شتسوي البنت المحتاجه للزواج و اهلها يرفضون لأسباب غير منطقية !!

السلام عليكم و رحمة الله و بركاته

اول شي فكرت اتكلم عن هالمشكله بأنها مشكلة صديقة لي او أي بنت اعرفها بس لأ قلت يا بنت يا Miss.B خلج شجاعه و قولي اللي بقلبج

عمري 20 سنه و الحمدلله طالبه جامعيه و ماشيه في دراستي ، مواصفاتي اعتقد انها تعجب الكثيرين لاني مرحه و دايما مبتسمه و الحمدلله رب العالمين صحيح اني مو ملكة جمال لكني مملوحه

انخطبت اكثر من مره لكن امي و ابوي يرفضون لاني بعدي صغيره و الدراسه اهم ! ماعتقد اني صغيره و حتى لو كنت فعلا صغيره مثل ما يقولون بس في شي ناسينه او يمكن مو حاطينه في بالهم اصلا .. انا بنت محتاجه للزواج و محتاجه للعاطفه و الحنان اللي مسحيل اقدر آخذه من اهلي .. الحمدلله اني متربيه عدل و متمسكه بديني و أخلاقي لاني لو كنت العكس ، الله يعلم شبسوي ! ما عندي علاقات مع الشباب و لا تلفونات و لا هالمواضيع اللي للأسف منتشره هالايام بين بعض البنات

اعتقد ان المكافأه اللي استحقها على صبري اللي الصراحه ابتدى يخنقني اني اتزوج و اتمنى يكون بأسرع وقت ممكن

قلتلكم اني انخطب لكن تخيلوا اهلي رافضين الفكره من الأساس لدرجة انهم ما يسألون حتى عن اسم الشخص او عايلته او اي شي عنه ، يعني مثلا الام تشوفني بمكان و تسأل امي عني .. تتوقعون شنو الرد ؟امي تقول بعدها صغيره عمرها 20 سنه و ماراح تتخرج الا بعد سنتين و احنا مو مستعيلين عليها !!

اوكي و أنا ؟؟ وين رايي ؟؟؟ تكلمت معاهم أكثر من مره لكنهم ياخذون الموضوع ضحك او مثل ما نسميها غشمره او انهم يقولون ليش مستعيله على الزواج توج صغيره شوفي الدنيا و استانسي و الزواج لاحقه عليه !

و الله أنا خايفه على نفسي .. البنت مهما كانت ملتزمه او على الأقل محافظه على نفسها و أخلاقها و سمعتها هذا مو معناه ان ما عندها احاسيس و مشاعر و لها احتياجات مستحيل تقدر العائله توفرها لها و هذا اللي يخلي بنات وايد يدورون الحب و الاهتمام بطرق خاطئه .. الله يبعدني و يبعدكم عنها يارب

آسفه اذا طولت عليكم لكن لو ظليت اتكلم ماراح اخلص من اللي فيني