وش اسوي في عيون بنتي؟!
عسل الشهد
30-09-2010
51 رد
64,907 مشاهدة
السلام عليكم ..
بنات عندي مشكلة عويصة ..
بنتي فطوم الله يحفظها من ولدتها وكانت عيونها الثنتين يقطون وصخ ..
يات عمتي بيتنا قالت حطي من حليبج في عيونها وبتخف .. لان الحليب سبحان الله معقم من الله .. انا ماعرف بس امي حاولت معاي وسوينا عالاقل كل يوم مرة .. وفعلا عيون صحت والثانية لا ..
كل مرة أوديها الرعاية اقولهم عن عيونها يقولون صبري لين تكبر شوي ويعطوني عصارة ابو الأسد وارجع واحطلها ولا يفيد ..
لما صار عمرها 6 شهور حولوني على السلمانية .. بس عطوني بعد 3 شهور!! وجا الموعد ونسيت اوديها سبحان الله مع اني كنت قبله بيومين متذكرة!!
نصحوني بمستشفى الرسالة ووديتها مع ان ماعجبني هالمستشفى بس قلنا يضع سره في اضعف خلقه .. لكن بالعكس عطونا عصارة هيجت عيونها!!:mad:
وافتريت عالصيدليات كلها وكل يوم عصارة وقطور ولا فاد شي ..
جربت شاي وماي ورد بعد مافاد .. نصحوني بماي زمزم جبته بس انتظر اكمل قراة سورة البقرة عليه وبجرب ان شاء الله..
بس دكتور قال هذي القناة الدمعية مسكرة ولما يصير عمرها سنة او بتكمل سنة بتخف!! وراوني ابر طوال وايد يقول اذا ماخفت نسويلها عملية بهذولي.. :-o
انا سمعت في الرعاية ممرضة تقول عادي العملية بسيطة اصلا لاتخافين بالليزر يسوونها تك والا هي مخلصة..
انزين وين اوديها للحين عيونها تدمع وتقط وصخ وكل من يشوفها يقول ليش تصيح واقول السالفة ومرات اقول ايه كانت تصيح عشان تمللت اقول السالفة ..
يمدحون دكتورة اسمها ابتسام العلوي لعيون الاطفال .. بس نفس الشي مواعيد بعيدة وكل من بدوره :( ونفس الشي هيفاء المحمود :(
للعلم فطومي باقي جم يوم وتكمل سنة ..
ادري طولت بس فيه احد عنده شي او اسم دكتور زين يخلصني من هالموضوع :(
وجزاكم الله خير ..
ياعمري عليهااا فطومة
ماقدر افيدش خيوو بس ماقدر اطلع من غير ماادعي ليها
الله يشفيها ان شاء الله ويقومها ليش بالسلامة
ويارب ماتحتاج عملية...
كل شي ولا العيون.. الله يعينها ويعينش..
سلامات للامورة..
الله يشافيها ان شاء الله
اني بعد ما اعرف دكتورات حق عيون
ان شاء الله ماعليها الا العافيه
ب
بنت الاجـــواد
عروس ذهبية
30-09-2010 | 03:35 AM
الله يشافيها يارب
لاتجرربين شئ مايفيدها يمكن يضرها لاسمح الله
اسألي عن اطباء اخصائين في العيون
واذا قدرتي جيبها للسعوديه في دكاتره اخصائين
عندك مغربي الدمام في خوش دكتور اسمه طااارق
الله يشفيها يارب
إن شاءلله يفيدونش أمهات عروس
وما عليه شر والله يشافيها ..
يا اختي
المفروض من اول مانولدت بنتك وشفتي عيونها تعبانه كان عطيتيها قطرة العيون مانتظرتي
ولد قريبتي جاه مثل بنتك والدكتور صرف له على طول القطره وعمره لسى ايام والحمدلله كمل بس اسبوع وطابت عيونه ترا هالشي يجي من الحضانه حقت المستشفى يومها شفت حضانة الاطفال والله دون مابالغ ان كل طفل جنبه قارورة القطره لونها ابيض وفيها خط ازرق
انصحك تودينها طبيب عيون موب طبيب اطفال اكيد بيكون عنده خلفيه اكثر حتى لو استشاره
الله يشفايها ان شالله وما تشوف شر
وديها لأخصائي عيون ، واللهه يشافيهها .
ياحبي لها ربي يحفظها كبر ولدي بس انا اكبر بشهرين
شوفي انا اختي يوم ولدتها امي كانت مثل بنتك
ولا عطونا المستشفى شي قال اعملي لها كل يوم تمارين بحركه دائريه
على الا نف جهت العين من فوق عرفتي كيف
والله الحمد للله اختي الان عمرها 8 سنوات مشاء الله عليها
ربي يشفي بنتك وطبيعي تجي للاطفال لا تخافين
وموفقه قلبي وبوسي لي فطوومه:L::L:
ما عليها شر ان شاء الله
ما ابغي اخوفج بس حاولي تودينها لأخصائي عيون بأقرب فرصة
لأن وحدة من الأهل بنتها ألحين عمرها 7 شهور ومن اول ما ولدتها كانت عندها عيون وحدة تدمع وتطلع وسخ ..
ودتها المستشفى كذا مرة مرة يعطونا قطرة عين ومرة مرهم وما استفادت عليه
وخذتها لدكتور تقي خلف وقال لها ألحين لازم رقاد لان البنت كانت من كثر ما عيونها توسخ وتدمع ما تقدر تفتحها وعندها التهاب حاد.. وظلت بالمستشفى عشر أيام كان بس يعطونها قطرة كل ساعة والحمدلله شوي شوي فتحت عيونها وصارة أحسن بس صار عندها حول..
وودتها السعودية ألحين قال لها الدكتور لازم عملية ألحين لان الحول صاير بسبب الالتهاب وصار لها شد بعصب العين والعملية عشان يرخي العصب ومن بعد العملية لازم تلبسها نظارة ..
وألحين قريب ان شاء الله بتسوي لها العملية ..
والله يشافي الجميع يارب
ا
ام فطومة الحلوة
عروس فضية
30-09-2010 | 09:19 AM
صح كلام الاخت كادي
بنتي بعد كانت عينها تدمع بس عين وحدة وقالت لي الدكتورة سوي لها مساح عند العين على الانف حركة دائرية يعني شفتي مصاصة العصير اذا منسدة شلون تنزلين الوسخ منها على تحت ويتصير زينة
ما تشوف شر الحلوة وان شاء الله فهمتي شلون
.
.. أمــ عــلــيــ ..
عروس ماسية
30-09-2010 | 10:14 AM
الله يشفيها ويخليها لك ويحفظها من كل شر
انا اخوي اول ما انولد صار له مثل بنتك .. ووصل عمره سنه .. وسووا له العملية كان عنده انسداد .. ماشاءالله الحين بالجامعه ومافيها شي عينه .. بس مشكلتها البسيطة اللي الى الآن انها غالباً تدمع ..
انتي وديها لدكتور يكون خبير في العيون .. ان شاءالله يكون حلها بسيط ..
فيه طبيب عيون ماشاءالله معروف بالسعوديه .. بالقصيم .. اسمه ( الفلاي ) بمدينة عنيزة .. له عيادة خاصة فيه .. ماشاءالله علاجه وحده بوحده .. عالجت عين ولدي عنده .. طاح فيها شي وورمت وصارت حمراء .. وديته المستشفى العام .. ومافيه فائده .. ووديته مستشفى خاص .. مافيه فائده .. وديته آخر لشي للطبيب هذا ( الفلاي ) .. ماشاءالله علاجه من ثالث يوم ترجع العين طبيعية .. أنصحك بزيارته .. لأنه من تجربة ..
:)
ما عليها شر القمره عورني قلبي عليها وكل شيء ولا العيووون ولا اي شيء يعطوونش تحطين فيها ترى اقل خطأ يمكن يسبب ليها مشكله اكبر لا سمح الله
واني ما عندي خلفيه في هالامور إنشاء الله البنات يفييدوونش وماعليها شر وتحملي فيها
والله يشافيها إنشاء الله ويخليها ليش ويبلغش فيها
ماعليها شر ان شاء الله كسرت خاطري
حاولي توديها استشاري عيون معروف
نصيحة لاتسمعي نصايح يمكن تضر ماتنفع يعني العين حساسة
ويمكن اللي استفادوا من هالتجارب مو لازم نفس حالة عيون بنوتتش اقصد تجارب تقطري عينها بحليب او شي ثاني
الله يشافي البنوتة
مرحبا اختي
لا تخافي آنه بنتي قبل اسبوع كانت مثل الحاله
وديتها المركز واعطوني قطور لها جربته واستفدت منه
وهاي صورته
واذا تبين اخصائي اطفال
انصحج تروحين لدكتور محمد الساعي اخذت بنتي له اكثر من مره
و عندج مستشفى الامل بعد زين
واذا تبين ارقامهم ادزهم لج
وقدامها العافيه يارب
انصحش تودينها مستشفى الدولي وعن تجربه ... عندهم دكتور اطفال واخصائي عيون وعن
قريبه لي ولدها اول ماجابته في اول اسبوع له صادته عيونه تطلع وصخ اول شيء بدت عيون وحده وشوي شوي قامت الثانيه بعد تطلع وسخ .. ونصحوها تنقط له من حليبها هم مافاد .. ودوه المركز ع اساس الكل قال لهم هذا مرض عادي للعيون يصيب كل الجهال جدي .. وراحوا المركز والدكتور قال التهاب بسيط وعطاهم مرهم وقطور وقال لهم ايام وبيشفى .. وهذا شيء عادي يصيب الاطفال .. مر يوم ويومين وكل ما جى للحاله تزيدوهي كل ما شالت هالوسخ الاصفر من عيونه يرد يطلع وقام ما يفتح عيونه .. وعيونه من دااخلها احمر
ردوا ودوه السلمانيه قالوا هذا شيء عادي وردوا صرفوا لهم قطور ومرهم بس غير عن المركز .. ومر اسبوع وهم ع هالحاله والام ماليها حال ولا تدري هو نايم والله قاعد ..!!
وبعدها زوجها دخل النت وكتب افضل اخصائي عيون وطلع له بمستشفى الدولي وما صدقوا خبر وراحوا هناك واخذوا الطفل وفحصوه وقالوا لهم عنده التهاب شديد شديد شديد بالعين وقالها اكثر من مره لهم
وقام الدكنور يسال من متى المرض ؟ وهل وديتونه مكان قبل لاتجون هني ..
قال زوجها اي وديناه المركز وعطونه قطور ومرهم فشاف الدكتور الادويه الا يقول هذا قطور مال شخص كبير .؟؟!! اتخيلوا لاي مدى اهمال المراكز الحكوميه صارفين دواء لطفل صغير
فعصب الدكتور وقال له المفروض من الو ما تصيده عيونه توديه لاخصائي عيون وما تخليه ولو راحت عيون الولد و .......الخ
فرد عليه زوجها .. انه وديته المستشفى وكنت واثق بالدكتور بس هو نفسه الكتور قال لي التهاب عادي كلش يروح بالقطور !!!!
المهم مااطول عليج ,,
دايركت اخذوه الممرضات وقاموا يحطون له قطور ومرهم لمده 3 ساعات تقريبا .. كل خمس دقايق قطور ومرهم وينظفون عيونه ... وكان فيه نوعيتين من القطور والمرهم ... وضربوه ابره في فخده ع عمري وهو ولد اسبوع وقالوا بعد له ابرتين تعالوا بكرى واللي بعده علشان ياخذهم
وقالوا لهم انه هذا الالتهاب نفس المرض اللي صاد طه حسين جدي ... وزين تلاحقتوا عليه .. وقاموا امه وابوه والتزموا بالقطور والمرهم مع التنظيف للعين وشوي شوي قام يروح للاحمرار ويفتح ...
وطبعا كان له مواعيد يروح لهم فيها علشان يكشفون ع عيونه فاول مره قالوا لهم لا لسى الالتهاب موجود وما تفير شيء ... بس بعدين شوي شوي قام يتحسن وضعه وصار احسن واحسن وعيونه ما قامت تدمع وصخ .. وحمدوا ربهم وشكروه ..لان صدق اهم شيء العين ..
والسموحه ع الاطاله بس عن جد المستشفى اهتمام ورعايه طبيه وعندهم اخصائييين ..
وع فكره ولدها كبر ولدي سنتين وشهرين
بنتي بعد كانت عينها تدمع بس عين وحدة وقالت لي الدكتورة سوي لها مساح عند العين على الانف حركة دائرية
ع
عاشقة الاسمراني
عروس برونزية
30-09-2010 | 12:31 PM
ما عليها شر
والله يشافيها يا رب
أ
أم ميمي وعلاوي
عروس نشيطة
30-09-2010 | 12:35 PM
السلام عليكم ورحمة الله وبركاته ..
ما خاب من تمسك بلإيمان .
عزيزتي كوني على يقين ان ارائنا لا تعبر عن حقيقة مرض إبنتك ِ فمهما تشابهت الأعراض إلا إن في نهاية الأمر لسنا سوى أمهات
نخبر تجاربنا من غير وعي ولا ادني معلومية .. للأننا بلأحرى لسنا دكاترة ..
بعد المقدمة الطويله العريضه يا اختي .. انا ولدي من اول ما جبته عنده عين كله تدمع وإذا نام يطلع وسخ ..! رحت لأكثر من دكتور
وكان الكلام نفس الشيء . (( إن القناة الدمعية لا يكتمل نموها إلا بعد السنة الأولى ) وكانوا لا نصحوني بإستخدام الأدوية لما لها
من تأثير سلبي مع مرور الوقت .. ونصحوني بعمل مساج للعين بشكل يومي وفي اي وقت وهي ان اضع طرف اصبعي على
الجفن واعمل دوائر بشكل خفيف ومع إستمراري خلال شهر او اكثر بكم يوم عين ولدي رجعت طبيعية .
اختي الغاليه .. اتمنى لإبنتك ِ الشفاء يارب واهم شيء لا تيأسي وتمسكي بلأمل ولا تخافي من تجارب الآخرين ابدا ً .
كمان عندي اختي عندها بنت من ولدتها عيونها تطلع وسخ ودموع وكمان تعذبت بالمستشفيات وكلهم يعطونها مراهم وقطور
وما صحت وشفت إلا لما صار عمرها 3 سنوات . وذلك على ما سمعت من الدكتور بإن القناة الدمعية لا تكون في كامل نموها
وكل طفل يكتمل نموها في اوقات مختلفة ولكن كزمن وسطي فإن خلال إكمال السنتين يكتمل نموها .
الله يشافي إبنتك ِ إن شاء الله
:thumbs_up:
بنت الاجـــواد;13257573:
الله يشافيها يارب
لاتجرربين شئ مايفيدها يمكن يضرها لاسمح الله
اسألي عن اطباء اخصائين في العيون
واذا قدرتي جيبها للسعوديه في دكاتره اخصائين
عندك مغربي الدمام في خوش دكتور اسمه طااارق
الله يشفيها يارب
ما تشوف شر الحلوة طمنينا عليها