مذلة شقة الاحلام

السلام عليكم

بنات اول مرة اكتب موضوع بس احس ضايقة فيني الدنيا

بقول لكم القصة من البداية .. انخطبت من قبل 3 سنوات ويوم اللي جو يتقدمون لي .. جا زوجي مع بيتهم و اخوه الكبير كلم اخواني و خبرهم انه البيت مبني جديد و مسوينه نظام شقق وانه زوجي عنده شقة بس حاليا اهو الاخو الكبير ساكن فيها لمدة سنة بس ع ما يجهز بيته و ينتقلون ..

المهم عدت ع خير و انخطبنا و بعد الخطوبة مرت السنة وما جهز البيت و قلنا يلا مو مشكلة نجهز روحنا ونستعد اكثر للزواج من بعد السنة ظل حميي يتصل فيني يقول لي بشارة خلاص بنطلع وبنتحول شهر 2 و ارد عليه خلاص اكيد ؟ :thumbs_up: يقول لي اكيد خلاص خلصنا كل شي تقريبا انزين واتصل لخطيبي و نستانس و نقعد نخطط و يقدم ع اجازة من الشغل للزواج و اني بعد اقدم ع اجازة من شغلي وطلعنا ورحنا نحجز كل شي لشهر 4 قلنا بيطلعون شهر 2 و بنعطيهم فرصة اشوي بعد ,, تونا بنحجز الصالة اتصل وقال لا شكلنا بنطول ..

المهم ردينا صادنا احباط و سكتنا .. مرة ثانية رد اتصل فيني وقال اليي اعتمدي هالمرة خلاص شهر 4 احنا طالعين .. وردينا احنا المساكين صدقنا و تاكدنا وياه اول شي هالمرة و قلنا اليه ترى بنجهز كل شي ع اساس شهر 6 زواجنا .. كل مرة نعطيهم فرصة للتاخير اشوي ونحاسب اليهم يعني..

عقب قام يمشي ويقول للاهل احنا ضاغطين عليهم و كفاية عليه التعب النفسي ويا البناي و احنا كل يوم نحن عليه متى يطلعوون ! واجبرناهم يطلعون !

وهو اللي كان متصل و قال هالكلام احنا حتى ما سألناهم لا يتضايقون او يتحسسون من الموضوع انه احنا ننتظرهم .. :'(

انزين صار شهر تسعة قلنا خلاص بنكمل سنتين واحنا ننتظرهم و بيتهم جاهز ع فكرة بس مو راضيين ينتقلون يبغون يخلصون كل شي حتى علبة الكلينكس ما تنقصهم بعدين ينتقلون :hysterical:

كنا رايحين نزور بيت جد زوجي سألونا متى الزواج ان شاء الله.. زوجي خبرهم انه خلاص بنتزوج الشهر الجاي و بنتأجر شقة لانه السالفة مطولة ويا اخوه.. عمه سمعنا و عصب يقول الحين شقتك جاهزة وموجودة وهم ع اشياء تافهة معطلينكم و بيتهم جاهز

خلاص اعتمدوا انه زواجكم الشهر الجاي و انا عند كلمتي.. راح وكلمهم و احنا ماندري وش قال اليهم المهم انه يوم ثاني بدوا ينتقلون غصبا عنهم من الشقة الى بيتهم..

طبعا احنا استانسنا وهم عادوونا حتى السلام ما يسلمون علينا و زوجته لا جت في زواجنا ولا حتى عقب ما باركت اليي .. و هي خبرت الكل انه احنا طاردينهم من الشقة !!:confused:

والكل صار يطالعنا بهالنظرة انه يعني اشلون زوجي طرد اخوه الكبير وما حاسب اليه وصار موقفنا كلش لانه اهي تمشي وتتكلم وتقول احنا طردناهم وما ظل احد ما وقف وياهم ع اساس اهم مظلومين واحنا السبب !!

حسيت ما فيه مجال يتعدل الموقف وطنشت قلت الله كريم وش اسوي يعني امشي وراها واعدل كلامها؟ والناس خلاص فاهمة هي الصدق اللي تقوله مع انه شعور حده كريه تحسين الكل فاهمنش خطأ

المهم عقب زواجنا يازعم بيت عمي حبوا انه يصفوا الجو .. جمعونا و قالوا الينا الدنيا ما تسوه ومن هالكلام وخلاص ما صار الا الخير .. اني طبعا ما في قلبي شي عليهم و استانست قلت خلاص صفت القلوب ..

اني الحين توني والدة وهي ما جت لي ولا باركت لي مع انه صار لي شهر واشوي .. سويت عزيمة كبيرة ع عقيقة بنتنا وعزمت الكل و الكل جا الا هي!!

يوم ثاني اتصلت فيني واستانست قلت اكيد بتعتذر انه ما جت .. اتخيلو وش كانت المكالمة..
السلام .. مبروك عليكم المولود اوه قصدي المولودة .. مع السلامة .. حتى ما رديت عليها صكت التلفون في وجهي !

انصدمت واتصلت في زوجها اقول اليه وش فيها بالضبط زعلانة مني ؟ حاطه بخاطرها بشي ؟ قال لي ما تدرين؟ قلت اليه لا .. الا يقول لي هي للحين حاطه بخاطرها ع ردة فعلش ع موضوع الشقة ويوم ننتقل منها !!!

كانت صدمتي اكبر يوم قال انفعلت وقلت اليه اني للحين في بيتنا قاعدة ومعززة مكرمة الله يخلي بيت ابويي قول لاخوك يطلقني اني ما برجع الشقة :'(

المهم.. اتصل في امي وكلمها لاني خلاص كنت في حالة هستيرية واصيح وبنتي تصيح واني ما طلعت من الاربعين يقول اليها لا لا الشقة شقتها وخلها ترجع علشان خاطري ومن هالكلام.. بعدين كلمته الا يقول لي لا طلع مو ع الشقة بس هي جدي اتقول من زمان ما كلمتش وما عرفت تفتح وياش موضوع قلت اليه حتى لو هي مو ع الشقة بس انت سيدة قلت ع الشقة معناتها ولا عمركم بتنسون هالسالفة ..

بعد كلام ونقاش واجد اتنازلت ورجعت الشقة بس كلش مو طايقة اجوفها ولا شي .. اتنازلت علشان خاطر زوجي والله لو يقدر ما رجعنا اليها جان اتاجرنا شقة وافتكينا منها

حمواتي محايدين لاني بنت خالتهم و زوجة الكبير بنت عمهم ومحد واقف ويايي كلش .. مادري وش اسوي وياها حاليا اني ما اطلع من الشقة خير شر ولا انزل حتى تحت ما ابغي اجوفها وهي عادي كل يوم تجي تخلي اولادها عند عمتي وتروح الشغل وترجع تاخذهم واني خاطري لو اجوفها اهاوشها بصراحة احس سكت عنهم واجد !

شوروا عليي وش الحل وياهم ! احس اني الطوفة الهبيطة كل يومين تطلع الينا سالفة بسبب الشقة