يمه تكفين اسمعيني !!!

السلام عليكم ورحمة الله وبركاته ..

بصراحة انا متابعتنكم من زمان و اليوم قررت اني اسجل فالمنتدى .. عشان آخذ نصايحكن في شي ودي اقوله و متعبني وااااااايد .. أبا فزعتكن يا بنااات .. و انا اشهد انكن ما بتقصرن معايه .
انا بنيه عمري 19 سنه .. خلصت سنه اولى فالجامعه .. وانا البكر والبنت الوحيده و عندي 5 اخوان .

مشكلتي ويا اقرب الناس لي ,, امي .. اللي هي ضيا دنيتي ربتني من كنت صغيره وعلمتني الصح من الغلط والحمد لله استمرت حياتي وانا في نظرها الافضل.. من تربيتها غديت من المتفوقات في كل سنواتي الدراسيه , وكانت دووم تستانس علي اني رفعت راسها بس للأسف .. احس في حاجز بيني وبينها من ناحية الحوار واخاف منها واااايد فوووق ما تصورون مع انها تسوي عمرها قريبه مني بس مااعرف ليش احساسي غدى صوبها شرات ( الفوبيا ) .

السالفه ومافيها انه يوم كان عمري 13 سنه .. بدت مشاعري تتحرك تجاه فتى يقربلي (ولد عم ابوي ) ... بدأ اعجابي فيه من ايام زواج خالتي من اخوه الكبير وحسيت انه هو يحبني يعني شعور متبادل من دون لا حد فينا يقول للثاني .. قلت يمكن يكوون حب مراهقه .. و سوييت للموضوع طاف .. و حاولت اتناساه لانه ماكنت اعرف شي و كنت ياهل .. مع الايام و السنين حسيت انه له شي بداخلي اكبر من انه شخص عادي ..يعني يوم يطرونه احس باهتمام غريب تجاهه .. اخباره و علوومه .. رغم هذا كله كنت اقوول فخاطري .. انا ما احبه ... شو هالمصخره .. انا عندي اهتمامات اخرى احسن من هالكلام الفاضي .. و بعدين فجأأأأه . حسيت ان امي ما تدانيه و لا تداني اهله .. و خاصة امه .. يمكن عشانها تشوف كيف خالتي تتعب احيانا من عمتها .. لانها انسانه واايد تغار على عيالها و تعامل خالتي باسلوب استفزازي .. تعرفون كيف العمات فهالزمن .. نادرا ما ينلقى وحده طيبه مع حريم عيالها !

كبرت و كبر هالشعور .. و اكتشفت اني بالفعل احبه .. و واثقه 100% انه يحبني و يباني ع سنة الله و رسوله .. حتى انه كلم اخوالي و خبرهم .. و هم حاولوا يجسو النبض عند امي .. و يشوفو رايها فالولد.. بس هي كانت دوم تقول لا مستحيل .. الا فلان .. نجوم السما اقرب له .. مب عشانه هو .. بس عشان امه !!

امي قرت مذكراتي .. وكشفت اني احبه .. ومايت تحاورني باسلوب .. طارت فيني و روعتني وتمت تهاوش وتصارخ كني سويت شي حرام وانا لا كلمته ولا تواصلت معاه بسس مجرد اني كنت اكتب واصور شعووري في اوراق .. ومن هاليوم خلاص قمت احس برعب صوبها لأنها تربط اي شي فسالفة فلان ..مثلا اذا ما كان لي نفس آكل تقول حب فلان ولا اذا طحت مريضه تقول من فلان واذا كنت قاعده برووحي تطالعني بنظرات كنها تقولي انتي تفكرين ففلان صح ؟؟ رغم انه والله ني كنت متانسيتنه وعايشه حياتي بسس من تقولي فلان تنكد علي.. كيف تباني انساه وهي تربط كل شي فيه .. كيف .. علمووني ! تخيلوا حتى مره دخلت علي الحجره وانا قاعده ادرس لأمتحان .. صفقت الباب ودخلت كنها بتضربني قاااااالت لي بصوت عالي شووو مانسيتيه هااه ؟؟؟ قلتلها منوو ؟؟ قالت فلان ,, لا وبعدج تسوين عمرج بريئه و نسيتيه .. وتصارخ وتهاد وتقولي فلان فيه وفيه وفيه بلاووي الدنيا .. وهو حرام والله مافيه شيي .. غير انه امه شوي ماعندها اسلوب ..ووصلت لدرجة نها قالتلي انسيه والا تراني بخبر ابوج انج تحبينه .. من يومها قمت احس بخوف منها.. اتجنبها والله خايفه منها ابدن ماقمت احس بحنانها احس انها وحش يرعبني ومايخليني في حالي .. دووم تعق علي نغزات بس اسوي عمري مااسمع اقوول مهما يكون هذي امي نورعيني اللي اشوف بها .. والله احبها !!

واستمرت الايام وبدت خالتي وامي يحاولن يكرهني فيه بطريقه غير مباشره يتكلمن عن فلان بسوء ويقولن نه راعي بنات وانه صايع واشياء تشيب الراسسسسس كلها كذب في كذب واتكشفت من يومين انه خالتي بنفسها قالت لبنت عمي ياويلي من ربي كم تبليت ع فلان وقلت اشياء من راسي عشان أكره فلانه فيه .. انا عرفت من اخوالي انه انسان محترم وماعليه رمسه .. الولد يبا يتقدم بس المشكله متردد لأنه يسمع من كل حد انه امي مستحيل توافق عليه وهو مايبا يفشل اهله لأنهم منا وفينا .. واللي صدمني اني سمعت من خالتي انها تقول انه امي اتفقت ويا ابوي لو تقدملي فلان بيقولون له حنا عطينا حد كلمه .. يعني يبون يردونه حتى من دون ما ياخذون رايي .. انا متأكدة انه امي اقتعت ابووي انه هالولد هب زين .. و زودت بهارات من عندها ..انا هب مقتنعه شو سبب الرفض عشان امه بس !! امه هب مشكله بأسلوبي اقدر اكسبها مثل ما امي كسبت يدتي اللي اسلوبها يشبه اسلوب ام فلان .. الولد يشتغل ومتعلم ومعتمد ع نفسه ..!!

الصراحه انا تعبت نفسيا المشكله انه امي ماتتفاهم ابد ودوم تصكرها فويهي .. حاولت اكلم خالاتي بسس للأسف خيبن ظني كنت اباهن عون سارن وخبرن امي بكل اللي قلته لهن ... تعبت والله تعبت .. بليز شورن عليه كييف اتفاهم ويا امي والله ني ابا رضاها عليه .. بليزززز ساعدني دخيلكن :'(:'(

ارقبكن :)