شرايكم بردة فعل أم زوجي

السلام عليكم ورحمة الله وبركاته

شحالكم خواتي ؟؟انا صارلي متزوجة سنة و3 شهور طبعا انا لما ملكة في المحكمة عطيت المأذون شروطي ومن ظمن هالشروط بيت منفرد عن أهله وأكمل دراستي وأشتغل أذا خلصت جامعة واتعلم السواقة .. المهم بعد الملكة ولي استمرت سنتين قررنا نحدد العرس وطبعا زوجي سألني قالي بتسكنين بيت أهلي والا تبين بيت روحج ! قتله بيت بروحي قالي اوكي ما عندي مانع واليوم الثاني رد علي قالي أنا ما اقدر عندي الالتزامات العرس وغيرها بس انتي سكني في بيت أهلي سنة أو سنتين بعدين بنقلج بيت بروحج بصراحة انا زعلت هذاك الايام واستغربت منه كيف غير رايه وما كلمنا بعض يمكن كم يوم وبعدها ابوي سوى غدا في بيتنا عشان العيد وحضروا اهله كلهم وهو بعد حضر بعد ما تغدينا وقبل ما يروحون أم زوجي كلمتني قالت ريلج قال أنج تبين تسكنين بيت بروحج وهو بصراحه ياي مضيق وما يبا يطلع بيت بروحه وانتوا بعدكم صغار ومن هالكلام ورديت عليها قتلها خلاص عادي انا عندي مب مشكله بسكن عندكم ...

وسكنت في بيتهم سنة وشهرين وكانت أم زوجي تحبني وايد وتمدحني عند حريم الجيران تقول حرمة ولدي هذا أحسن من حرمة ولدي الكبير . .. وكانت كله تتكلم عن حرمة ولدها الكبير أنها وسخة وانها عنيدة وانها تشتري كل شي غالي ومن هالكلام وانا اسمع واطنش وكل ساكته ما ارد لان انا طبعي هادي. حرمة ولدها طبعا تصير بنت عم ريلي يعني من أهلهم وانا غريبه عن عائلتهم . وبالعكس لما قعدت عندها حسيت حرمة اخوهم طيبة وما شفت عليها شي واخو زوجي وحرمتة طبعا ساكنين بيت بروحهم يعني بس انا وزوجي كنا ساكنين في البيت
وأمه وأبوه وأخواته وأخوه لي أصغر عنه
وبعدين زوجي قرر بنفسة قال انا بنتقل عشان ناخذ راحتنا أكثر لان نحن ساكنين في مكان بعيد شوي وهو بغى يقرب من المدينة وعشان أقرب له حق دوامه المهم زوجي دور بيت اجار وحصل طبعا ما شاور احد ولما ترتبت امور البيت وكل شي خبر أهله أمه لما درت انه بينتقل عصبت وطلعت كلام قالت انت ما شاورتني ولا كلمتني انك بتتنتقل قالها حتى لو شاورتج بترفضين فأنا مني عرفت أنه هي من البداية ايام الملكة لي ما كانت تبانا نسكن بروحنا

وتمت أم زوجي متغيرة علي لما عرفت أن نحن بنطلع ولا تعطيني ويه وما تبى تكلمني لان تحسب أن أنا لي اريد انتقل مب ولدها قتلها بالعكس انا مرتاحه عندكم وبيت اهلي قريب من بيتكم ما عندي مشكله وحتى ريلي حلف له قالها ان هو بنفس لي يبا ينتقل .. وتمت جي مغير معاملتها معاي كله طنشني وقبل لا نتقل بيوم رحت انا وريلي نكلمها مر ثانية عشان نخبرها ان نحن بنطلع باجر قالت انا عادي ما عندي مانع اخوك واخواتك ترى بعد كل واحد في بيت بس انتو ليش ما شاورتوني وتمت تصيح وتتكلم وانا تميت ساكته بعدين دخلت غرفتي واليوم الثاني لما جبنا سيارة تشل اغراضنا ما طاعت تسلم على ريلي صدت عنها وانا لما طلعت سلمت على اهله كلهم وتميت اصيح لان ما هانت علي هالسنة لي قعدتها وياهم حتى هي ام زوجي لما شافتني اصيح استغربت وتمت تصيح ...

وراحت اليوم ثاني قالت حق حرمة جارتنا ان ولدي جاب سيارة يحملون اغراضهم حتى ما قالي ان هو بيطلع وحرمة جارتنا خبرت ولدها و ولدها خبر ريلي وريلي تم معصب قالي كيف أمي تقول أن انا ما خبرتها اني بطلع وانا مخبرنها ويعني من هالكلام

وانا احين صارلي شهر من انتقلنا يوم العيد جات تزو بيت أهلي ومتغيره حتى على أمي ما قعدت تسولف مع أمي نفس كل مرة وانا مطنشتني لما أعطيها شي تاكلها تقول ما اريد

واحين من اسبوع سويت عزومة في بيتي ورحت أنا وزوجي بيتهم نسلم عليهم ونعزمهم على العزومة وطول الوقت متجاهلتني وتكلم حرمت أخوهم وانا مطنشتني وتضحك وياها بس عشان تقهرني وهي قبل كانت تسب فيها وتتكلم عليها اخر شي صارت هي احسن عني فلما بغيت اطلع اسير بيت اهلي عزمتها على الغذا قالت لالالالالا انا ما بجي بطريقة فظيعهها وانا دموعي اربع اربع واخت زوجي ما رضت على طريقة امها وزعلت من امها ..

ما ادري شو اسوي وياها يعني انا لا اذيت احد ولا سويتلهم شي بالعكس كنت هادية وحبوبه عندهم واي شي يبونه كنت اوصلهم واطلع خواته وياي لما اطلع واقول اخر شي هذا جزاتي وكل اصيح وافكر اقول ياربي انا شو سويتلها يعني بس عشان طلعنا بيت بروحنا جي تسوي فيني يعني احين افكر اقطع زيارتي لهم بعد المعاملة سيئة لي ليقتها منها.. ريلي قالي حتى حرمة اخوهم جي عاملتها سنة كاملة لم طلعوا بيت بروحهم يعني حرام عليها بناتها لي متزوجات كل وحده ساكنة بيت بروحها وانا وزوجي حرام علينا نسكن بروحنا انزين امي انا شو سوت لها عشان تغير من معاملتها حق امي بس ما اقول الا حسبي الله ونعم الوكيل