قصـة ولادتـي المبكـرة بفرحـة عمري بـعد طـول انتظـار

بسم الله الرحمن الرحيم

اغلبكم يعرف معاناتي مع الاجهاضات المتكرره ومشاكلي في حملي هذا لكن الحمد لله ربي عوض صبري وصبر زوجي خير بعد ثلاث سنوات ونص زواج ربي رزقني بتاريخ20/6/2010م بنور عيني وفرحة عمري ولدي (خالد) الله يشفيه ويحفظه ويخليه لنا يارب...
طبعا انا ولدت ولاده مبكره في الاسبوع 26 وجم يوم على حساب الدوره والاسبوع 27 تقريبا على حساب السونار والمفروض موعد ولادتي بتاريخ 25/9/2010م لكن قدر الله وماشاء فعل والحمد لله على كل حال..
عموما دكتورتي كانت متوقعه اني اولد ولاده مبكره لان كانت اتيني تقلصات قويه من الشهر الثالث وبعدها في نهاية الاسبوع 19 تقريبا صار عندي ثقب في كيس الجنين وانفتح عندي عنق الرحم وصادني بداية طلق وترقدت فتره والحمد لله الرجم رجع سكر ووقفو الطلق لكن للأسف ما التام الثقب بس الحمد لله ان ما اثر على الياهل او صار تسمم او اي شي من هالقبيل ومن دخلت الاسبوع 24 خذييت جرعتيين كورتيزون(ابرة الرئه) وطبعا هلابره كل الدكاتره ينصحون فيها لو كان متوقع ان الوحده تولد ولاده مبكره وعلى الرغم من كل ذي وعلى الرغم من خوفي من الولاده المبكره او اني اخسر حملي لا سمح الله إلا اني كلش ما توقعت اني صج راح اولد ولاده مبكره لهدرجه لكن ما اقول غير الحمد لله على كل حال...

المهم انيي حق احداث ولادتي بتاريخ 18/6/2010م كنت احس بالم وضغط من تحت لدرجه ما اقدر اوقف او اقعد او انبطح احس مو عارفه شنو اسوي في عمري عشان يخف علي الالم قلت بصبر اللحين و لو ماخف علي لي بكره راح اروح المستشفى وما خبرت احد باللي احس فيه لا اهلي ولازوجي وزوجي كان حاس ان فيني شي بس كل ما يسالني اشفييج كنت احاول اخبي عليه واخلي نفسي عاديه خصوصا انه كان المفروض يسافر عقب جم يوم فما ابيه يحاتيني او يخاف علي واهو في الغربه ... المهم تاريخ 19/6/2010م حسيت الالم للحين مستمر ايني بفتره متقطعه بس للحين ماراح بس بعد تصبرت على الالم وحاولت ما ابين شي لزوجي واهو كان حاس مسكين ويحن علي نروح المستشفى بس قلت بصبر لان لاعت جبدي من المستشفيات وتوقعت ان الالم راح يخف ويروح مع الوقت لين صارت الساعه تقريبا 10 ونص بالليل حسيت الالم وصل حده دخلت الحمام _وانتو بكرامه_نزل مني ماي وافرازات لونها وردي مت من الخوف مايي في بالي ولاده بس خفت ان الماي قاعد ينزل بسبب الثقب وان باثر على الياهل او بصير له شي لا سمح الله واستمر نزول الماي انا اهنيي قعدت اصييح وانادي على زوجي ياني مسكيين متخرع ولما شافني جذي قالي يله خل نروح المستشفى وانا المتفرغه اقوله لا بتسبح وبرتاح اول عقب بنروح خخخخ المهم طنش كلامي وطرنا على المستشفى السلمانيه مع اني اتابع في العسكري بس رحنا السلمانيه لانه اقرب لنا وصلنا على الساعه 11 ألا تقريبا وانا كله في بالي مو ولاده بس خايفه من سالفه الماي وريلي مثلي بس عقب ما صج ولدت قام يشلخ علي يقولي اصلا كنت حاس ان ولاده خخخخخخ المهم طول الطريج في السياره كانت اتيني الطلقه اتم اصارخ واصييح وزوجي متدوده يقولي لا تصارخيين تنفسي وذكري الله واقري قرآن استغفر الله حزتها احس مو قادره افكر او اقول شي من الالم وعقب جم دقيقه يختفي ولا كان فيني شي لكن كنت احس ان السيت وثيابي يسبحون من الماي رغم اني حطييت فوطه صحيه لكن وجودها مثل عدمه لان اصلا كيس الماي خلاص انفجر وانا كله عبالي ان هالماي بسبب الثقب المهم تمينا على هالحال طول الطريج انا اصارخ واصييح كل مااتيني الطلقه وريلي يحاول يهديني وشغل قرآن عشان اهدا لكن من الالم ماكنت احس بروحي ولا ادري في زوجي شقول اصلا المهم اول ما وصلنا المستشفى زوجي سيده راح ركيض اييب لي ويل جير ودخلنا الطوارئ للنساء والولاده دخلوني الحجره وقالو لزوجي ينتظر بره وفي هالوقت زوجي اتصل باهلي عشان ايون اول مادخلوني الحجره قالت لي بتفحصني مافحصتني إلا تقولي مفتوحه 4 سانتي خلاص ولاده:confused:انا جذي صرت طللع طول هالفتره فيني طلق ومتوسعه وانا ما ادري بالدنيا المهم بدلو ثيابي بسرعه وركبوني فوق في غرفة المخاض وزوجي طول هالفتره ينطر بره على اعصابه عباله انا للحين في سرير الطوارئ ما قالو له يوم يركبوني فوق المهم يوم شافني طولت دش يسال الممرضات إلا يقولون له فلانه فوق خلاص ولاده وعطوه جيسه فيها ثيابي واغراضي ومسكيين من الصدمه ماكان عارف شسوي يوم ركب لهم فوق اهو واهلي سالو الممرضات عني تقول الممرضه اللي فوق لا فلانه بس يجيكون شنو سالفه نزول الماء مو ولاده اهلي وزوجي بطلو عينهم شلون مو ولاده وموديني جناح المخاض طلعو يقولون جذي عشان ما يعورون راسهم كل شوي يسالون ولدت او لا ويحنون عليهم المهم انا في هالفتره دخلوني غرفة العمليات وعلى حظي اللي يولد كان دكتور بس حزتها لا كنت حاسه بفشيله ولا شي بس ابي يخف عني الالم المهم قالي فلانه انتي لازم عمليه لان الياهل راسه فوق انا بس ابي افتك من الالم اقوله عمليه عمليه مو مشكله يوم جيكو وضع الياهل جافو خلاص نزل في منطقه الحوض يعني ما ينفع يسوون لي عمليه ناده الدكتوره اللي على الكول وشكلها فقيره كانت راقده بس الشهاده لله كانو قمة الذوق والطيبه معاي وطبعا سرير الولاده كان ماساوي تحسينه نص سرير مو سرير كامل وهذيي اللي يحطون عليها الريل شي ماساوي احس ريلي قصيره مو راضيه تثبت عليها خخخخ المهم عطوني ابرة البنج تحت وبدأ يشق وقالو لي ابدأ ادفع وطبعا ما كنت عارفه شلون ادفع اصلا قالو لي كانج داشه حمام وانتو بكرامه:oحاولت اسوي اللي يقولون لي عليه والدكتوره تدلك بطني وتهديني لين ما نزل وشرف خلودي الساعه 12 و22 دقيقه بالليل و لو لاحظو ان تمييت بس ساعه وشي تقريبا يعني لو تاخرت اكثرجان يمكن ولدت في البيت لان اصلا فيني الطلق من جم يوم وانا ولا ادري بالدنيا المهم عقب الدكتورةتمت تدلك بطني وتمسح عليه لين ما نزلت المشيمه وانا اقولهم شنو يبت يقولي الدكتور بنت عقب يقول اقصد ولد احسه كان متدوده لان الياهل مسكيين نزل من ريله ووزنه كان 760 جرام بس وسيده كان واقف دكتور اطفال بنفس العرفه وعلى طول خذو ولدي ماصار لي جانس حتى اشوفه بدأو يخيطوني عقب يات القابله ونظفتني ما اشوفها إلا رجعت تخيط بس حزتها من الالم ماقدرت اسالها شتسوي عقب قالت لي خطيتج لان بعد تحتاجيين غرز زياده خيطوني بثمان غرز صج عذاب هالخياط للحين اعاني منه استغفر الله المهم عقب ودوني غرفة بنفس القسم مال المخاض اللي يقعدون فيهم الامهات عقب الولاده عشان يطمنون ان كل شي اوكي قبل لا يودونهم الجناح وبعدها خبرو زوجي واهلي ودخلو لي واهم يصيحون وانا اصييح كنت منتظره لحظه اني اضم البيبي اول ما اولد وهالشي وايد اثر فيني ان ما قدرت اعيش هاللحظه حتى ماشفت شكله بس الحمد لله على كل حال عقبها ودوني الجناح وكنت احس كل جسمي يالمني خصوصا بطني وحوضي احسه متكسر علي قالو لزوجي اييب لي شي اكله راح مسكيين يشتري لي وعقب ماياب الاكل طردوه اهو واهلي وراحو البيت وودوني انا الجناح حزتها حسيت روحي في حلم مو كانه صج وكنت مشتاقه اشوف ولدي اول مايات الساعه 6 الصبح وصل زوجي ورحنا نشوف ولدنا وكانت لحظه ما اقدر اوصفها دموعي تنزل اللحين وانا اذكر حسيت معاناة هالسنين وتعبي كله راح يوم شفته والله يتمم فرحتي بان الله يشفيه ويكبر ويطلعونه من العناية وايي ينور بيته واضمه في صدري ما اخليه ولا لحظه...

اما عن حالة ولدي حاليا مستقره بس للحين على اجهزة التنفس مع اني ماخذه ابرة الرئة وطبعا ما اقدر ارضعه ولا يقدرون يرضعونه صناعي بس عن طريق الانبوب وو وزنه وايد قليل بس الحمد لله حاليا قاعد يزييد لكن احتاج كذا مره نقل دم لان دمه وايد قاصر وفوق ذي صادته بو صفار وصل نسبته 23 بس الحمد لله اللحين رد نزل لي 10 دعواتكم حبايبي ان الله يشفيه ويعافيه ويرجع لحضني وحضن ابوه باقرب وقت يالله ياكريييم...



ادري وايد طولت عليكم في القصه بس حبييت تعيشون وياي تفاصيل ولادتي خصوصا ان بنات وايد على طول مساكيين يطرشون لي رسائل خاصه عشان يطمنون على وضعي ووضع الجنين وما يدرون اني ولدت حاليا بفضل رب العالميين والله يحفظ لي ولدي ويخليه ويشفيه ويعافيه...