ما هو الحل ان استمر الطفل على الكـذب..!؟

السلام عليكم ورحمة الله وبركاته

أمهات ذو الخبره..
ابني حمدان ما شاء الله بيكمل 4 سنين على شهر 10 وبيدخل ال كي جي 1 يعني حياته الاجتماعيه بتبدي الحينه وبيختلط مع الناس اشكال وانواع..

المشكله في..
انه يجذب واااااااااااااااااااايد.. وما يفهم.. احسه انه تعود على هالشي ويعتقد انه صح..

مثال قبل كم من يوم هو واخته كانو جالسين في الصاله وحصلو كوب سكر وطبعا بدؤ باختراعاتهم بمزج السكر مع الماي لانه في جهاز ماء في الصاله وصبو الخليط في "تكرمون" نعول اخوي كانه مصففهم برى غرفته وكلها نعول غاليه وماركات وما لبسها وااااااايد.. اتخيلو..!؟

وانا توني راجعه من الدوام علساعه 3 تقريبا المكان هادي اول ما وصلت البيت عادتا اروح اسلم على امي وبعدين اشوف عيالي.. فرحت ادور على امي ما حصلتها وسمعت اصوات بالطابق الثاني وعرفت انهم حمدان وسعيده يلعبون فوق.. فناديتهم..

طبعا هدؤ وبعدها نزلو تحت وما اشوف غير ثواني واخوي ينزل من فوق يدور على امي ومعصب.. انا حسيت انه فيه شي.. فدخلت غرفتي وخذتهم معاي.. الا واسمع اخوي معصب ويشتكي لامي انه اليهال صبو خليط على تكرمون نعوله..

ويت امي تسالهم وهم شكلهم متغير خايفين على يحاولون التهرب.. المهم فهمت الموضوع.. وزوجي كان نايم فعصب لما سمع الشكاوي وسالهم من الفاعل طبعا الاصابع تضاد الطرفين.. فطردنا انا وامي من الغرفه واستلم الاثنين طبعا كل واحد فيهم يتهم الثاني.. حمدان يقول والله سعيده الي سوت جذيه وسعيده تقول والله هو الي سوا هالشي.. وابوهم طبعا ما قصر ضرب الاثنين هوما يحب حد يتهم عياله بالغلط وهالشي يخليه يعصب على طووووول..

محد راضي يعترف والاثنين مصرين على الكذب.. انا الي اعرفه بنتي لما تخاف تعترف وولدي لما يخاف يصر على الكذب لانه يخاف من الضرب.. هالمره الاثنين مصرين انهم ابرياء.. والمشكله ان بنتي من النوع ان شافت شي غلط تيي وتخبرني على طول.. فمستحيل انه شافت اخوها يسوي شي غلط وتسكت الا وهي مشاركتنه..

الله يخليكم افيدوني كيف اخليه يترك هالتصرف لانه في وايد مواقف ما تستاهل الكذب وهو يكذب.. وهل هالشي طبيعي في هالعمر..؟! ما ابغيه يستمر على هالتصرف..

انتظر خبرتكم..:(