الربط والولادة المبكرة؟! ياريت تساعدوني

السلام عليكم

من فترة واني ابغي اسألكم, ياريت ما تخيبون ظني مثل ما تعودت اجوفكم في كل المواضيع

اني سويت عملية ربط عنق الرحم في بداية الخامس بسبب آلام طلق مبكر صادتني و هم يسوون العملية قالوا فيني لحمية زايدة في الرحم واستئصلوها في اثناء العملية..

بعدها بفترة صادني نزيف و ترقدت مرة ثانية وكان السبب من اللحمية ما التئم الجرح ...وطبعا ما سوو لي شي قالوا ما نقدر نسوي شي هو بروحه بيوقف

مع بداية الشهر السابع كان عندي افرازات وايد وكان ع بالي عادي قلت الكل يقول اتزيد الافرازات,, بس جفت نزل عليي دم ورحت المستشفى ولما فحصتني الدكتورة قالت انه هذا ماي ينزل وخلوني تحت الملاحظة لولادة مبكرة وعطوني ابرتين لرئة البيبي لو لا سمح الله وصار ولادة..

بعد هالفترة عدت ع خير والحمد لله ما ولدت قبل ,, بس يوم اترخص لآخر يوم اسألهم ليش ينزل دم.. يقولون ما ندري !

المشيمة وضعها اوكي ورحت لدكتورة ثانية اكدت اليي انه كل شي طبيعي بعد

الحين رد رجع الدم ينزل بس ع فترات ساعات يكون نقط دم وساعات خيوط دم وما ابغي اروح المستشفى احس اتمللت توني طالعة منه :'(
موعدي الاثنين الصبح,, انتظر لو تنصحوني اراجعهم؟ متاكدة و واثقة ما بيعرفون السبب ..

وسؤالي الثاني : لو لا سمح الله وكان اعراض ولادة مبكرة و اني مسوية ربط اشلون اتصرف في هالحالة؟ خايفة من هالموضوع :-#