زواجي الصغير الكبير بتفاصيله (يوم وأربع ليال وليلة)

O

Oriana

تاجرة

13-08-2010 | 02:13 PM

زواجي الصغير الكبير .. منزمان كنت أبي انزل الموضوع بس حكمتني الظروف ومنعتني.. واليوم قلت لازم انزله لكم.. وقبلها نقول لكم مبارك عليكم الشهر

شخباركم عرايس عروس المعرسة فيكم والمخطوبة والعازبة

قبل لا أبدأ.. حبيت انبه أن

القراءة في الموضوع محرزة أكثر من الصور فلا تفوتوا القراءة على حساب الصور >>> أدري هدرتي طويلة

-------------------

بداية...

أشكر كل من علق برأيه وقيمني في مواضيع تجهيزات خطوبتي والموجودة على الروابط التالية:

حفلة ملجتي

http://forums.3roos.com/showthread.php?p=5614789#post5614789

سلة شبكتي

http://forums.3roos.com/showthread.php?p=6186553#post6186553

مفاجأة صديقاتي لي

http://forums.3roos.com/showthread.php?t=354148

حفلة خطوبتي

http://forums.3roos.com/showthread.php?t=346883

وأعتذر عن تأخري في وضع موضوع خاص عن زواجي البسيط في نظري والكثير في نظر الناس

طبعاً خبركم عروس وانشغلت!

----------------------

عرسي كان شيء مخطط له بالمجهول

كيف يعني بالمجهول؟ يعني وقتي ما كان في إيدي... ولكن مثل ما يقولون أعقلناها وتوكلنا :)

في الخطوبة سويت خطوبة كبيرة... وكنت حابة أسوي زواجي صغير ومحدود واعزم فيه بالأساس صديقاتي لأن حلمي بعرس ستايله أوروبي وهادئ وخبركم الأهل موتهم الطقطقة والعفسة وخبركم الميزانية حابة اوفرها للسفر

فما بالكم أني بنت أمي الوحيدة >>>> يعني يا بنية مافي نبي نفرح ونستانس وما عندنا الا انتين

وعمتي نفس الفكرة لأن عرس أول ولد وبكرها!

ولهذا زواجي صار فيه عدة ليالي نبدأ بالأيام والتواريخ

----------------------

حفلة غذاء (على شرف أهل العروس ومعارف الأم القريبين جداً)

اليوم: الجمعة / التاريخ: 6 نوفمبر 2009

الموقع: المركز الحسيني

أصرت أمي على إقامة حفل غذاء نفس مال أول (تقليدي) تكفلت هي بكافة مصاريفه هدية منها لي وقامت بدعوة الأهل والأصدقاء ولكن المقربين... والمعازيم كانوا في حدود 200 شخص بس اللي حضروا أقل بكثير

طبعاً في هاليوم رحت صالون الأنامل السحرية عند ام عباس من الصبح وسويت شعري سشوار ويف ولبست تاج ناعم عبارة عن خطين ذهبيين بس وشعري مفلول... وحطيت ميك أب ناعم طبيعي (برونز على ذهبي) ولبست جلابية لونها أبيض صدفي مع تطريز ذهبي من تصميمي وطلعت من الصالون ورحت أستوديو صحاري وصورت صورتين ورحت على طول المركز الحسيني... والحمد لله يوم وصلت كانوا المعازيم بعدهم ما وصلوا... فساعدت الماما في استقبال المعازيم ولما كثر العدد جلست على الكوشة الموجودة مسبقاً في المركز وصديقاتي من حواليني... وتغديت مع المعازيم وكان الوضع هادي ومرتب من غير فوضى... وبعد الغدا

جلسوا أهلي يغنون ويصفقون بروحهم وكانوا مستانسين عالآخر كأنهم رايحين رحلة.

وعدى هاليوم على خير

وهذي صورة السماطات وهي مفروشة والكوشة تبين

وهذي صورة القدور والحلاوة والأكل

----------------------

مذهب المنتدى هو مذهب أهل السنة و الجماعه...و يمنع الحديث في غيره

----------------------

ليلة الحنة (أسري حتى مو عائلي)

اليوم: مساء الأربعاء/ التاريخ: 11 نوفمبر 2009

الموقع: صالة بيتنا

كنت أبي الحناية فاطمة مالت راس رمان (أم بنين) بس عجزت وحرقت تلفونها من زود ما اتصل وهي ما ترد وطرشت لها مسج اخبرها ان ابيها تحنيني لعرسي وما ردت على المسج ولهذا غيرت حنايتي إلى الحناية أم إبراهيم من البلاد وهي نفسها اللي حنت صديقتي يوم زواجها وكان عاجبني وقلت لصديقتي هي تحجزها وتعطيها عربون وكل شي يعني اني ما سويت شي.. صديقتي تكفلت بالموضوع.

في هاليوم كنت محتاسة... لأن كان يوم حنتي وبنفس الوقت ما بقى شي على العرس ولا رتبت لي مكان للحنة رغم أن مافي حضور غير أمي وزوجة اخوي وبناتها وشلة 2.2 اللي هم صديقاتي الثلاث.... وطبعاً ما ننسى الحناية أم إبراهيم وأختها...

يعني الحضور كانوا كلهم على بعضهم 10 أشخاص وانا من ضمنهم

وكان لازم أروح الصالون بعد... فعلى الساعة 11 الصبح رحت صالون إيفا وقلت لهم سووا لي سشوار ولفات على برة ورشوا عليه سبراي خفيف وخلوه ملفوف لأني ما بفله إلا بالليل

زوجة اخويي كانت مصرة أني أحط سفرة العجم اللي سويتها لملجتي.. عشان تعطي ديكور للمكان.. وكنت أقول لها ما له داعي لأن مافي حضور يعني عليش انتين وصديقاتي بحط سفرة وديكور؟ قالت إيه احسن عشان على الأقل لما تصورين يبين في مكان عدل... وقلت شورش وهداية الله

المشكلة أن سفرة الملجة كانت حمرة... والقماش أولريدي تصرفت به >>>> سويت به جلابية لنفسي ووزعت الباقي

وانا فستاني يوم الحنة وردي! كيف أسوي ديكور وردي وما عندي أقمشة ولا شي ولا عندي وقت أروح السوق أشتري

اتصلت في المسعفة صديقتي.. وقلت لها السناحات اللي اخذتهم منش يوم ملجتي كان فيهم سناح وردي صح لو أنا غلطانة؟

جان تقول بس احنا ما ركبناه... قلت لها ادري لأن ديكوري كان احمر .. ألحين أبغيه وأبغي معاه دوشق ومساند وتكيات... قالت غالي والطلب رخيص... وما قصرت الغالية وجابته ليي

وغطيت به مدخل المجلس بمساعدة الوالد (وكان هذا بنفس يوم الحنة الظهر الساعة 2 إلا ربع قبل الغدا)

وحطيت الدوشق والمساند والتكيات وجبت المنظرة والشمعدان والقرآن وحطيتهم على جنب

وهذي صورة المكان

طبعاً فستاني كان وردي فاتح قصير ومنفوش وستايله قريب من ستايل الستينات بس كان غريب والسبب الحركة اللي في القماش... كان شيفون وردي فاتح مخرم تخريمات ورود ومحل التخريمات تطلع البطانة التفتا بلون وردي أغمق.. ولأني درت السوق ادور هالنوع من القماش ما لقيته.. فاشتريت شيفون عادي باللون اللي ابيه ورسمت الورود على كارتون وقصيت حوالينه واخذت القماش مع الكارتون اللي قصيته إلى الخياط وقلت له سو لي هالموديل وخرم لي قطعة الشيفون كلها على أساس الكارتونة اللي رسمتها وقصيتها...

وخياطي فنان ما قصر وسواه لي مثل ما أبي وأكشخ... أتمنى تكونون فهمتوا اللي أقصده من الموديل... بس كان شغل متعوب عليه أن يقعد يخرم لي قطعة قماش شيفون مترين على شكل ورود!

فستاني ما كان له علاقة بليلة الحنا يعني لا هندي ولا تقليدي ولا جلابية ولا لونه حتى يوحي بليلة حنا... وهذا القصد منه لأني ابي استفيد منه عقب وبنفس الوقت لأن ليلة الحنة ما عزمت احد غير اهل بيتي بس أمي وزوجة اخوي و 3 من صديقاتي

نواصل...

بعد الغذاء لبست فستاني وفوقه عباتي وحملت أغراضي واكسسواراتي ووصلني الوالد إلى صالون رسل... وحطيت ميك اب عند هناء الحداد... لأن أحب الميك أب الوردي مالها والهدف أن يكون ناعم كلش وستايله غير عن أم عباس.. بعد ما تمكيجت... بعدها جاني زوجي الصالون ورحنا استوديو فوتوكينا وصورت 12 صورة (4 لي و 4 له و 4 مع بعض)

بعدها وصلني زوجي بيت أبوي ودخلت وكانت وحدة من صديقاتي هناك بس وزوجة اخويي وبناتها واخت الحناية أم إبراهيم يعني حنايتي للحين ما جت... ولهذا سويت جارج... شحنت روحي اكل ورحت مكرمين الحمام واستعديت على بال ما تجي حنايتي

الأكل كان صواني معجنات وورق عنب من عند حلويات طارق بالإضافة إلى مشروبات غازية و معكرونة وكباب عدس

وبعدين قعدت في فرشتي الصغيرة وحنوني من الساعة 9 إلى الساعة 11 ونص تقريباً

ويوم يبس الحنا قشرته ورحت غرفتي نمت... وللأسف كانت بداية تعب ونزول المناعة يعني يا أوريانا شكلش بتمرضين!

يوم ثاني الصبح كان جلستي العودة

----------------------

الجلوة الرئيسية (حضور لكافة الأهل والأصدقاء من جانب اهل العروس وأهل المعرس)

اليوم: مساء الخميس/ التاريخ: 12 نوفمبر 2009

الموقع: المركز الحسيني

قعدت من الصبح وكنت تعبانة كلش لأني مو شبعانة نوم بسبب الحنة.. ورحت جهزت اغراضي وتسبحت وعطيت أمي هالكرسيين اللي سويت تغليفهم بنفسي عشان يجلسوني عليهم وقلت لها تصرفوا ودوه المركز... طبعاً اهلي كانوا محتاسين على التجهيزات والأغراض اللي بيودونها المركز واخويي وداني على الساعة 10 صالون الرونق ... وسويت شعري عند فتحية

كان شعري ويف وبينه ظفاير مدخلة بطريقة غريبة وحلوة مع البف وفرق في النص (انا طلبت الفرق في النص عشان الجلسة)

يوم استوى شعري اتصلت في اخوي وجا أخذني ورجعني البيت... تغذيت ولبست فستاني وحملت اغراضي واكسسواراتي ووصلني الوالد البسيتين عند ابتسام كمال... والصدمة اني رحت وهي مو هناك! وظليت اتصل فيها وما ترد.. وبعدين أخيراً ردت وانا كنت واقفة على الباب ما اقدر ادخل لأن الباب مو مفتوح ومافي احد... وانتظرتها بحدود ربع ساعة يالله وصلت..

وانصدمت ما توقعت شكلها جدي... تبين كلش كيوت وصغيرة وحبابة عالآخر وطيوبة

وبدت فيني مكياج وكنت اني الوحيدة هناك لأن كنسلت كل مواعيدها ذاك اليوم بسبب انشغالها بأمور خاصة وكانت تبي تكنسلني بس كسرت خاطرها لأني حاجزتنها من قبل 3 أشهر ومعتمدة عليها...

بعد ما خلصت مكياجي اللي بدعت فيه ابتسام كمال وغيرتني عدل صبغت أظافري ذهبي وظليت انتظر زوجي يجي ياخذني بس ابتسام كمال طلعت وراحت لأشغالها وظليت بروحي مع زوجة أخوها.. شوي شوي إلا أحس شي غلط في عيوني!! رحت للمنظرة أتاري الرمش تحرك من مكانه! وظليت اضغط عليه عشان يثبت مو راضي يلصق!

خبرت مرت اخوها قالت لي ما اعرف للمكياج انا بالمرة! قلت لها طيب طلعي القلو وانا بلصقه قالت ماكو اغراضها كلهم شالتهم!

اتصلت في ابتسام .. طلعت ابتسام راحت بعيد وما تقدر ترجع لي! وتورطت انا وخبرتها ان اتم ضاغطة عليه مدة طويلة وبيثبت

حاولت اضغط عليه وعجزت مافي فايدة.. يثبت شوي وبعدين يطيح!

وصل زوجي.. وركبت السيارة وانا مو عارفة شسوي.. وقلت لزوجي يشوف.. قال لي خلها ترد لج قلت له شلون ترجع وهي راحت مدينة حمد واحنا في المحرق وتباعدت واجد.. بعدين رحنا صحاري بما ان تصويرنا في استوديو صحاري .. وفوق استوديو صحاري في صالون بريميرا استيلو... ورحت لهم وأنا أجرجر في فستاني وذيله وعفستي! وأركب درج طابقين! يالله وصلت

ويوم دخلت قلت لهم ما ابي شي.. انا عروس طايح رمشها :096:

[COLOR=royalblue]الفلبينية اللي هناك قالت لي مالت المكياج طلعت مو هني.. قلت لها مو شغلي تطلعين لي اللي يلصق وبلصقه.. المهم كسرت خاطرها ودورت لي لأن ماكو الماكييرة تشيل اغراضها بعد.. المهم بعد التعب والتدوير حصلت لي واحد بس جامد وشوي خربان.. وظلت بأبر تعصر فيه يالله طلع لي شوي.. ولصقته لي بصعوبة يالله لصق لأن القلو كان [COLOR=royalblue]خربان بعد! وشوي خرب لي الكحلة لكن مو كلش يبين محد يلاحظ غيري![/COLOR][/COLOR]

وكسرنا الشر وصلينا على النبي وشكرناهم ورحنا صورنا في الاستوديو اللي ذبحوني حركات

وعلى الساعة 8 ونص وصلت المركز ودخلوني في غرفة بروحي ورا وجوا صديقاتي قعدوا ويايي عن بروحي... طبعاً بما ان فيني حساسية جيوب وتنشط مع التعب وضعف المناعة اشتغلت علي الحساسية على خفيف وكنت احس فيها بس مقاومة حكة الأذن والأنف...

بعدين على الساعة 9 ونص دخلت بنت عمتي وخالتي وقالت لي يلا بتدخلين الصالة.. وعلى طول فزيت ولبست البوشية البيضاء (بوشية بيضاء مسوى فيها نقوش قديمة بالنغدة ) سوتها لي ام صديقتي هدية من عندها ولبست فوقهم مشمر أخضر تقليدي مطرز بذهبي وفوقه مشمر مال بني جمرة (احمر مبكر) ستايل شعبي تقليدي وقديم كلش

ودخلت على زفة الجلاية أم صادق.. طبعاً كنت عمية وما أشوف شي لأني مغطية وجهي ببوشية مطرزة وقلت بسوي جلسة نفس مال أول ما ابي وجهي يطلع وما بطلع وجهي إلا بالأخير بعد ما اخلص الجلسة...

وهالدخلة عطتني هيبة والكل استانس وعجبه خصوصاً ستايل البوشية المطرزة بالنغدة والمشمر المبكر

نسيت اخبركم عن فستاني .. كان أخضر تفاحي على ذهبي وكان لونه مو ثابت ما بين الأخضر والذهبي ويعطي لمعة برونز شوي حسب الإضاءة وكان فيه شك ناعم وكثيف عند الصدر الشك مشكل 3 احزمة تفتا هندي مشكوك ومشبوكة بالفستان بشيفون تنزل نهايته إلى الذيل، والجيب أو الجزء التحتي من الفستان من تفتا أخضر تفاحي ألوانه مو ثابتة ( التصميم والقماش من عندي والتفصيل في ليدي مون)

مكياجي كان أخضر تفاحي مع تدرجاته وذهبي والروج وردي فاتح

واكسسواراتي لبست طقم الذهب مال خطوبتي وصندل ذهبي (فلات عشان طولي وطول زوجي المتقارب)

المهم... بعد ما دخلت وكانوا صديقاتي مجوديني عن لا أطيح أو ادعم في شي وبنت عمتي وخالتي وأمي ورايي والكل زفاني أهلي وصديقاتي لحد الكوشة.. قعدت شوي عند الكوشة على بال ما تخلص زفة أم صادق وبعدين نزلوني وقعدوني على الكرسي اللي غلفته وخلوني أقابل القبلة..

وجت أم صادق وتجمعوا الأهل والصديقات حواليني.. وحطوا الشمعتين في إيديني وحلاوة وجاكليت ملفوف في قطعة قماش ذهبية في حضني.. وبدوا يجلوني ويمسحون إيديني ورجليني وراسي عند مفرق الرأس بماي الورد والزعفران

وبدوا الجلوات والأغاني والرديح والصفقة والرنة والنقزة والكل استانس ومافي إلا اني ما اشوف شي لأني مغطية بالبوشية!

ولما خلصوا الجلوة اخذوا الحلاوة من حضني ونفروه مع فلوس على المعازيم

وبعدين جت أمي وشالت من علي الغطاء وركبوني الكوشة واشتغلوا المصورات تصوير فيني.. استجنوا وانا كنت تعبانة من الحساسية بس مقاومة .. كسروني من التصوير... حد التصوير في المركز حوالي 400 صورة والمأساة اني اختار منهم بس 65!! استجنيت... الظاهر عجبتهم >>>

الموهييييييييييم

[COLOR=black][SIZE=4][COLOR=royalblue]وزعوا البارسلات وكانتمن مطعم [SIZE=4]show piece[/COLOR][/SIZE] مع مشروبات غازية وأكياس مكسرات مع جاكليت وحلوى بحرينية[/COLOR][/SIZE]

بعد ما تكسرت تصوير اتصلت في زوجي عشان يجيني للمتورب.. وكان مو راضي إلا يخف العدد وقلت له كلهم طلعوا ومافي إلا القراب كلش لأن الوقت كان 11 وشي تقريباً والناس كلها اكلت ومشت.. المهم وصل زوجي وطلعت له برة ودخلت معاه في زفة إلى حد الكرسيين اللي غلفتهم وقعدنا مقابلين بعض

وهني أول شي سووه غسلوا أيادينا بماي ورد

عندنا عادات أهل أول بالبحرين أن يغسلون أيدي المعرس والعروس بالماي ورد والطريقة كالآتي:

يشبك المعرس يده اليمين بيد العروس اليمين مع رفع الإبهام ولصقهما ببعض (يعني إبهامي بإبهامه)

ويطلع من جيبه خردة فلوس وينثرهم على ايدينهم بيده اليسار.. وفي هالأثناء تجي بنت تصب ماء الورد من الغوري الخاص الذهبي على يدينهم ويحطون من تحت صحن ذهبي غزير شوي عشان الماء ما يلعوزهم

بعدها ياخذون هالخردة ويدفعونهم صدقة

والماء النازل من الغوري على إيدينهم يرشونه على سريرهم وفي زوايا بيت الزوجية

وبعدين جابوا مشمري الأخضر وفرشوه فوق راسنا وكل بنت مسكت طرف منه وظلوا يرفرفون به على راسنا ويغنون الأغنية البحرينية التقليدية القديمة (واتريمبو واليومي) والتي تكثر فيها الصلوات على محمد وآل محمد مع بيوت أشعار قديمة تتغنى بجمال العروس والمعرس وحياتهما معاً

نسيت اخبركم أني زينت كرسيين بقماش أخضر عشان الجلسة والمتورب وحملتهم ويايي من البيت لأني ما كنت أبي كرسي عادي على الأقل يكون فيه حركة ولو بسيطة وبما أني مسوية كل شي مال أول ومتغطية ومو مبينة وجهي اخترت قماش يشبه السناح وخيطته عند خياط عادي كغطاء لكرسي ورتبته أني في البيت مع ربطة ذهبية وهذي صورة الكرسيين

بعدها.. حضنتني أمي وصاحت وحضنت زوجي وبعدين جت أم صديقتي وبخرتني وشببتني وشببت زوجي.

بعدين واصلنا تصوير وأهديت زوجي ساعة وهو اهداني طقم ذهب أبيض لبسته يوم العرس وخلصت الحفلة ورجعت بيت أبويي! وعلى طول اخذت حبوب الحساسية ونمت نومة كانت لحظة او ثانية لأني ما شبعت من التعب

وقعدت من النوم واني مزكمة وحالتي حالة... وهاليوم كان يوم العرس!!!

----------------------

يتبع.............

:!!:

O

Oriana

تاجرة

13-08-2010 | 02:14 PM

الزواج ( حفلة مثل ما تمنيتها... صديقات فقط والعدد 100 أما الحضور 75)

اليوم: مساء الجمعة / التاريخ: 13 نوفمبر 2009

الموقع: فندق إيليت سويتس

أول شي أبي أقوله عن هالتاريخ وأسباب اختياري له

أولاً يصادف يوم جمعة وما قبله ولا بعده مناسبات عشان الناس تكون فاضية لي

ثانياً رقم 13 داخل واجد في حياتي في أشياء أذكرها أو ما أذكرها.. وصرت اتفاءل به مثل ما يقولون أو أحبه

ثالثاً 13 نوفمبر هو عيد خطوبة أمي قبل 41 سنة (الصلاة على النبي)

وحجزت الصالة من شهر مايو 2009 حق شهر نوفمبر ... حجزتها واني ما ادري هل بتزوج صدق أو ما بتزوج لأن ما كان ولا شي كامل

فصلت فستاني في ليدي مون ( ما اقدر ابدل عنه يعجبني شغلهم ومعاملتهم) طبعاً الموديل من عندي والقماش بعد من عندي... والقماش جبته من الأردن مخصوص وكان فيه دانتيل سترج دخت السبع دوخات عشان ألاقيه...

فستاني نااااااااااااااااااااااااعم وستايل أوروبي بحت بحت بحت... وكان كلوش 6 قطع ومنثور فيه شك وخرز سواروفسكي (خرز مو فصوص) يعني كريستالاتي كانت كرستالات خرز كور صغيرة اشتريتهم بنفسي ووديتهم إلى ليدي مون وقلت له شك لي من هذا ما ابي السواروفسكي العادي

كان الذيل طويل واجد.. ومن فوق عبارة عن دانتيل وكم طويل راص على اليد (سترج) وكان الدانتيل كله مشكوك بخرزات السواروفسكي مدمج معاه اللولو الأبيض

كان لونه ابيض ناصع لون الحليب والطرحة حوالينها كله دانتيل مشكوك ومنثور فيها خرزات سواروفسكي بعد وكانت طويلة جداً أطول من الفستان.. وكانت طرحتي طبقتين ومنفوشة.. طبقة على وجهي وطبقة طويلة ورا منفوشة

ولبست تاج فخم وكبير تعبت عشان احصله لأني شايفة صورته وحاولت مع كذا محل هني يفصلونه ما عرفوا واللي عرفوا كان واجد غالي طالبين علي في حدود 300 دينار وما رضيت اسويه.. والسعودية ما عندي احد يوديني .. وشفته اون لاين وحاولت اطلبه طلع ما يوصلون للبحرين وحاولت وتحايلت وهم ما قدرت... آخر شي طبعت صورته وعطيته الوالدة وراحت إيران وجابته لي من هناك جاهز ويشبهه بنسبة 97% يعني الفرق بس 3%!

ديكور الصالة كان بسيط ومسرح شفت صورته في الانترنت واعتقد الجندل اللي يسويها

عاد انا رحت إلى مجيد للأفراح اللي سوا ديكور خطوبتي لكن للأسف ما قدر يسويه لأن في هالفترة بيكون مسافر ولهذا طرشني غلى بريميرا استيلو مصمم القاعات في فندق الدبلومات

رحت عنده ورحب فينا وطلع يعرف الوالد بعد وعطانا سعر كلش حلو

[COLOR=royalblue]

[/COLOR][COLOR=royalblue]سويت المسرح أوف وايت مع باقات ورد بيضاء وعلى كل طاولة حطيت فازة فيها وردتي سوسن بيضاء تحتها مرآة (cala lilly)[/COLOR]

وطلبت منهم يسوون لي طاولة عادية عليها ورد للكيكة.. كيكتي كانت من عند أم حسام (فانيلا ومحشوة بكسترد وتوت وفراولة).. أما العروس والمعرس اللي فوق الكيكة فطلبتهم من أمريكا بالانترنت.

وطاولة على الجانب الثاني تزيينها شوي مختلف للعروسين (عشان نتعشى مع بعض)

الدي جيه كان دي جيه دريم اخترت لهم بنفسي الزفة والأغاني اللي ابيها واللي اخترتها كلها اغاني كلاسيك وهادئة لأن طابع حفلتي كان الستايل الأوروبي والهدف ما كان حفلة عرس بقد ما كان عشاء عرس

نجي للأكشخ

بطاقة العرس

كنت أبي أوزع شي وبنفس الوقت أبي بطاقة العرس تكون كشخة.. وابي بطاقة العرس تكون مفيدة يعني مو اخسر عليها فلوس وبعدين محد يستفيد منها

ولهذا كنسلت التوزيعات وقلت توزيعاتي هي بطاقاتي

وقعدت أفكر وأفكر وأفكر لين اهتديت إلى أن بطاقاتي تكون كالآتي

طبعاً هذا عبارة عن دفاتر نوت بوك على شكل قطعة شوكولاتة طلبتهم أوردر من الصين ولما وصلوا صممت الكلام على الفوتو شوب بنفسي وألفته وأخذته على مطبعة واخترت الورق واللون الذهبي وقلت لهم اطبعوه لي وقصصوه على الشكل والصقوه في اول صفحة من الدفتر

ولما جهزوا اشتريت شرايط ولفيتهم بشرايط ذهبية وشبكت معاهم بطاقة صغيرة للدخول عشان يحتفظوا بالدفتر اللي هو نفسه البطاقة!

[COLOR=royalblue]

[/COLOR]

دفتر توقيع المعازيم احترت فيه ولهذا قررت اسويه بنفسي.. ولضيق الوقت ما حسيته صار مرتب واجد لكن في النهاية الفكرة كانت حلوة وبستفيد منها بعدين

[COLOR=black][SIZE=4][COLOR=royalblue]اخذت كلندر قديم وجلدته بمخمل بلون الـpeach [/COLOR]وطبعت صور لورد الكالا ليلي.. بحيث تكون في الصور مساحات بيضاء كبيرة.. وشبكتهم في قاعدة الكلندر بتراكي دائريين وصار دفتر توقيعات واقدر اعرضه بسهولة في أي زاوية من زوايا شقتي.[/SIZE][/COLOR]

نجي لتجهيزاتي الخاصة...

من الصبح قعدت واني مزكمة :sick: مثل ما قلت لكم

وتسبحت وحملت أغراضي وعلى طول رحت صالون الرونق... وهناك بدت وحيدة في شعري كنت ثاني عروس ورفعت لي شعري وحطت لي التاج وكان باقي الطرحة قالت لي بعد المكياج بتحطه

بعدين طلبت لنفسي غذاء وكنت تعبانة حدي والزكام يزيد وافكر شلون بتكون حالتي مع المكياج... المهم على الساعة 4 بدأت فيني فاطمة اللبنانية المكياج وسألتني شنو ستايلي وشنو أبي.. وقلت لها لا تبيضيني ولا تسمريني أبي لوني وابي ابين ناعمة قد ما تقدرين لأن حفلتي ستايلها اوروبي... وفعلاً طلعتني مثل ما ابي وباحلى حلة مثل ما يقولون وكان مكياجها ناعم وراقي جداً.. مكياجي كان وردي فاتح مع تدرجات الفضي وحطت لي كحل تركواز داخل عيوني غيرني عدل ... والروج كان فوشي وصرت مثل الباربي

بعدين جاني اخويي بسيارة الزفة وكانت مزينة كلها بورد طبيعي أبيض ووداني بيت أبويي.. وهناك لبست فستاني وجان اكتشف اني نسيت الباقة >>>> نفس الحركة سويتها في الخطوبة

واتصلت في صديقتي وقلت لها تجيبها.. المهم مرت وجابتها لي من المحل للبيت

باقتي من لاريسا والصورة لقيتها في الانترنت وطلبت يسوون لي مثلها وطلعت مضبوطة

وهذي الأصلية من النت

بعدين زوجي جاني بيت ابويي.. ونزلت من على الدرج إلى الصالة وهو ما يدري اني هناك.. ومن شافني وقف وانبهر وحسيته عاجبنه عدل وهالشي وردة فعله ريحتني بزيادة لأن حسيت الفرحة بعيونه والمفاجأة اني تغيرت واجد وبينت عروس

واشتغل هو وأخويي الكبير والبابا تصوير فيني وبعدين جا اخويي وركبنا السيارة اني وزوجي من ورا وسووا لي زفة كبيرة ومنسقة ومرتبة بالسيارات إلى حد استوديو سكوب.. صورنا هناك وكانوا الطاقم كله مستجن.. كلهم دخلوا لي غرفة التصوير يطلون يشوفوني ويقطون كم كلمة بالفلبيني ويطلعون... ما طلت من الأستوديو إلا كلهم حفظوا وجهي ومستانسين وكانوا يقولون لي نيو ستايل .. وان العرايس اللي يمرون عليهم دائماً ستايلهم خليجي وهذا ستايل أوروبي وكل شي ناعم... وعلى قولتهم أعرف اسوي حركات تصوير ( خبركم موتي التصوير).. يعدين واصلنا الزفلة إلى الفندق ووصلت الفندق بالضبط الساعة 9... وظليت مدة في السيارة وبعدين ركبت السويت اللي عاطينا اياه الفندق

[COLOR=royalblue]وقعدنا هناك نطالع التلفزيون وطالعت حلقتي اهم شي :lol:[/COLOR]

وبعدين يوم صارت 10 اتصلت في صديقتي اسألها عن الوضع لأني ابي ادخل الصالة 10

قالت لي لا بعدها الصالة فاضية وانتظري شوي عشان الناس يتجمعون قلت لها عجل بدخل 10 ونص

يوم جت 10 ونص اتصلت صديقتي وقالت لا تنزلين للحين باقي جم شخص عشان يكون وضع الصالة تمام التمام وشبه مكتملة

المهم شوي إلا طاقين باب السويت.. فتح زوجي إلا داخلة علينا عروس صغيرة وعليها طرحة

كانت هذي مفاجأة زوجة أخويي اللي سوت لبناتها ثنتيهم فستان نفس فكرة فستاني كم طويل وكلوش 6 قطع وفوق هذا كان الفستان من بقايا قماش فستاني هو والدانتيل وكانت ملبسة بنتها اللي تشبهني وكوبي مني بالضبط طرحة وتاج ومسوية لها باقة ورد نفس العروس الصغيرة بالضبط

أما بنتها الثانية فعمرها سنة بالضبط.. وهالكتكوتة لبسوها بعد فستان طويل و6 قطع كلوش وكانت توها تتخطى وتمشي وحطوا فوق راسها طرحة بطولها... وطلعت كيوتة وتجننننننننننننننن.. كانت شكل فقط لأنها مستحيل بتمشي في الزفة وهي توها تتخطى وعمرها سنة بس بينت كيوتة حدها عروس أوفر صغيرة

اكتشفت ان مرت اخوي جابت بنتها عندي السويت عشان محد في الصالة يشوفها ويكتشفون فكرة الفستان وموديله لن موديلهم يشبه موديلي مع فروق بسيطة لأنهم صغار.

على الساعة 11 إلا ربع نزلت عشان ادخل الصالة.. وشغلوا زفتي بغناء أريام وباسم نور الشمس... ومشت بنت اخوي قدامي مثل العروس لحد الكوشة وانتظرتني هناك ودخلت وراها انا وزوجي وكنت منزلة الطرحة على وجهي ومشينا بروحنا لحد ما وصلنا الكوشة وكان تضبيط ممتاز في المشي والحمد لله صارت الزفة سريعة يوم قربت للكوشة :)

وبعدين رفع زوجي الطرحة وصورنا وبدلنا الدبل وبعد شوي جت بنت اخويي وباستني وعطتني هدية >>> طلعت لوحة في برواز راسمتني وراسمة زوجي عن يا زعم عروس ومعرس

بعد اغنية الزفة حطوا اغنية أريام وفايز السعيد (دويتو) اهلا وسهلا ومرحبا

وبعدين تحول الوضع إلى موسيقى كلاسيك من بعد صخب وصول العروس ونزلت مع زوجي من على الكوشة ومشيت على نفس الممر ورحت إلى البوفيه وفتحته... حطينا لنا أكل في صحونا وكنا نصور واحنا ناكل وسكوب ما قصروا في التصوير كانوا مكيفين عالآخر وخصوصاً أن الشي اللي يعجبني في سكوب ان اللي تصور داخل الاستوديو نفسها اللي تصور العروس في الحفلة ولهذا رافقتها وصارت تعرفني عدل وكتبوا لي حتى في دفتر توقيع الحضور وحضنتني وحببتني قبل لا تروح كانت واجد مستانسة بي! وللحين على متابع صور العرس تستانس يوم اللي تشوفين وتجي تحببني نفس الربع! ماخذة عليي عدل! وهي حبابة بعد واجد وانا حبيتها

حملوا لنا صحونا وودوهم الطاولة ورجعت على نفس الممر مع زوجي امشي وابتسم للحضور ورحت لطاولة جنب الكوشة مخصصة لنا.. قعدنا عليها انا وزوجي وتعشينا وفي هالأثناء صورونا سكوب والناس انشغلوا في البوفيه ياكلون ويتسامرون

والبوفيه عجب الناس كلهم وقالوا عنه ان حلو ولذيذ.. بس للأمانة انا ما اتذكر لا طعم ولا شي لأن الزكام كان واصل حده خصوصاً اني عطست كم عطسة في الصالون وبغى يتعفس مكياجي وبعدين ظليت اشفط كله على داخل وخلاص التهبت اللوز وارتفعت الحرارة وانا كله تمثيل في تمثيل وفوقه كنت بالعة حبوب الحساسية قبل التصوير وحبوب الحساسية تدوخ شوي فكنت احاول اوعي روحي غصب وشغلتي اوزع ابتسامات >>>> لين بغينا نبين أقوياء نعرف شلون

بعدها قطعنا الكيكة واشتغلت الاهداءات ودخلوا اخواني على زفة وصوروا معاي وبعدين طلع زوجي معاهم.. وصورت مع صديقاتي ورقصنا واستانسنا.. وبعدين رحنا السويت تبعنا

صورت في السويت كم صورة وبعدها تعشينا مرة ثانية وفليت شعري عن كارتون الشباصات اللي فيه والحشوات اللي زوجي كل شوي ينصدم لما تطيح في إيده حشوة وانا اضحك

اخذت حبوب دوا مرة ثانية ونمت

الصباح رباح

ما قعدنا إلا الظهر.. حملت أغراضي وطلعت من الفندق بعد ما شكرتهم ورجعت بيت أبويي وزوجي راح بيت ابوه >>>> استغربتون صح؟

لأني رجعت اجهز باقي اغراضي وتسبحت ورحت صالون إيفا وقصيت شعري وسشورته

وبعدها استعدينا ورحنا المطار على الساعة 7

لأن الزواج الحقيقي بدأ بشهر العسل الرائع في 7 مدن أوروبية ولمدة 20 يوم

انتظروا موضوعي عن شهر العسل :) وطبعاً راح يكون بالركن الخاص بالسفر والسياحة

تكلمنا لكم عن يوم الغداء... وأربع ليالي الزواج... بقت ليلة

وهالليلة كانت بعد ما رديت من شهر العسل

وتحديداً يوم الخميس تاريخ 10 ديسمبر 2009

----------------------

حفلة الاستقبال

والموقع: صالة عايشة المؤيد بمدينة عيسى

أمي ما كانت راضية تمام الرضا اني سويت عرس ولبست أبيض وحبايبها ما شافوني به خصوصا انها تتمنى الكل يشوفني بالأبيض وتفرح >>> الأمهات ما يشبعون

ولهذا سويت استقبال مفتوح ولبست فستان عروس أبيض ثاني ومعاه طرحته بعد وكان أنعم من فستان زواجي بس بمستواه روعة لدرجة ان الكل كان يسألني هذا فستان زواجش؟ رديتين لبستين فستان زواجش؟ حتى صديقاتي اللي حضروا بعضهم خربطوا!

على الرغم ان فستان الزواج مال الاستقبال كان اوف وايت ميال للبيج شوي مو أبيض ناصع

وكان حفرة سيور وليس كم طويل

بس صار فخم كلش خصوصاً انه كان كله دانتيل مشكوك والقطعة كانت جاهزة ماخذتنها من العرادي في مجمع العالي ودخلت عليه تفتا أبيض وطرحة مشبوكة بالظهر ألبسها على راسي وأحياناً أنزلها وتروح مع ذيل الفستان.. فكان الكل عاجبتنه الفكرة رغم انها مو جديدة.

وفستاني ما كان منفوخ يعني كان فستان عروس بحجم فستان السهرة :)

الصبح اشتغلت مع الماما على صواني الفواكه اشتغلنا نقصص في الفواكه وأنسقهم على الصواني لتقديم البوفيه وهذا شكلهم

طبعا لازم أروح الصالون فرحت لأم عباس في صالون الأنامل السحرية وسوت شعري مرفوع عادي وستايل أوروبي بعد ناعم ولبست طقم ذهبي بعد وحطيت مكياج برونز بس افخم من يوم الغذاء

ورحت الصالة الساعة 7 المغرب بالضبط.. وعلى الساعة 7 وربع بدأوا الناس يجون وكنت انا وأمي على الباب نستقبل المعازيم

والكل عجبته فكرة ان العروس تستقبل الناس بدل ما الكل ينتظرها وكنت اقول لهم ان هذا استقبال لازم اضيفكم لأنكم ضيوفي

بس اللي يخليهم يستغربون اني كنت لابسة فستان عروس بس بدون معرس وحتى بعضهم انتظروا يحسبون المعرس بيدخل وقلت لهم ان هذا استقبال مو عرس :)

صورت واستانست وفي الاستقبال طلبنا أكل معجنات وخفايف من عند ملكة المنصوري في الرفاع وجوكليت من عند مخبز دلمون وتارت الفواكه من عند المنار

وهذا صور الأكل

بعدين جاني زوجي على الساعة 11 ونص وطلعت من الصالة ورحنا سكوب صورنا مع بعض

وبعدين ردينا الصالة واخذنا الهدايا والأغراض ورجعنا شقتنا :)

وكان هذا سلسلة احداث زواجي

تقرير مفصل.. قليل الصور.. واجتهاداتي كانت لنفسي وفي فساتيني

واسمحوا لي على التقصير

وعلى بخالتي في الصور لأن آسفة صور فساتيني ما أقدر اعرضهم لأن اعتبرها أشياء خاصة

واللي حابة تشوفهم.. حياها البيت أراويها صوري :)

النقل ممنوع مالم يتم نسب الصور والموضوع لإسمي (أوريانا)

ف

فجر عمان

عروس رائعة

13-08-2010 | 02:32 PM

الله يبارك لج اختي والله يرزقج بالذريه الصالحه وتكون ايامج كلها عسل
ومووووووووضوع حلو
وتستاهلي التقيم
دعواتكم لباقي البنات بالزواج والستررررر
بس بسالج سوال انتي ما صحتي يوم زواجج انا اسمع اغلب البنات يبكون ليله زواجهم
انا للحين ما تزوجت انظر فارس الاحلام والا اقول لكم بكمل دراستي عقب بفكر في الزواج

O

Oriana

تاجرة

13-08-2010 | 02:55 PM

لا والله حبيبتي... ما بكيت كنت ماسكة نفسي.. بس أمي بكت يوم الجلوة ودمعت عيني معاها :)

وربي يرزق كل أعزب الزواج والذرية الصالحة

د

ديمة~

عروس نشيطة

13-08-2010 | 03:01 PM

ما شاء الله تبارك الله

الله يهنيج و يسعدج و يجعل أيامج كلها أفرااااح

و ربي يبارك لكم في زواجكم و يجعلج قرة عين زوجج

ج

جروح الوله

عروس ماسية

13-08-2010 | 04:59 PM

ماشاء الله كل شي حلوو ومرتب تمام
وياعيني على الستايل الاوروبي
زين تغيرين .. اندمجت بالقرآة
بالتوووووفيق يا حلووووة ..

ح

حاملة القرنفل

عروس ماسية

13-08-2010 | 05:03 PM

ما شاء الله عليش يا أوريانا دائماً مبدعة

الله يهنيش ويسعدش في حياتش وناطرين تقرير شهر العسل :adore:

يعني الحين صار لج 9 شهور من تزوجتين صح؟

ما أدري اذا تذكريني أو لا ؟:rolleyes:

ث

ثمرة من النخلة

عروس جديدة

13-08-2010 | 05:08 PM

ماشاء الله عليك
الله يسعدك انت وزوجك
تقريرك للحفل مفصل
حبيت كتيييييييييييير الباااااااااااقة

خيااااآآآآآآآآآل

ش

شوشو 87

عروس ماسية

13-08-2010 | 05:13 PM

ماشالله تبارك الرحمن

الصراحه تقريرج روووووووعه وكل شي حلوو ومرتب

وأفكارج حق البطاقه عجيبه

وعشت الجوو معاج

وتستاهلين التقييم

والف مبرووك والله يسعدج يارب .. :)

t

totatota42

عروس مبدعة

13-08-2010 | 05:15 PM

بسم الله ما شاء الله

ت

تائبة لله..

عروس مشرقة

13-08-2010 | 05:23 PM

ماشاء الله عليك حبيبتي
مرة حلللوة و الله و التاج خبيته كثيير و باقة الورد كماان تجنن
ماشاء الله عليك
تتهنين

ح

حــور البحرين

عروس مشرقة

13-08-2010 | 05:33 PM

وااااو روووووعة ..
ماشاءالله قلتين كل شي بالتفصيل ..
تتهنوووون ياحلوة عليكم بالعافية والله يهنيكم ،،

.

.. الجوهره ..

عروس مبدعة

13-08-2010 | 05:46 PM

ماشاااء الله ..

تقرير مميز ,, و حلو بتفاصيله ..

الله يوفقج و يرزقج الذريه الصالحه ..

ع

عنود الشوق

عروس مبدعة

13-08-2010 | 05:58 PM

ماشاء الله كل شي حلووو ومرتب

وافكاااااااااارج روووووووووووعه

ربي يسعدكم ويهنيكم

s

s7aba

عروس رائعة

13-08-2010 | 06:10 PM

الصراحة مواضيعج انا اموت عليها و ومواضيع الملجة والخطوبة وكل شي قبل كنت اقراهم اكثر من مرة من كثر ما احبهم ويعجبوني

ما شاء الله ما شاء الله كل موضوع تحطين ايدج فيه يصير يجنن

وهذا الموضوع رووووووعة ما مليت وانا اقراه واصلا حتى الصور ما اطالعهم عدل هههه بس ابغي اقرا الموضوع اللي بدعتي فيه

وحبيت الباقة وفكرتها وعجبني يوم تروحين المتم اللي في المنامة حسيت انه صج تراثي والنسوان استانسو عليه

و العرس عجبتني فكرة ان بعدين انه عندكم طاوله خاصة حق تتعشون عليها

و البنت اللي نفس ستايل فستانج فكرتها حلوة بس لو حطيتون معاها معرس نفس ستايل المعرس بالضبط كان يصير واايد حلو

مو كاني طولت الهذرة ؟؟ خخخخخ

بس الزبدة انه موضوععج كله على بعضه يجننن

وان شاء الله موضوعج اليديد يكون عن توزيعات ولادتج ان شاء الله

W

WhO @m i

عروس مبدعة

13-08-2010 | 06:27 PM

لا إله الا الله

اللهم صلى على محمد وآل محمد

كل شئ على بعضه حلو ومرتب

الله يهنيكم ويرزقكم بالذريه الصالحه ان شاء الله:)

تم التقييم

ا

ام هدواي القلب

مشرفة سابقة

13-08-2010 | 07:32 PM

ربي يوفقك يارب..

S

Spoiled Zozo

عروس مشرقة

13-08-2010 | 08:56 PM

ما شاء الله تبارك الرحمن
عرس من اروع ما يكون
الله يرزقكم الذرية الصالحة ويخليكم لبعض

وتم التقييم

م

ملكة الاحساسـ

عروس رائعة

13-08-2010 | 10:19 PM

ما شاء الله تبارك الله

الله يهنيج و يسعدج و يجعل أيامج كلها أفرااااح

و ربي يبارك لكم في زواجكم و يجعلج قرة عين زوجج

ب

بقايا ألم

عروس نشيطة

13-08-2010 | 10:45 PM

ماشاء الله تبارك الرحمن
اللهم صلي على محمد وآل محمد
الف الف مبرووك وبالرفاه والبنين
تحياتي