بعد طول انتظــــار .... عيشوا معاي قصتي

بسم الله الرحمن الرحيــــم
ماشاء الله تبارك الرحمن
:o احترت كيف اكتب قصتي لاني مالي بالكتابه بس قلت اعطي كل وحده مثل حالتي امل
بقولكم قصتي من اول يوم خطوبه الى يومنا هذا

انا متزوجه واحد من اهلي ومن اول يوم تعلقت فيه وتعلق فيني مع اني كان عندي عقده من الرجال ورافضه الزواج :D مرت ايام الخطوبه كلها مشاكل من خالتي الله يسامحه تعبت نفسيتي وصار عندي قولون عصبي وفوق كل هذا كنت بسكن بعيد عن اهلي في منطقة اهل زوجي
طبعا انا قبل الزواج الحمد لله دورتي منتظمه ومااشكي من شي
بعد الزواج ماجاتني ابد مر شهر شهرين وخمس شهور نفسيتي كانت دمار
وامي تقول يمكن حامل روحي سوي تحليل وانا اقولها اناا ماراح احمل الا بعدين وانا متاكده انه مافي حمل وهالتعب اللي فيني لانه نفسيتي تعبانه ....
بعد خمس شهور خلاص جسمي تنفخ وزاد وزني بشكل كبير وصرت مااقدر اتحرك من التعب رحت المستشفى طبعا مافي حمل قلت للدكتوره وش المشكله قالت لي الهرمونات عندك اكيد متلخبطه وسوي التحاليل علشان نشوف اي هرمون
مااهتميت وطلعت من عندها بعد كم شهر قالت لي امي لازم تراجعي المستشفى لانه الهرمونات تاخر الحمل .....
رحت المستشفى لانه ماتجيني الا بالحبوب ولا اهتميت بالفحوص ومرت سنه وجسمي كل ماله ويتلخبط اكثر ... الحمد لله نقلت المنطقه اللي ساكنين فيها اهلي وصارت نفسيتي احسن ....
بديت اتعالج واسوي تحاليل ... طلعت النتيجه انه هرمون الخصوبه تقريبا صفر او واحد والمفروض يكون 25 ...
اخذت منشطات كلوميد وابرة التفجير ... وانا ماكنت مهتمه بسالفة الحمل لاني مو مستقره :| وزوجي كان مو حاط في باله فكرة الحمل ...
وهذا اللي قهرني اكثر بصـــــــــــــــــــراحه 8o|
استمريت على الكلوميد وكان يجيب نتيجه حلوه بس مايصير حمل
طلبت الدكتوره تحاليل من زوجي ... اتأزمت نفسيته وضاقت به الدنيا :mad: وانا اقوله عادي عندك تكون المشكله مني بس انت لا ؟؟؟
وطلعت نتيجته سليمه الحمد لله ... بديت اوسوس انا خفت يتزوج علي مع انه مو من هالنوع ولسه بدري مالنا غير سنتين .. بس كنت دايم اختبره :D ان كيدهن لعظيم <<<
كملت سنتين من زواجي بس للاسف توفى اخوي ونفسيتي تعبت لاني انا اللي مربيته كنت اقول حتى لو الله ماعطاني عيال عطاني اخوان اشيلهم واحطهم بس بعد وفاة حسيت بااهمية الاطفال والحمل ..
زاد الضغط علي لاني الوحيده اللي متزوجه من اخواني والكل يقولي جيبي نونو علشان امك تلهى معاه وانا اقول الله كريم
ظليت متابعه مع الدكتوره وقالت لي خلاص الكلوميد مااحملتي عليه لازم نغير لعلاج الى الابر ... انا تضايقت لاني كنت اتعب من الكلوميد وياثر على نفسيتي ووزني طالع نازل كيف الابر وش بتسوي فيني
حولتني على الاستشاريه وقالت لي انه الكلوميد يجيب فايده معاك مايحتاج نعطيك شي اقوى بس لازم تسوي منظار للانابيب علشان نتاكد انها سليمه ...قلت لها توكلنا على الله
بديت تفتح معاي موضوع اطفال الانابيب وانه لو كان في مشكله عندك ماكو غير هالحل :|
انا مااهتميت وقلت اللي عند الله مو بعيد ... حددوا لي موعد ورحت بس الدكتوره اللي بتسوي العمليه في اجازه وطلعت ... ولا رجعت المستشفى كم شهر ...
رحت للممرخه هي من اهلنا بس كبرت وصار ماتمرخ احد والا كثير حملوا على يدها ماشاء الله ..
قالت لامي خليها تجي وانا بمرخها وان شاء الله خير
انا على فكره من اول زواجي احس بالم بخواصري وكل ماسالت الدكتوره تقول من التبويض من الوزن من مدري ايش المهم ماعطتني جواب
لما رحت للمرخه قالت لي العروق عندك متشابكه علشان كذا تحسي بالم بجنوبك .. كنت مقدر امشي اذا جاني الالم
ووغير كذا العروق مسكره الرحم وهذا سبب تاخر الحمل ... مرختني وماشاء الله حسيت بتغييير كبيررررررررررررر ...
ارتحت كثير ولا رجع لي الالم ماشاء الله ..
مر شهر وشهرين وثلاثه وسته وعشره وانا ماحملت مع انه كل اللي مرختهم ماشاء الله حملوا من ثاني شهر :thumbs_up:
انا قلت كل تاخيره وفيها خيره وانخطبت اختي :013::013:ومن الفرحه نسيت كل شي وانشغلت معاها وحتى امي انشغلت وكنت وقتها كله استفرغ واختي تقولي ياويلك لو حملتي ويجي عرسي وانتي والد وماتحضري بذبحك قلت لها انا مريضه بس ماني حامل
وكان عندي موعد بالمستشفى رحت وقلت للدكتور عطني موعد تنويم علشان اخر شي كانوا مقررين لي عمليه ...
كتب لي اوراقي والمفروض كانت تجيني يوم الجمعه وانا رحت للدكتور الثلاثاء مر الاسبوعين ولا جاتني قلت مو وقته لاني ابي اسوي العمليه ... انشغلت بملكة اختي وبعدها سافر اخوي يدرس برى ... وزوجي كانت عنده دوره عسكريه :cool: وانا مره مشغوله وافكر بالعمليه متى يجي وقتها رحت وسويت التحاليل قبل العمليه بثلاث ايام ورحت موعدي للتنويم
وانا طول الطريق اقول لزوجي اكيد بتتأجل مثل كل مره وانا مليت وماابي احمل وزوجي يحن على الحمل كان من شهرين مدري وش صاير له ...
وانا اقوله عنااااااااااااااااااااااااااااد مابحمل 8o| واكيد برجع البيت ماراح اظل بالمستشفى ... وصلنا ودخلت وجلسوا يخلصوا الاجراءات وزوجي معاي وانا اقول ودي بكيكه روووح جيب لي كيكه من السوبرماركت وحلاوه ... طللع وجات المممرضه تقولي يمكن ماتسوي العمليه لانه في تحليل ايجابي قلت لها اي تحليل قالت لي تحليل الحمل .. طالعت يمين يسار قلت شكلها مضيعه بيني وبين اللي جنبي ... ومااهتميت قالت الحين الدكتور بيجي
دخل الدكتور وهو نفسه بخشمه مررره اخلاقه شينه اعوذ بالله :mad:
وقال نفس كلام الممرضه وقلت له اي تحليل رد علي بدون نفس تحليل الحمل واحان راح نسوي لك تحليل لهرمون الحمل بس ماراح تطلع النتيجه الا بكره وانتظري الدكتوره تجي بالليل ..
:hysterical: انا صار وجهي الوان اضحك وابكي والدكتور ماله خلق يطالع بوجهي .. طلع ودقيت على زوجي قلت له وينك تعال بسرعه جاء وقالي وش صاير قلت له تحليل الحمل اللي سويته مليون مررره اول مره يطلع ايجابي وهذا يكفيني مو مهم اكون حامل :hysterical:
وانا اصيح واضحك وهو سجد شكر وبس يقول الحمد لله الحمد لله
وكان وقت زياره واللي جنبي عندها زوجه وانا كاتمه صوتي لانسوي فضيحه انا وزوجي واحنا نبكي .. قلت له انهم بيخلوني اليوم عندهم لانهم مو متوقعين يكون حمل وبكره بيدخلوني العمليه اذا كان التحليل سلبي ... قال ان شاء الله خير وراح البيت وجلست انا على نار انتظر الدكتوره وماجاتني الا 11 بالليل واتخيلوا شعوري من 3 الظهر الى 11
ولما جات حطمتني ونرفزتني ... كاناه تقولي لاتحطي امل ... مدري كيف تفكيرهم .. وانا ماطلبت راييها الحمد لله ثقتي برب العالمين ... حااولت انام علشان يجي يوم ثاني بسرعه كانت اطول ليله بعمري وجلست اتذكر وش سويت علشان احمل هالشهر لقيت انه ثلاث اشياء لها اكبر تاثير
اول شي سورة البقره قريتها ايام التبويض سبع ايام
الدعاء يوم عرفه له اثر كبييير
وطبعا الكل لاهي عني وامي ناسيه التفكير لانها كل شهر تنتظر اذا جاتني والا لا
وطلع الفجر ويحوسوني حوس علشان العمليه وانا اقولهم ماراح اسوي العمليه وهم مو عاطيني وجه وبهدلوني مع المغذي ...
ودوني الاشعه وسوالي اشعه لللبطن علشان العمليه قلت للممرضه بسوون لي سونار علشان اذا في حمل قالت لي اي في حمل بس تووووه قلت لها انا مالي لا اسبوعين متاخره علي .. قالت لي وليه حايسينك كانه بيدخلوك العمليه قلت ينتظروا التحاليل تطلع سلبيه :thumbs_down: قالت لي زين انهم مانزلوا لك الحمل قلت الحمد لله وطلعت الغرفه وانتظر الدكتوره تخدرت ونمت لاني مانمت الليله اللي قبلها الا الدكتوره جات وهي تبتسم وتقولي نتيجة التحليل طلعت وانتي حامـــــــــــــــــــــــل :013::013:
قلت الحمد لله
قالت لي بس الهرمون ضعيف وراح اعطيك مثبتات
قلت هم الحمد لله
وافتكيت من العمليه :013:
دقيت على زوجي تعال خذني وقلت له كل شي .. امي سمعت صوت زوجي وهو طالع وخافت
قلبها كان يعورها علي وتحاتيني مسكيييينه لما شافته طلع رجولها ماشالتها دقت علي قالت وش صاير قلت لها مافي شي قالت متى بيدخلوك العمليه قلتها الظهر قالت ليه زوجك طلع .. قلت باقي اوراق ماوقعها امس

سكرررت التلفون وجاء زوجي وخلصنا الاوراق واخذنا موعد وصلت البيت اول مادخلت وامي شافتني ماقدرت توقف كانت فاتحه عيونها ومتفاجئه مررره وخايفه قلت لها انا حامل وبكيييت وبكت امي لين قالت بس لانها كانت تبي تفرح لي ولاختي واختي الثانيه صغيره جالسه جنبنا وهي ماهي فاهمه وش نقول ..
وجاء زوجي ورجعنا نبكي سووينا حفله دقت امي على ابوي وقالت له ... ولما اجتمعوا خالاتي واهلي قالت لهم امي والكل فرررررررح والحمد لله على كل حال مرت الشهوووور على خير وان شاء الله يعدي هالشهرين بسرعه وتسهل علي ولادتي ...
ادعوا لي وان شاء الله ماانساكم وقت ولادتي انه الله يرزقكم ويرزق كل محرومه