والله قهر ......قهر

مسا الخير بنات كيفكم يمكن في بنات بيعرفون والاغلب لا لاني كنت من رواد هالقسم من سنتين واكثر بس تعبت كتير فقلت خليني ابعد شوي بس اكيد بطلطل عليك من وقت لتاني

بس عنجد كتير متضايقه ومخنوقه ومو قادر افضفض لحد غيركم ما بقدر افضفض لاي حد تاني صعبه احكي لامي او لخواتي لاني ما بدها احملهم فوق طاقتهم وما بدي اخوفهم علي اكتر وما الي غير الله وغيركم

انا صرلي اربع سنين ونص متزوجه ولسه الله ما كتبلي الحمل والحمد لله راضيه وعايشه ومقتنعه انه من عند رب العالمين بس اليوم عنجد تضايقت كتير اليوم سلفتي (زوجه اخ زوجي )قعدت ترمي حكي انها حامل وتعبانه رغم انها ست كبيره بجيل امي وبنتها انا وباها اجيال تقريبا بتحكي انها حامل بس ما بدها اياها بده تنزل نفسها وبتحكي خلينا نترك الحمل لغيرنا احنا عنا وبكفينا الي عنا وبتحكي المفروض انه ان الي اكون حامل مو هي لانها هي ما بدها وبتحكي يا الله هالدنيا الي قاتل حاله علشان يحمل ما بيحمل والي ما بده بيحمل عنده ضايقتني كتير رغم اني متاكد مليون بالميه انها مو حامل بس حكت هيك علشان تغظني لانه لو فعلا حامل كانت رح تخليه علشان تجاكرني لانها ما بتطيقني

بنات والله تعبت كل ما احاول انسى الموضوع وافكر باشي تاني بيجي حد يضايقك عنجد طول اليوم وانا ابكى ودمعتي على خدي وزوجي مسافر عنجد قهر حسيت حالي اليوم ولا اشي وهي بتحكي وبتجاكر لو شفتوا اسلوبها بنات عنجد بتجاكر في وبتقلي يلا لازم تحملي بسرعه انتي زوجك اخر العنقود لازم نشوف ولاده ما بيصير يضل اكتر من هيك من غير اطفال وبتقلي شو رايك اعطيك الي ببطني ما انا هيك هيك ما بدي اياه شو رايك تاخديه عنجد قهر يا بنات قهر مش عارف من الصبح وانا بحاول انسى كلامها بس مش قادر كانه سكاكين بتطعن في قلبي

ما بعرف ايش استفادت من هالكلام غير انها جرحتني وتعبت نفسيتي

معلش طولت عليكم بس ما الي غيركم افضفضله واحكيله