السلام عليكم
مشكلتي اللي أعاني منها مأثرة جدا على نفسيتي و حياتي و مستقبلي
و هي رائحة العرق اللي تحرجني جدا
صرت منطوية على نفسي ما أطلع و لا أشوف أحد
و الله تعبت و أنا أبدل في مزيلات العرق
و كل ما أخذت واحد جديد أقول في نفسي
لا هذا إن شاء الله أحسن من اللي قبل
و ما في فائدة ما لهم مفعول قوي
يظل مفعولها ساعة ساعتين و تطلع ريحة مو حلوة
تعبت تعبت تعبت
في اليوم اتروش أكثر من مرة و أنتظف عدل و آخذ وقت كبير بالإستحمام
و محافظة من ناحية العناية بالجسم
و أحب العطورات و الطيب و الرائحة الحلوة
و كل ما شفت شيء جديد شريته
لكن ريحة العرق تخرب على كل شيء
بس بجد ما أعرف شنو سبب هالمشكلة تعبت نفسيا بدرجة كبيرة
صرت أخاف اتقرب من الناس
أخاف يحرجوني بكلمة
استخدمت مزيلات طبية شفت يمدحونها وايد بالنت
شريت كذا مزيل طبي ما أحسهم نفعوا معي
و شفت ناس كاتبين معاناتهم مثلي و ما لقوا مزيل يناسبهم
اتمنى تساعدوني لأن هالمشكلة ما تتصوروا اشكثر مأذيتني
تخيلوا حياتي كيف صايرة أشوف الناس تطلع و تستانس و انا منطوية على نفسي
ساعات أكسر خاطري نفسي و أقعد أبجي من الهم و الحالة اللي انا فيها
خاطري أنخطب و أزوج مثل البنات بس كل ما تقدم لي شاب رفضت الزواج
أفكر كيف بتكون حياتي الزوجية و أنا أعاني من هالمشكلة
رغم اني امتلك مواصفات من الناحية الشكلية و العلمية يتمناها كل شاب
أخاف يفوتني القطار و أخاف أحلامي تتبخر
مو فقط من ناحية الزواج من نواحي إجتماعية وايد بالحياة
تعبت نفسيتي جدا جدا جدا
أنا جيت أشكي لكم معاناتي لأن أحسيتكم كلكم اهنيء أخوات قلوبكم على بعض
و تحبون تساعدون و ما تقصرون و انا حسيتكم مثل خواتي
أتمنى تساعدوني بحل خاصة اللي معاناتهم مثل معاناتي
شنو استخدموا و شنو اللي فاد معاهم
ادعوا ان مشكلتي تنحل بسرعة