جبت لكم اليوم أكلة إيطالية لذيذة
"نيوكي"
و هي نوع من أنواع الباستا و طريقتها التقليدية تكون بالبطاطس...
و طريقة تقديمها تكون إما بالصلصة البيضا، يعني كريمة أو جبن... أو بالصلصة الحمرا...
و هنا سويتها بكور اللحم و الصلصة الحمرا...
نبدأ بسم الله...
لعجينة الباستا بنحتاج:
(الكمية تكفي 3 أشخاص)
حبة بطاطس متوسطة، مقشرة و مقطعة مكعبات
بيضة
2 كوب طحين
2 ملعقة كبيرة جبنة بارميزان مبشورة
نحط البطاطس في قدر و نغمره بماي فاتر، بعدين نرفعه عالنار و نغليه لحد ما يستوي
بعد ما يستوي نهرسه، و لازم يكون ناعم و بدون كتل...
فنحطه في مشخال و نهرسه بالملعقة عشان يطلع من الفتحات بدون تكتلات...
الحين نضيف له البيضة و الجبن و نصف مقدار الطحين و نعجن...
نضيف باقي مقدار الطحين بالتدريج لحد ما نحصل على عجينة متماسكة و ما تلزق باليد و إذا احتجتوا طحين زيادة، زيدوا...
نغطي العجينة و نخليها ترتاح شوي...
في هالوقت نجهز كور اللحم:
كوب لحم مفروم
بصلة صغيرة مفرومة
فص ثوم مفروم
بقدونس مفروم
ملح
فلفل أسود
نخلط المقادير مع بعض و نشكلها كور صغيرة، و نقليها بشوية زيت على نار حامية لين تتحمر من كل الجوانب....
و نجهز الصلصة الحمرا:
زيت زيتون
بصلة متوسطة مفرومة
فص ثوم مفروم
ورقة غار
حبتين طماط مقشرين و مطحونين مع ملعقتين كبار معجون طماط
نص كوب ماء
ملح
فلفل أسود
ريحان ناشف
نحمر البصل و الثوم بشوي زيت زيتون مع ورق الغار...
بعدين نضيف لهم الطماط المطحون و الماء و البهارات
و أول ما تغلي، نضيف كور اللحم و نخفف الحرارة و نغطيها... خلوها تغلي على نار هادية لحد ما تصير صلصة ثقيلة!
الحين نرجع لعجينتنا...
أول شي نجهز قدر كبير فيه ماء، و نرفعه عالنار و نخليه يغلي...
في نفس الوقت، نحط جنبنا الطحين و شوكة و سكين أو قطاعة رول و صينية كبيرة نرشها بالطحين ...
ناخذ مقدار كورة صغيرة من العجينة و نرقها باليد عالكاونتر بحيث يصير عندنا شكل إسطواني طويل بعرض الإصبع تقريباً، و نقطعها بالسكين أو القطاعة لقطع صغيرة بطول إنش أو أصغر شوي...
الحين ناخذ القطع وحدة وحدة و نضغطهم على الشوكة بعد ما نرش عليها الطحين عشان ما يلزق عليها العجين...
و الغرض من هذي الحركة، إننا نسوي حزوز في قطع العجين...
و في قطعة خشب مستطيلة، تجي محززة و جاهزة و تستخدم لهذا الغرض بدال الشوكة...
و هذا شكلها...
طبعاً لما نضغط لازم يكون شكلها ملتف و تجي كأنها مفتوحة من الوسط...
و هذي مجموعة خلصت :)
و كل ما نخلص من مجموعة نحطهم في الصينية اللي جهزناها، و لما نخلص من المقدار كله، نبدا نسقطهم في الماي المغلي، طبعاً على دفعات... و نخليها تغلي تقريباً دقيقتين لحد ما ترتفع قطع العجين على سطح الماي...
و نرفعهم بمغرفة و نصفي عنهم الماء زين، و نحطهم في صحن التقديم، و نكمل مع الدفعات الثانية بنفس الطريقة...
في الأخير نغرف الصلصة الحمرا و كور اللحم اللي جهزناها فوق النيوكي و نرشها بجبنة البارميزان...
و هذا شكلها النهائي!
طعمها جداً لذيذ، جربوها ;)
و بالعافية مقدماً F:
