مشكلتي ما أظن ليها حل..اللي عايشين في بيت عمهم يساعدوني

السلام عليكم

بنات سبق وكتبت لكم مشكلتي مع أهل زوجي


أكتب لكم بعضوية غير عضويتي الأصلية


بنات أعااااااااااااااااااني ومتحييييييييييييييرة..

من اول ما انخطبت ام زوجي وخواته واخوانه يحبوووووووووووووووني ويمووووتوووون فيني والله يشهد..

ام زوجي كل من شاف معاملتها ليي حسدني عليها حبووووبه وقلبها أبيييييييييييض لدرجة مرة جيت ليها تصيح الا أقول ليها ليش تصيحين عمة؟؟

الا تقول ليي "أحبش واجد ما أقدر تبتعدين عني لو بس يوم واحد" :'(حتى اني حسدت روحي على هالعمة:woo:

لدرجة بناتها قاموا يسألوني..يقولون ليي ليش امي هالكثر تحبش وش مسوية ليها
تمت عمتي طول فترة الخطوبة تحبني وتخاف عليي من الهوا الطاير..وبس عرست!!!وتصير المفاجآت اللي ما كانت تجي على بال أحد


عمتي كرهتني بشكل مو طبيعي:!!: أسلم عليها ترد عليي رد بارد كلش..
أحب راسها في كل مرة لين ما جه يوم وقالت ليي اني ما احب أحد يحبني على راسي وفشلتني وجتني الصيحة:'(
امي نصحتني انه الهدية تقرب بين القلوب..رحت عطيت عمتي عطر غالي وكان من زمان خاطري فيه وعاطيني اياه هدية مباشرة عطيته لعمتي بس عشان ترجع محبتها ليي...لكن لا حياة لمن تنادي وهي كل يوم عن يوم تكرهني أكثر ودائما تنتقدني..لدرجة انه ما كانت تبي تاخذ الهدية..:study:

تخيلوا بنات حالتي!! بروحي كنت متأثره لأني بعيش بعيد عن امي وفوق هذا احصل مثل هالمعاملة..

وحمواتي (أخوات زوجي) موقفهم بارد..أحسهم راضيين بتصرفات امهم ويايي..أحس بغربة وبوحدة مو طبيعية...:(
تخيلوا اخوات زوجي اول ما دشيت بفستاني كلهم مكشرين في وجهي ومو طايقيني...حتى كلمة مبروك ما سمعتها..

والحين مو عارفه وش أسوي..حاولت أرضي عمتي بطرق كثيرة لكن ما في فايدة..قليل إذا رضت عليي ومعظم الأحيان كارهتني

وعرفت حزتها انه عمتي عندها قوانين واللي ما يمشي على قوانينها يطلع من قلبها وتصير عدوته..

يعني بعض الأحيان نروح اني ويه زووحي السوق نشتري بعض الأغراض للبيت..لازم تبي تعرف وش اشترينه وكل مرة نقول ليها وش اشترينه..ولازم نجيب شي ويانه ليها ولا بتزعل!!

والقانون الثاني لازم نقعد من النوم من وقت وأنزل تحت ليها وأقعد وياها طول اليوم ما عدا وقت العصر لأنها تبي تنام..

والقانون الثالث لازم نتغدى ونتعشى ونتريق تحت وياها..وما يصير ناكل ولا وجبة بروحنه ولا حزتها بتصير مشاكل..

تخيلوا انه اي حاجة تدش الشقة لازم تبي تعرف وش الشي اللي دش الشقة وتركب فوق لشقتي وهي ما تقدر بس عشان تعرف وش اشترينه:!!:

وبالنسبة لخوات زوجي موقفهم سلبي جدا ما يحبوني وما يكلموني لا بخير ولا بشر..
وحتى الحين واني حامل ما أحسهم مستانسين ولا فرحانين كلش:thumbs_down:

ما عندنه خصوصية اني ويه زوجي في حياتنه..كل شي عمتي تجي تسأل زوجي وفوق هذا تعاملني مو زين..

زوجي مسويينه خدام ليهم ما يعرفونه خواته الا لما عندهم حاجة...ما قط اتصلوا له الا يبون منه شي أو يوصلهم لمكان..كأنه ما عندهم رجال يوصلونهم!!

حياتي مأساااااااااااااااااااااااااااة مو قادره اتحمل الضغوطات النفسية..

يوم اللي أروح أزور أهلي عندي يوم عيد..على الأقل أحصل أحد يحبني أحد يسلم علي أحد يهتم فيني..عكس هناك ما عندي أحد

ودائما يفرقون في المعاملة بيني وبين زوجات إخوان زوجي...

دائما يتعمدون ينعتونهم قبالي بس عشان يطلعون فيني أللف عيب..

على الرغم اني والله يشهد عليي..أتصل فيهم وأسأل عنهم وأحاول أرضيهم كلهم..وأعطيهم أي شي يبونه حتى هدايا بدون سبب أعطيهم..

وهم حتى سلام ما يسلمون عليي...أبي تفسير لحالتي..

ساعدوني وش أسوي..