كيف استطيع ان اكمل الفكرة

السلام عليكم

بعد التحيه انا حدخل في الموضوع على طول
انا جوزي بيشتغل اعمال حرة بمعنى اخر بيشتغل يوم و اينام اسبوع مع انه خريج تجارة و كان بيشتغل في المصر و عامل حلو جدا بس نعمل ايه لاولاد الحرام بقى ما بيسيبوش حد في حاله قعدوا ايزنوا عليه لحد ما ساب الشغل و خد فلوسه كلها حطها في صفقه و هو ما عندوش خليفه كافيه عليها و خسرت الصفقه و قعد هو يصفق :thumbs_down:

و الحمد لله على كل حال
انا دلوقتي عايزه اشتغل شغلانه في البيت تساعدني في المصاريف او على الاقل تغطي مصروفي الخاص و مصروف ابني الله يفرحني بيه يا رب

و انا ساكنه في منطقه مش بأعرف فيها حد غير جوزي و مامته و خالته و بس هو مش عايزني اختلط بحد مع ان بقالي سنتين ساكنه بس حتى الجيران مش عايزني اتعرف عليهم

و كل ما احكيلهم على مشروع ممكن اعمله بيقولولي دا عايز تسويق و انتي ما تعرفيش حد و حماتي رافضه تماما انها تسوقلي الحاجات مع انها من المنطقه و معارفها كتير اوي
و كل ما احكيلها اني عايزه اعمل كدا عشان اساعد ابنك (زوجي) في المصاريف و اشيل عنه تقعد تتريق عليا و تضحك و تدمرني خالص

المهم نيجي للخلاصه اللي انا طلعت بيها بعد تفكير طويل و مشاورة لاهلي و اصحابي اللي ساكنين في حته تانيه تبعد عني 1200 كم :'(

حبيباتي عرايس عروس انا فكرتي هي اني اعمل كتالوج خاص بيا تكون فيه منتجات طبيعيه للعنايه بالبشرة لاني عندي وصفات كثير باعملها في البيت ليا و لاخواتي (ايام زمان ) و ناجحه معايا و الحمد لله فقلت ايه رأيكم اني اتوسع و ابيع و بما اني ما ليش معارف في المنطقه فكرت اعمل بروشور او كتالوج صغير من 3 او 4 ورقات بس و يكون بالصور و الاسعار و كدا و طبعا ما فيش في الكتالوج اي حاجه تدل عليا انا (حأضحك على حماتي :worn_out:) و احط فيه نمرة تلفون ( يا رب جوزي يرضا ) و ممكن ايميل كمان عشان التواصل و ممكن كمان احط لينك عالفيس بوك كنوع اخر من تسويق المنتجات ها ايه رأيكم ؟؟؟؟
حلو؟؟؟؟ طيب نيجي بقى للمشاكل اللي واجهتني في التنفيذ
اولا اني ما عنديش رأس المال المناسب للعمل و فكرت اخدهم من ماما كسلفة و بعدين لما اتوسع ارجعهم هي قالتلي لو المشروع حيزبط و عارفه انك حتقدري عليه انا ما عنديش مشكله ممكن اديهملك حتى من غير سلفه بس انا رافضه اني اخدهم من غير ما ارجعهم
تانيا اني مش عارفه احدد سعر الحاجات لاني عمري ما اشتريت المكونات و علب التعبئة بكميات كبيرة كنت باعمل باللي موجود عندي
و خايفه لو رحت و جبت الحاجات بكميات المشروع لا قدر الله يفشل و اتورط انا في الفلوس بتاع البضاعه و بعدين تبقى شماته من جوزي و حماتي :mad: مش حأقولكم حيبقى منظري وحش وحش وحش
تالتا باعتبار اني ما عملتش حاجات و تغليفات شيك لسه فمش عارفه اجيب الصور اللي حاحطهم في الكتالوج منين؟؟؟و مش معقوله احط صور كدب و بعدين ابيع حاجات غير اللي في الكتالوج دا يعتبر غش صح و (ما بني على باطل فهو باطل )
رابعا مش عارفه فين ممكن اعمل الكتالوج مكان تكون اسعاره معقوله لان الكتالوج حيتوزع مجانا فالواحد مش عايز يدفع الفلوس كلها في الكتالوج و ما يصنعش البضاعة
خامسا و اخيرا عايزه اعرف مكان بيبيع البوكسات و العلب الصغيرة الفاضيه و الحاجات بتاع التغليف و التعبئة و ايكون بالجمله و كمان لو فيه مكان بيعمل استكرات مخصوص يعني عشان احط ستكر على المنتج فيه الاسم و رقم التلفون و كدا زي المنتجات الكبيرة :o

و اخيرا حبيباتي سامحوني على الاطاله و انا عارفه انكم مش حتسيبوني و مافيش غيركم حيساعدني ابتدي مشروعي و ليكم مني لو المشروع ربنا اكرمه و استمر ادعيلكم بظهر الغيب و بارك الله فيكم مقدما