افكر في الانفصال2

السلام عليكم ورحمة الله وبركاته ...
من اسبوع تقريبا كتبت مشكلتي و اني افكر في الانفصال عن زوجي ... وفعلا قبل ما اخذ فرصة واقرا ردودكم حصلت مشكلة ثانية واخذ مني ولدي وجوازات السفر وطلع من البيت ...
قمت رحت لبست وركضت وراهم ما حصلتهم ...اميم اركض في الشوارع ادور على ولدي اللي عمره 6 شهور وبعد ساعة رجعوا البيت وما رضى يعطيني اياه بعدها فعلا حسيت الموضوع وصل الحد واتصلت بابوي ورحت بيت اهلي وبعدمحاولات كثيرة رضى ان هو يعطيني الولد
المهم تاني يوم جا رجعني البيت وقال لي انه رجعني عشان الولد وانا اصلا لو ما ابوي قال لي ارجعي بيتك ما كنت رجعت
من يومها وانا احاول افهم مشكلة زوجي
عرفت ان هو الشي اللي مغيره مني حسب كلامه اني خليت اهلي يتدخلون بينا ... بس بصراحة انا شكيت في الموضوع لان المشاكل بدات من قبلها ... بالذات من ما ولدت ولدي وقعدت افكر في الشي اللي اتغير ...
تذكرت شي انا لين الحين مصدومة اني اصلا فكرت فيه
انا ولدي والحمدلله مولود بثقب في القلب والثقب مقداره 1 ملم والحمدلله انا عارفة ان هذا الشي بقدره رب العالمين وان حجم الثقب ما ياثر على صحته او حياته واعرف ناس متزوجين عندهم ثقب بس هذا مو ذنبي الله سبحانه وتعالى اختار هذا الشي وهو عيب خلقي ما عنده سبب ....
اتصلت فيه وسالته انت حاسس ان انا السبب قال لي ما اعرف
وانا عارفة ان هو اذا يبي يقول لاء يقول لاء واذا يبي يقول ايوا بس بطريقة غير مباشرة يقول ما اعرف
سبحان الله
انا بصراحة اذا هو حاسس اني السبب ما بناقشه في الموضوع بخلي الطبيب يشرح له المشكلة كلها
بس اذا السبب ان هو زعلان اني شكيت لاهلي انا شايفة ان معاي حق الجأ لهم لما اوصل لمرحلة صعبة
المهم انا فكرت جدا في موضوع الانفصال وقررت اني استحمل شوي عشان ولدي لان هو يحس لما نحنا نتهاوش ويبكي بشدة و احاول اكسب زوجي للمرة الاخيرة من غير ما افرط في حقوقي
بس كيف الله اعلم ... وهل هو بيتغير ولا خلاص ... المهم اشكركم كلكم على ردودكم لي ومشورتكم القيمة و ما تحرموني من اراءكم
واذا ممكن تقولو لي اعطي زوجي فرصة وابعد عنه ولا اقرب منه واخليه دايما حولي والله يهديني ويهديه ويهدينا كلنا