قصة ولادتي الحزينة

السلام عليكم عروسات

مبارك عليكم الشهر F:

طبعا مو القصد اني اكدركم وانتو صايمين :'(

بس هذا اللي صار

هذي ثاني ولادة لي ( عندي ولد عمره سنة وشوي )

كان موعد ولادتي 4 - 8 - 2010

بس الموعد طاف

الدكتورة حولتني على مركز جدحفص عشان اسوي تخطيط كل يوم

تاريخ 7 - 8 رحت المركز وسويت تخطيط

التخطيط ما كان زين ودقات البيبي كانت وايد ضعيفة وتعبانة

فحولوني على السلمانية

رحت السلمانية سوو لي تخطيط مرة ثانية قالو لي نفس الشي

في نفس الليلة حولوني غرفة الولادة عشان يحطوني تحت الملاحظة

وعشان الدكتورة تقرر اذا كنت محتاجة طلق صناعي

يوم ثاني الصبح بدا عندي الطلق الطبيعي بس كان بارد

ترى انا من دشيت الشهر التاسع كان يجيني طلق بس بارد

يعني يجيني ساعتين ثلاث والله حتى يوم بعدين يخف ويروح ولا كأنه!!

الساعة 11 قررو يحطون لي طلق صناعي

طبعا كان الوضع عادي عندي لان ولادتي الاولى كانت نفس الشي بالضبط ( طلق صناعي )

عقب 5 - 6 ساعات بدا الالم يزيد والطلق يزيد

العصر توسعت 2 سنتي ... وقتها استانست وحمدت ربي وقلت ان شاء الله ما تجي 12 بالليل الا وانا والدة

وتميت للساعة 12 وانا بعدي 2 - 3 سنتي :-#

وانا صابرة ومتحملة كل ما يجيني الطلق اسوي تنفس

والالم يزييييييييييييييييييييييد

والله الالم اللي حسيت فيه بولادتي الاولى لا يقارن اللي حسيت فيه هالمرة

الفجر توسعت 4 سنتي

ودقات قلب البيبي راااااااااااااايحة فيها

جا الدكتور بعدين ونادو زوجي

قال الدكتور ان التوسع عندي بطيء وان لازم يسوون لي عملية قيصرية
لان احتمال اذا طولت اكثر يا تموت الياهلة في بطني
يا اولدها وعندها تخلف عقلي يا دافع البلاء :(

زوجي سألني وانا في حاااااااااال مايعلم به الا الله عن رايي
اذا يوقع او لا؟

قلت له عقب التعب والطلق هذا كله؟؟ عملية؟؟

قال لي زوجي مو احسن من تعبي 9 شهور يروح كله؟؟ :'(

قلت له اتصل في الوالدة جوف شنو تقول

قال لي انه اتصل وان الاهل موافقين وباقي انا اوافق

وتوكلت على الله ووقعت

بعدين عطوني مهلة ساعتين او اكثر عشان يجوفون اذا اتوسع اسرع

طبعا ما توسعت غير 5 سنتي

وانا ابجي اقول دام بتسووني عملية ليش تخلوني اتعب اكثر؟

في الاخير سوو لي عملية

وجبت مريوم الوردة :L:

اللي اكره من الطلق

الالم اللي عقب العملية

واللي اكره واكره

الم العقبان وانتي فيج جرح العملية :'(

بس كل هذا يهوون

والحمدلله على كل حال

مادري شنو حال اللي تتوسع 10 سنتي بعدين يسوون لها عملية
واللي يشقونها من تحت وبعدين يشقونها من فوق :'(

انا الحين عند الاهل الله يخليهم

والالم قل بوايد وكل يوم اصير احسن

اللي معور قلبي ولدي ماقدر اشيله ولا العب وياه :(

بس يلا ادري انه شي مؤقت ان شاء الله

وكلها اسابيع شهر لو شهرين ان شاء الله وكل شي يصير طبيعي F:

واعوضه عن كل الدلع :adore:

وسلامتكم