زوجي فشلني مع أهلي

بعد 10 ايام بتم سنة على زواجي لكن احس انه السنة دي كانت كأنها عشرة سنين خبرة زواج ... زوجي طيب وحنون بس عصبي.

لما اتقدم رأيت فيه الشاب الصالح اللي يخاف ربه واتغاضيت عن بعض الامور زي انه مستواه التعليمي اقل من مستواي وكذلك وضعه المادي بالاضافة الى انه من النوع المسيطر والمتحكم
كنت شايفة ان تسلطه وتحكمه نوع من قون الشخصية لكن بعد الزواج اكتشفت امور كتيرة.

اكتشفت ان زوجي مستواه التعليمي اقل من اللي قال لي عنه ولكن وعدني انه حيحاول يحسن وضعه ويرجع للدراسة ولقيت انه انسان ثقته بنفسه ضعيفة و مهزوزة لأنه اخوانه كلهم متعلمين وهو الوحيد اللي ساب الدراسة ... و شخص شكاك يتابع الامور وما بيثق في كلام الناس اللي حواليه.

في الاول رضخت لكل طلباته ... غيري الموبايل ..غيرت، غيري البنك بتاعك ..غيرت ، في تلفون في بيت اهلك باسمك كنسليه ... كنسلت لغاية ما اهلي بدو يتغاظو و يتكلمو معاي انه اللي انا بسويه غلط وما بيرضي حد و كانو عارفين انه التصرفات دي زوجي وراها بس ما حبو يتدخلو على اساس انه ما عايزين يخربو بيتي فبدأت اتمرد و اطالب بحقوقي وهنا بدأت المشاكل.

طبعا لأن زوجي طبعه متسلط ما رضى ابدا اني تكون لي شخصية مستقلة او رأي مختلف عن رأيه بقى يشوف اي رأي مخالف عن رأيه معناه اني مغلطاه او ان التصرف ده في حد وازني عليهو فبقى يشوف في صحباتي و طلب اني ابعد عنهم ...طبعا انا رفضت في الاول بس في الاخر بديت ابعد تدريجيا عشان ما اخرب بيتي ...لما لقى اني لسه مصرة على مواقفي بدى يشك في اهلي وخصوصا امي واختي و بقى يختلق المشاكل مع اختي لدرجة انه يوم في خلافتنا رجعت لأهلي زعلانة فقام اتصل وطلب اختي في التلفون وقال ليها ارتاحي خلاص انا واختك حننفصل!

انا حاليا لي اسبوعين والدة وقاعدة مع اهلي ..شفت في الفترة ما يوازي طول فترة قعدتي معاه
اي نقاش معاه بيوصل لأبوي كشكوى واذا رسل مسج ورديت بمسج ماعجبته بيعيد ارسالها لأبوي عشان يوصل لأبوي معلومة ان بنتك ما محترماني واي نقاش فيه الفلوس ومطالبه بحقوقي بيلم الاهل و يقول اني ذليته بفلوسي والله احرجني قدام ابوي قعد حسب كل المرات اللي انا ساعدت فيها معاه و كم الكاش اللي انا عطيته

طبعا هو كان فاكر اني كلمت اهلي ... ابوي طبعا اتغاظ لأنه شايف اني انا اللي اديته فرصة من الاول ... واي خلاف يدور بيني وبينه اهلي واهله عارفين بيه ..انا بقيت حاسه انه حياتي مكشوفة وما بقيت بثق فيه عشان مواقف كتيرة حصلت بس انه حتى الكلام والنقاشات اللي تدور حتى لو كان فيها كلام زعله ما من المفروض يكلم بيها الاهل ....انا وصلت لمرجلة اني بقيت ما قادرة اتعامل معاه ...زوجي صعبها علي جدا و حتى الواحد لو رجع الامور ما حتكون زي الاول

انا بقيت ما عارفة اوقف ولا استمر واذا استمريت استمر كيف ؟