هلوساتي سنتين التي خلالها سحقت 73 كيلو^_^ (((خـــواطــــر للأخــــت SOUL)))

قصه قديمه...!! "موضوع المعاناة:



صحيت 11 ونص

من 12 ونص وانا اشتغل بالبيت

ساعات احس اني غبيه لما سفرت شغالتي على اساس ابي حريتي ببيتي وابي اتحرك

المهم ماعلينا

راحت عاد

بس تصدقون والله الشغل بالبيت له عدة مميزات

اهمها لاصرتي متزاعله انتي وابو الشباب

انك ماتقابلين وجهه وهو منتفخ كنه ضب>>>>الضب كائن حي يتنمي للزواحف قبيح المنظر حين ينتفخ>>>>>ابوك يالشرح

والميزه الثانيه انك تتحركين...والثالثه انك تفرغين غضبك وازماتك النفسيه بالشغل


الزبده
الحركه جدا مريحه على عكس الظاهر
تريح الاعصاب وتشيل التوتر



حاليا انا لما يكون عندي شغل عادي بالبيت امشي نص ساعه

ولما يكون فيه شغل كثير..لاوالله يكفيني الشغل

تصدقون لي اسبوع خاطري في المطبق..وكل ماجيت اقول لزوجي يجيب افكر

وبعدين

اكلت وشبعت

وبعدين..

مافيه شي


عجين وبيض وزيوت


واحاول اركز واتذكر الطعم...الاقيه طعم عادي

مافيه ميزه

واغض النظر عن هالفكره

واكل اي شي

ان كان لي مزاج طبخت وإن لم يكن قزرناها خبز وجبن


تحسون ان الاكل مهوب كل شي

رحت البارح للمول...

اتفرج ولقيت مقاسي بسهوله

عقب معاناتي مع ايفانز او ان هارفي

ولقيت باسعار مره نايس

لكن الان الذوق صار صعب

ماصار يقنعني اي شي...

احساسي وانا اتمشى بهالمحلات واني لو ابي اقدر اخذ اي قطعه احساس مخملي عجيب

اوقف لحظه واتذكر قبل سنتين حالي

يالله

ازمه نفسيه كل الحركات وكل المناسبات...بداخلي شي يقول شكلك شييييييييييين

وعيوني تقول عادي مافيك زود

132 ولافيني زود

الحمد لله


اني صحيت من هذاك الكابوس


النكته
اختي تقولي :
تخيلي تنامين وتصحين وترجعين وزنك زي اول

قلت :

قولي خير لاان شاء الله

قالت اختي:

والله ان يجيني سكته>>>>>>>>مبسوطه باللوك الجديد لي

حسيت ان المتعه تجاوزتني انا........ووصلت اللي حولي

الحركه..
تكفيك تأنيب الضمير...يعني انتي محدده سعراتك ماتزيد عن 800 مثلا ووصلتي 1200 في يوم ما

يعني زاد عليك 400 كالوري

سهله

امشي نص ساعه لمدة 4 ايام وبتكوني تخلصتي منها بدون ماتتأمين وتخربين باقي يومك

...

كإقتراح للمشي

وكيف تخلين الوقت يروح بدون ماتحسي فيه


اغرقي بأحلام اليقظه..

تخيلي نفسك تدخلين محل وتطلبين مقاس 10 او 8


واو

ولما تشترين فري سايز كيف يصير عليك

ولما تروحين لناس شايفين حالهم عليك لانك سمينه وكيف ردة فعلهم بتكون..؟!

فكري بترتيب وقتك واوراقك



بتلقين النص ساعه خلصت

7
7
7
7
لي عوده

نــعود





((موقف))


مره لما كنت مخنوقه بمئة وثلاث وثلاثين كيلو

كنا في استراحة أهل زوجي

وكانت فيه بنت اخو زوجي .. وزنها اتوقع 72 لكن تبين اضخم .. يعني بنيتها عريضه شوي

وكانت واقفه على باب الشارع

طول فتره الـ5 سنوات كنت اعتقد ان باب الاستراحه صغير..ودايم اقول الله يصلح ياأبو عبد الله ليه ماكبرته>>>ابوعبدالله اخو زوجي

المهم

جيت بطلع

قالت لي بأسلوب السخريه ..

(( افتح لك الدرفه الثانيه ))

انقهرت جدا..لكن ماخليتها

قلت دبيه بس احلى منك...وبيني وبين نفسي اقول وش ابي بالحلا وانا غرقانة بالشحم..!!

سكتت .. ولاعمرها علقت..

عااااااااااد الان نحفت..


((وجا رد الاعتبار))

كنا مره في عزيمه وكانت نفس البنت تمشي قدامي

ولابسه ضيق ..وكانت زوايد ظهرها وجوانبها واضحه لانها سمنت بالاجازه >>> قريب جدا هالحكي

قمت مسكت ظهرها وقلت

وش ذا ؟؟ يكفي اكل ..لان بيدها الصحن معبيته من البوفيه..!!

اقسم بالله ماقدرت ترد

قالت :لااا الفستان ضيق..ولابسه مشد..!! >>> مع العلم ان البنت لها من شدة البلاغه اتوقع لسانين

طيب احسن لو لابسه مشد .. بس البلا بالجسم ..!!

عقبها حسيت بالانتصار



معلومه

عمري في حياتي ماتتريقت على اي بنت سمينه او دقيت او علقت عليها..لأني كنت احس باحساسها..فكنت اتجنب التجريح..


لكن هذي البنت كان لابد اني اخذ حقي منها..>>> حقوده لاحد يتعرض لها


****************************** ****

اكتشفت ايضا ان الجسم الرشيق... يصحي فيك الثقه ويعززها..


قاتلك الله يالشحم..حرمتنا حتى الاستقرار




نسيت اقولكم

ان باب الاستراحه كان عادي اتساعه..لكني انا كنت مفرطة الاتسااااااااع...البلا فيني مو بالباب..

****************************** ********

لي عوده

تذبذبنا

واستفسارتنا العقيمه

وهالدايت كم ينحف باسبوع

وهالدايت فيه رياضه او لا


اسئله وتذبذب يدهورنا الى حالات لايمكن ان نرجع منها بسهوله

ونتعدا الارقام الفلكيه

و لازلنا نبحث عن شي سهل ينزل وزننا مثل سهوله طلب الوجبات السريعه وأكلها الاسرع

ننتظر الوجبه السريعه نص ساعه وناكلها ب 5 دقايق

ونعاني منها سنوااااااااااااااات...
ليش مانتطور في كل شي

مو بس حالاتنا الماديه والتعليميه والاسلوب والكلام

نتطور بالاكل وافكارنا تجاهه

اكرر الاكل متعه مثل اي متعه لو زادت عن الحد بتكون نقمه.........!!
خذي قرار قوي وصارم
وكل ماضعفت نفسك قويها وقولي الى متى انا وانتي بنتعب؟؟

هو الاسبوع رايح رايح باكل او بدايت..خليني اجرب ماراح اخسر إلا وزن وهذا اكيد
لو نزلت نعمه لو مانزلت حاولت وحاشيت زياده وكمان تعلمت ان هالدايت ماناسبني

ادور غيره وافكر اكثر واكثر واكون واقعيه اكثر



نظرات الاعجاب فيك تغنيك.......

اغراض الدايت - مقاضي الدايت - اكلات الدايت


حلو ان الواحد يبحث عن بدائل صحيه وجيده

لكن الشي المزعج صرف مبالغ على الفاضي


كونك تحولين اكلك من هاي فات الى لو فات

يكفي

يعني بدل الزيت العادي .. يكون زيت الزيتون


وبدل الجبن العادي يكون اللايت

وبدل الدقيق الابيض والخبز الابيض الخبز الاسمرالغني بالالياف

لو جينا للسعرات ماتفرق كثير

لكن صحيا تفرق..

الدايت خسارة الوزن والصحه

الدايت اكتساب الصحه بتخفيف الوزن..
</B></I>

من الاشياء اللي تعلمتها في هذي الرحله

_ الاكل متعه لكن المفروض نستمتع بعقل....اللعب والفلوس والزواج والحب و و و و كلها متعه لكن لو زاد التفكير فيها او زاد استخدامنا لها او ممارستنا له او تعلقنا فيه بيكون مرض

_ مع الاعتذار الشديد لكل ذات وزن كبير....لما كنت من ذوات السمنه والسمنه المفرطه الان اعتبر ذاك الامر تشوه


_ كثير نسمع كافئي نفسك بوجبه ...او كافئي نفسك بيوم مفتوح...كيف تعتبرين اساس مشكلتك هو المكافأه؟؟؟ ...لازلت اقول الاكل متعه لابد انها ماتزيد عن المعقول


_ لاتخططين لوجباتك خلال اليوم تخطيط مسبق ... خليها زي ماتجي خذي اللي يناسبك والكميه اللي ترضي عقلك وليس معدتك..
لانك بتصحين مخططه على فطور معين وغدا وعشا غالبا نخطط انه خفيف..بالنهايه ولاوجبه من اللي خططنا لها ناخذها ماعدا الفطور ولاحظوا هذا الامر..!!>>>>تراه اكتشاف

_ نبهي نفسك وحاوريها خلال الاكل...انهريها و هزئيها وشجعيها..تكلمي معها


_ خذي اللي تحبين مو اللي لازم تاخذينه...يعني لاتقولين لازم جدول ولازم نظام
النظام انتي تطبقينه


_لما تخبصين في وجبه..كملي عادي الوجبه اللي بعدها لو ماقدرتي تستغنين عنها و لاتعتبرين اليوم او الوجبه هذي مشكلة الاسبوع وتقولين (( يوووووووووه خرب يومي ونظامي خلاص اخربها اليوم!! لا عدلي الخطأ بكذا حل منها

** مشي ساعه او نص

** الاستغناء عن وجبة العشاء من اليوم اللي بعده

** الاستغناء عن وجبة العشاء لو التخبيصه غداء

** اهون الشرين كملي يومك خفيف وانسيها وكملي الاسبوع عادي..


_ حبي نفسك...


_ اعتبري الرياضه تنفيس وراحه..


_ وقت البيريود او قبلها بكم يوم اعتبري نفسك بالوزن المثالي وانك تحافظين عليه باكلك...يعني كلي اكل يثبت وزنك ...راعي نفسيتك ولاتضايقينها
اسبوع بالشهر لاينزل وزنك مو ضروري


_ "هذي النقطه جدا مهمه"

&&& معدل نزول وزنك معدل ثابت يعني لاترهقين نفسك

* من وزن 115 وفوق معدل النزول من 10 الى 12 كيلو بالشهر باي دايت

* من وزن 100 الى 90 معدل النزول من 9 الى 7 كيلو بالشهر

* من 85 الى 75 معدل النزول من7 الى 5كيلو بالشهر

* من 70 الى 65 معدل النزول من 4 الى 3 كيلو بالشهر

*من 65 الى 55 معدل النزول من 3 الى 2 كيلو بالشهر

طبعا هذا النزول الصحي والطبعي...لكن بتجي وحده تقولي انا 70 ونزلت 7 او 8 او 10 بشهر

اتحداها لو الوزن نزل شحوم وان الكتله العضليه ماتأثرت..واتحداها لو قدرت تسيطر على وزنها اكثر من 3 شهور..!!

فـ لاترهقون انفسكم


_ خلال 10 شهور انزل 30 كيلو افضل مليون مره من انه خلال 10 شهور وزني مكانك سر..!!


_ البحث والإكتشاف الدائم عن البدائل الصحيه الجيده واللذيذه


_ الابتعاد قدر المستطاع عن الكافيين...لانه له دور كبير بفتح الشهيه والتأثير عليها..خلو عنكم الكذب وانه يقفل الشهيه


_ كل شي مو طبيعي له عواقبه خاصه الادويه اللي تتحكم بالشهيه...جدا جدا مضره من تجربه كبيره وفاشله ادت بي اني اجرمت بحق جسمي ووصل للوزن اللي ذكرته لكم..استخدمتها 3 شهور بعدها بدت ماتأثر ابدا وشهيتي صارت اكبر واكبر...ووصلت 132 كيلو..


_ لاتحرمين نفسك ... صدقيني راح تنتقم منك أشده إنتقام


_ لاتخلين الأكل متنفسك الوحيد...جربي قبل المشي ..نط الحبله .. الجري بمكانك ... حركات الملاكمه...صدقوني بتلاحظون فرق


_ لاتخلين يومك كله تفكير وش باكل وش بشرب,,,خليها للظروف


_ الوصول للوزن المناسب اسهل بكثير من الحفاظ عليه وهذي مشكلة الكثير..


_ لاتبعدين الميزان عنك اكثر من 10 ايام....كثير تتعب شهر بالدايت بالاخير تكتشف انها مانزلت اكثر من 3 او 4 كيلو هي كنزول جيد لكن لوحده وزنها فوق 100 جدا تحطيم..


_ 3 لتر مويه يوميا مافيها اي كلااااااااااااااام..


ادري طولتها

لكن لسه باقي لكن هذا اللي يحظرني حاليا....

ولي عوده

مع كل الحب

التصوير والتصور


فكرة اتخذتها من البدايه

اعتمدت الصور في شكلي والتصور في افكاري

دايم اتصور شكلي لما اوصل الهدف

حتى اني الاحظ شكل ظلي وانا امشي في حوش اهلي لارحت لهم

مريت مره

ولاحظت الظل كيف اخذ نص الجدار اللي امر منه

وقبل كان ياخذ الجدار كله

طول ماانا امشي واروح واجي افكر بشكلي الاخير

وطول ماانا على النت او الجوال بيدي اطلع شكلي القديم

واقول هالشكل مات

بيبقى الشكل الجديد والروح الجديده


الرضا عن النفس احساس مثل المشي على السحاب



حبيت احط لكن تشوفون انجازي مع التصوير والتصور


ماشاء الله لاقوةإلا بالله


الكبير مقاسه 58

والصغير 28

امانه اذكروا الله.. اللهم استودعك نفسي وما انجزت

للأسف حنا نأكل ونضيع اغلب سعرتنا او نقاطنا على الخرابيط

شبيس وشكولاته

صحيح نحسبها

لكن مانستفيد

لو اخذنا حصصنا اليوميه اللي المفروضه ناخذها ولزاما ناخذها

بتحصلين شهيتك قلت ونفسيتك تحسنت
وبشرتك وشعرك ماتأثروا


لكن للأسف نفكر بالطعم اهم شي

لو ركزنا وخلينا لنا يوم فري مو مشكله


وفري مو معناته اكل بجنون كني بجمع اكبر كمية اكل واكبر كمية طعم..

لأنه خلال ثواني بتحسين بتخمه تفقدك اي معنى للذه والاستطعام بالاكل..


لكن باقي الاسبوع ايامنا صحيه قبل كل شي

الحليب منزوع الدسم والفواكه والخضار ابدا ماتسبب زياده بالوزن

لما يصادف انك اخذتي معها كميه معقوله من النشويات والحلويات

الحرمان يولد شخص غريب وكريه بداخلك يكبر ويكبر معه الحقد ويفاجئك بكمية انتقام ماتقدرين ترديها




لكم حبي

نقله

تنتقل الاغلبيه لمرحله الحياة الزوجيه...

وفي البدايه

استعراض...يعني حركات
طبعا الاغلبيه يكونوا قبل الزواج رشيقات او مربربات زي مايطلق مؤخرا علىا لرويانات

تحمل .. ويبدا الأستعراض يقل
لييييييييين

يختفي,,,

كل تفكيرها هي وهو الطفل الجديد

ويشرف حضرته بضريبه إلم في كل الاشكال
الم حمل...الم ولاده...الم منظر

ايه انتي نفاس لازم تتغذين زين عشان ظهرك...عشان يثقل رحمك ...>>>> كله كوم وسالفه هالرحم كوم
المشكله الكل متصور هالرحم كف ميزان لازم ترجح.....

ماعلينا مانبي نهلوس بالارحام بعد ..
>>>> ياكثر غرابيل هالحريم
المهم نرجع للبنت اللي بالنفاس

تعالي عاد وشوفي الاكل

مجمع خزعبلات.... لهوم...كبو ... مادري وشو
تحلف اننا من جنوب افريقيا على هالاسماء..!!

تروح عاد كاشخه لزوجها

والرجال متحمس يبي هذيك العروسه اللي اخذها من بيت اهلها اللي خابرها


ينبسط اول ساعه...يعني اول يوم لو عنده دم مايقول شي
ولو متبلد ماتفرق معه

المهم
بالاخير

ياحلوه .. كن وزنك زايد

عاد هي بكل واقعيه>>>الملكعه طبعا

ايه خبرك الحمل والولاده...عاد تصدق كلها 5 كيلو اللي زدت>>>>اكبر نصابه

عاد هو يسكت ممشيها بكفيه

ومرت الايام...ماصارت نصبة الخمسه كيلو....صارت 10

وتبدا التعليقات المره...

اما تلميح أو تصريح أو تجريح...........
عاد تبدا نداءات الاستغاثه
بنات زوجي مهددني...الحقوني زوجي يقول صرتي ......... ..الخ

بناااااااااات تكفون ساعدوني

بنات ابنتحر..!!

بنات زوجي يغازل...>>> ضيعت القسم



يعني وش تبين ؟؟
</B></I>

طيب لو اتبع هالنظام كم بنحف بالاسبوع.......؟؟؟؟


سؤال يتردد كثير من المترددات الكذابات

تجيك تعطل القروب وتسوي زحمه وكم بينزل لما اقولها 3 او 4 كيلو تقول لا قليل..

واحصلها بكل موضوع تسأل هالنظام كم ينزل؟؟

قسم احس اني بالسوق وتدور ارخص محل..؟؟

او كن وزنها ذهب وتسوم بهالمحلات..!!

ساعات اتابعها هالبنت بشوف وش ترسى عليه..

بالاخير احصلها كملت شهر وزنها ماتحرك ماغير تدور وتسأل

واحيان وزنها ينزل كيلو او يزيد

...

مشكلتنا دايم نبي شي سهل وسريع


الجمال يبي إحتمال ,,

الميزان


كنت اعتقد انه الصادق الامين

طلع المحطم اللعين

خاصه اللي توزن يوميا


جد

تلقين وزنك 60 صباح السبت

وطحتي يوم السبت بالموالح وورق العنب و الشطه والصويا والامور اللي فيها صوديوم عالي

مع انك شربتي مويه كثير

ولاكثرتي ولاتجاوزتي المحدد لك

صحتي على عادتك تبين توزنين

لقيتيه زايد..!!

لييييييييييييه

وش صار

والله ماخبصت...الله يلعن ابو الدايت

كل هالحرمان والوزن يزيد

طيب اليوم اجل بفلها وخله يزيد

هنا خلاص بديتي تنهارين

مدامك واثقه ان اكلك مازاد وانه المقرر لك من سعرات او نقاط ليه زعلتي

طيب راجعي نوعية اكلك

معروف ان زيادة الاملاح وخاصة بنزوات الصوديوم تحبس السوائل بالجسم

وتلقينك طووول اليوم اللي راح تشربين مويه وشاي وشاي اخضر

هنا حصل الاحتباس من زيادة الاملاح وحصلت الزياده اللي حطمتك بالميزان

نصيحتي لك مع الميزان

- خليه كل شهر مع وعد منك له انك بتحطمينه

- خففي من الموالح وزيدي المويه

- لو ماقدرتي تسيطرين على انك ماتوزنين يوميا..لاتعتمدين عليه واعتمدي ع المقاسات..

كثير بنات اعرفهم اوزانهم بالسبعينات ومقاساتهم قريب من الخمسينات..مو شي سمعته شي شفته

لكم حبي

كبر المحبطات

التفكير بالمستقبل



التفكير بالمستقبل يفقدنا القدره على الاستمتاع بالحاضر


كرريها

حبي ايامك ونفسك


راح تنحفين وتلبسين المقاس اللي تتمنين

راح تنحفين ولا ترجعين لسبب واحد مو لآنك تعبتي لين نحفتي لا

لانك حبيتي نفسك فماراح تضريها عشان خاطر سكر ودهون

رأي الآخرين

بين الإنتقاد والإرشاد


(( يووووه شنتي يافلانه )) (( السمنه احلى عليك )) (( اول شكلك اخف دم ))

او النقيض

(( والله بطله )) (( اهنيك على هالاراده )) (( قسم احسبك اصغر خواتك))


عبارات لما تجوعين تسمعين الاولى

ولما تقاومين تلقين قدامك الثانيه


يعني بالاخير نكون منغمسين بالتفكير بالدايت وحكي الناس

ولازم شكلي ع العيد يكون توب عشان الكل يقول واو

وضغط وحرمان

والاكل قدامك

يعني تعذيب نفسي بحت

ليه طيب؟؟

ولما يقولون واو..بالاخير هو كانوا طووول ذيك الايام نفسيا مرتاحين..ومحافظين على اوزانهم

ولاحرموا انفسهم

ولافكروا فيك اصلا

وانتي تفكرين فيهم عشان كلمة (( واو ))

تعاملي مع نفسك بهدوء

لاتقحمينها بين الان ويوم العيد


كل الضغط يولد الانفجار

ان نحفتي بحرمان وتجويع بتخسرين نفسيتك وصحتك

وان مانحفتي كونك حافظتي على وزنك لو هو اصلا زايد يعتبر انجاز..خاصه بهذا الشهر الله يشرفه

وان نحفتي وانتي مريحه بالك ومخففه ومتعامله بذكاء مع الاكل..هنا راح تصدقين كلام سول


ان الاتنقاد والارشاد

فقط كلام من الاخرين يذبذب قراراتك




مع الـــود

الإراده


كلمه صغيره

لكن نعتبرها شي صعب

ونادر منا اللي يملكه

متى ماملكتي نفسك

متى ماحبيتيها

متى ما ادركتي الفرق بينك وبين (( الحيوانات)) .. >>> اعتذر

متى مالقيتي نفسك

متى ماكنتي صادقه مع نفسك

راح تكتشفين انها عندك ومن زمان...لكن كانت مركونه على احد رفوف عقلك الغائب بين اكوام الطبخات والحلوايات..

شكلي ووزني



فكرة ارهقتني وارهقت الكثير


لما اقول وزني لأحد مايصدق ..يقولي شكلك اقل

ارجع بين فرح مخلوط باحباط

ليه طيب الميزان مايتحرك

لما اروح من اسبوع لأسبوع لجمعة الاهل او القرايب

يقولون

سووول وين بتروحين وقفي خلاص مره ناحفه..!!

وزني ماتحرك ياناس..؟؟

واحيان يكون العكس

لما كنت اروح للنادي وكانت فترة 3 اسابيع وتركته لظروف

كنت اشوف بعض الحريم والبنات هناك

لما اسمع المدربه تقولهم اوزانهم استغرب

اشكالهم تعطي اكثر

تلاقين الوحده 85 وكنت اتوقعها فوق 95

هنا

اقول

الميزان والشكل والحكي

كله مهوب مهم


المهم

انا وش اقول عن نفسي...!!

لو رضيت عنها برضيها

ولما ارضيها


اكيد بترضيني...!!

انا شهيتي مفتوووووحه


كثير من ذوات الاوزان الزائده شهيتهم مفتووحه

حتى اللي نزلوا اوزانهم شهيتهم مفتوووحه

الفرق بين النوعين


ان اللي نزلوا اوزانهم اعتمدوا كثير على موضوع الرياضه والمشي


المشي ساعه باليوم والاكل باعتدال كفيل بتنزيل الوزن

والمشي جدا مفيد

يسرع الايض

ينشط الدوره الدمويه

ويجعل العضلات دايما تنتج حراره تذيب الدهون بينها حتى بعد ماتخلصين مشي بكم ساعه..


اللي تحب الاكل تاكل

لكن تعتبر نفسها انسانه رياضيه وهي بحاجة هالاكل

تحركي اكثر مدام بتاكلين اكثر


اقتراح

طبقي
ساعه مشي + ساعه ايروبيك = 600-700 كالوري

و خليك مرتاحه بالاكل

خلونا اذكياء

الرجيم ليس تعذيب وارهاق وعقاب...!!


فعلا كثير يجلسون ايام فااااااالين ابوها
اكل وبلع وهبال
حلويات وشكولاتات وشيبسات ومشروبات غازيه
وايسكريم
ومعجنات
ولما تششششششبع لين تعورها ضلوعها

تحس بالم نفسي عظيييييييييييييييييييييييم


ليه كذا
طيب خلاص ماراح افكر باللي راح


وبكرا ببدا رجيم

الفيشار

او رجيم 3 ايام مويه بس

او رجيم السوائل

او رجيم الـــ .... شي من العذاب

وتتوقع ان هالامر بينفعها

ممكن تسوي يومين كحد اقصى..بعدها تكرر الموضوع

وتتراكب المعجنات باردافها...والشوكولاتات بظهرها..والحلويات بكرشها


وترجع ذيك الليله السوداء اللي تتخذ فيها القرار الجرئ

<<<<<<>>>>>>>> السوائل
الفيشار
الخرابيط

الرجيم تعامل راقي وذكي مع الاكل

او انك تاكلين بحدود التثبيت وتتحركين لحدود النزول....

الثواب والعقاب

ناكل ونتعذب
نروح حفلات ونتعذب
مطاعم ونتالم
وجمعات ومعمعة عذابات لاتنتهي
وان انتهت بتخبيص لامنتهي
يختتم بدموع على الوساده

>>>> بكتب اغاني قررت خلاص

وليه كذا وكل هالعنى
ناكل وننبسط
لكن مانعتبر الاكل غلطه ومجموعة ذنوب ونجلد انفسنا لاننا ارتكبناه...! وهنا نكون معاقبين

ونستمر بالعقاب

لوافترضنا ان الاكل ذنب ومارسناه
كل ذنب له كفاره

وكفارة التخبيص من وجهة نظري انا (( سول )) مشي مكثف او تمارين بكثافة تخبيصك وعدم رضاك عنها

ماقول لاترتكبون ذنوب
ارتكبوها

لكن تتحملون التكفير عنها؟؟؟

لو تعاملنا مع انفسنا بهالطريقه

اصبحنا بوضع (( الرشيق الصالح))

الضييييييييييييييق

غالبا اسبابه هالدوره المقرفه...


لما نضيق منها

نرمي مافينا عليها

ونقول هالسمنه وهالوزن مايتحرك

والمزاج يقلب 180 درجه

مثلي هاللحظه

مزاجي جدا مقفل

ادري انها السبب..او قرب موعدها السبب

لكن في بالي الوزن والدايت والوزن الزايد رغم انه ماحصل حتى الان الحمدلله

بس قلق في قلق

بالاخير

عيني على المطبخ والنفس مسدوده

والرغبه مفتوحه

لييييه ..؟؟!!

ساعات اقول ياحظ هالرجال ماعندهم هالمعاناة

شفتوا الصراع كيف

كلنا نعاني

مالي نفس اكل

وعقلي يقول لازم تاكلين

صار يومي كل مشغول بالاكل...

طيب هنا لازم افكر بشي ثاني

قلت اروح افتح موضوعي واهلوس عليكم

يمكن يتعدل المزاج..!!

تخيلو مريت بهالحاله 26 مره ...واجد صح

لكن خلال سنتين وشهرين

ايه

حنا لما نمسك درب مانعرف غيره...

فقط لاننا انفعاليات حدنا

لازم شوية رواق .. و راحه

بروح امارس هالرواق والراحه...




لي عوده