عندما يجتمع الحب وال ....... في آن واحد

السلام عليكم ورحمة الله وبركاته


عندي مشكلة نفسية وتسبب لي مشكلة صعبة مع زوجي ،، وهي بنت زوجي

اعذريني اذا ماكان عندي اسلوب في الكتابة لكن راح احاول اوصل لج المشكلة وبالتفصيل

اولا انه تزوجت من مدة ثلاث سنين وكان عنده هالبنت الوحدة من زواج سابق من أجنبية انفصل عنها ورجعت ديرتها ،، هالبنت كان عمرها سنتين وفي نفس الوكت انه كذلك عندي بنت من زواج سابق من عمر بنت زوجي ،، المهم احنه اتفقنه ان انربي البنات مع بعض وما في فرق بينهم ولو ان بنتي ظروفها غير يعني ما راح اتكون معانه طول الوكت ايام عندي وايام عند ابوها ،، المهم تزوجنا والبنات كانو بعمر سنتين وظلو مع بعض كأي يهال لعب وهواش وظرب ،، زوجي ما رضى بالهشي وتضايق من بنتي يقولي بنت سوت وفعلت وبدى الهواش بينه واحنه تونه في بداية المشوار رغم اني فهمته اقوله هذيله يهال الحين يتظاربون بعدين يلعبون ولا كأنه صار شي بس اهو اصر على رايه انه بنتي اتأذي بنته وهوست على قلبي وطلعت بنتي من البيت وخليتها عند امي وخلا الجو حق بنته من اهني بنته اطلعت من قلبي مثل ما بنتي اطلعت من بيته ،، وطافت شهور مو أيام على هالحالة ايام اللي اتكون البنت عندي اخليها عند امي واييها يوميا من العصر الى الليل ولما باطلع من البيت اشرد عنها واهي يا عمري تقعد ادورني واصيح وريلي يشوف جذي ملتزم الصمت بحجة انهم يتهاوشون انرد بيتنه واهو ياخذ بنته وينيمها بحظنه وانه انام على مخدتي وقلبي محترق على بنتي اللي شردت عنها واتم اصيح من قهري بس من وراه لأني مابي اتصير مشاكل بينه ،، الشي الثاني احنه اتفقنه قبل الزواج ان انأخر سالفة الانجاب عشان نتفرغ حق تربية البنات بس يوم شفت الوضع جذي حسيت بالوحدة تقتلني وقلت له ابي احمل ابي يصير عندي ياهل يعوضني عن بنتي اللي ابتعدت عنها ما رضى وتحجج باللي اتفقنا عليه وساعات يقولي بتيبين ياهل وبتهملين بنتي وبتفضلين الياهل عليها ،، شفت فيه الانانية من جهة انحرمت من بنتي عشانها ومن جهة انحرمت حتى من ان يكون عندي ياهل بعد عشانها ،،، انه ام وانجرحت في امومتي وماهي يوم ولا يومين اكثر من سنتين والنتيجة طلعت في علاقتي في بنته طلعت من قلبي نهائياً احس وبالنفور منها ما احبها كفاية انها في مسؤوليتي من اول ما تزوجت انه اللي قايمة ابها واسويلها كل احتياجاتها ودخلت الروضة وزادت المسؤولية ووما قصرت وياها بس موضوع الاحساس ،،، ميت من صوبها والله لدرجة ان الين لمستني او باستني احس مثل الكهربا اللي تضرب فيني مادري شسوي ،، والاهل يدرون باللي قاعد يصير و يقولون لي انتي مو مجبورة اتحبينها بس لا اتبينين لها انج ما اتحبينها جامليها وانه حتى المجاملة ما اقدر اجاملها :'( ،، والمشكلة زوجي يدري اني ما احبها ويشوف التعامل البارد اللي اعاملها فيه وساعات يسكت وساعات ينفجر فيني وساعات توصل فيه إلى الانفصال كحل نهائي :'( ،، انزين شسوي مو انتو اللي وصلتوني الى هالمواصيل واذا اقوله بالاسباب اللي وصلتني لهالنتيجة ما يتقبل كلامي ويقولي انتي حقودة واتشيلين بقلبج وجذي :'( ،، على فكرة نسيت اقولج شغلتين مهمين من الاسباب اللي بعدتني عنها يقولج المثل الياهل يحبب الناس فيه او يكره الناس فيه بطبعه واهي طبعها دلوعة بزيادة بزيادة وانانية اتحب الشي الزين حق نفسها والشين حق غيرها يعني حتى اليوم وانه اكتب لج المشكلة كانت متهاوشة وي بنتي على العيادي اللي حصلوهم تبي تاخذ مال بنتي لأن الدنانير ماله قديمين ومال بنتي يدد وغيره وغيره من هالمواقف اللي اتصير من نفس المنوال ،، الشغلة الثانية امها الاجنبية ،، قبل سنتين تقريبا يت الديرة تبي اتشوف بنتها واهي طبعن درت انه تزوج قامت تبي تخرب بينه بكل الطرق الخبيثة ادز له مسجات حب وغرام واتقوله ادري انك اتحبني وانك ما تحب اللي تزوجتها واللي اخس من ذي كله قامت تطعن في شرفي واتقوله مرتك جذي وجذي وانته ما تدري عنها ،، وانه اشوف هالشي جدامي ومنفجرة بغيظي وهو يسكتني يقولي لا تردين عليها :'(،،، المهم هاذي الاسباب اللي وصلتني الى نتيجة

اني احب زوجي ومابي ازعله بشي او اقصر عليه بشي بس هالاسباب اللي صارت منها انتهت بقدوم مولودتي اللي نورت علي دنيتي وحلت ازمة الوحدة اللي كنت عايشتها واسباب ما انتهت وهو طبعها اللي مو قادرة ابلعه ،، انه ماقولج اني اكرهها ،، لا ،، بس ما احبها :'( ولا اقدر اجاملها :'(

وسمحيلي طولت عليج وحاسة انج بتلوميني بس عطيني حل :'(


تحياتي