السلام عليكم يا جماعه
= (
عندي سالفه محيره العايله كلها و ابغى اخذ رايكم عسى هالموضوع ينتهي
لي اخ عمره 23 سنه ,,
هالسالفه بدت يوم كان اول سنه جامعه وبنت عمي كانت باول ثانوي
الحين اثنيهم خلصوا دراسه ويشتغلون صار لهم مده
بنت عمي عمرها 20 او 21 مب متأكده
اخوي حبها ,, حبها وايد بس كان متكتم
خبرني اقولها وانا خبرتها ما صار بينهم مكالمات ولا اتصالات ابدا
ولا حتى مسجات تقولون حب عذري
لكنها لسبب ما كانت تتحراني اجذب عليها او الفت عليها قصه انه اخوي يحبها
وطرشت مسج على تلفونه ,,
فلان انته صدق مخبر دمعه انك تحبني ؟
وكتب لها هي ,,
من ذاك اليوم انقطعوا عن بعض
واعتبرها حركات ياهل لان هو اكبر عنهم بوايد
بتقولون وين المشكله المشكله يوم كنا طالعين البر
قبل 3 سنين كانوا الشباب حاطين تلفوناتهم بخيمه
و طالعين جوله بالبانشي
و هي من باب الفضول وادري مو من حقها لكن تعبثت بتلفون اخوي
واكتشفت انه يرمس بنات ..
وتمت تصيح وما قالت لي شي غير اني اقول حق اخوي انه اللي بينهم انتهى
انا بدوري خبرته عصب قال منو مفكره عمرها خل تولي ,,
بعد فتره بسيطه خبرتني ان ولد عمنا الثاني اصغر منها بسنه واكبر مني بسنتين
ماخذ رقمها من تلفون امها وانه يحبها و يدري انها كانت تحب اخوي قبل
العايله كلها تعرف من نظراتهم حق بعض
بس هو كان يبى يخبرها شعوره ومب مشكله اذا هي ما حبته بس ع الاقل ترمسه
قالت لي انها ما تبى تجرح شعوره ما تبى تحسسه بنفس الاحساس اللي حست فيه
فبعد سبع ايام بالضبط من يوم بدات ترمسه قالت له يا فلان انته اصغر عني
واعتبرك شرات اخويه مب اكثر بس انا ما بغيت اقولك من البدايه خفتك تنجرح
تمت يصيح ويترجها ترمسه بس هي ما طاعت طلب منها تراسله عبر المسجات
شرات الايام اللي طافت بعد ما طاعت
قال لها قبل لا يسكر انا بوريج
وسكر في ويها ذيج الساعه ما فهمت شو يقصد
بس الاخ طلع مسجل لها مكالمات , معنه كان نادر ما ترمس ف المكالمه
و المسجات
و اختار الفتره اللي اخوي قام يرمس امي فيها عسب تخطبها له والله يشهد انه ودر كل البنات عسبها
وقال لاخوي وراه المسجات و الله قال عليها كلام استحي اكتبه
بنت عمي انهارت نفسيا
واخوي كرهها وايد
والسالفه وصلت اخوانا الاكبار اللي احتقروها كلهم كيف كانت ترمس ولد عمنها وهو اصغر عنها بوايد صدق ما تستحي وصدق وصدق
طلعت عنها رمسه كبيره بالعايله بس ما وصل شي لابوها
لانهم يعرفون كيف راح يكون موفقه
////
قبل سنه بالضبط بنت عمي ملجت ع واحد من اهلنا
واخوي ما حضر ملجتها
كانت تصيح يوم ملجتها وانا كنت اقول لها هذا نصيبج لا تترين اخويه
اخويه ما يباج ادري كنت قاسيه بس حق مصلحتها
المهم ..تمت مالجه 6 شهور ما كانت مرتاحه ابدا
وكم مره وهي ترمس ريلها تغلط باسم اخوي
وهو لاحظ لكن ما يقول شي
لين قبل العرس باسبوعين قررت تطلق
قالت انها ما تقدر تعرس ما تقدر تنسى اخوي ..
وحرام تظلم خطيبها معاها
واطلقت الكل كان يسألها ليش كانت تقول مب مرتاحه ..
مب نصيبي
بعد ما اطلقت و فجأه جيه اخوي رمس امي انه يباها
امي عارضت بالبدايه ع الرمسه اللي طلعت بس يوم جافته مصر
رمست البنت بعد شهرين من يوم قال لها اخوي لانها كانت تستخير
والله يا جماعه عمري ما بنسى يوم امي خبرتها من العبره قامت تصيح
واستانست ونفسيتها تغيرت وايد
وامي عطتها فرصه تفكر زين وتستخير
و كانت بتخطبها رسمي لكن ابويه توفى = (
وتأجل الموضوع لين ما ابويه يكمل سنه
وهي بروحها قالت لين عمي يكمل سنه واشوي
لكن خالاتي لما دروا بالسالفه وخاصه حريم عمي
يحاولون يغيرون راي امي ويقولون هاي عندها سوابق
وكيف هو يرضى ياخذ وحده رمست ولد عمه لو باجر استوت ضرابه
بيعايره بها يقصدون ولد عمي بيعاير اخوي انه رمس حرمته
والله انه يحبها وايد
وهي تحبه
يمكن هي غلطت يوم عطته فرصه حق ولد عمنا بس كانت صغيره
ويشهد ربي انها يوم رمسته ما كانت تقول له شي غلط
امي بدأت شوي تتخوف وتحاول تنقع اخوي ما ياخذها
وتكرهه فيها قد ما تقدر
تخاف من الامور اللي بيترتب عليها هالزواج
بس اخوي ما بأذنه ماي
نحن عايله وايد محافظه
وهالامور ما عندنا رحمه فيها
يعني لو ابوها درى راح تنمسح من على ويه الارض
و اخاف في المستقبل لو استوت ضرابه مع بين اخوي وبينها
يعايرها
هالانسان جدا غاليه علي وما ابي لها الاذيه
بالنسبه لي مرات اقول حرام نحرمه من بعض
ومرات اقول صدق هي غلطت غلطه بتم طول العمر نقطه سوده في سجلها
ابغى رايكم في الموضوع والله يشهد ع كل كلمه قلتها فوق هاللي استوى