السلام عليكم ورحمة الله وبركاته
أنا عـروس جديدة صار لي شهر ونص تقريبا بس
عمـري 21 سنه ..
وطبعاً حالي حال أي بنت أول ما تتزوج تتمنى تسمع بخبر حملها من اول ما تتزوج
بس اني من قبل العرس كنت أحاتي لأن دورتي مو منتظمة يعني ساعات اجوفها 3 اشهر تتأخر بس يومين او 3 ويكون امر طبيعي وساعات تتأخر علي بالشهر او الشهر والنص ..!
فكنت واجد احاتي سالفة الحمل بسبة سالفة الدورة ..
المهم عرست شهر 7 قبل موعد دورتي والمفروض كانت تجيني 18-7 والحين 20-8 الحين ما جتني .. وآخر دورة لي 18-6
أكيد بتسألون سويت فحص او لا
سويت بدال المرة اكثر من خمس مرات وكل يطلع سالب :thumbs_down:
قبل ثلاثة ايام جاني التهاب ابوال فضيييييع رحت المستشفى قالو يمكن حامل او شي سوو لي فحص بالدم طلعت مو حامل و عطاني ابر او وصف لي الدواء طبعا ما يحتاج اوصف الألم لأن كان مأساااااااااوي .. وعقب ما شربت الدوا وكل شي يوم ثاني حسيت بكل آلام في الرحم والايام اطوف وللحين ما جتني العادة :'( فقررت اروح الى فوزية كمال اسوي اترساونت ورحت لها وسوت لي اترساونت قالت لي كل شي نورمل وطبيعي بس فيه احتمالية وجود بداية ( تكيس في المبايض ) من جذي الدورة مو منتظمة .. وسوت ليي تقرير وقالت روحي الى دكتورة نساء عشان تسوي لج فحص هرمونات وتعالجج .. المهم اليوم خذيت موعد عند دكتور بانو ( لأني واايد سمعت انها زينه )في المستشفى الأمريكي ورحت .. الا الفلبينية تقول موعدكم مو عند بانو عند دكتورة ثانية قلت لها ما يصير انا قلت ابي بانو قالت بانو محد .. ومواعيدها فل الى شهر قدام وعقب جت ممرضة بحرينية وسألتني شفيج وقلت لها السالفة قالت لي عطيني تقرير فوزية كمال وخذته وقرته او ودته الى دكتورة تقراه ورجعت لي وقالت ان التكيس جدا بسيط وتقريبا نورمل يعني ما تحتاجين ضروري تدخلين على الدكتورة هالفترة قلت لها بس انا الدورة شهرين مو جايتني والظاهر كسرت خاطرها وعطتني موعد الى الدكتورة بانو باجر ..
بنات الحين الاسئلة
احد يعرف هالدكتورة؟
احد استفاد منها؟
تتوقعون لو بس تعطيني دوا تنظم الدورة اقدر احمل؟
احد صادة الا صادني ؟
انا شوي وزني زاد من انخطبت تتوقعون هذا تأثير الهرمونات .. او يمكن لأني متنت ماقدر احمل؟ بس يعني مو المتون المتون.. متنت بس اني طويلة ما ابين متينه واجد ابين مربربة على قولتهم :(