الف مبروك اختي وكملي دراستج حتى لو بتبدين بالتجاره .. لا يشغلج هالشي عن دراستج ترى هي سلاحج ان شاء الله
وانا بساعدج ان شاء الله قد ما اقدر وبقولج الي اعرفه .. الله يسامح البنات والله انها اشياء بسيطه بس مادري ليش هالانانيه .. !!
أنـآ من الإمارات تحديداً عجمـآآن .. مـثلاا لو بغيت أشحن بضاعة لخاارج الإمارات او داخلهـآ
ويــن أرووووح و تكون أسعارهم مناسبة ( يعني هل في شركة شحـن في عجمـآآن خدمتها زينـة و أسعارها بعد )
بخصوص الشحن لخارج الامارات .. افضل طريقه واقرب مكان لج هو بريد الامارات اسعارهم جداً مناسبه وتعاملهم مافي احسن منه .. وروحي الظهر او العصر ماشي زحمه ومايدققون وايد على الاغراض الي بطرشينها ومن يشوفون بنت داخله يمشونها قبل الرياييل بسرعه
ادخلي المبنى مال البريد على اليسار روحي هناك وقولي ان عندج طرد تبين اطرشينه
بيعطونج كوبون تعبينه
والمطلوب هالبيانات :-
البيانات الي تخصج انتي على اليسار
الاسم الثلاثي
رقم الموبايل
العنوان مع صندوق البريد
وانتبهي على هالبيانات لان يمكن الطرف الثاني مايستلم او يكون العنوان الي طرشتي عليه غلط فيردون يطرشون لج الطرد مره ثانيه بدون رسوم يديده لانج دفعتيها اول شي
البيانات الي تخص المرسل اليه
الاسم الثلاثي
العنوان
رقم الموبايل
وفي النص تكتبين شو مطرشه .. انا اختصرها واكتب هديه
اول شي انتي الحين عندج طلب تبين اطرشينه .. اوزنيه فالبيت .. انا اوزنه بالميزان العادي اذا كان كرتون كبير .. اما اذا شي بسيط مثلا علبه عليها وزنها انتي روحج بتفتكين من الصدعه وبدون وزن ولا شي بتعرفين وزنه كم
ليش لازم اعرف وزن الطرد الي بطرشه؟؟
لان رسوم الشحن تعتمد على الوزن والي المشتري بيتحملها فلازم تعرفين كم الرسوم عشان تضيفينها على قيمة البضاعة الي بطرشينها عشان تبلغين المشتري
وماطرشين شي قبل ما تستلمين المبلغ كامل وتحطينه عندج فالبوك .. مب يقولون لج طرشنا وهذا كود الحواله او شيكي على حسابج المبلغ دخل .. ( بخبرج عن موضوع الحوالات عقب )
لا .. تأكدي ان المبلغ الي طلبتيه هو الي استلمتيه بيدج .. لان في رسوم تحويل تنخصم من الدولتين وفرق العمله والمشتري لازم يتحملها كامله
وانتبهي للحوالات الي توصلج من السعوديه .. اكرر .. انتبهي ..
قولي لهم بالحرف لو البضاعه مع الشحن تكلف 100 درهم قولي لهم ابا استلم 100 درهم كامله
وهاي قائمه الاسعار
حاولت ارفع الصوره على كم موقع اكثر من مره بس الظاهر النت عندي مب صاحي:badly:
اممم أنا ما أعرف شي في التجارة فيعني لو بغيت يوصلون لي طلبية مثلا الشارقة لازم أروح للشركة نفسها و أعطيهم الطلبية و يكون عليها العنوان وهم يوصلون ؟..
لا ماتروحين للشركه تتصلين على مندوب عجمان وهو اييج لين البيت انا اتعامل مع شركة هوت لاين وعندهم نظام الدفع عند الاستلام
ياخذون 30 درهم على التوصيل للطلب الواحد يستلمون الطلب من عندج ويوصلونه للمشتري خلال 3 ايام تقريبا وعقب يردون لج الفلوس قولي اسبوع تقريبا لين توصلج فلوسج
وعندهم نظام حلو انهم يوم يستلمون الفلوس من المشتري يدخلونه في حسابج لو كان عندج بس تعطينهم رقم حسابج بس ماعرف كيف تعرفين لو دخلوا المبلغ في الحساب لان ماعندي حساب فالبنك
نظامهم انج تشترين 10 كوبونات بـ 300 درهم وبتكون بياناتج انتي مطبوعه عليها
يعني ما عليج غير انج تكتبين بيانات المشتري والمبلغ الي تبين يستلمونه منه ولاتنسين تضيفين قيمة التوصيل مع قيمة البضاعه الي بطرشينها الا اذا كنتي انتي بتتحملين رسوم التوصيل هذا شي راجع لج يعني
بيطلبون منج صوره جواز اول شي ومب شرط تكون لج انتي .. ممكن جواز الوالد .. او حد من اخوانج او نسايبج .. هم مابيسوون فيها شي بس كنوع من الاثبات طبعا انتي بتستفيدين من هالشي في حال صارت مشكله بينج وبين الشركه لا قدر الله .. وهذا مستبعد جدا
البيانات الي تطلبينها من المشتري او المستلم
الاسم
رقم الموبايل
العنوان .. وخذي العنوان بالتفصيل احسن عشان توصل الطلبات بسرعه
وقبل ماطرشين اي طلب تأكدي من الي طالبين منج اذا كان الدفع عند التسليم لان الخيانات على بيزه :thumbs_down:
أنزين لو كانت مثلا الطلبية أكل يعني حلوياات و كيكات أو معجنات و فطاير بالنسبة لهذه الأكلاات كيف بيكون التوصيل ؟.. و علشان ما تخترب ها الأكلات بشو تنصحوني و مثلا يعني أخلي التوصيل لها الأكلات فقط للشارقة و عجمان علشان ما تخترب شرايكم ؟
انا ماجربت بس الصراحه ما انصحج اطرشين بالشركات لان مايوصلون لج الطلب بنفس الوقت الا تشوفين لج حد ( ويكون شخص ثقه )
بالنسبـة للحساب في البنك اللي عرفته أن لازم يكون عندي حساب في البنك و أطرش الاسم و رقم الحساب للمشتري و المشتري يطرش المبلغ على الحساب أنزين :
مب شرط يكون عندج رقم حساب عشان يطرشون لج عليه
انا للحين ماعندي رقم حساب تخيلي !! :D
انا استلم المبالغ عن طريق الحوالات المصرفيه والي هي وسترن يونيون او سبيد كاش
كل الي يحتاجونه منج هالبيانات عشان يطرشون المبلغ
الاسم الثلاثي
رقم الموبايل
العنوان الدوله والمدينة
واستلم عن طريق الانصاري للصرافه او الامارات للتحويل بتلاقينهم في ستي سنتر حذال بعض وشي صراف في حمدان سنتر نادرا ما توصل الحوالات عليه
حوالات وسترن يونيون تعرفينها من رقم الحواله الي الشخص المرسل بيعطيج اياه
يتكون من 10 ارقام هذا تقدرين تستلمينه من اي مكان من الي ذكرتهم لج وطبعا هم بيخبرونج وين تستلمين او وين مطرشين الحواله او انتي سألي مافيها شي ترى
1. أنا كيف أعرف إذا المبلغ وصل ولا لا ؟
اذا عندج حساب في دبي الاسلامي بيوصلج مسج ان حد دخل لج المبلغ .... درهم الساعه الفلانيه .. بس ماعرف اذا من خارج الامارات يستوي بعد ولا لا
واذا حواله مرات الانصاري يطرشون مسج ومرات لا .. بس اذا عطوج كود الحواله تروحين بنفسج تستلمينها مابيخبرونج لو اتصلتي وعطيتيهم الكود
2. في واايد بنوك تتعامل بالربا و أنا ما أبغي أخلي فلوسي يدخل لها أي مال حرام ... علشان جي أبغيكم تنصحوني بأي بنك يكون الأفضل بالنسبة للتجارة و بدون ما يزيدون أو ينقصون من الفلوس في البنك ؟
ماعرف بس وايد عندهم حساب في دبي الاسلامي .. واعتقد انه احسن للي داخل الامارات لان لو بيحولون لج مبلغ مابيكون في رسوم تنحسب عليهم
3. بالنسبة للي يطلبون من الخاارج لو بغيت أطلب طلبية من الخارج من الصين أو كوريا أو أمريكا .. ألخ .. هل لازم أكون فاتحة حساب في بنك معين علشان أدفع الفلوس .. و كيف أستلم البضاعة و من وين ؟!
انا استخدم بطاقة الوالد بما ان ماعندي حساب اصلا ..المهم لازم يكون عندج فيزا .. او ماستر كارد .. ومب اي موقع تشترين منه !!! والحساب الي بتطلبين منه من الانترنت حطي فيه المبلغ الي تبين تدفعينه مب تحطين فلوسج كلها ويضيع تعبج كله اخر شي
لاتثقين في حد وتعطينه رقم حسابج .. لاتطلبين الا من المواقع المعروفه وقبل ما تطلبين دوري على الغرض الي بتطلبينه وشوفي سعره في المواقع قد ما تقدرين
وهم بيطرشونه لج على عنوانج يا بيوصلج على بريد الامارات ولا على امبوست وكلهم في نفس المبنى .. بيتصلون بج وبيخبرونج ان لج طرد ولازم تستلمينه من عندهم تروحين وعندج اثبات هويه عشان اجراءاتهم
اتمنى من كل قلبي اني افدتج ورديت على كل اسئلتج ولو تبين اي شي رقمي فالتوقيع ومايردج الا لسانج F: