// حياتي فاضيه ومافيها شي غيره .. //

مساء الخير خواتي شخباركم ؟
خواتي أني حابه أفضفض شوي ليكم ولله الحمد اني ماعندي مشكله بمعنى مشكله بس حابه اتكلم ..
أني حاسه إن حياتي ماليها معنى ولا فيها هدف غير زوجي ؟ او اللي اهو خطيبي وبصير زوجي بعد جم شهر انشالله
يعني حياتي كلها متمحوره عليه .. خلصت جامعه دبلوم لان تخصصي في الجامعه بس دبلوم وقررت اكمل بكالريوس في جامعه خاصه وانخطبت له وانا اخذ كورس الترينيغ ومن خلصت التدريب وهذي حالتي لا كملت دراسه ولا اشتغلت " اشتغلت في شركه شهر واحد وطلعوني تعاونت علي وحده هناك تمبي تجيب رفيقتها وطلعتني "
بنات مو هذا موضوعي .. اني مخطوبه يعني للحين ماتزوجنا بس يومي كله مع خطيبي او بالاحرى مبرمجه يومي كله عليه يعني على دوامه مو دايما اكون وياه بس تقريبا يعني وهذي مو مشكلة بس المشكله ان حياتي بدون دراسه ولا شغل ولا شي يشغلني عنه حاستنها ماليها معنى يعني كأني عايشه له بس وماعندي عالم غيره ..
عندي صديقات من ايام الجامعه بس نشوف بعض بين فترات بعيده بحكم انشغالنا كل وحده مه زوجها او خطيبها او منطقتها بعيده ..
ابي يكون عندي عالم غيره .. احس إني عايشه لنفسي مو عايشه وماشيه حياتي كلها له !!!
للعلم احنا نحب بعض بس هذي مو عيشه يعني مو مرتاحه جدي .. الحين بكمل السنه من خلصت جامعه وحاسه ان عقب الزواج بيزيد هالاحساس عندي ،
لاني مو متعوده اعيش جدي ولا هذا طموحي إني اكون ربه بيت فقط وما همي غير الزوج والبيت والاولاااد لاني متفوقه وما ارضى اعيش جدي بس ..
للعلم بنات اني صغيره يعني عمري 22 سنه وزوجي مايقدر يدرسني في جامعه خاصه لان اهو اساسا حتى حق تدريب السياقه ماعنده " اتدرب على حسابي " ..

كنت حابه افضفض بس وياريت تشورون عليي بخبرتكم في الحياه شسوي :)
أو قولوا ليي انتون شلون مقضيين حياتكم ؟ تشتغلون ؟تدرسون ؟؟ لو حياة مع زوجكم وبس ؟ وماتحسون ان حياتكم جدي مالها معنى ؟؟