قصة ولادتي .. يارب لكـ، الحمد

السلام عليكم ورحمة الله وبركاته

اللهم صلي على محمد وآل محمد

اللهم لك الحمد حتى ترضى ولك الحمد اذا رضيت ولك الحمد على الرضا

بالبدايه بقول لكم أني ولدت قيصري والحمدلله . وماكنت خايفه ولا كنت افكر الا يوم قربت العمليه . بس قبل كان عندي شعور سبحان الله اني مرتاحه وماني متظايقه انه ولادتي بتكون عمليه .
ربي عطاني نعمه . ووهبني صحه جسم ياسبحان الله . مع انه كانت ولادتي شبه خطرهـ، خصوصا انه الهيموجلوبين عندي ( 7 ) تخيلو . يعني براحه يجيني نزيف . واحتاج دم مو اقل من كيسين واذا مو اكثر ..

كنت دايم اقرا قرآن واستغفر واحس براحه . عجيبه .

قصتي

انا حملت من زواجي بشهر . ماشاء الله تبارك الرحمن . . الحمدلله رب العالمين . طبعا الكل عارف الوحم وسوالفه . بعد ماخلص الوحم الحمدلله بديت اكل شوي شوي . اما بداية حملي ماكنت اكل لين صار عندي فقر دم حمل .مع قرب الرابع رحت موعدي وهنا المفاجئه لي مو جنس الجنين لا .. ان المشيمه تحت . نازله بالمره . من انغراسها . الحمدلله . اهم شي الجنين بخير وصحه .
مع بداية الشهر السادس صرت احس بالم مو طبيعي لمن امشي . وبعدها بكم يوم من السادس جاني نزيف . وتنومت بالمستشفى كم يوم وطلعت الحمدلله .. وبعد طلعتي كنت مرتاحه طبعا ببيت اهلي . واهلي مو مقصرين معاي ربي يعطيهم العافيه . ماسوي شي غير اني مرتاحه . بس سبحان الله بعد اسبوع من طلعتي . الله يكرمكم دخلت الحمام على صلاة الفجر . عشان اصلي . الا شوي احس بشي دافي ينزل اطالع الا دم . كني فاتحه حنفيه .
انا انفجعت صراحه قمت انادي اختي وهي بعد انفجعت وانا اقول لها جيبي جوالي عشان بدق على زوجي ..وهي مفهيه وتطالع بالدم . :woo:
دقيت ورحنا وطبعا نزيف ثاني ونوموني . وظليت بغرفه الولاده 12 ساعه تقريبا . وقالو لي اذا ماوقف النزيف ولاده قيصريه . بس الحمدلله . وقف وطلعوني لغرفتي . وبعد كم يوم طلعت .
مر الشهر 7و8و9 بخير . الحمدلله .
قررت الدكتوره العمليه بالاسبوع 37 من حملي . بس بعدها تأجلت لاني زكمت وحددت لي اسبوع 38 .
يوم السبت كانت العمليه . لليلة السبت رحت وقعدت بغرفتي . ولاجاني نوم ولاغمضت عيوني . حتى اهلي مانامو ولازوجي . كان يفكر وخايف بالمره .
حطو علي التخطيط وكان عندي طلق خفيف يوصل لـ 30 وينزل .جت الساعه 6 وجهزوني من لبس شرابات عشان العمليه ولبسوني لبس المجانين الي مفتوح من كل جهه ووادي :worn_out:
المهم . دقيت على زوجي وقلت له يالله تعال لانهم قدمو وبيدخلوني الساعه 8 العمليات . مسكين غسل بس وجا بدون فطور بدون شي . وصل عندي الساعه 8 قبل لايدخلوني بكم دقيقه . طلعت الممرضه عشان ناخذ راحتنا . هنا بدا الفلم وانا عارفه انه حالتي شبه خطرهـ، قلت له ان صار لي شي ولدي امانه .وتحمل فيه زين . وسكتني ولاكملت كلامي .وانا الدموع بعيوني ومشجعه نفسي .
طلعوني من غرفتي لغرفة العمليات . حطو لي القسطرهـ، هي تعور شوي وتظايق بالبدايه بس بعدين يشيلونها .
دخلت غرفة العمليات . برررررررررررررررررد اسكيمو .. القطب الجنوبي . وانا ارجف من الخوف ومن البرد . دكتورة التخدير تحاول فيني . تقولي نصفي وانا اقول كامل .
حطو لي اوكسجين يدوخ شوي يخلي الوحده ه هههههههههههه
تقولي دايخه وانا اقول لها لا هذا المخدر . هههههههههههههه
جت الدكتوره الي راح تسوي لي العمليه . شفتها تلبس قفازاتها وهي تقولي يالله بسم الله وتوكلنا على الله وانا هزيت راسي وتوكلت على الله درت وجهي ماحسيت بالدنيا .

طلعت الدكتورهـ، لزوجي برا تركض وفرحانه . زوجي اخترع يفكر صار فيني شي والدكتوره فرحانه . وهي تقوله ما احتاجت دم صار الهيموجلوبين 16 . سبحان الله يارب لك الحمد .كنها معجزه ولارحمه من رب العالمين لي . انا عبدة ربي ماكنت ابغى الا اشوف ولدي سالم من كل شر ويجي سليم . شوفو رحمة ربي بعبيده بآخر لحظه انقلب كل شي مع انه اصحاب زوجي تجهزو وجو تبرعو لي وماقصرو . ربي يعطيهم على قد نياتهم
لاتيئسو من رحمه الله . ربي رحمة واسعه .واذا دعيتي الله من قلب خاشع ربي يستجيب .

ولدت الساعه 8: 44 دقيقه وجبت ولد الحمدلله وسميتة علي عشان كان يوم المولد .

بعد العمليه صحيت على الم مو طبيعي . ولااقدر احرك شي بجسمي . وانا اقول لهم الم وبرد هذا الي علقت بلساني ههههههههههه

طبعا المسكن مايعطونك ياه الا اذا صحصحتي عدل . عطوني المسكن وانا ارجف من البرد وضروسي اتصافق بقوه .
ودوني غرفة الافاقه ونادو زوجي . وانا مخرفه اقولها ابي اشوف ولدي وهو يروح يقولهم ويقولون له بعدين . وانا اهلوس من البنج شوي والبرد والالم . وبعدين ودوني غرفتي وصحصحت عدل . وجابو لي ولدي ماشاء الله قمر .
حسيت اني ابي اصيح وانا اضحك احساس مختلط ربي لايحرم كل من هو محروم هالاحساس وربي يرزق كل محروم الذريه الصالحه البارة يارب العالمين .

ولدت بمستشفى المانع الدمام . الدكتوره صبيحه هشام .
المستشفى من ناحية المعامله ممتاز والنظافه والاكل وكل شي صراحه