت عند احد زياره ارجع احصل المطبخ حايس وادا قعدت مع زوجي احصله مهموم وطفشان من اخوانه وتحكمهم فيه وادا رجع على العشاء نعشيهم دفعتين كل اثنين مع بعض على حسب عملهم ورايح جاي يودي لهم مويه ويودي لهم اكل ومره مهتم فيهم وخايف يتأخر عليهم وهم يقولوله ليش ما تقعد معانا ليش أنته أكيد تروح عند زوجتك وتساعدها ليش تساعدها ومن هدا الكلام يعني كأننا مش عرسان وانا ابغى نعيش حياتنا براحتنا وأنا أستحملت ورضيت وبعد مده تعبت وعملت عمليه جراحيه

وجوا أهلي وأخدوني وسافرت عندهم لأني كنت بحاجه للأهتمام والعنايه وقعدت مدة شهرين عند أهلي وكان يتصل بي ويقولي أنه تعبان نفسيا وأنه زعلان من اخوانه لأنهم ما يحترمونه وأنه مل وراح يجي عشان ينفك ويرتاح منهم حاس أنه مظلوم من اخوانه مع العلم أنه شغلهم مع بعض وهو يشتغل اكثر منهم وجاني وقعد شهر ومر الشهر وأحنا في تعب ومشاكل أهله كل يوم يتصلوا ويقولوله ليش هدا اللعب وارجع لعملك وأنا كنت أقوله خلينا نرجع وهوا مو راضي المهم أهله يحسبون أنه أنا الي ابغاه يقعد معايا عشان نتمشى وننبسط فصاروا ينكدوا علينا وأخوانه يتصلوا على أهلهم ويقولوا هي ما تبغى تطبخلنا هي تدلع عليه وهو مديها على كيفها وصاروا كأنهم هم المظلومين وأنا ظالمتهم لأنه احيانا على قولهم أأخر عشاهم أو ما أطبخ ألي يبونه مع أنه البيت فاضي ماأسوي ألا الي يجيبوا وبس المهم رضينا بالهم واللهم مو راضي بينا .....


اخوانه يتصلوا ويشتكوا وأهله يتصلوا عليه ويشتكوا وأنا ساكته وراضيه وبعد كدا جات الرساله ألي حرقت أعصابي من والده في جواله فيها كلام عليا بأنه لازم يأدب مرته ولازم أسمع كلام أخوانه وأنه أسوي كل ألي يبغونه المهم أني أنا رفضت أرجع معاه و طلبت أنه من حقي أعيش مع زوجي لحالي أدا راضي يجي ياخدني وأدا مو راضي يخليني عند أهلي وسافر وهو يبكي ويقول حسبي الله على اللي يبي يفرقنا عن بعض وزعلان من أخوانه وهو مسافر عندهم ملاحظه قبل مايسافر تعب فوداه أبويا عند قارىء شيخ تبع الهيئه وقراء عليه وقاله روح عند دكتور نفسي وقاله الدكتور (أنته عندك جهد نفسي وما تقدر تأخد قرارات تخصك وتخص حياتك توصل عند القرار وترجع تدور وتلف وقراراتك سلبيه وأنته تسرح كثير وعندك هلوسه ) وصحيح أنا كنت حاسه بكدا و أصريت عليه يروح عند الشيخ بس كان متردد وخايف ومن أول ما تزوجنا كان يسرح أحيانا ويفكر كثير ولما بسأله بيقعد يبكي ويقول اخوانه ضاغطين عليه قلت له اجل كيف أتحمل أدا أنته ما تحملت أخوانك

.
المهم أنه بعد ما سافر بثلاث أيام أتصل على أهلي وأتغير كل موقفه معي بعد ما كان معايا صار ضدي مع أخوانه المهم غيروه وصار يقول كلام مثلا أني أنا ما كنت أطبخ وأني ما أعرف أطبخ وأني بنت دلع وأني أنا سبب مرضه مو بأخوانه وأنه ماحد يتحكم فيه من أخوانه وأنه له رأيه الخاص والشور شوره وهو العكس لأنه قبل مايسافر تفاهمنا معاه أنا وأهلي وقال : الشور شور أخوي الكبير والكلمه كلمته في كل شيء المهم عكس الكلام ألي كان يقوله عند أهلي 180 ^ درجه مختلف .
وقال يااما زوجتي تجيبوها أو فلوسي ترجعلي وأهله قالوا هدا وضعنا وما راح يتغيراحنا عيشتنا كدا نعيش مع بعض في بيت واحد وما نفترق والطبيخ لازم اطبخلهم غصب عني موبكيفي

المهم بعد ماسافر بأسبوع تفاجأت أني (( حامل )) وبكيت كثير وقلت الحمد لله هدي أرادة الله لكن مابرجع ألا أدا تعدل الوضع المهم الأن صارلي شهر عند أهلي من بعد ماسافر وقلت ماراح أرجع ألا أكون في شقه لحالي حتى غرفتين ما طلبت الشي الكثير .
المهم هده الأحداث مرت خلال ستة أشهر من زواجي ..


وأرجوالأهتمام بحل قضيتي أو أعطائي الرأي المناسب لها وأأسفه على الأطاله ......