ارجوكم...اللي عنده فكرة يقول لي

ا

ام نوراء 2005

عروس متألقة

06-07-2010 | 12:55 PM

بنات خواتي
بغيت منكم طلب...........اني راح ابني شقة في بيت عمي مكونه من غرفتين نوم و صالة و غرفة طعام ( يعني للقعدة ) و مطبخ و حمامين

الشقة شبه بارزة يعني ترميم بس في اشياء واجد ابغي اعدل فيها و ما ادري كم يكلفني الموضوع

اني بغيت اشرح ليكم شنو ابغي اسوي عشان لو بس اتقدرون معاي كم اتكلف ...اكيد اللي بنى او عدل يعرف

- راح اوسع الصالة و اخذ الطابق الثاني كله ( التعديل راح يكون اني اقدم الطوف و اسد باب غرفة عشان اطلعه بره الشقة ( الغرفة راح اتكون لبيت عمي ) )
- السقف راح ابدله لان السقف خشب و قديم
- الحمامين راح اعدلهم لان القاشي قديم و بعضه متكسر
- راح افتح لي من التهوية حق المطبخ و المطبخ راح يكون مفتوح على غرفة الطعام
- غرفة الطعام بفتحها على الصالة بس راح احط باب جرار
- الارضية متحيرة بين السيراميك المطفي او الباركيه
- الغرفتين مجرد بيتغير الحمام و بحط الارضية و بصبغ
- الصالة و غرفة الطعام راح يكون نفس الشي صبغ و ارضية
- المطبخ كامل ببتدي فيه من جديد ( بس راح ابني جدار طوفه وحده ليه و افتح اللجهة اللي تطل على داخل الشقة عشان يصير مفتوح و طبعا الكبتات و هالسوالف )
ياريت اتخبروني يعني كم راح يكلفني هالموضوع ( اني على المدى البعيد راح اشتري لي ارض و ابنيها لكن مو اقل من بعد 7 سنوات و اني اوردي صار لي 5 سنوات من تزوجت )

ياريت اتقدرون لي فقط ....و الله يعطيكم العافية

C

Cherry_On_Top

عروس مشرقة

06-07-2010 | 05:26 PM

مع التعديلات اللي ذكرتيها احس كأنكم راح تبنون من اول وجديد
احنا شقتنا صغنووووووووونة يعني بس غرفة نوم وصالة ومطبخ مفتوحين على بعض وغرفة صغيييييييرة حق اللوندري (الغسيل) وحمام ودرج
كلفتنا 8000 دينار (شقتي كلها سراميك مطفي )
وانا عايشة فيها مؤقت بس ... صار لي سنتين تقريبا فيها وكلها جم شهر وبننتقل شقة اكبر ان شاء الله ( 3 غرف نوم و 3 حمامات وصالة كبيرة ومطبخ كبير وغرفة شغالة صغيرة و2 بلكونات وحدة بالمطبخ والثانية بالصالة )

اتوقع مع الاشياء اللي بتسوونها تحتاجون مبلغ اكبر

والله يوفقكم

ا

ام نوراء 2005

عروس متألقة

07-07-2010 | 07:26 AM

مشكورة حبابة ما قصرتين اني حاطة ميزانية 6000 دينار

بعد يبغي لي اسأل لان ناس بعد مثل ما قلتين قالو لي بتكلفش
و من ظمنهم قالو لي مو واجد ما بتكلفش اكثر من 4500 دينار

لاني اني صح بقعد فيها مدة بس حرام اخسر عليها 10000 دينار و بعدين بطلع منها ( ويش يرد يجمعها مرة ثانية )

الحين السقف قالو لينا ان مجرد جبس بينحط مو لازم رديمكس

الباب اللي بشيله تبع الصالة عشان اوسعها اهو باب صاير المنيوم و الجهة كلها المنيوم يعني مو باب و جدار طابوق يعني هذا مجرد انه بنشيله ما بنهدمه

غرفة الطعام بفتحها على الصالة لكن مجرد ان بشيل الباب اللي مابين الصالة و هادي الغرفة يعني ما بكسر شي

غرفة بنتي بس راح اعدل الارضية و الحمام

غرفتي بس لاصبغ لان الارضية سيراميك من قبل

الصالة راح اتكون بعد ارضية و صبغ وياها غرفة الطعام

ش

شمسه الشموس

عروس مبدعة

07-07-2010 | 10:50 PM

الميزانيه اللى حطيتينها بتكفيش

بس لازم قبل ما تبتدين في الشقه تعرفين من المقاول كم بسويها ليش من البدايه
اذا جبتين واحد و بس بزيد عليش المبلغ طبعا انا صرات عندي مشكله من البدايه كنا متفقين على سعر و زاد وايدوايد
و السقف ياخذ ميزانيه
و اختاري اشياء مو غاليه ترى مو كل غالي حليو في اشياء رخيصه حليو و دوم

مثلا الباركيه وايد غالي استغني عنه
شوفي سيراميك احسن و في اسعار في منه غالي و في رخيص
و تقدرين اتحطين موكيت مو لازم سيراميك و توفرين اكثر و يطلع حليو و انطف

و المطبخ مو تسوين في المحلات الغاليه ب 1000 و فوق في محلات اتسوي ليش بنص المبلغ مثل الراشد وانا سويت مطبخي فيه و سيدتي و عفيفي هذه المطابخ نفس المستوى و مستواهم وايد زين
و ما اييد اتسوين في الشعبي لان سعرهم ما يفرق وايد عن هذه المحلات انا لم رحت اشوف يطلع لي فرق 100 او 150 و شوي و مو بنفس الجوده

و الله يوفقش

ه

هـذيـان

عروس ماسية

08-07-2010 | 03:43 AM

تعديلات البناء جيبي لش هندي فري فيزة احسن من مقاول وخبريه شنو تبين تسوين وبيعطيش التسعيرة .. ويُفضل تسألين اكثر من هندي .. واختاري الانسب لميزانيتكم

القاشي افتري محلات السيراميك ( عندش محلات في سترة + سوق واقف + النعيم )

والصبغ اتفقي مع محل او هندي يصبغ لكم .. بس اذا هندي ارخص بواجد

اذا تبين محلات راسليني عالخاص وبعطيش .. لان تونا مخلصين من هالسوالف فـ نوعا ما عندي خبرة :o